අපේක්ෂා රෝහලේ අධ්‍යක්ෂවරයා ලෙස කටයුතු කරන වසන්ත දිසානායක නම් වෛද්‍යවරයා මාධ්‍ය සාකච්ඡුාවක් පවත්වමින් දෙසැම්බර් 12 වැනිදා එල්ලකර තිබුණු චෝදනා අතර ‘මේ කළු ත‍්‍රස්තවාදීන්ගේ කළු සල්ලිද‘ යන පැනය කිහිප වතාවක් අසා තිබුණි. අපේක්ෂා රෝහලේ ගිණුම යැයි කියමින් පෞද්ගලික ගිණුමකට මුස්ලිම් ජාතිකයන් කිහිපදෙනෙකු මුදල් එකතු කරන බවත්, තමන් ඒ ගැන පොලීසියට පැමිණිලි කළ බවත් ඔහු කළ ප‍්‍රකාශයේ හැඟවුම විය.
අධ්‍යක්ෂවරයා අදහස් දක්වා තිබුණේ ‘ෆයිට් කැන්සර්’ නම් ව්‍යාපෘතියෙන් මුදල් එකතුකිරීම සඳහා පාවිච්චි කරන ගිණුමක් ගැනය. අධ්‍යක්ෂවරයා අදහස් දැක්වීමේදී කියා තිබුණු පරිදි මේ ගිණුම නාඳුනන, නොදන්නා, පෞද්ගලික එකක් නොවේ. අපේක්ෂා රෝහලේ අධ්‍යක්ෂවරයා මාධ්‍ය සාකච්ඡුාවක් තියමිනුත්, දෙරණ ටීවී හා හිරු ටීවී ඇතුළු මාධ්‍ය ආයතන වගකීමකින් තොරව ඒවා විකාශය කරමිනුත් ඇවිළවූ ගින්න ගැන වැඩිදුර කතාකරන්නට කලින් මේ ගිණුම මොකක්දැයි සරලව පැහැදිලි කළ යුතුය. කතාවේ ඉතිරි කොටස්වලට ඉන්පසුව යා හැකිය.
ගිණුම
මෙම ගිණුම ජාතික සෞඛ්‍ය සංවර්ධන අරමුදල නමින් හඳුන්වන ගිණුමකි. එය සෞඛ්‍ය අමාත්‍යාංශය යටතේ ඇති ගිණුමකි. එය 1981 අංක 31 ජාතික සෞඛ්‍ය සංවර්ධන අරමුදලෙන් එම අරමුදල පිහිටුවා ඇත. එම අරමුදලට අයත් මෙම ගිණුම ලංකා බැංකුවේ මහරගම ශාඛාවේ පිහිටුවූ එකකි. ගිණුම් අංකය 71275069 වේ. එම ගිණුමේ නෛතික බලය පැවරී ඇත්තේ සෞඛ්‍ය අමාත්‍යාංශයේ ලේකම් ලෙස පත්වන පුද්ගලයාටය. අපි මේ ගැන කතාකරන්නට සෞඛ්‍ය අමාත්‍යංයේ ලේකම්වරිය ලෙස කටයුතු කළ පී.එස්.එම්. චාල්ස් මහත්මිය ඇමතුවෙමු. එහෙත් චාල්ස් මහත්මිය සම්බන්ධ කරගත නොහැකි විය. ඒ අනුව මෙම අරමුදල භාරව කටයුතු කරන ගිණුම් අංශයට කතාකළෙමු. එහි නිලධාරියෙක් අප සමඟ මෙසේ පැවසීය.
