හෙද සංගමය
කොවිඞ්-19 වසංගතය හමුවේ ලංකාවේ පනවා ඇති ලොක්ඩවුන් තත්වය ඉවත් කිරීමේදී ලෝක සෞඛ්‍ය සංවිධානය අපේ‍්‍රල් 13 වැනිදා නිකුත් කරන ලද නිර්දේශ අනුගමනය කරන ලෙස රජයේ හෙද නිලධාරීන්ගේ සංගමය නිවේදනයක් නිකුත් කරමින් ඉල්ලා සිටී.
අපේ‍්‍රල් 14 වැනිදා ජනාධිපතිවරයා ආමන්ත‍්‍රණය කරමින් නිකුත් කරන ලද ජනමාධ්‍ය නිවේදනයක් මගින් එම ඉල්ලීම කර ඇත.
කොවිඞ්-19 වසංගතය පාලනය වූ බව සලකා අපට රට තුළ කරන සීමා පැනවීම හෙවත් ලොක්ඩවුන් තත්වය ලිහිල් කිරිමට රජය තීරණය කර ඇති බව ප‍්‍රකාශවලින් පෙනී යන්නේයැයි එම නිවේදනයෙහි සඳහන් කර ඇති නමුත්, එය කළ යුත්තේ විශේෂඥ උපදෙස් මත බවත් දේශපාලන, සමාජීය හෝ සංස්කෘතික කරුණු මත සලකමින් එය නොකළ යුතු බවත් එම නිවේදනයෙන් පෙන්වා ඇත.
ලෝක සෞඛ්‍ය සංවිධානයේ නිර්දේශ එම නිවේදනයෙහි මෙසේ දක්වා ඇත.
‘කොවිඞ්-19 වසංගත තත්වයට තම රට තුළ ගත් ක‍්‍රියාමාර්ග හමුවේ පාලනය වී ඇත්ද යන්න එම රටවල් ස්ථීර කරගත යුතුයි.
සිය රට තුළ වෛරසයේ ව්‍යාප්තිය අවම වී ඇත්ද යන්න ස්ථීර කරගත යුතුයි.
පාසල්/රාජකාරී ස්ථාන හා වෙනත් අත්‍යවශ්‍ය ස්ථානයන්හි වෛරසය පැතිරීම වැළැක්වීම සඳහා වැළැක්වීමේ පියවර අනුගමනය කිරීමට සැලැස්මක් තිබිය යුතුයි.
තම රට තුළ සිදුවන ආනයනවලට අදාලව සිදුවිය හැකි අවදානම් තත්වයන් කළමනාකරණය කරගත යුතුයි.
කොවිඞ්-19 මර්දනයට අදාලව හඳුන්වාදුන් එදිනෙදා ජීවිතයේ නව ආදර්ශවත් පුරුදු පවත්වාගැනීම පිළිබඳ ප‍්‍රජාව පූර්ණ ලෙස දැනුවත් කිරීම හා බලගැන්වීම සිදුකළ යුතුයි.’
