ලංකාවේ නීතිය යටතේ තවමත් භික්ෂූන්ට වාහන ධාවනය කරන්නට අවසර නැත. මෙය විවාදයට තුඩුදී ඇති කරුණකි. ඒ අනුව රියදුරු බලපත‍්‍රයක් භික්ෂුවකට ලබාගන්නට නොහැකිය. එහෙත් ඕනෑ තරම් භික්ෂූහු රියදුරු බලපත‍්‍රයක් නොමැති වුණත් රිය ධාවනය කරති. එහෙම කර පොලිසියට කොටුවුණ අවස්ථාද එමටය. එහෙත් කසාවතේ බලය නිසා ඔවුන්ට විරුද්ධව නීතිය ක‍්‍රියාත්මක වෙනවා අඩුය.
කලවාන පොතුපිටිය මිහිඳුතලාව ආරණ්‍ය සේනාසනය ප‍්‍රදේශයේ තිබෙන බෙහෙවින් ආකර්ෂණීය විහාරයක් ය. ඒ පන්සලේ බොහෝ භික්ෂූන්ට හිටපු පාලකයන් සමග මෙන්ම වර්තමාන පාලකයන් සමගද ඇත්තේ සමීප බැඳියාවකි. මහින්ද රාජපක්ෂ හිටපු ජනාධිපතිවරයාගේද නොමඳ අනුග‍්‍රහය ලැබූ විහාරයකි මෙම විහාරස්ථානය. පසුගිය 13වෙනිදා මෙම විහාරයේ වාසය කරන ඌරුමීවල කුසලඥාන හිමියන් තමන්ගේ අලූත ගත් ජීප්රථය ධාවනය කළේ තරුණයන් දෙදෙනෙකුගේ ශරීර මතින් ය. ඒ කලවාන රත්නපුර මාර්ගයේ දෙණියකඬේ ප‍්‍රදේශයේදී ය. මෙම රිය අනතුරින් පසු තරුණයන් දෙදෙනා රත්නපුර ශික්ෂණ රෝහලට ඇතුළත් කර තිබුණ අතර එම දිනයේදීම හවස් වනවිට ධනුෂ ලක්ෂාන් තරුණයාගේ ජීවිතය මරණයෙන් කෙළවරවී තිබුණි.
ධනුෂ ලක්ෂාන් සහ ප‍්‍රසාද් ප‍්‍රියදර්ශන පසුගිය 13 වෙනිදා කලවාන නගරයේදී මුණගැසී ඇත. ඒ දවල් 12ට පමණය. පසුව මෙම දෙදෙනා රත්නපුර ප‍්‍රදේශයේ ප‍්‍රබල දේශපාලකයෙකු මුණගැසීම සඳහා ඔහුගේ නිවිතිගල පිහිටි නිවසට යන්නට ධනුෂ ලක්ෂාන්ගේ යතුරුපැදියෙන් පිටත්වී ඇත. මොවුන් ඉදිරි දිනකදී සංවිධානය කරන ක‍්‍රිකට් තරගයකට අනුග‍්‍රහය ලබාගැනීම සඳහා මෙලෙස එම දේශපාලකයාගේ නිවසට යන්නට පිටත්වූ බව දැනගන්නට ලැබේ.