‘ජාතික සෞඛ්‍ය සංවර්ධන බැංකු ගිණුම අයිති වෙන්නේ සෞඛ්‍ය අමාත්‍යාංශයට. ඒ ගිණුමේ මෙහෙයුම් සිදු වෙන්නේත් සෞඛ්‍ය අමාත්‍යාංශයෙන්. වෙන කිසිම බාහිර පුද්ගලයෙකුට එහි ගනුදෙනු කරන්නට බැහැ. ජාතික සෞඛ්‍ය සංවර්ධන ගිණුමේ සභාපති ලෙස නිල බලයෙන් පත් වෙන්නේ අමාත්‍යංශයේ ලේකම්වරයා. දැන් ඉන්න ලේකම්වරයා මාරුවෙලා වෙනත් කෙනෙක් ආවත් ගිණුමේ නෛතික බලය ඉබේම අලූත් ලේකම්වරයා පත්වෙනවා. මේ ගිණුමට කොතරම් මුදල් ප‍්‍රමාණයක් එකතු වෙලා තියෙනවාද කියලා මට කියන්න බැහැ. වැඩි විස්තර දැන ගන්නට අමාත්‍යාංශ ලේකම්වරිය අමතන්න.‘
ෆයිට් කැන්සර්
ඉහත කී ගිණුමට මුදල් එකතු කිරීමේ ව්‍යාපෘතියක සිටි ෆයිට් කැන්සර් ව්‍යාපෘතියේ කතාව බොහෝ දෙනෙකු දැනටමත් දන්නවා විය හැක. එහෙත් නැවත එය කෙටියෙන් හෝ සිහිපත් කරගැනීම වටී. අනිද්දා සමඟ අදහස් දැක්වූ එම ව්‍යාපෘතියේ නිර්මාතෘ එම්.එස්.එච්. මොහොමඞ් මෙසේ කීය.
‘මගේ පුතා පිළිකා රෝගයෙන් මියගියා. අවුරුදු දෙකක් තිස්සේ අපි පුතාව එක එක රටවලට අරගෙන ගිහින් ප‍්‍රතිකාර කළා. නමුත් කිසිම සුවයක් පුතාට ලැබුණේ නැහැ. 2015 වර්ෂයේදී අපි මහරගම අපේක්ෂා රෝහලට ආවා. අපි මානසිකව සහ කායිකව සෑහෙන්න වැටුණා අපේක්ෂා රෝහලේ තත්වය දැකලා. පිටරටවල තියෙන දියුණු තාක්ෂණයි, අපේ රටේ තිබුණ මලානික ප‍්‍රතිකාරවලයි අතර වෙනස අපි හොඳටම දැක්කා. රෝහලේ පෙට් ස්කෑනර් එකක්, එම්.ආර්.අයි. මැෂින් එකක් නැහැ කියලා අපි දැනගත්තා. තිබුණු සී.ටී. ස්කෑනර් එක අවුරුදු 20ක් පරණයි. ජාන විද්‍යාගාරයක් නෑ. ඒ යන්ත‍්‍රවලින් කරන පරීක්ෂණ සඳහා ලක්ෂ ගණනක් වියදම් කරලා පෞද්ගලික රෝහල්වලට යන්න සිද්ධවුණා.
අපේක්ෂා රෝහලේ කාර්ය මණ්ඩලය අතිවිශිෂ්ට, ප‍්‍රශංසනීය මිනිසුන්. ගැටලූව තිබෙන්නේ පහසුකම්වල. අවශ්‍ය යන්ත‍්‍ර නැතිකමින් මිනිස්සු අසරණ වෙන හැටි මම දැක්කා. එම්.ආර්.අයි. පරීක්ෂණයකට පෞද්ගලික අංශයේ රුපියල් 40,000 ක් විතර අය කළා. පෙට් යන්ත‍්‍ර යන්ත‍්‍රයක් නැතිකම නිසා ලක්ෂ එකහමාරක් විතර ලෙඩෙකුට වියදම් වුණා. තිබුණු පැරණි සීටී ස්කෑනර් එකෙන් පරීක්ෂණයක් කරන්නට නම් ලෙඩෙකුට මාස ගණනක් බලාගෙන ඉන්න සිද්ධවුණා. මේ ඛේදවාචකය මම අවුරුදු තුනක් තිස්සේ බලාගෙන හිටියා. මම ඒ ගැනම කල්පනා කළා. අපේ රටේ මිනිස්සු නොවැදගත් දේවල්වලට මොනතරම් මුදලක් වියදම් කරනවාද. ලංකාවේ මිනිස්සු අතරින් වැඩිම පිරිසක් පිළිකා රෝගයෙන් මියයද්දී එයට ප‍්‍රතිකර්ම කරන්නට වැය වෙන්නේ අඩු මුදලක්.
