ගාමිණී ජයවීර – මහනුවර දිස්ත‍්‍රික් අන්තර් ආගමික කමිටුව
මහනුවර ප‍්‍රදේශයේ හිජාබ් පැළඳගෙන ආපු මුස්ලිම් ගුරුවරියන් පිරිසක් හරවා යැවූ අවස්ථාවක ඔබේ සංවිධානය එයට මැදිහත් වූ ආකාරය සිහිපත් කළොත්..
පාස්කු ඉරිදා ත‍්‍රස්ත ප‍්‍රහාරයෙන් පස්සේ මහනුවර සෙන් ඇන්තනිස් බාලිකා විද්‍යාලයේ ගුරුවරියන් හත්දෙනෙක් තමයි ඒ ප‍්‍රශ්නයට මුහුණ දුන්නේ. අදටත් අපි ඒ ප‍්‍රශ්නය විසඳාගන්නට සටන් කරනවා. අබාය ඇඳගෙන ඉන්නවා කියලා ඔවුන්ව පාසල ඇතුලට ගන්න ප‍්‍රතික්ෂේප කරලා ලොකු ප‍්‍රශ්ණයක් ඇති වුණා. ඒ ගුරුවරියන් හත්දෙනා බුර්කා අඳින කාන්තාවන් නෙවෙයි. සාමාන්‍ය මුස්ලිම් අය වගේ හිජාබය විතරක් අඳින අය. ඒ ගුරුවරියන්ගෙන් හයදෙනෙක් මේ වන විට වෙනත් පාසල් වලට මාරු වීම් ලබාගෙන තියෙනවා. එක් ගුරුවරියකට පමණක් තවමත් මාරු වීම් ලැබුණේ නැහැ. අපි ඒ ගුරුවරිය වෙනුවෙන් පෙනිසිටිමින් ශ්‍රේෂ්ඨාධිකරණයේ නඩුවක් ගොනු කරන්න ලෑස්ති වෙමින් ඉන්නවා.
දිගන ප‍්‍රදේශයේ මුස්ලිම් ජනතාවට එරෙහිව එල්ල වූ ප‍්‍රහාරයට එරෙහිවත් ඔබේ සංවිධානය පෙනී සිටියා නේද?
අපි මුලිකව කරන්නේ සංහිදියාව පිළිබඳව වැඩ කටයුතු තමයි. අපි එක්සත් ජාතීන්ගේ සංවිධානයේ සංහිඳියාව පිළිබඳව කටයුතු කරන නියෝජිතයින් හම්බවෙලා ඔවුන් සමඟත් මේ ගැන කතාකළා. දිගන මුස්ලිම් ජනතාව ඉලක්ක කරගනිමින් සිදු වුණු වෛරී සහගත පහරදීම් සම්බනධයෙන් සෙවීමට පසුගිය ආණ්ඩුව කොමිසමක් දානවා කියලා පොරොන්දු වුණා. නමුත් සිදු වුණේ නැහැ. ඒ නිසා අපේ සංවිධානය මැදිහත් වෙලා ස්වාධීන පුරවැසි කොමිසමක් හැදුවා. දකුණු අප‍්‍රිකාවෙන් ලැබුණු ආධාර මත අපේ නීතිඥයෝ දිගන පහර දීම් සිදු වුණු ප‍්‍රදේශ කිහිපයකට ගිහින් සත්‍ය සෙවීමේ වැඩසටහන් තුනක් පටන් ගත්තා. විවිධ පුද්ගලයන් එයට සාක්ෂි ලබා දුන්නා. අපේ නීතිඥවරුන් තමයි කොමිසම් සභාව මෙහෙයවේවුවේ. ඊට අමතරව ආයෙත් මේ වගේ සිද්ධියක් ඇති නොවන්න අපි ජනතාව දැනුවත් කිරීමේ වැඩපිළිවෙලක් සිදු කළා. මේ සියල්ලම අපි කලේ ලංකාදීප පුවත්පතේ දැන්වීමක් පළ කිරීමෙන් පසුව. අපි දිගන පහරදීම් පිළිබඳව වාර්තාවක් පවා සකස් කළා.
ඒ වාර්තාවට මොකද වුණේ…
අපි ඒ වාර්තාව හිටපු කතානායවරයාට, රනිල් වික‍්‍රමසිංහ මහත්මයාට සහ වෙනත් රටවල් වල මානව හිමිකම් පිළිබඳව සාකච්ඡුා කරන සංවිධාන වලට ලබා දුන්නා. ඒ වාර්තාව පිලිබඳව හොඳ කතාබහක් ඇති වුණා. ඒ වාර්තාව නිසා දිගන සිදු වුණේ කුමක්ද කියා පාර්ශ්වයන් ගණනාවක් දැනගත්තා.
අන්තර් ආගමික කමිටුවෙන් මහනුවර පෙරහැරේ නිවේදන කටයුතු දෙමළ භාෂාවෙනුත් සිදු කරන්න මැදිහත් වුණා නේද?
