22.4 C
Sri Lanka
26 October,2021

පොහොර නැති නිසා  ගහක් උඩට නැඟලා

Must read

 

සමගි ජන බලවේගයේ පාර්ලිමේන්තු මන්ත්‍රී

රෝහිණී කුමාරි කවිරත්න

 

රට ඇතුලේ ආර්ථිකය කඩා වැටීමක් සිදුවෙලා තියෙනවා. මාතලේ දිස්ත්‍රික්කයේ ජනතාව මේ දේවල්වලට මුහුණ දෙන්නේ කොහොමද?

මාතලේ දිස්ත්‍රික්කය කෘෂිකාර්මික ප්‍රදේශයක්. ඒ වගේම සංචාරක ව්‍යාපාරය සහ මැණික් කර්මාන්තය නිසා ආර්ථිකය ශක්තිමත් වුණු ප්‍රදේශයක්. මේ වෙනකොට  සංචාරක කර්මාන්ත කඩා වැටිලා. මැණික් ව්‍යාපාරයත්  කඩාගෙන වැටිලා. මේ වෙනකොට සංචාරකයන්ගේ පැමිණිමක් නැති නිසා මැණික් විකුණාගන්න බැරි තත්වයක් උදාවෙලා තියෙන්නේ. මේ සියලුම ව්‍යාපාර මාතලේ ජනතාවගේ ආර්ථිකයත් එකක් සෘජුවම බලපාලා තියෙනවා. ඒ නිසා ආර්ථිකය විශාල වශයෙන් කඩා වැටිලා. කෘෂිකර්මාන්තය පිළිබඳව කතා කළහොත් දේශගුණික හේතු නිසා, පොහොර නැති නිසාත් නියමිත වෙලාවට වගා කරගන්න බැරිව ගියා.

 

පොහොර ප්‍රශ්නය උග්‍ර විදියට තියෙනවා  නේද?

පොහොර ලංකාවට ගෙන්වන්න තිබුණේ 2020 අවුරුද්දේ මුල. ඒත් කොවිඞ් වසංගතය නිසා ඒ ක්‍රියාවලිය නතර වෙලා තිබුණා. ගිය සතියේ මාතලේ නගරයේ ගොවි මහත්තයෙක්  පොහොර නැති නිසා  ගහක් උඩට නැගලා විරෝධතාවක්  කළා. ලග්ගල ප්‍රදේශය කාබනික පොහොර භාවිතා කරමින් වගා කරන ප්‍රදේශයක් බවට පත් කරනවා කියලා හිටපු ජනාධිපතිතුමා මිනිස්සුන්ට පොරොන්දු වෙලා තිබුණා. එහෙම පොරොන්දුවක් දුන්නා නම්, අඩුම තරමේ මිනිස්සු ඒ ගැන දැනුවත් කරලා, කාබනික පොහොර ටිකවත් වෙලාවට ලබා දෙනවා නම්  මිනිස්සු රජයට කරදර  කරන්නේ නැතිව තමන්ගේ රැකියා කරගෙන ජීවත් වේවි. විරෝධතාව දක්වපු මනුස්සයා අපි පොහොර ලබා දෙන්නම් කියලා ගහෙන් බැස්සුවා. ඒත් ඒ කියපු දවසට පොහොර ටික ලබාදේවිදැයි අපිට සැකයක් තියෙනවා. ගොවි මහත්වරු මේ විදියට කලබල වෙන එක සාධාරණයි. මොරගහකන්ද ව්‍යාපාරය නිසා ලග්ගල, පල්ලේගම  ප්‍රාදේශීය ලේකම් කාර්යාලයේ කුඹුරුවල යල, මහ කන්න 10 ක් විතර කුඹුරු අස්වද්දලා නැහැ. අවුරුදු 5 ක් පුරාම ලග්ගල මිනිස්සු ජීවත්වෙන්නේ රජයෙන් ලබා දෙන වියලි සලාකයෙන්. මොරගහ, කළු ගඟ ජලාශේ හදන්න ලග්ගල මිනිසුන්ගේ ඉඩම් ටික පවරා ගත්තා නම් ඒ මිනිස්සුන්ට වෙනත් ස්ථානයකින් ඉඩම් ලබා දෙන්න රජයට යුතුකමක් තිබුණා.