මගේ පුතාට පෙට් ස්කැන් පරීක්ෂණ 08ක් කළා. ඒ අතරේ පෙට් ස්කෑනර් යන්ත‍්‍රණයෙන් කරන පරීක්ෂණය කරන්නේ නැතිව පුතාගේ ඇඳ අසල කෙනෙක් මියගිහින්. ඒ ගැන කම්පාවෙන් පුතා මගෙන් ඉල්ලූවා පෙට් ස්කෑනර් යන්ත‍්‍රයක් අරන් දෙන්න කියලා. පුතා මගෙන් ඇහුවා, ඩඩා අපි හොස්පිටල් එකට පෙට් ස්කෑනර් එක් අරන් දෙමුද කියලා. එහෙත් මම උත්තර දුන්නේ අපට සල්ලි කොහෙන්ද, ඔයාට වියදම් කරලාම සල්ලි ඉවරයිනේ කියලා. ඉන්පස්සේ තමයි ඔහු යෝජනා කළේ මුදල් එකතුකරමු කියලා.
මම මැදිහත් වෙලා ෆයිට් කැන්සර් ටීම් නමින් කණ්ඩායමක් පිහිටුවාගෙන මාස 03 ක් ඇතුළත රුපියල් කෝටි 25ක් එකතු කළා. මම මුදල් එකතුකළේ පෞද්ගලික ගිණුමකට නොවෙයි. ජාතික සෞඛ්‍ය සංවර්ධන අරමුදලට. අපි එකතු කරපු හැම සතයක්ම ගියේ රජයට. ඒකේ බලය තිබුණේ සෞඛ්‍ය අමාත්‍යාංශයේ ලේකම්වරයාට.
ඒ ගිණුමේ නෛතික බලය තියෙන්නේ සෞඛ්‍ය අමාත්‍යාංශයේ ලේකම්වරයාට. එයාට තමයි පුළුවන් මේ ගිණුම හසුරුවන්න. 2018 අපේ‍්‍රල් 01 වෙනිදා වැල්ලවත්තේ ඉඳලා මහරගමට එනකම් පයින් ඇවිදගෙන ගිහින් අපි මේ පෙට් ස්කෑනර් යන්ත‍්‍රය අපේක්ෂා රෝහලට භාරදුන්නා. ෆයිට් කැන්සර් ටීම් හැදුණේ එම ව්‍යාපෘතියේදී.
ඒ ව්‍යාපෘතිය ඉවර වුණාට පස්සේ අපේක්ෂා රෝහලේ වෛද්‍යවරු කණ්ඩායමක් අපෙන් ලිඛිතව ඉල්ලීමක් කළා ටෝමෝතෙරපි ලීනියර් ඇක්සිලේටර් දෙකක් පරිත්‍යාග කරන්න කියලා. අපි ඒ ගැන සෞඛ්‍ය අමාත්‍යාංශයේ නිලධාරීන් දැනුවත් කළා. ඒ ව්‍යාපෘතිය පටන් ගන්න අරමුදලක් ආරම්භ කිරීම සඳහා සෞඛ්‍ය අමාත්‍යාංශයත් එක්ක ෆයිට් කැන්සර් ටීම් එක ගිවිසුම්ගත වුණා.
ටෝමෝතෙරපි යන්ත‍්‍ර ලංකාවටම තියෙන්නේ එකයි. ඒ යන්ත‍්‍රය තියෙන්නෙත් පෞද්ගලික රෝහලක. දුප්පත් අහිංසක රෝගියෙකුට පිළිකාවක් හැදුණොත් ටෝමෝතෙරපි එක කරන්න යන්ත‍්‍රයක් නැහැ. එක්කෝ ඒ රෝගියාට වෙන්නේ මරණය වැළඳගන්න. නැත්නම් ලක්ෂ ගාණක් වියඳම් කරලා පෞද්ගලික රෝහලෙන් ඒ සේවය ලබා ගන්න.