එහෙත් අතරමගකදී ධනුෂගේ ¥රකථනයට පැමිණෙන ඇමතුමක් නිසා ඔහු තම යතුරුපැදිය මාර්ගය අසල නවතා එයින් බැස එම ඇමතුමට කතාකර ඇත. මොහොතකින් ඌරුමීවල හිමියන්ගේ ජීප්රථය පාරෙන් ඉවතට පැන මෙම තරුණයන් යට කරගෙන ගොස් අසල කොස් ගසක හැපී නතරවී ඇත. එවිට දහවල් 12.45ට පමණ වෙන්නට ඇති බව ප‍්‍රදේශවාසීහු ප‍්‍රකාශ කරති. මෙහිදී ප‍්‍රදේශවාසීන් පැමිණ මෙම භික්ෂුව වටකරගෙන කළහකාරී ලෙස හැසිරෙන්නට වූ අතර එම අවස්ථාවේ එම ස්ථානයට පැමිණි ආණ්ඩුවේ ප‍්‍රබලයෙකු භික්ෂුව එම ස්ථානයෙන් රැුගෙන, නිවිතිගල පොලිසියට ඇරලවා ඇති බව දැනගන්නට ලැබේ. ප‍්‍රදේශවාසීන් මෙම භික්ෂුව වටකරගෙන දෝෂාරෝපණය කරන අයුරු සහ එය ගානකට නොගෙන මෙම භික්ෂුව කිසියම් පුද්ගලයෙකු සමග ¥රකථන සංවාදයක නිරතව සිටින වීඩියෝවක් සමාජ මාධ්‍යයේ සංසරණය වෙමින් තිබේ. එම වීඩියෝව කියන්නේ නීතිය කැඩුවත් මිනිහෙකු මරණයට පත් කළත් කසාවතක් දරයි නම් බය වෙන්නට දෙයක් නැති බවය.
මෙලෙස අනතුරට පත් තරුණයන් දෙදෙනාම කලවාන වැද්දාගල ප‍්‍රදේශයේ පදිංචිකරුවන් ය. මියගිය තරුණයා උසස් පෙළ විභාගයට මුහුණ දී ප‍්‍රතිඵල පැමිණෙන තුරු සිටි තරුණයෙක් ය. එදිනම මෙම රිය අනතුර සම්බන්ධව නිවිතිගල පොලිසිය මෙම හිමිනම අත්අඩංගුවට ගෙන අධිකරණයට ඉදිරිපත් කරනු ලැබූ අතර පසුගිය දෙසැම්බර් 17වැනි දින රත්නපුර අතිරේක මහේස්ත‍්‍රාත් දුලාන් වීරවර්ධන රුපියල් ලක්ෂ 15ක ශරීර ඇපයක් මත මෙම භික්ෂුව නිදහස් කිරීමට නියෝග ලබාදී ඇත.
නිවිතිගල පොලිසිය අධිකරණයට ඉදිරිපත් කළ බී වාර්තාවට අනුව මෙම භික්ෂුවට රියදුරු බලපත‍්‍රයක් නැත. ඒ අනුව මෙම භික්ෂුව මෙලෙස කලවාන පොතුපිටියේ සිට නිවිතිගල දෑල තමන් උගන්වන පිරිවෙනට දිනපතා රැුකියාව සඳහා ගොස් ඇත්තේ පොලිස් ඇසට වැලි ගසමින් තම රථය පදවාගෙනය. නිවිතිගල පොලිසියේ හෝ කලවාන පොලිසියේ රථවාහන අංශයට මීට ප‍්‍රථම මේ භික්ෂුවගේ මෙම නීති විරෝධී ක‍්‍රියාව හසුනොවුණා යැයි කිව නොහැකිය. මේ භික්ෂුව සතු දේශපාලන බලපුළුවන්කාරකම නිසා නීතිය ක‍්‍රියාත්මක කරන්නට බැරිවෙන්නට ඇත. කෙසේ හෝ දැන් තරුණ ජීවිතයක් අකාලයේ විනාශ වී ගොස් අවසන් ය. දැන් තිබෙන්නේ කසාවතක් දැරූවත් මෙම භික්ෂුවට විරුද්ධව නීතිය සාධාරණව ක‍්‍රියාත්මක කිරීම ය. රිය අනතුරු අරබයා වර්තමාන ආණ්ඩුව දැඩිව කටයුතු කරන බව පාඨලී චම්පික රණවක මන්ත‍්‍රීවරයා අත්අඩංගුවට ගැනීමෙන් පෙනෙයි. එම දැඩි නීතියම මෙම භික්ෂුව අරබයාද ක‍්‍රියාත්මක වෙනු ඇතැයි අපි සිතමු..
