පුංචිරාලගේ සෝමසිරි
පානම් පත්තුව සුරැකීමේ සංවිධානයේ සංවිධායක
පානම නැගෙනහිර පළාතේ, අම්පාර දිස්ත‍්‍රික්කයේ ලාහුගල ප‍්‍රාදේශීය ලේකම් කොට්ඨාසයේ ප‍්‍රදේශයකි. 2009 දී පානම ගම්වැසියන්ට පහරදී පලවා හැර තිබුණි. පානම ඉඩම් අයිතිවාසිකම් දිනාගැනීමේ අරගලය එදා සිට අද දක්වා දිවෙයි.
පානම ඉඩම් ප‍්‍රශ්නයේ අතීතයත්, එයට වත්මන් ආණ්ඩුවේ නායකයන්ට තියෙන සම්බන්ධයත් කෙටියෙන් සිහිකළොත්..
අපේ සීයලාගේ කාලේ, 1960 අවුරුද්දේ විතර ඉඳලා අපි පානමේ පදිංචි මිනිස්සු. යුද්ධෙ ඉවර වෙනකොට 2009 ජූලි 17 වෙනිදා මහ ? කළු ඇඳගත්ත මිනිස්සු ටිකක් ගම්මානෙට ඇතුළු වුණා. ගමේ හිටපු මිනිස්සුන්ට ගැහුවා. ඒ මිනිසුන්ව ගමෙන් එළෙව්වා. ඉන්පස්සේ ඔවුන් අපේ දේපළවලට ගිනි තිබ්බා. ඒ කාලේ ඔකඳ සහ කතරගම දේවාලවල පෙරහැර තිබුණා. ඒ නිසා ගමේ ගොඩක් අය ඒ පෙරහැර බලන්න ගිහින් තිබුණා. ගමේ රැුදිලා හිටපු අයට තමයි මේ විදියට ගහලා එළෙව්වේ. ඒක සිද්ධවුණේ දැන් ආණ්ඩුව මීට කලින් බලයේ හිටපු කාලයේදී. ගම්මානයේ නැවත පදිංචි වෙන්නට ආණ්ඩුවෙන් උදව් කළාද? නැහැ. අපව එළෙව්වාට පස්සේ ඒ අය අපේ ඉඩම් අල්ලගෙන තිබුණා. මිනිස්සු උදේ ඇවිත් අපේ ගම්මානයට ඇතුළු වෙන්න ගියාම පොලිසියෙන් දාලා තිබුණා. අපිට දේපලවලට ඇතුළු වෙන්න දුන්නේ නැහැ. ඒ කියන්නේ ඒකට ආණ්ඩුවේ උදව් තිබුණා. ඔවුන් අපේ ගෙවල් පිටින් ගිනි තියලා තිබුණා. ගෙවල්වල තිබුණු බඩු සේරම ගිනි අරගෙන, අපිට ඉතිරි වුණේ ඇඳගෙන හිටපු ඇඳුම් විතරයි. අපි මුලින්ම මානව හිමිකම් කොමිසමට ගිහින් මේ ගැන පැමිණිලි කළා. පසුව අපි මේ සම්බන්ධයෙන් විසදුමක් ඉල්ලලා අධිකරණය ඉදිරියට ගියා.
හානි වූ දේපලවලට වන්දි ලැබුණාද?
2009 සිදුවුණ පහරදීම්වලින් අපේ ගමේ එක්කෙනෙකුට තුවාල සිද්ධ වුණා. ඔහු අම්පාර රෝහලේ පවා සිටියා. මේ පහරදීම්වලින් සහ ගිනි තැබීමෙන් අපේ දේපලවලට සිදුවුණු හානියට කිසිම වන්දි මුදලක් ලැබුණේ නැහැ. කවුරුවත් කිසිම දෙයක් කළේ නැහැ. අපිට මේ විදියට පහරදීම් වුණ වෙලාවේ ප‍්‍රාදේශීය ලේකම් කිව්වේ මේ වගේ සිද්ධියක් වෙලා නැහැ කියලයි. අපි ඒ පහරදීම් ඔප්පු කළාට පස්සේ තමයි ඔහු මේ සිදුවීම වුණ බව පිළිගත්තේ.
ඉඩම් ප‍්‍රමාණය මොනතරම්ද?
ඉඩම් අක්කර 480ක් අල්ලගෙන තිබුණා. අපේ ඉඩම් අල්ලාගැනීමේ දිගුවක් විදියට ගුවන් හමුදාව සහ නාවික හමුදාව තවත් අක්කර 840ක් අල්ලාගෙන තිබුණා. ඒ ඉඩම් අයිති වුණේ වන සංරක්ෂණ දෙපාර්තමේන්තුවට. සමස්තයක් ලෙස ආණ්ඩුව ඉඩම් අක්කර 1,220ක් අල්ලගෙන තිබුණා.
මානව හිමිකම් කොමිසමේ තීන්දුව මොකක්ද?