ඔව්, මහනුවර පෙරහැරේ විස්තර විචාරය කවදාවත් දෙමළ භාෂාවෙන් කළේ නැහැ. නමුත් අපි ඒකට මැදිහත් වෙලා අවුරුදු දෙකක් දෙමළෙන් විස්තර විචාර කළා. මේ වගේ වෙනස්කම් ගණනාවක් අපි මහනුවර සිදු කළා. දේශීය විදේශිය අය ඇවිත අපි මහනුවර පෙරහැරේ දෙමළ විස්තර විචාරය කිරීම ගැන ප‍්‍රසාදයෙන් කතා කරනවා. ඊට අමතරව අපි යාපනය, වව්නියාව වගේ ප‍්‍රදේශවල සිටින ජනතාව සමග එකතු වෙලා සංහිදියා යාන්ත‍්‍රණය සම්බන්ධයෙනුත් වැඩසටහන් කළා.
දළදා මාලිගාව ඉස්සරහා මාර්ගය විවෘත කරගැනීම සම්බන්ධයෙන් මුලික වෙලා කටයුතු කළා නේද?
දළදා මාලිගාව ඉස්සරහා තියෙන පාර විවෘත කරන්න කියලා අපි මුලින් උද්ඝෝෂණය කළා. ඉන්පස්සේ අපි ශ්‍රේෂ්ඨාධිකරණයේ නඩුවක් ගොනු කළා. මේ පාරේ වාහන ගමන් කළොත් දළඳා මාලිගාවට හානියක් වන බව කියලා මල්වතු පාර්ශවයේ හිමිවරුන් පාර විවෘත කිරීමට විරුද්ධව මැදිහත් වුණා. ලංකාවේ වායු දූෂණය ඉහළම නගරය මහනුවර. මේ වෙනකොට මහනුවර වායු දූෂණය නිසා ළමුන් සහ වැඩිහිටියන් රෝගවලට ගොදුරු වෙනවා.
මහනුවර වායු දූෂණය නිසා විශාල ප‍්‍රශ්න ඇති වෙලා තියෙනවා නේද?
මහනුවර සිදුවෙමින් පවතින වායු දූෂණය සම්බන්ධයෙන් මහාචාර්ය ඉලේපෙරුම මහත්මයා පරීක්ෂණයක් සිදු කළා. ටි‍්‍රනිටි විද්‍යාලය අසළ සහ ගුඞ්ෂෙඞ් අවට ප‍්‍රදේශයේ වායු දූෂණය වැඩියි. අවස්ථා ගණනාවකදිම අපි බලධාරීන්ව මේ සම්බන්ධයෙන් දැනුවත් කළා. එහෙත් අස්ගිරි මල්වතු මාහිමිවරුන් මේ ප‍්‍රශ්නයට මැදිහත් වුණ නිසා මිනිස්සු මේ ගැන කතා කරන්න බයයි. අපි උද්ඝෝෂණය කළ අවස්ථාවේ දී පාර්ලිමේන්තු මන්ත‍්‍රිවරයෙකුගේ පිරිසක් ඇවිත් අපිට පහර දුන්නා. දැන් කවුරුත් මේ පාර සම්බන්ධයෙන් කතා කරන්නේ නැහැ. මේ වෙනකොට මහනුවර කුඩා ළමයින්ටත් පෙනහළු වල රෝග ඇවිත්. අපේ සංවිධානයේ ඉන්න ළය සම්බන්ධ විශේෂඥ වෛද්‍යවරයෙක් වන දුෂ්‍යන්ත මැදගෙදර මහත්මයා මේ වායු දූෂණය සම්බන්ධයෙන් වාර්තාවකුත් හැදුවා. අපි ඒ ගැන මාධ්‍ය සාකච්ජාවක් පවා පවත්වලා කීවා. මේ ප‍්‍රශ්නය නිසා හදුනා නොගත් රෝග පවා ළමයින්ට වැළදිලා තියෙනවා. මේ වායු දූෂණය වෙන ප‍්‍රශ්ණය ඉක්මනින් විසඳන්න ඕනෑ. නමුත් කිසිම කෙනෙක් මේකට ඉදිරිපත් වෙන්නේ නැහැ.
යහපාලන ආණ්ඩුවෙන් උමංමාර්ගයක් හදන්න යෝජනාවක් ගෙනාවා නේද?
යහපාලන ආණ්ඩුව සමයේදී මහනුවර නගරයට උමං මාර්ගයක් හදන්න කිරිඇල්ල මහත්මයා යෝජනාවක් ගෙනාවා. නමුත් අපි උමං මාර්ගයට විරෝධය පළ කළා. මහනුවර කියන්නේ සංවේදී භූමි කලාපයක්. ඒ කඳු සිදුරු කිරීම අවධානම් සහගත කටයුත්තක්. අපි දැක්කා ඌව පළාතේ උමා ඔය ව්‍යාපෘතිය නිසා කඳු පද්ධතියට කොතරම් හානියක් සිදු වුණාද කියලා. විරෝධය නිසා දැන් ඒ කටයුත්ත නතර වෙලා තියෙනවා.x