 

පොහොර ලබා දෙන බව ජනාධිපතිවරයා පොරොන්දු වුණා නේද?

ඔව්, ගෝඨාභය රාජපක්ෂ ජනාධිපතිවරයා පොරොන්දු වුණා මිනිස්සුන්ට අනිවාර්යයෙන් මහා කන්නයට පොහොර ලබා දෙනවා කියලා.  තව ටික දවසකින් මහ කන්නය පටන් ගන්නවා. අපි බලාපොරොත්තු වෙනවා ජනාධිපතිවරයා කියපු විදියට කාබනික හෝ රසායනික පොහොර ටික ජනතාවට ලබා දෙයි කියලා. අනෙක් කාරණය වගා කරන්න ලබා දෙන්නේ දෙමුහුන් බීජ.ගොවි මහත්වරු කියනවා දෙමුහුන් බිජ හුරු වෙලා තියෙන්නේ රසායනික  පොහොරවලට කියලා. දේශිය බීජ  අපේ රටේ නැහැ. මැලේසියාවෙන් අපේ රටට ඇවිත් අපෙන් කෘෂීකර්මාන්තය ඉගෙනගත්තේ. ඒත් මැලේසියාවෙන් බීජටික එවනකම් අපිට බලාගෙන ඉන්න වෙන තත්වයක් අද උදාවෙලා  තියෙන්නේ.මාතලේ දිස්ත්‍රික්කයේ බහුතරයක් ඉන්නේ කෘෂිකර්මාන්තයෙන් ජීවත් වෙන මිනිස්සු.

 

ලග්ගල නවනගරයේ තත්වය කොහොමද?

ලග්ගල නව නගරය හදන්න ඉඩම් රජයට පවරා ගත්ත මිනිස්සු විශාල ප්‍රමාණයකට තවමත් ඉඩම් ලබා දීලා නැහැ. කොටසකට අක්කර භාගයක ගොඩ ඉඩම් ලබා දුන්නා.ඒ ඉඩම්වල අනුපවුල් කිහිපයක් පදිංචි වෙලා ඉන්නවා. ඒ මිනිස්සුන්ට යන්න තැනක් නැහැ.  අපි පසුගිය ආණ්ඩුව කාලේ මේ ප්‍රශ්නවලට විසඳුම් ඉදිරිපත් කළත්, මෛත්‍රීපාල සිරිසේන ජනාධිපතිවරයා මම කියන කිසිම දෙයකට ඇහුම්කන් දෙන්න සුදානම් වුණේ නැහැ. ඒත් එදා අපි මහවැලි අමාත්‍යංශයෙන් කරන්න කියද්දී කරන්න බැහැ කීව නිලධාරීන්, මේ වෙනකොට ගෝඨාභය රාජපක්ෂ  ජනාධිපතිවරයා කටින් දෙන නියෝගවලට පවා ක්‍රියා කරනවා. පසුගිය කාලයේ අපි යමක් කරන්න කීව අවස්ථාවල චක්‍රලේඛවලට පටහැනියි කියා වැඩ නොකර හිටපු නිලධාරීන්  අද චක්‍රලේඛ නැතිවම වැඩ කරනවා. අපිට තියෙන ප්‍රශ්නය ඇයි මේ නිලධාරීන් කල්මැරුවේ කියලා. කොහොම නමුත් ලග්ගල මිනිස්සුන්ගේ ප්‍රශ්ණ විසඳෙනවා නම් හොඳයි. අනෙක් එක ලග්ගල රෝහල. ලග්ගල රෝහල  විශාල ගොඩනැගිල්ලක්  වුණාට ඉන්නේ එක වෛද්‍යවරයෙක්. වකුගඩු රෝගීන් මාතලේ සහ දඹුල්ල නගරවලට එන්න ඕනෑ. අපිට ශික්ෂණ රෝහල් නැහැ. එහෙම නැත්නම් අපි බදුල්ලට, මයියංගණේට, හෝ නුවරට යන්න ඕනෑ. අපි ඉල්ලීම් කළා  මේ රෝහල මධ්‍යම ආණ්ඩුවෙන් පාලනය වන රෝහලක් විදියට හදලා දෙන්න කියලා. පසුගිය ආණ්ඩුව කාලේ ඒ සියල්ලටම විධිවිධාන සකස්කරලා, ඒ සඳහා කැබිනට් මණ්ඩලයේ අනුමැතිය ගන්න පමණයි ඉතිරි වෙලා තිබුණේ. ඒත් ආණ්ඩු මාරුවත් එක්ක ඒ සියලු දේවල් යටපත් වෙලා ගියා.

