රෝග ලක්ෂණ පෙන්වලා නැහැ
ඉන්දුනීසියාවේ සිට පැමිණ ලංකාවේ නිරෝධායන කඳවුරක නිරෝධායනයට ලක්වූ පුද්ගලයෙකුට නිරෝධායනයෙන් දින 06කට පසුව කොවිඞ්-19 ආසාදනය වී ඇතැයි තහවුරු වූ බවත් එම පුද්ගලයා රෝග ලක්ෂණ පෙන්වා නැති බවත් බේරුවල ප‍්‍රධාන වෛද්‍ය නිලධාරී වරුණ සෙනෙවිරත්න පැවසීය.
උණ, කැස්ස, උගුරේ සංකූලතා ආදි කොවිඞ්-19 ආසාදිතයන්ට අදාළ රෝග ලක්ෂණ නොපෙන්වූ නමුත් ඉන්දුනීසියාවේ සිට පැමිණි බේරුවල ප‍්‍රදේශයේ පදිංචිව සිටි තුන්දෙනෙකු පරීක්ෂණ සඳහා යොමුකළ බවත් ඒ තිදෙනා අතරින් එක් අයෙකුට රෝගය ඇතැයි තහවුරු වූ බවත් ඔහු පැවසීය.
එම පුද්ගලයා 30 හැවිරිදි පුද්ගලයෙකු බව වාර්තා වේ.
නිරෝධායන කඳවුරුවල සිට පිටවන පුද්ගලයන්ට රෝගය තිබේදැයි වෛද්‍ය පරීක්ෂණයකට ලක් නොකළ බවත්, උණ හා කැස්ස තිබේදැයි පරීක්ෂා කළ බවත් මීට පෙර අනිද්දා කළ විමසීමකදී හමුදා මාධ්‍ය ප‍්‍රකාශක බි‍්‍රගේඩියර් චන්දන වික‍්‍රමසිංහ පැවසීය. කෙසේ වෙතත් කොවිඞ්-19 රෝගීන් අතරින් සැලකිය යුතු ප‍්‍රතිශතයකට කිසිදු රෝග ලක්ෂණයක් නොපෙන්වන බව පරීක්ෂණවලින් තහවුරු වී වෛද්‍යවරුන් සහ කොවිඞ්-19 පිළිබඳ පර්යේෂකයන් අතර පොදු පිළිගැනීමක් බවට පත්ව ඇති කරුණකි.
