අපරාධ පරීක්ෂණ දෙපාර්තමේන්තුවේ අධ්‍යක්ෂ ජ්‍යෙෂ්ඨ පොලිස් අධිකාරී ශානී අබේසේකර, සමූහ මංකොල්ල විමර්ශන අංශයේ සහ විශේෂ ඒකකයේ සහකාර පොලිස් අධිකාරී ඞී.එස්. තිසේරා, සමූහ මංකොල්ල විමර්ශන අංශයේ ස්ථානාධිපති පොලිස් පරීක්ෂක නිශාන්ත සිල්වා යන එම දෙපාර්තමේන්තුවේ ඉහළ නිළධාරීන් තිදෙනාට මාරුවීම් නිර්දේශ කර ඇතැයි වාර්තා වේ.
එම මාරුකිරීම්වලට අදාළව නිල තහවුරු කිරීම් නොවැම්බර් 21 වැනි දින දහවල් වනවිටත් අදාළ අංශවලට සහ එම නිළධාරීන්ට ලැබී තිබුණේ නැත. එහෙත් ස්ථිර වශයෙන්ම මෙම නිළධාරීන් තිදෙනා මාරුකර ඇති බව උසස් පොලිස් නිළධාරියෙක් අනිද්දා කළ විමසීමකදී තහවුරු කළේය.
මෙම පොලිස් නිළධාරීන් තිදෙනා මාරු කරනවිට ඔවුන් ප‍්‍රගීත් එක්නැළිගොඩ පැහැරගෙන යාම සහ ඝාතනයට අදාළ සියලූ පරීක්ෂණ ද නාවික හමුදා ඝාතක කණ්ඩායමක් විසින් පැහැරගෙන ගොස් ඝාතනය කරනු ලැබූ පුද්ගලයන් 11 දෙනා පිළිබඳ පරීක්ෂණ ද සාර්ථකව අවසන් කර අදාළ ගොනු නීතිපතිවරයා වෙත යවා තිබුණි. ඊට අමතරව ලසන්ත වික‍්‍රමතුංග ඝාතනය, රගර් ක‍්‍රීඩක වසීම් තාජුඞී ඝාතනය, කීත් නොයාර් පැහැරගෙන ගොස් වධහිංසා පැමිණවීම, උපාලි තෙන්නකෝන්ට පහර දීම ආදි සිදුවීම් පිළිබඳව පරීක්ෂණ සාර්ථකව ඉදිරියට මෙහෙයවමින් සිටියේ මෙම නිළධාරීන් තිදෙනාගේ මූලිකත්වයෙන්ය. වෛද්‍ය සාෆි ෂියාබ්දීන්ගේ සිද්ධියට අදාළව පරීක්ෂණ කටයුතු සිදුවූවේද මෙම නිළධාරීන් තිදෙනා යටතේය. මීට පෙර හිටපු ජනාධිපති මෛත‍්‍රීපාල සිරිසේන මහතා පොලිස් පරීක්ෂක නිශාන්ත සිල්වා අපරාධ පරීක්ෂණ දෙපාර්තමේන්තුවෙන් මාරුකර යැවීමට කටයුතු කළ අතර එය පොලිස් කොමිසම මැදිහත්වී වැළැක්වීය.