ඒ ගිවිසුම්ගත කිරීමට සෞඛ්‍ය අමාත්‍යංශය වෙනුවෙන් අධ්‍යක්ෂ ජෙනරාල් අනිල් ජාසිංහ මහතාත්, සෞඛ්‍ය අමාත්‍යාංශයේ ලේකම්වරයා වෙනුවට සෞඛ්‍ය අමාත්‍යංශයේ උපලේකම් නිමල් බාලසූරිය මහතාත් ෆයිට් කැන්සර් කණ්ඩායම වෙනුවෙන් මමත් ගිවිසුම් අත්සන් කළා. 2019 අපේ‍්‍රල් 01 වෙනිදා එම ව්‍යාපෘතියේ වැඩ පටන් ගත්තා. මේ ව්‍යාපෘතිය කෝටි 100ක ව්‍යාපෘතියක්. අපට මේ ගිණුමට එකතුවෙන මුදල් ප‍්‍රමාණය දැනගන්න ඍජු ක‍්‍රමයක් නැහැ.
අපට සෞඛ්‍ය අමාත්‍යාංශයෙන් දැනුම් දුන්නොත් තමයි අපි එය දැනගන්නේ. රෝහල් අධ්‍යක්ෂවරයා චෝදනා කළ වෙලාවේ කියලා තියෙනවා කෝටි 14ක මුදලක් ගිණුමට එකතුවෙලා තියෙන බව.
මේ වෙද්දී ෆයිට් කැන්සර් ටීම් වෙනුවෙන් ස්වෙච්ඡුාවෙන් එකතුවුණ සාමාජිකයන් 1500ක තරම් පිරිසක් ඉන්නවා. රටවල් 6ක ඔවුන් විහිදී ඉන්නවා. අපි ගිණුමට මුදල් දාන්න කියලා යොමු කරනවා හැර, කිසිම විදියකට පෞද්ගලිකව මුදල් එකතු කිරීමක් කරලා නැහැ.
වසන්ත දිසානායක මහතා කීවා පාස්කු ඉරිදා ත‍්‍රස්ත ප‍්‍රහාරයට පසු දිනය වන අපේ‍්‍රල් 22 වැනිදා කෝටි දෙකක් මගේ ගිණුමකට වැටුණු බව. ඒක බොරුවක්. ඒ මුදල් වැටිලා තිබුණේත් සෞඛ්‍ය අමාත්‍යාංශයේ ගිණුමට. මම හොයලා බලද්දී දැනගන්නට ලැබුණේ එදා අටදාස් හයසීය හතලිස් අටක් දෙනෙක් මේ ගිණුමට මුදල් පරිත්‍යාග කරලා තිබුණු බව. කෝටි දෙකක් එකතුවෙන්නේ ඒ හැමෝගේම මුදලින්.
ත‍්‍රස්තවාදී සංවිධානයකින් මේ මුදල් ලැබුණාදෝ කියලා ඔහු කියනවා. ඔහු චෝදනා කරන්නේ මගේ ගිණුමකට වැටුණු බවනේ. මම ඔහුගෙන් අහනවා ඔය කියන ගිණුම් අංකය හෙළි කරන්න කියලා. බැංකුවේ නම, ගිණුමෙහි හිමිකරුවා ලෙස බැංකුවේ සටහන් වෙලා තියෙන නම හෙළිකරන්න කියලා. ඔය තරම් තොරතුරු ඔහු ළඟ තියෙනවා නම් පැහැදිලිව හෙළි කරන්න. මම මගේ බැංකු ගිණුමේ විස්තර පරීක්ෂා කරලා බැලූවා. මගේ ගිණුම ඕඞී වෙලා තිබුණේ. ඒ කියන්නේ මම බැංකුවට ණයයි.
අපේ ව්‍යාපෘතියට සහයෝගය ඉල්ලලා අපි මාධ්‍ය ආයතන තිහකට විතර ලියුම් යැව්වා. ඒවායේ ප‍්‍රතිඵලයක් විදියට විජය පුවත්පත් ආයතනය කෝටි 2ක පමණ නොමිලේ දැන්වීම් පළකළා. දෙරණ අපේ මාධ්‍ය සහකරු විදියට ඉදිරිපත් වුණා. ඔවුන් මේ ව්‍යාපෘතියෙහි ගිණුම් අංකය දාලා ඔවුන්ගේ මනුසත් දෙරණ ව්‍යාපෘතියේ කොටසක් විදියට මේකට ප‍්‍රචාරය දුන්නා. ඇත්තටම ඔවුන් ප‍්‍රචාරය කළේ මේ ව්‍යාපෘතිය ඔවුන් තනිවම කරන එකක් විදියට. ඔවුන් මේ ව්‍යාපෘතිය තමන්ගේ අතට ගන්න ඒ වෙලාවේ උත්සාහ ගත්තා.
