මාධ්ය බලය තමන් අත තිබේනම් ඕනෑම සිදුවීමක් වචන ඒ මේ අත පෙරළමින් තමන්ට වාසිදායක ලෙස සකසාගැනීමේ හැකියාවක් ඇත. පසුගිය සතියේ උපාධිධාරීන්ට ලබාදුන් පත්වීම් ගැන ආණ්ඩුව කරමින් ඉන්නේද එලෙස වචන ඒ මේ අත පෙරළීමකි. ජනාධිපතිවරයාගේම වචන වලින් මැතිවරණ කොමිෂන් සභාව ගත් තීන්දුව විස්තර කර තිබුණේ මෙසේය.
‘පත්වීම් දීලා ඉවරයිනේ. ඡුන්දයක් බලාගෙන දුන්න එකක් නෙවෙයි. සුදුසුකම් තිබුනු සියළුම දෙනාට දුන්නා. රජයක් දුවන්න එපැයි. රජයක් දෙන්න එපැයි. මට කිසිම තේරුමක් නැහැ, කොමසාරිස්තුමා කියන එකේ. බන්දගන්න එපා කිව්වානම් වෙනම දෙයක්. බන්දගත්තාට පස්සේ පුහුණුවක් දෙන එක මට කිසිම පදනමක් තේරෙන්නේ නැහැ. එතැන කිසිම තේරුමක් නැහැ. ඒක අපි නැවතත් කොමසාරිස්තුමාට ලියනවා. පුහුණුකිරීම් නතර කළොත් රාජ්ය සේවයේම පුහුණුවීම් නතර වෙනවා. පුහුණුවක් කියන්නේ සාමාන්ය පුහුණුවක්. එයා කරන රාජකාරිය වෙනුවෙන් එයාව තේරුම් කරලා දීමට. මං හිතන්නේ නැහැ ඒකේ කිසිම දේශපාලන බලපෑමක් තියෙනවාය කියලා.’
ජනාධිපතිවරයාගේ ඉහත ප්රකාශයෙහි මැතිවරණ කොමසාරිස්තුමා යැයි වරින් වර සඳහන් කරන්නේ ස්වාධීන මැතිවරණ කොමිෂන් සභාවේ සභාපතිවරයා ගැන විය යුතුය. මැතිවරණ කොමිෂන් සභාව ගෙන තිබුණු තීන්දුව ගැන ජනාධිපතිවරයාට ‘තේරුමක් නැතැයි’ කීවද එම පත්වීම් වල සන්දර්භය සලකා බලන විට ඒ ගැන තේරුම් ගැනීම අපහසු නැත.
ජනාධිපතිවරයා කැබිනට් මණ්ඩලයේ ප්රධානියාය. ඒ ජනාධිපතිවරයාම පසුගිය වසරේ අග භාගයේ සිට ප්රසිද්ධියේ කියා තිබුණේ මාර්තු 01 වැනිදායින් පසුව වහාම පාර්ලිමේන්තුව විසුරුවා හරින බවය. ඒ කැබිනට් මණ්ඩලයේ සාමාජිකයන් ඇතුළු සියළු දෙනා වහාම පාර්ලිමේන්තුව විසුරුවා හරින බව කියා තිබුණි.
ශ්රී ලංකාවේ රාජ්ය සේවය දරාගත නොහැකි තරම් පුළුල් බව අමුතුවෙන් කියන්නට ඕනෑ නැත. දැනට ලක්ෂ 13ක රාජ්ය සේවයක් ඇත. දැනටමත් සෙනඟ අතිරික්තයක්. හදිසි රැුකියා ලබාදීමේ අවශ්යතාවයක් රටේ තිබුණේ නැත.
