කාන්තා ලෝක කුසලානය අවසාන වුණා. අපේ රටවල බොහෝ දෙනෙක් තරගාවලියට පැතූ අවසානයක් තිබුණා. ඒ අපේ කලාපයේ ඉන්දීය කණ්ඩායම ජයගැනීම. ඔවුන් ජයගතහොත් කලාපයේ පුංචි දැරියන්ගේ සිහින ලෝකය වෙනස් කරන සිදුවීමක් විය හැකිව තිබුණා. කාන්තා ක‍්‍රීඩාවට අඩු වටිනාකමක් දෙන අපේ කලාපයට ඉන්දියානු කෙල්ලන් ලෝක කුසලානය ජය ගත්තා නම් එය තීරණාත්මක අවස්ථාවක් විය හැකියි.
එහෙත් අපේ කලාපයට තවත් ලෝක කුසලානයක් දක්වා බලාගෙන ඉන්නට සිදුවේවි. ඕස්ටේ‍්‍රලියානු කෙල්ලන් අවසන් මහා තරගයෙන් දැවැන්ත ජයග‍්‍රහණයක් ලැබුවා. ඒ අනුව පස්වැනි වතාවටත් විස්සයි විස්ස ලෝක කුසලානයක ජයග‍්‍රාහිකාවන් වන්නට ඕස්ටේ‍්‍රලියානු කාන්තා ක‍්‍රිකට් පිළ සමත් වුණා. එය අප පැතූ සුන්දරම අවසානයක්. එපමණක් නොවෙයි, එය ලෝක කාන්තා ක‍්‍රීඩා ඉතිහාසයේ දැවැන්තම තරගයක්.
සියලූ ක‍්‍රීඩිකාවන්ගේ තාරකා ගුණය, පීඩනය මැද ක‍්‍රීඩා කළ අපූරුව දැවැන්ත පේ‍්‍රක්ෂාගාරයක් ඉදිරිපිට දකින්න ලැබුණා. ජාත්‍යන්තර කාන්තා දිනය යෙදුණු මාර්තු 08 වැනිදා කාන්තා ක‍්‍රිකට් ක‍්‍රීඩාවේ සුවිශේෂම මොහොතක් උදා වුණා.
සුන්දර අවසානය
නවකතාවකදී හෝ චිත‍්‍රපටියකදී නම් කතාවේ අවසානය කතාව ලියන පුද්ගලයාට තෝරාගත හැකියි. එහෙත් ක‍්‍රීඩාවේදී එසේ කළ නොහැකියි. සැලසුම් කර සුන්දරම අවසානය ලියන්නට බැහැ. තරගාවලියක හෝ තරගයක කතාව කලින් ලියා තබන්න බැහැ. ඕනෑම තරගාවලියකට පෙර අප හිතින් පතන කතාවක් තිබෙනවා.
අපේ රට තරගාවලියට යනවා නම් අපේ රට ජයගනු දැකීම මුලින් අප දකින සිහිනය. තමන්ගේ රට තරගාවලියේ ඉදිරියට යන්නේ නැති අවස්ථාවක හෝ තමන්ගේ රට සහභාගී නොවන තරඟාවලියකදී අප පතන්නේ සුන්දරම කතාවක් ලියැවෙන අවසානයක්. ‘අන්ඩර්ඩෝග්’ ජයග‍්‍රහණයක් හෙවත් අඩු අවස්ථාවක් ඇති කණ්ඩායමක් ඉහළටම පැමිණ තරඟාවලිය ජයගැනීම ගැන සිහින දකිනවා.
නැතිනම් ඉහළම දක්ෂතා ඇති කණ්ඩායමේ දක්ෂතාවයන්ට උරුම ජයග‍්‍රහණය ලැබීම ප‍්‍රාර්ථනා කරනවා. තවත් විටෙක හොඳම ක‍්‍රීඩකයාගේ හෝ ක‍්‍රීඩිකාවගේ කණ්ඩායම ජයගැනීම සිහිනය විය හැකියි. නැතිනම් හොඳම නායකයාගේ කණ්ඩායම ජයගනු දැකීම අපේ සිහිනය විය හැකියි. තරගාවලියෙන් අප ප‍්‍රාර්ථනා කරන කතාව ඒක. එහෙත් ඇතැම් විට තරගාවලිය අවසානයේදී අපේ සිහින ප‍්‍රතිඵලය නොලැබිය හැකියි.