එහෙත් අපි ඒකට කැමැත්තක් දැක්වුවේ නැහැ. ඒ මාධ්‍ය ආයතන අපි ගැන නොදන්නවා නෙවෙයි. අපේ ව්‍යාපෘතිය ගැනත්, එහි ගිණුම් අංක ගැනත් නොදන්නවා නෙවෙයි. ඔවුන් දැන දැනම ජාතිවාදී අරමුණෙන් අපට එල්ලකළ චෝදනා අපෙන් කිසිම විමසීමක් නොකර ප‍්‍රසිද්ධ කළා.
මෑතකදී එතුමා ෆෙස්බුක් අඩවියේ මට නින්දා අපහාස කරලා තිබුණා. ඌරා, සූකරයා, තම්බියා, හම්බයා, හරක්ගේ බෙල්ල කපන එවුන් වගේ ඉතාම ග‍්‍රාම්‍ය, ජාතිවාදී සහ නින්දිත ආකාරයට තමයි අපහාස කරලා තිබුණේ. ඒ අතරේ ඔහු කියලා තිබුණා ජනාධිපති ගෝඨාභය රාජපක්ෂ මහතාට සුළු ජාතිකයන්ගේ ඡුන්ද ඕනෑ නැති බව. ජනාධිපතිවරයාට මේ කතාව එක්ක කිසිම සම්බන්ධයක් නැහැ. ඔහුවත් මේකට ඇදලා අරගෙන තිබුණා.
මම ඔහුට මරණ තර්ජන කළ බවත් කියනවා. එසේ කළා නම් ඒවා මාධ්‍යවලට පෙන්වන්න පුළුවන්. මම තර්ජනය කරපු දිනය, වෙලාව හෙළිකරන්න පුළුවන්. මම අන්තිමට ඔහුට ¥රකථන ඇමතුමක් ගත්තේ මාස 7කට කලින්. මීට පෙර සිටම ඔහුගේ හැසිරීම නිසා මට ඔහුව එපා වෙලයි තිබුණේ.‘
ඔහුට මේ සියලූ චෝදනා ඔහුගේ නමේ ඇති මොහොමඞ් කොටස නිසා බව පැහැදිලිය. රටේ ජනතාව මේ සිදුවීම හරස්කඩක් ලෙස ගත යුතුය. එම්.එස්.එච්. මොහොමඞ් මහතා රටේ ගෞරවය දිනාගත් කෙනෙකු වන නිසා ඔහුට එල්ලකර ඇති චෝදනා බොහෝ දෙනෙකු විශ්වාස නොකරන බව පැහැදිලිය. කෙසේ වෙතත් අනෙක් මොහොමඞ්ලාට එල්ලකරන චෝදනා පවා මේ වර්ගයේම ඒවා විය හැකි බව උගත්, බුද්ධිමත් මිනිසුන් තේරුම්ගත යුතුය. එවැනි චෝදනාවලට ඉතා ප‍්‍රවේශමෙන් ඇහුම්කන් දී ඇත්ත නැත්ත අවබෝධ කරගත යුතුය.
වසන්ත දිසානායක
පිළිකා රෝගය යනු කෙතරම් භයානක තත්වයක්ද යන කාරණාව පිළිබඳව රෝහල් අධ්‍යක්ෂ වසන්ත දිසානායකට කිසිම අවබෝධයක් නැති බව පෙනී යයි. පිළිකා රෝගය කෙතරම් මරණය සමග ගැටගැසී ඇත්ද යන්නත්, පිළිකා රෝගය කෙරෙහි සමාජය දක්වන ආකල්පය කෙතරම් සංවේදීද යන්නත් ඔහුට කිසිම අවබෝධයක් නැත. අවශ්‍ය උපකරණ නැතිකම නිසා පිළිකා රෝගීන් විඳින පීඩාව ගැනත් ඔහුට කිසිදු අදාලත්වයක් නැත. ඔහුට අවැසි බව පෙනෙන්නේ තමන්ගේ පෞද්ගලික වුවමනා වෙනුවෙන් චෝදනා එල්ලකිරීම පමණි.