මේ උපාධිධාරී බඳවාගැනීම් බොහොමයක් අයත් වන්නේ ප්රාදේශීය ලේකම් කාර්යාල වලටය. අප කළ විමසීම් වලදී ප්රාදේශීය ලේකම්වරුන් හා රාජ්ය පරිපාලන සේවයේ ප්රවීණයන් කිහිපදෙනෙකු කීවේ මෙම බඳවාගැනීම් සිදුකළ රාජ්ය ආයතනවල පුරප්පාඩු නොතිබූ බවය. එපමණක් නොව, අළුතින් බඳවාගැනීම් කළොත් ඉඳගැනීමට ඉඩක්වත් නොමැති බවය.
මීට පෙර 2006 දී මහින්ද රාජපක්ෂ ජනාධිපතිවරයා රුපියල් 10,000ක වැටුපට උපාධිධාරීන් 15,000ක පිරිසක් රජයේ රැුකියා වලට බඳවාගෙන තිබුණි. පසුව 2013 දී පමණ සංවර්ධන නිලධාරීන් ලෙස උපාධිධාරීන් 30,000ක් බඳවාගත්තේය. මෙලෙස බඳවාගත් අයට නිසි රාජකාරී ලැයිස්තුවක්, නිල ස්ථානයක් තිබුණේ නැත. ඇතැම් රාජ්ය පරිපාලන නිලධාරීන් කියන්නේ ඔවුන් කෑම විවේකයේදී ගෙදරින් ගෙනෙන බත් එක කා නැවත ගෙදර යෑම පමණක් සිදුකළ බවය. ඇතැම්විට තවත් නිලධාරියෙකුගේ ෆයිල් ඔසවාගෙන යෑම වැනි සුළු කටයුතු පමණක් කර ඇති බවය. එලෙස බඳවාගත් අයව ආයතනවල ප්රධානීන් පවා කරදරයක් ලෙස සැලකීය. ඒ සියල්ල නිසා එම උපාධිධාරීන්ගේ ගරුත්වයට පවා හානි විය.
ඒ සම්පූර්ණ පසුබිමෙහි පාර්ලිමේන්තුව විසුරුවා හරින දිනය පැහැදිළිව කියා ඇති පසුබිමක උපාධිධාරී පත්වීම් ලබාදීමේ සැබෑ අරමුණ නොතේරෙන දරුවන් මෙන් හැසිරෙන්නට කිසිවෙකුට හැකියාවක් නැත. එමෙන්ම පාර්ලිමේන්තුව විසුරුවන දිනය ලෙස පැහැදිළිව කියා ඇති දිනය ළංවෙද්දී හදිසියේ අධිවේගී තැපෑලෙන් ලිපි යවමින් පත්වීම් ලබාදීම ගැන මැතිවරණ කොමිසම පියවරක් ගත්තේ ඇයිදැයි ජනාධිපතිවරයාට තේරුමක් නැති වුණත්, බුද්ධියක් ඇති පුරවැසියන්ට පැහැදිළිව වැටහේ. මැතිවරණය මාර්තු 02 වැනිදා මධ්යම රාත්රිය තෙක් ප්රකාශයට පත් කර නොතිබුණත් නිල වශයෙන් මැතිවරණ කොමිසම මැතිවරණයට සූදානම් වෙමින් සිටියේය. ආණ්ඩුවද එයට සූදානම් වෙමින් සිටියේය. ඒ නිසා මෙම පත්වීම් දීම මැතිවරණය ඉලක්ක කරගෙන සිදුකළ එකක් බව ඕනෑ කෙනෙකුට වැටහේ.
එකවර බඳවාගැනීම් 42,000ක් කරන විට දිවයින පුරා ඇති ප්රාදේශීය ලේකම් කාර්යාල සහ තවත් රාජ්ය ආයතන කිහිපයකට බඳවාගත්තේ යැයි සිතමු. දැනට දිවයින පුරා ප්රාදේශීය ලේකම් කාර්යාල 336ක් ඇත. ඊට අමතරව තවත් ආයතන 64ක් එකතු කොට දිවයින පුරා ආයතන 400කට මේ නිලධාරීන්ව අනුයුක්ත කළා යැයි සිතමු. එසේ වුවහොත් එක් ආයතනයකට නිලධාරීන් 105 බැගින් බෙදී යයි.