එහෙත් එක දෙයක් විශ්වාසයෙන් කියන්න පුළුවන්. තරගාවලියක් අවසානයේ අප කැමති වුණත්, අකමැති වුණත් සුන්දර කතාවක් දකින්නට ලැබෙන බව.
2018 පාපන්දු ලෝක කුසලානයෙන් ක්‍රොඒෂියාව ජයගනු දැකීම අප සැම පැතූ සුන්දර අවසානය. පහළ සිට ඉහළට ආ කණ්ඩායමක් නොසිතූ ජයක් ලැබීම කෙතරම් සුන්දර කතාවක්ද? අප පැතූ ඒ අවසානය නොලැබුණත් ප‍්‍රංශය තරගාවලිය ජයගැනීම තරගාවලියට සුන්දරම අවසානයක් වුණා. සංක‍්‍රමණික කොල්ලන් පිරිසක්, තමන්ගේ වටිනාකම බටහිර ලෝකයටම පෙන්වූ අවස්ථාවක් එයින් උදා වුණා.
ඕස්ටේ‍්‍රලියානු කාන්තා ක‍්‍රිකට් තවමත් ඉහළම මට්ටමේ ක‍්‍රිකට් ක‍්‍රීඩිකාවන් නිෂ්පාදනය කරනවා. ඔවුන් ඕනෑම තත්වයක් යටතේ ක‍්‍රීඩා කළ හැකි විශිෂ්ටයන්. පීඩනයට ඔරොත්තු දිය හැකි ක‍්‍රීඩිකාවන්. එරට ක‍්‍රීඩිකාවන් සඳහා ක‍්‍රීඩකයන්ට සමාන මිලක් ගෙවනවා. ක‍්‍රීඩිකාවන් තරු ලෙස සමාජයේ ඉහළ පිළිගැනීමකට ලක් වෙනවා. ඕස්ටේ‍්‍රලියාව ක‍්‍රීඩිකාවන්ට සැලකූ තරම නිසා ඔවුන්ට ජයග‍්‍රහණය ලැබීම පුදුමයක් නොවෙයි. ඇත්තෙන්ම අවසන් තරගයටත් වඩා ඊට පෙර දකුණු අප‍්‍රිකාවට එරෙහිව පැවති අවසන් පූර්ව තරගයේදී ඔවුන් ලැබූ ජයග‍්‍රහණය විශේෂයි. දකුණු අප‍්‍රිකානු තරගයේදී මුලින් පන්දුවට පහරදුන් ඕස්ටේ‍්‍රලියානු ක‍්‍රීඩිකාවන් පන්දුවාර විස්සකදී ලකුණු 134ක් ලැබුවා. එහෙත් වර්ෂාව ඇදහැලූණු නිසා පන්දුවාර 13කට තරගය සීමා කෙරුණා. ඒ අනුව ලකුණු 98ක ඉලක්කයක් ලැබුණා. දකුණු අප‍්‍රිකානු ක‍්‍රීඩකයන්ට තිබුණේ පන්දුවාර 13කට ඉනිම සැලසුම් කොට තරගය ජයගැනීම. වැඩි අවස්ථාව තිබුණේ ඔවුන්ට.
එහෙත් අතිවිශිෂ්ට පන්දු රැුකීම්, අතිශය විනයවත් පන්දු යැවීම් මතින් දකුණු අප‍්‍රිකානු ක‍්‍රීඩිකාවන් ලකුුණු 92කට සීමා කරන්නට ඕස්ටේ‍්‍රලියානු පන්දු යවන්නියන් සමත් වුණා. එම තරගය ඕස්ටේ‍්‍රලියානු ක‍්‍රීඩිකාවන්ගේ විශිෂ්ටත්වය මනාව පෙන්වුවා.
