සිය මැතිවරණ ප‍්‍රචාරණ සම්මන්ත‍්‍රණයක් අමතමින් ගෝඨාභය රාජපක්ෂ 19 වැනි ආණ්ඩුක‍්‍රම ව්‍යවස්ථා සංශෝධනය ගැන අදහසක් දක්වා තිබේ.
ඔහු එහිදී කියාඇත්තේ 19 වැනි ආණ්ඩුක‍්‍රම ව්‍යවස්ථා සංශෝධණය සිය පවුල හෙවත් රාජපක්ෂ පවුල අරමුණු කරමින් ගෙන ආ එකක් බවය. පවුලක් අරමුණු කරගනිමින් සිදුවූ එය ලෝකයේ කිසිදු රටක සිදුවී නැති දෙයක් බවද ඔහු කියා ඇත.
සිය සහෝදරයා වූ මහින්ද රාජපක්ෂට යළි ජනාධිපතිධූරයට තරඟ කරන්නට බැරි තත්වයක් ඉන් ඇතිකළ බවද, මහින්ද රාජපක්ෂගේ පුතු වූ නාමල් රාජපක්ෂට ජනාධිපතිවරණයට තරඟ කිරීමට බැරි ලෙස වයස අවුරුදු තිහක් වූ සීමාව වයස අවුරුදු තිස්පහ දක්වා වැඩිකළ බවද ඔහු කියා දී ඇත. එමෙන්ම ද්විත්ව පුරවැසියන්ට තරඟ කිරීමට බැරි කළේද සිය පවුල ඉලක්ක කරමින් බව ඔහු කියා ඇත.
එම තත්වය නිසා තමාට ජනාධිපතිවරණයට තරඟ කරන්නට සිදුවූ බව ඔහු එහිදී කියා ඇත.
ගෝඨාභය රාජපක්ෂ සමහර වෙලාවට නොදැනුවත්වම ඇත්ත කියන බව එයින් පෙනී යයි. මහින්ද රාජපක්ෂට තවදුරටත් තරඟ කිරිමට හැකිවුණානම් හෝ නාමල් රාජපක්ෂට තරග කිරීමට හැකිවුණානම් අද ගෝඨාභය රාජපක්ෂ කෙනෙක් තරග බිමේ නැත. එහි තේරුම වන්නේ ගෝඨාභය රාජපක්ෂ සුදුසු නිසා නොව ඉහත කී අයියා හා පුතා නුසුදුසු නිසා ඔහුට අවස්ථාව ලැබී ඇති බවය.
අනෙක් පැත්තෙන් ගෝඨාභය රාජපක්ෂ අමතක කරන සත්‍යයක්ද තිබේ. ඒ ඔහුගේ සහෝදර මහින්ද රාජපක්ෂ ගෙනා 18 වැනි ආණ්ඩුක‍්‍රම ව්‍යවස්ථා සංශෝධනයය. ඉන් කළේ 17 වන සංශෝධනයෙන් ඇතිකර තිබූ ස්වාධීන කොමිෂන් සභාවල බලය ඔහු අතට ගැනීමය. දෙවරකට වඩා ජනාධිපති පදවියට පත්වන්නට බැරි බවට වූ ප‍්‍රතිපාදනය අයියා ඔහු වෙනුවෙන් සංශෝධනය කරගැනීමය. එය ව්‍යවස්ථාව හැ¥ ජේ.ආර්. ජයවර්ධන පවා අත නොතැබූ එකක්ය. 19 සංශෝධනයෙන් කළේ එම වරදවල් නිවැරදි කිරීමය. තවදුරටත් ස්වාධීන කොමිෂන් සභාවලට බලය දීමය. පත්කිරීම් සිදුකිරීමේදී විධායක ජනාධිපතිවරයෙකුට තිබූ ප‍්‍රශ්න කළ නොහැකි බලය සීමා කිරීමය.
එම තත්වයන් එක් පවුලකට හොඳ නැති වුවාට රටකට යහපත්ය. ඔහුට එරෙහි නඩු සම්බන්ධයෙන් පසුගිය කාලයේ දුන් අධිකරණ තීන්දුවලින්ම එම යහපත් තත්වය ඔහු තේරුම් ගන්නවානම් හොඳය. එමෙන්ම 19 සංශෝධනය ගෙන එන්නට සිදුවූයේ 18 සංශෝධනය නිසා බවද ඔහු දැනගත යුතුය.