එහෙත් ඇත්තෙන්ම මෙය සාමාන්ය ඓක්යයක් සඳහන් කිරීමක් පමණි. ප්රායෝගිකව කොළඹ, කුරුණෑගල, ගාල්ල හා මාතර වැනි ප්රදේශවලට අනුයුක්ත කරන සංඛ්යාව වැඩිය. ඒ අනුව ඇතැම් ප්රදේශවලට සිය ගණන් නිලධාරීන් අලූතින් එකතු වනු ඇත. දැනටමත් ප්රාදේශීය ලේකම් කාර්යාලවල විවිධ ආකාරයේ ක්ෂේත්ර නිලධාරීන් 58ක් විතර සිටින බව පරිපාලන නිලධාරීහු කීහ. ඒ අයට දැනටමත් ඒ ආයතනවල ඉඩ ප්රමාණවත් නැත. පළාත් සභාවල නිලධාරීන්ද සිටී.
මේ මැතිවරණ සමය වන නිසා නිලධාරීන්ට මැතිවරණ වලට අදාල රාජකාරී කිරීමටද සිදුවෙයි. ඒ අතරමැද්දේ නිලධාරීන්ට පුහුණුව ලබාදෙනවායැයි කීම ව්යාජයක් පමණි. ඇත්තෙන්ම පුහුණුව යන වචනය පාවිච්චි කළද රුපියල් 20,000ක වැටුප් ලබන්නට ඔවුන් කාර්යාලයට යෑම පමණක් සිදුවනු ඇත.
රැුකියාවක් ලබාදුන් පසුව ඒ රැුකියාවට ගරුත්වයක් තිබිය යුතුය. නිසි රාජකාරී ලැයිස්තුවක් තිබිය යුතුය, නිශ්චිත තනතුරු නාමයක් සමග යම් තැනක ස්ථානගත කළ යුතුය. දැනට මේ පත්වීම් ලබාදුන් නිලධාරීන්ට එවැනි නිශ්චිත තනතුරු නාම, රාජකාරී ගැන සඳහන් කර නැත. ඔවුන්ට ලබාදෙන පුහුණුව කුමක්ද කියාවත් කිසිදු නිශ්චිත සඳහනක් නැත.
ඒ සියල්ලට වඩා දැන් වෙනත් ප්රශ්නයක් පැන නැගී ඇත. අප මේ සටහන ලියන මොහොත වන විටත් මැතිවරණ කොමිසම හා ආණ්ඩුව අතර මෙම පත්වීම් පිළිබඳව සාකච්ඡුාවක් සිදුකර අවසන් මතයක් ප්රකාශ කර නැත. දැන් ඇත්තේ ආණ්ඩුව හා මැතිවරණ කොමිසම යන පාර්ශ්ව දෙකේ එකිනෙකට වෙනස් ප්රකාශ දෙකකි.
මැතිවරණ සමයේදී මෙවැනි පත්වීම් නැවැත්විමේ බලයක් මැතිවරණ කොමිසමට ඇත. ජනාධිපතිවරයා මෙන්ම කැබිනට් මණ්ඩලයද එම බලයට අභියෝග කරමින් කතාකර ඇත. මැතිවරණ කොමිසම කුමක් කීවත් බඳවාගත් අයට වැටුප් ගෙවන බවද කැබිනට් මාධ්ය ප්රකාශකවරයා කියා ඇත. ඒ අනුව දැන් අප බලාසිටිය යුත්තේ මැතිවරණ කොමිෂන් සභාව කුමක් කරනු ඇතිද කියාය. කොමිසම තමන්ගේ ස්වාධීනත්වය පෙන්වමින් මැතිවරණ ක්රියාවලියේ ගෞරවය වෙනුවෙන් කෙළින් පියවරක් ගනු ඇතිද කියාය.x