එම්.එස්.එච්. මොහොමඞ් මහතාගේ පැත්තෙන් මානුෂීයව මෙම ප‍්‍රකාශ සැලකුවොත්, ඔහුගේ හිතේ ඇතිවන වේදනාව, කෝපය සහ කළකිරීම කෙතරම්ද යන්න අනුමාන කළ නොහැකි තරම්ය. ඔහුට තිබුණු විශාලම සම්පත වු පුත‍්‍රයාගේ ජීවිතය පිළිකා රෝගයෙන් අහිමි වී ඇත. ඉන්පසුව ඔහු මනුෂ්‍යයෙකුට කළ හැකි වටිනාම කටයුත්තක් වෙනුවෙන් ස්වෙච්ඡුාවෙන් ඉදිරිපත්ව සිටී. ඔහුට ලැබෙන ලාභයක්ද නැත. එතරම් දෙයක් කරද්දීත් තමන්ගේ ජාතිය අල්ලාගෙන මාධ්‍යවලින් පහරදීම ගැන ඔහුට දැනෙන්නේ කෙබඳු හැඟීමක්ද යන්න අනුමාන කරන්නටත් අසීරු තරම්ය.
කෙසේ වෙතත් වෛද්‍ය වසන්ත දිසානායකගේ ඉතිහාසයේ මෙවැනි අසංවේදී සිදුවීම් ඇත. ඔහු රංගන ශිල්පිනී රෙබෙකා නිර්මලී මහත්මිය මියයෑමෙන් පසුව 2014 අගෝස්තු තුන්වැනි සතියේ සරසවිය පුවත්පතකට කියා තිබුණේ බොහෝ කලාකරුවන් පිළිකාවෙන් මිය යන බවයි. වැරදි ලිංගික ක‍්‍රියාකාරකම් එවැනි මරණ සඳහා හේතු වන බව ඔහු කියා තිබුණි.
එල්ටීටීඊ සංවිධානයේ දේශපාලන අංශයේ සිටි තමලිනී ජෙයක්කුමාරන් යුද්ධයෙන් පසු සාමකාමීව සමාජයේ ගැවසුණු කාන්තාවකි. රජයේ ගෞරවය පවා ඇයට ලැබී තිබුණු අතර උතුරේ සංහිඳියාවට අදාල වැඩසටහන්වලදී රාජපක්ෂ රජය සමඟද ඇය සමීපව කටයුතු කළාය. තමන්ගේම කැරලිකාර ජීවිතය ගැන මධ්‍යස්ථව දකිමින් ඇය ජීවිත කතාවක්ද ලියා තිබුණි. ඇය අවසාන කාලයේ මහරගම පිළිකා රෝහලේ ගත කර තිබුණු අතර මියගියේ පිළිකා රෝහලේදීය.
පිළිකා රෝහලේ වෛද්‍යවරුන් කිහිපදෙනෙකුම අප සමඟ කීවේ තමලිනී ජෙයක්කුමාරන්ගේ මරණයෙන් පසු මාධ්‍යවේදීන්ද රැුගෙන වසන්ත දිසානායක වෛද්‍යවරයා පැමිණ තිබුණු බවය. කොටි කාන්තාවක රෝහලට ඇතුලත් කළේ කවුදැයි අසමින් ඔහු පැමිණ තිබූ බවත්, කොටි කාන්තාවගේ සිරුර මාධ්‍යවලට පෙන්වන්නට ඕනෑ බව කියමින් තමලිනීගේ සිරුර කැමරා අතැති මාධ්‍යවේදීන්ට පෙන්වන්නට උත්සාහ කළ බවත් එම වෛද්‍යවරු කියති. ඒ මොහොතේ තමලිනී ජෙයක්කුමාරන්ට ප‍්‍රතිකාර කළ පිළිකා රෝග විශේෂඥ වෛද්‍ය මහේන්ද්‍ර පෙරේරා එයට දැඩිව විරුද්ධ වී තිබුණි. එම සිදුවීමෙන් පසුව පිළිකා රෝහලේ වෛද්‍යවරුන් අතර වෛද්‍ය වසන්ත පෙරේරා පිළිබඳව විරෝධයක් මතුවී තිබුණු අතර ඔහු කෑගල්ල රෝහලේ අධ්‍යක්ෂවරයා ලෙස පත්කර යවා තිබුණේ ඉන් පසුවය. ඉහත සිදුවීම ගැන අප විමසීමේදී වෛද්‍ය වසන්ත දිසානායක අදහස් දැක්වීම ප‍්‍රතික්ෂේප කළේය.
