පාසල් සිසුන් සඳහා ක‍්‍රියාත්මක කරන සුරක්ෂා රක්ෂණය තවදුරටත් රක්ෂණ සමාගම්වලට ලබා නොදී අධ්‍යාපන අමාත්‍යාංශය යටතේම ක‍්‍රියාත්මක කළ යුතු බව ලංකා ගුරු සංගමයේ ප‍්‍රධාන ලේකම් ජෝසෆ් ස්ටාලින් අවධාරණය කරයි.
එම රක්ෂණය සඳහා පළමු වසරේදී රජය රුපියල් මිලියන 2700ක මුදලක් ගෙවුවද රක්ෂණ ප‍්‍රතිලාභ ලැබුණේ රුපියල් මිලියන 400ක් පමණක් බවත්, ඊට පසු වසරවලදීද රක්ෂණ වන්දි ලෙස ගෙවීම් සිදුවූයේ රුපියල් මිලියන 400ක මුදලක් වශයෙන් බවත් ස්ටාලින් මහතා කියයි. ඒ නිසා රුපියල් මිලියන 1000කට අධික මුදලක් සෑම වසරකම රක්ෂණ සමාගම්වලට නිකරුණේ ගෙවමින් සිටින බවත්, අධ්‍යාපන අමාත්‍යාංශය යටතේ ඇතිකරනු ලබන අරමුදලක් මගින් මෙම රක්ෂණය ක‍්‍රියාත්මක කළහොත් එම අතිරේක මුදලින් ළමයින්ට තවත් ප‍්‍රතිලාභ හිමිකර දිය හැකි බවත් ස්ටාලින් මහතා පෙන්වා දෙයි.
එමෙන්ම ඔහු වැඩිදුරටත් පෙන්වා දෙන්නේ දැනට මෙම රක්ෂණය වෙනුවෙන් කටයුතු කිරීමට අධ්‍යාපන අමාත්‍යාංශයේ වෙනම ඒකකයක් ඇති බවත්, රට පුරා විහිදී ඇති කලාප අධ්‍යාපන කාර්යාල 97ක් මගින් එම රක්ෂණයට අදාල ලිපිගොනු කටයුතු සිදුකරන බවත්ය. එම නිසා රක්ෂණ සමාගම්වලට නිකරුණේ මුදල් නොගෙවිය යුතු බව ඔහු වැඩිදුරටත් අවධාරණය කරයි.
ඉඳුවර බණ්ඩාර