 

ආංශික කාරක සභාවලට සාමාජිකයන් පත්නොකර කල් දමමින් සිටිනවා නේද? ඔබ එහි සිටි කෙනෙක් විදියට ඒ ගැන දකින්නේ කොහොමද?

පසුගිය ආණ්ඩුව කාලයේ  ආංශික අධීක්ෂණ කාරක සභා 16 න් විශාල  වැඩ කොටසක් කළා. මම අධ්‍යාපනය, උසස් අධ්‍යාපනය සහ මානව සම්පත් කළමණාකරණ ආංශික අධික්ෂණ අනු  කමිටුවේ සභාපති විදියට වැඩ කළා. ඒ කාරක සභාවලින් විවිධ ප්‍රශ්න අපිට විසඳගන්න පුළුවන් වුණා. යම් කිසි ප්‍රශ්නයක් අපිට ආව අවස්ථාවල අගතියට පත් වුණ පාර්ශවයත් අපි ගෙන්නුවා, අමාත්‍යංශවල නිලධාරීන් ගෙන්නුවා. ඉන්පස්සේ අපි එකතු වෙලා ඒ ප්‍රශ්නය විසඳුවා. අපි ආංශික කාරක සභා හරහා විවෘතව වැඩ කළා. රටේ විශාල ප්‍රශ්නයක් වෙලා තියෙන පළමුවෙනි ශ්‍රේණියට ළමයි ඇතුළත් කිරිම පිළිබඳව චක්‍රලේඛයක් අපි සකස් කළා. අපි ලංකාවේ විවිධ ස්ථානවලින් දෙමාපියන් ගෙන්නුවා, විවිධ පාසල්වලින් ගුරුවරු, විදුහල්පතිවරු  සහ ගුරු සංගම් 16 ක් ගෙන්වලා, එතෙක් තිබුණු 1 වන ශ්‍රේණියට ළමුන් ඇතුලත් කර ගැනීමේ චක්‍රලේඛයේ තිබුණු කරුණු 17 ක් වෙනස් කළා.  අධ්‍යාපන ක්ෂේත්‍රයේ තිබුණු විශාල ප්‍රශ්නයක් තමයි ගුරු මාරු ප්‍රශ්නය. විවිධ කාරණා නිසා සහ විවිධ පළිගැනීම් නිසා ගුරුවරුන්ට පළිගැනීම් විදියට ගුරුවරුන් මාරු කිරීමේ ජාතික වැඩ පිළිවෙලක් අපි හැදුවා. ඒක පාර්ලිමේන්තුවට ඉදිරිපත් කළා. එවකට හිටපු අධ්‍යාපන අමාත්‍ය අකිල විරාජ් මහත්මයා ඒ ජාතික ප්‍රතිපත්තිය භාර ගත්තා. ඒත් ඉන්පස්සේ ආණ්ඩුව මාරු වුණා. අධ්‍යාපන අමාත්‍යංශයේ නිලධාරීන්ට වගකීමක් තියෙනවා මේ ප්‍රතිපත්තිය ක්‍රියාවට නන්වන්න. ඒත් අපේ මහන්සිය වතුරේ ගිහින්.■

 

- Advertisement -

පුවත්

LEAVE A REPLY

Please enter your comment!
Please enter your name here

- Advertisement -

අලුත් ලිපි