එංගලන්තයේ අවාසනාව
මෙවර තරගාවලියේදී එංගලන්තය අවාසනාවන්ත තත්වයකට මුහුණදුන්නා. ඒ අවසන් පූර්ව තරගයට සහභාගි නොවී, තරගාවලියෙන් ඉවත්වීමට සිදුවීම. එංගලන්තය හා ඉන්දියාව අතර යෙදී තිබුණු අවසන් පූර්ව තරගය සම්පූර්ණයෙන්ම වර්ෂාවට හසු වුණා. එහෙත් ඒ තරගය පැවැත්වීමට විකල්ප දිනයක් යොදා තිබුණේ නැහැ. ඒ නිසා මුල් වටයේදී වැඩි ජයග‍්‍රහණ ප‍්‍රමාණයක් ලබාගත් කණ්ඩායම ලෙස ඉන්දියාවට අවසන් මහා තරගයට යන්නට අවස්ථාව ලැබුණා.
වාර්තාව
විස්සයි විස්ස කාන්තා ලෝක කුසලානයේදී වාර්තාවක් තබන්නට ඕස්ටේ‍්‍රලියාව උත්සාහ කළා. ඒ ලෝක ඉතිහාසයේ වැඩිම පේ‍්‍රක්ෂකයන් පිරිසක් සහභාගි වූ කාන්තා ක‍්‍රීඩා තරගයට අදාළ වාර්තාව. ඒ වාර්තාව තිබුණේ 1999 කාන්තා ෆිෆා ලෝක කුසලාන තරගාවලියේ අවසන් තරගයට. එයට 90,815 දෙනෙකු සහභාගි වී තිබුණා. ඊට වඩා වැඩි පේ‍්‍රක්ෂකයන් ප‍්‍රමාණයක් රැුස් කරන්නට ප‍්‍රචාරක ව්‍යාපාරයක් ගෙනගියත් වාර්තාව තබන්නට හැකිවුණේ නැහැ. තරගය නරඹන්නට ආවේ 86,174 ක දැවැන්ත පේ‍්‍රක්ෂක පිරිසක් පැමිණියත්, වාර්තාව තබන්නට එය ප‍්‍රමාණවත් නැහැ. එහෙත් කිසිසේත්ම ලැජ්ජා විය යුතු නැහැ. මේ තරගකාරී කෙල්ලන් අතුරු සිදුරු නැතිව ක‍්‍රීඩාංගණය පුරවන්නට සමත් වුණා. එය පසුගිය වසරේ පැවති ක‍්‍රිකට් පිරිමි ලෝක කුසලානයේ අවසන් තරගයට පැමිණි පිරිසට වඩා වැඩි පිරිසක්. ඒ නිසා ක‍්‍රීඩිකාවන් කිසිසේත්ම ලැජ්ජා විය යුතු නැහැ.
ලකුණු සටහන්
තරගයේ ලකුණු සටහන අනුව ඕස්ටේ‍්‍රලියාව ලකුණු 87ක දැවැන්ත ජයග‍්‍රහණයක් ඉන්දියාවට එරෙහිව ලැබුවා. ආරම්භක පිතිකාරිනියන් වූ බෙත් මූනි හා ඇලිසා හීලි අතිප‍්‍රබල ආරම්භයක් ලබාදුන්නා. හීලි ඉතා කෙටි පන්දුවාර ගණනාවකදී වේගවත් ප‍්‍රහාරයක් එල්ල කළේ කලාතුරකින් දකින්නට ලැබෙන අන්දමේ ප‍්‍රමිතියකින් යුත් ප‍්‍රහාරයක් සමග.
අවසාන තරගයක පීඩනය ඉන්දියානු කෙල්ලන්ට දරාගත නොහැකි බව උඩපන්දු අත්හැරීමෙන්ම පෙනුණා. විශේෂයෙන්ම ඉන්දීය පිළේ තාරකාව වූ සෆාලි වර්මා මුල් අදියරේදී පන්දු රැකීමේදී දුර්වල වුණේ ඇය දැඩි පීඩනයකින් සිටින බව පෙන්වමින්. දැවැන්ත පිති ප‍්‍රහාරය නිසා ඕස්ටේ‍්‍රලියානු පිළ ලකුණු 184ක් ලැබුවා.