එම්.එස්.එච්. මොහොමඞ් මහතාට එරෙහිවත් ජාතිවාදී ආකාරයෙන් සමාජ මාධ්‍යවල අපහාස කරමින් වසන්ත දිසානායක මහතා හැසිරුණු ආකාරය සමාජ මාධ්‍යවල විශාල කතාබහකට ලක්ව තිබුණි. මේ වෙද්දී වසන්ත දිසානායක මහතාගේ ෆෙස්බුක් ගිණුම අවලංගු කර තිබේ. ෆෙස්බුක් ගිණුමේ හිමිකරු අවලංගු කරගැනීම හෝ වෛරී ප‍්‍රකාශ කිරීමෙන් පසු ෆෙස්බුක් ගිණුම අනෙකුත් පරිශීලකයන්ගේ පැමිණිලි නිසා අවලංගු කිරීම සිදුවිය හැකිය.
කෙසේ වෙතත් රෝහල් අධ්‍යක්ෂවරයාගේ අදහස් ප‍්‍රකාශ කිරීම් හා හැසිරීම් අතිශය වෛරී සහ භයානක ඒවා බව අමුතුවෙන් කිව යුතු නැත. එමෙන්ම රෝහල් අධ්‍යක්ෂවරයා පිටතට පැමිණ මෙලෙස හැසිරීම් දක්වන්නේ ගෝඨාභය රාජපක්ෂ මහතා ජනාධිපතිවරණයෙන් ජයගත් පසුව බවද පැහැදිලිය. ඔහු කල්පනා කරනවා ඇත්තේ තමන් එවැනි ප‍්‍රකාශ කිරීමෙන් ආණ්ඩුවේ හිත දිනාගැනීමටත්, ආණ්ඩුවේ ආශීර්වාදය ලැබීමටත් හේතුවනු ඇති බවය. ඔහු ඍජුවම ජනාධිපතිවරයාගේ මැතිවරණ ජයග‍්‍රහණය ගැනත් කතාකරමින් අදහස් සමාජගත කරන්නේ ඒ නිසාය. වෛද්‍ය වසන්ත දිසානායක වත්මන් ආණ්ඩුවෙහි ප‍්‍රබල හිතවතෙකුදැයි අප දන්නේ නැත. එහෙත් ඔහු පෙන්වන හැසිරීම ආණ්ඩුවට කොහෙත්ම සුබදායක නොවන බව නම් කිවයුතුය.
දැන් අපට බලාසිටින්නට සිදුවෙයි. ඒ, ආණ්ඩුව කුමක් කරනවාද යන්නය. මේ කතාවේ කේන්ද්‍රය ඇත්තේ එතැනය. ආණ්ඩුව ගන්නා පියවර කුමක්ද යන කාරණය මතය. වසන්ත දිසානායක මහතා කර ඇත්තේ කුමක්දැයි ඉතා පැහැදිලිය. ඔහු අතිශය ගෞරවනීය ස්වෙච්ඡුා සංවිධානයකට ත‍්‍රස්තවාදී චෝදනාවක් එල්ලකර තිබේ. චෝදනාවෙහි බරපතළකම අතිශයින් භයානක බව අමුතුවෙන් කිව යුතු නැත. මෙය ඊටත් වඩා භයානක වන්නේ ආණ්ඩුව මේ ජාතිවාදී රෝහල් අධ්‍යක්ෂවරයා ආරක්ෂා කළහොත්ය. සත්‍යය සමාජගත කිරීම හා වෛරී ප‍්‍රකාශ කළ නිලධාරියාට එරෙහිව පරීක්ෂණයක් කිරීම ආණ්ඩුවේ වගකීමය. එසේ නොවුණහොත් ශ‍්‍රී ලංකාවේ මුස්ලිම් ජනතාවට ඉතා භයානක පණිවුඩයක් යනු ඇත. සුළුතර ජනතාව දිනාගැනීමට උත්සාහ කළ යුතු ආණ්ඩුවක් එයට සම්පූර්ණයෙන්ම ප‍්‍රතිවිරුද්ධ මාවතක ගමන් කරන බව සමාජයට තහවුරු වනු ඇත.
