නිරෝධායන කඳවුරුවල සිටි පුද්ගලයන් නිවෙස්වලට යැවීමේදී කොවිඞ්-19 රෝගය තිබේදැයි සොයාබැලීම සඳහා රසායනාගාර මට්ටමේ වෛද්‍ය පරීක්ෂණයකට ලක් නොකරන බව අනිද්දා කළ විමසීමකදී හමුදා මාධ්‍ය ප‍්‍රකාශක බි‍්‍රගේඩියර් චන්දන වික්‍රමසිංහ කීය.
දින 14ක කාලයක් පුද්ගලයෙකු නිරෝධායන කඳවුරේ තබාගන්නා බවත් එම සම්පූර්ණ කාලසීමාවේදී කඳවුරුවල සිටින පුද්ගලයන්ට උණ, කැස්ස ඇතුළු රෝග ලක්ෂණ තිබේදැයි දිනපතා පරීක්ෂා කරන බවත් ඔහු කීය. අවසානයේ නිරෝධායන කඳවුරුවලින් පිටවෙන අවස්ථාවේදීද උණ හා කැස්ස තිබේදැයි පරීක්ෂා කරන බව ඔහු කීය.
කන්දකාඩු නිරෝධායන මධ්‍යස්ථානයේ නිරෝධායනය අවසන් කර මාර්තු 24 වැනිදා පිටවූ අකුරැුස්ස ප‍්‍රදේශයේ පුද්ගලයෙකුට කොවිඞ්-19 ආසාදනය වී ඇතැයි අපේ‍්‍රල් 05 වැනිදා අනාවරණය විය. එම පුද්ගලයා කොරියාවේ සිට ලංකාවට පැමිණි අයෙකි. එම සිදුවීමෙන් පසුව යුද හමුදාපති ලූතිනන් ජෙනරාල් ශවේන්ද්‍ර සිල්වා නිරෝධායන මධ්‍යස්ථානවල සිට පැමිණි අයට තවදුරටත් ස්වයං නිරෝධායනයට ලක් වන ලෙස නියෝග කර තිබුණි. එම තත්වය පිළිබඳව විමසූ අවස්ථාවේ හමුදා මාධ්‍ය ප‍්‍රකාශකවරයා ඉහත අදහස් දැක්වීය.
ඔහු වැඩිදුරටත් ප‍්‍රකාශ කළේ, එම රෝග ලක්ෂණ නොපෙන්වන අයට රෝගය තිබීමට ඇත්තේ අඩු ඉඩකඩක් වන නිසා එසේ කරන බවයි. ප‍්‍රායෝගිකව දින 14කට වඩා වැඩි කාලයක් නොමිලයේ ආහාරපාන ලබාදෙමින් නිරෝධායන කඳවුරක තබාගැනීම අසීරු බවද ඔහු පෙන්වාදුන්නේය.
කෙසේ වෙතත් නිරෝධායන කඳවුරුවලින් පිටවෙන පුද්ගලයෙකුට ප‍්‍රවේශම්සහගත ලෙස කටයුතු කරන ලෙස උපදෙස් ලබාදී තිබෙන බවත් ඔහු කීය. නිරෝධායන කඳවුරුවලින් පිටවූ සියලූ පුද්ගලයන් හා පවුල්වල උදවිය වගකීම් සහගතව, ප‍්‍රවේශමෙන් කටයුතු කරන ලෙසද ඉල්ලා සිටියේය.
මේ අතර කොවිඞ්-19 රෝගීන් අතරින් කොපමණ ප‍්‍රතිශතයක් රෝග ලක්ෂණ පෙන්වනවාද නැද්ද යන්න පිළිබඳව මේ වන විට ගෝලීය මට්ටමෙන් අධ්‍යයන කරමින් පවතින අතර, විශාල පිරිසකට රෝග ලක්ෂණ නොමැතිව රෝගය පැවතීමේ අවදානමක් ඇතැයි කරුණු හෙළිවී තිබේ.
අයිස්ලන්තයේදී කර තිබුණු අධ්‍යයනයකට අනුව වාර්තා වූ රෝගීන් අතරින් සීයට 50ක් රෝග ලක්ෂණ පෙන්වා නැත. ඒ පිළිබඳව අයිස්ලන්ත රජයේ නිල වෙබ් අඩවියෙහි වාර්තාවක සඳහන්ය.
රෝගීන් අතරින් විශාල පිරිසක් රෝග ලක්ෂණ නොපෙන්වා සිටිය හැකි බව ඇමෙරිකාවේ ජෝන් හොප්කින්ස් විශ්වවිද්‍යාලයේ මහාචාර්ය ඬේවිඞ් බුචොල්ස්ද පෙන්වාදී තිබේ. ජෝන් හොප්කින්ස් විශ්වවිද්‍යාලය මේ මොහොතේ කොවිඞ්-19 පිළිබඳව පරීක්ෂණ කරන ලොව ප‍්‍රධානම ආයතනයකි.
ඇමෙරිකා එක්සත් ජනපදයේ රෝග පාලනය හ නිවාරණය සඳහා වූ මධ්‍යස්ථානයේ අධ්‍යක්ෂ, වෛරසවේදී රොබට් රෙඞ්ෆීල්ඞ් සෞඛ්‍ය වාර්තාකරුවකු වන සෑම් වයිට්හෙඞ් සමඟ සාකච්ඡුාවකදී පෙන්වාදී ඇත්තේ රෝගීන් අතරින් සීයට 25ක් රෝග ලක්ෂණ නොපෙන්වා සිටීමේ ඉඩක් ඇති බවය.