ප‍්‍රතිප‍්‍රහාරයට පැමිණි ඉන්දීය පිළේ ආරම්භක පන්දුවාරයේදීම සෆාලි වර්මා දැවී ගියා. අවුරුදු 16ක මේ තරුණ ක‍්‍රීඩිකාව තරගාවලිය පුරාවට පිත්තෙන් පෙන්වූවේ ලෝකයම කිසිදා නොදුටු අන්දමේ පිතිකරණයක්. කාන්තා තෙන්දුල්කාර් කෙනෙකු ඉන්දියාවට හමුවී ඇති බව සංවාදයට ලක්වුණා. ඒ කතා කිසිවක් ව්‍යාජයක් නොවෙයි. එහෙත් මේ යොවුන් ක‍්‍රීඩිකාව මෙවර අවසන් තරගයේදී දැවැන්ත පීඩනයකින් සිටි බව ඈ දැවී ගිය ආකාරය මෙන්ම ඉන්පසුව දැවී යෑමට ප‍්‍රතිචාර දැක්වූ ආකාරයෙන්ද පැහැදිලි වුණා.
එතැන් පටන් ඉන්දීය පිළට සිටි විශිෂ්ට පිතිකාරියන් දුර්වල ලෙස දැවී යෑමට ලක් වුණා. ස්මි‍්‍රති මන්දනා මඳක් සටන් කරන බව පෙනුණා. වේදා ක‍්‍රිෂ්ණමූර්ති හා දීප්ති ශර්මා යම් ලකුණු ප‍්‍රමාණයක් රැුස් කළා. එහෙත් 184ක දැවැන්ත ඉලක්කය හඹා යන්නට ඔවුන්ට කිසිසේත්ම හැකිවුණේ නැහැ. මේ මහා පේ‍්‍රක්ෂකාගාරයේ ප‍්‍රීතිඝෝෂා මැද ඔවුනට ලැබිය හැකි වුණේ ලකුණු 99ක් පමණයි. ඉන්දියානු ක‍්‍රීඩිකාවන් අසමත් වුණා. එහෙත් මේ කණ්ඩායමේ සිටි අතිශය තරුණ ක‍්‍රීඩිකාවන් බොහෝ දෙනෙකුට මෙය වැදගත් අත්දැකීමක් වේවි. අනාගත ලෝක කුසලානයක් ජයගන්නට ඇතැම් විට සෆාලි ප‍්‍රමුඛ ක‍්‍රීඩිකාවන්ට හැකිවේවි.
මේ වන තෙක්ම කාන්තා ක‍්‍රිකට්වල සිහසුනේ ඉන්නේ ඕස්ටේ‍්‍රලියාව. පස්වැනි වතාවටත් ඔවුන් ලෝක කුසලානය ජයගැනීම මඳක් කම්මැලි සහගත බව කෙනෙකුට කිව හැකියි. එහෙත් යම් ක‍්‍රීඩාවක රාජකීයත්වයට ක‍්‍රීඩා කණ්ඩායමක් පත් වුවහොත් ඒ රාජකීයත්වය ඔවුනට ලැබී ඇත්තේ ඉබේම නොවන බව සිහි තබාගත යුතුයි. ඒ පසුපස ඇත්තේ අතිවිශිෂ්ට ක‍්‍රීඩා විලාසය.
උදාහරණයක් ලෙස නවසීලන්ත පිරිමි රග්බි කණ්ඩායම රග්බි ලොව රාජකීයත්වයට පත්වුණේ ඉබේම නොවෙයි. එවැනි රාජකීය කණ්ඩායමක් සිටියදී ඔවුන් පරාජය කිරීම ලොව අනෙකුත් හැම කණ්ඩායමකම ඉලක්කය බවට පත්වෙනවා. එසේ වීමෙන් ක‍්‍රීඩාවේ ප‍්‍රමිතිය ඉහළ යනවා. අවසාන තරගයේදී ඉන්දියාව පෙන්වූවේ අවසන් මහා තරගයක පීඩනය මැද රාජකීයයන් පරදවන්නට ඔවුන් තවම සුදුසුකම් ලබා නැති බව.
මෙය කාන්තා ක‍්‍රීඩා ඉතිහාසයේ සුවිශේෂ අවස්ථාවක් බව හැම අතින්ම පෙනුණා. ලෝකයේම අවධානය යොමු වුණා. මීළඟ කාන්තා තරගාවලිය සංවිධානය කරන අයට මෙන්ම, කාන්තා ක‍්‍රිකට් කණ්ඩායම් ඇති අප වැනි රටවලටද කාන්තා ක‍්‍රීඩාව ගැන වැඩිපුර කල්පනා කරන්නට මෙම ලෝක කුසලානය අවස්ථාවක් වූ බව පැහැදිලියි.
- අනුරංග ජයසිංහ