ගිනි තියපු ගම්මානයේ පවුල් 34ක් ජීවත් වුණා. ඒ පවුල්වලට අක්කර 64ක් අයිති වෙලා තිබුණා. අපේ ඉඩම්වලට අපිට යන්න දෙන්නේ නැති නිසා අපි අධිකරණයේ ඉදිරියේ දීර්ඝ කාලයක් නඩු කිව්වා. මානව හිමිකම් කොමිසමේ අපේ ප‍්‍රශ්නය ගැන දීර්ඝ කාලයක් විමර්ශන කළා. මානව හිමිකම් කොමිසමේ විමර්ශනය අවසානයේ තීන්දුවක් ලබා දුන්නා. මිනිස්සුන්ගේ ඉඩම්වල අයිතිය ඒ අය ඔප්පු කර ඇති නිසා, ඒ මිනිස්සුන්ට ඒ ඉඩම්වලට ඇතුල් වෙන්න රාජ්‍ය නිලධාරින් මැදිහත් වෙන්න ඕනෑ බව ඔවුන් කීවා. අපට ඉඩම් ලබා දීමට කටයුතු කරන්න කියලා කිව්වේ.
අධිකරණ තීන්දුව මොකක්ද?
අධිකරණයේ විභාග වුණ නඩුවේදී අපේ ඉඩම් සම්බන්ධයෙන් නොයෙකුත් ආකාරයේ සිදුවීම් සිදුවුණා. ප‍්‍රාදේශීය ලේකම් කිව්වා අපි පදිංචි වෙලා හිටපු ඉඩම් අයිකි වෙන්නේ වන සංරක්ෂණ දෙපාර්තමේන්තුවට කියලා. වන සංරක්ෂණ දෙපාර්තමේන්තුවෙන් කිව්වේ මේ ඉඩම් ඔවුන් අයිති නැති බව. අපි අවුරුදු ගණනාවක් පුරා මේ ඉඩම්වල පදිංචි වෙලා සිටින පිරිසක් බව ඔවුන් තහවුරු කළා. ඔවුන් කීවේ අපි පදිංචි වෙලා හිටපු ඉඩම් අවශේෂ කෑලෑවක් බව. ඒ නිසා ඒ ඉඩම්වල ඕනෑම පුද්ගලයෙකුට පදිංචි විය හැකි බව කීවා. එම පිළිතුර නිසා අපි පදිංචි වෙලා හිටියේ රජයේ ඉඩම්වල බව ඔප්පු කරන්න බැරිවුණා. නඩු තීන්දුව හම්බවුණේ ඉඩම්වල මිනිසුන්ට ඉන්න අවශ්‍ය නීත්‍යනුකූල කටයුතු කරන්න කියලා. තීන්දුව තිබුණත් අපට ඉඩම් දුන්නේ නැහැ.
යහපාලන ආණ්ඩුව පානම ඉඩම් සම්බන්ධයෙන් කැබිනට් තීන්දුවක් ගත්තා නේද?
දින 100 ආණ්ඩුව තිබුණු කාලයේ යහපාලන රජයෙන් 2015 පෙබරවාරි 25 වෙනිදා කැබිනට් තීන්දුවක් ගත්තා. අක්කර 25ක ඉදිකිරීම් කරන්නත් ඉතිරි ඉඩම් සියල්ල මිනිස්සුන්ට බෙදලා දෙන්නත් තීන්දු කළා. දැන් අවුරුදු පහක් ගියත් ඒ ඉඩම් තවමත් අපිට ලබාදුන්නේ නැහැ. අපට නැවතත් අභියාචනාධිකරණයට යන්න සිද්ධවුණා. ඒ කැබිනට් තීරණය ක‍්‍රියාත්මක කරන්න කියලා ඉල්ලන්න. ඒ අතර අපි ඉඩම්වලට බලෙන් ඇතුළු වුණා.
ඒ කවදාද?
අපි ඇතුළු වුණේ 2016 මැයි මාසයේ. එදා ඉඳලා මේ දක්වා පවුල් 34ක් අපේ ඉඩම්වල පදිංචි වෙලා ඉන්නවා. අක්කර 65ක් තිබුණ භූමි ප‍්‍රමාණයෙන් අක්කර 25ක් ඉදිකිරීම් සඳහා වෙන්කරලා. අපට ඉඩම් අයිතිය භුක්ති වි`දිමින් නිදහසේ පදිංචි වෙන්නට නම් ඉතිරි අක්කර 40 මනින්න ඕනෑ. එහෙත් කිසිම රජයේ නිලධාරියෙක් ඇවිත් මේ ඉඩම් මැනලා දුන්නේ නැහැ. ඉඩම්වලට අදාල ලියවිල්ලක්වත් තවම අපට ලැබිලා නැහැ. යහපාලන ආණ්ඩුවත් අපි ගැන සංවේදී වුණේ නැහැ.
දැන් පානම ගැන අලූතින් බියක් ඇතිවෙන්නේ ඇයි?
අපට ආරංචියක් තියෙනවා. ඒ ගැන අපට බයයි. මේ ඉඩම් නැවත පවරාගන්නට මේ ආණ්ඩුව සූදානම් වෙන බව තමයි අපට ආරංචි වෙන්නේ. මොනවා වේවිද කියලා අපි දන්නේ නැහැ. අපට විශ්වාසයකුත් නැහැ. අපේ ඉඩම් අයිතිය දෙන්න කියලා ආණ්ඩුවට බලපෑම් කරන්න ඕනෑ. ඒ අතරේ ඉඩම් ආයෙත් නැතිවේවි කියන බය අපට තියෙනවා.