දෙසැම්බර් 12 වැනිදා මාධ්‍ය හමුවකදී රෝහල් අධ්‍යක්ෂ වසන්ත දිසානායක එල්ලකළ චෝදනා
මහරගම අපේක්ෂා රෝහලට විකිරණ යන්ත‍්‍ර ලබාදෙන්න කියලා මොහොමඞ් නමැති පුද්ගලයෙක් මුදල් එකතු කරනවා. ඒ තැනැත්තා මීට කලින් මේ රෝහලට පෙට්ස්කෑනින් යන්ත‍්‍රයක් ලබාදීලා තියෙනවා. ඇත්තටම අපි ඒ ගැන ඔහුට ස්තුතිවන්ත වෙනවා. ඔහු මෙවර රුපියල් කෝටි සියයක් එකතු කරනවා. ඒ ගන්න යන්ත‍්‍රය කොහෙද තියන්නේ. ඒ ගැන කිසිම දෙයක් කතා කරලා නැහැ. මට තියෙන ප‍්‍රශ්නය ඔහු හැමවේලාවේම පාවිච්චි කරනවා අපේක්ෂා රෝහලේ ගිණුම කියලා. නමුත් මම දැඩි වගකීමකින් යුතුව කියනවා. මම මේ ගැන මිරිහාන රෝහලයි, මහරගම රෝහලයි දැනුවත් කළා. මිරිහාන පොලිසියේ එස්එස්පීවරයා මගේ දැනුවත් කිරීමට ප‍්‍රතිචාර දැක්වුවා. මේ ලිපි ගොනුව අධ්‍යක්ෂ, අපරාධ විමර්ශන දෙපාර්තමේන්තුවට යොමු කරලා තියෙන්නේ අගෝස්තු මාසයේ. නමුත් කිසිම ක‍්‍රියාවක් ගත්තේ නැහැ. කලින් හිටපු ජනාධිපතිවරයාට මම පෞද්ගලිකව කතා කරලා කිවුවා මේ ක‍්‍රියාව නවත්වන්න කියලා. නමුත් කිසිම පියවරක් ගත්තේ නැහැ.
මේ මොහොමඞ් ගැන මට තව ප‍්‍රශ්නයක් තියෙනවා. අපේ‍්‍රල් 21 සහරාන් බෝම්බ ගැහුවේ. අපේ‍්‍රල් 22 රුපියල් මිලියන 20ක් මොහොමඞ්ගේ ගිණුමට වැටිලා තියෙනවා. මගේ ගාව තියෙනවා ඔහුගේ ගිණුමේ විස්තර. අපේ‍්‍රල් 21 කොහොමද ඔහුට මිලියන 20ක් ලැබුණේ. මිනිස්සු බැංකුවට ගියාද? මේ කාගේ සල්ලිද? මේ ත‍්‍රස්තවාදීන්ගේ කළු සල්ලිද? හංගන්න ඕනෑ නිසා මේ ගිණුමට දැම්මාද? මට කරන්න පුළුවන් හැමදේම මම කළා. බැරිම තැන තමයි ජනාධිපතිතුමාට මෙහෙම ඇමතුවේ. මම හිතනවා මේ සැරේ සාධාරණයක් වෙයි කියලා.
http://www.health.gov.lk/moh_final/english/public/elfinder/files/publications/2019/act-13-1981.pdf
