රජයෙන් නොමිලයේ ලබාදෙන සුඛෝපභෝගී පහසුකම් තනතුරු මාරුවක් සමඟ අලුත් කිරීමේ මේනියාවක් ශ්‍රී ලංකාවේ අමාත්‍ය මණ්ඩලයේ සමහර සාමාජිකයන්ට ඇත.
අමාත්‍ය මණ්ඩල විෂය වෙනස් වීමකදී අලුත් අමාත්‍යාංශයෙන් ලැබෙන වාහන අලුත් ඇමතිට පරණය. අමාත්‍ය කාර්යාලය පරණය. එය අලුත්වැඩියා කළ යුතුය. ගෘහභාණ්ඩ පරණය. ඒවා අලුතින් ගත යුතුය. තිර රෙදිද අලුත් කළ යුතුය.
සමහරුන්ට අමාත්‍යාංශ ගොඩනැගිල්ල පරණය. නැත්නම් ඉඩ ප්‍රමාණය මදිය. ඒ සඳහා ඉඩ වැඩි අලුත් සුඛෝපභෝගී ගොඩනැගිලි සොයයි. එසේ අලුත් ගොඩනැගිල්ලක් සොයාගතහොත් ඊට ගෙවිය යුත්තේ මහජනයාගේ මුදල්ය. ඇමතිවරුන්ගේ සාක්කුවෙන් නොවන නිසා ඔවුන්ට ප්‍රශ්නයක් නැත.
මේ ආකාරයට අලුත්ම ගොඩනැගිලි ගාය වැළඳී ඇත්තේ විදුලිබල, බලශක්ති හා ව්‍යාපාර සංවර්ධන අමාත්‍ය රවී කරුණානායකටය.
දැනට විදුලිබල අමාත්‍යාංශය පවත්වාගෙන යන කොළඹ 07 ආනන්ද කුමාරස්වාමි මාවතේ ලක්ෂ්මන් කදිරගාමර් ගොඩනැගිල්ල අලුත් අමාත්‍යවරයාගේ කටයුතුවලට ඉඩ මදිවී ඇතැයි කියනු ලැබේ. ඇත්තම හේතුව ඉඩම මදිවීමද, නැතිනම් සුඛෝපභෝගී නොවීමදැයි දන්නේ අමාත්‍යවරයාම පමණි.
ඒ නිසාම දැන් විදුලිබල, බලශක්ති හා ව්‍යාපාර සංවර්ධන අමාත්‍යාංශය කොළඹ 02 නවම් මාවතේ පිහිටි ගොඩනැගිල්ලකට ගෙනයෑමට විෂයභාර අමාත්‍ය රවී කරුණානායක තීරණය කර ඇත.
අලුත් ගොඩනැගිල්ල වර්ග අඩි 40,000කි. එක් වර්ග අඩියක් සඳහා රුපියල් 260ක් ගෙවීමට නියමිතය. දැන් අමාත්‍යාංශය ඇති ගොඩනැගිල්ල වර්ග අඩි 19000කි. එහි වර්ග අඩියක් සඳහා ගෙවන්නේ රුපියල් 74කි.
ඒ අනුව නව ගොඩනැගිල්ලේ මාසික කුලිය රුපියල් මිලියන 10.4කි. නැත්නම් රුපියල් එක්කෝටි හාරලක්ෂයකි. අවුරුද්දක් සඳහා කුලිය රුපියල් මිලියන 124කි. මේ ගොඩනැගිල්ල මුලින්ම කුලියට ගන්නට යන්නේ අවුරුදු දෙකක් සඳහාය. ඒ අනුව ඒ සඳහා යන වියදම රුපියල් මිලියන 248කි.
ගොඩනැගිල්ල කුලියට ගැනීම සඳහා ඉල්ලන ලද මුදල ලබාදීම මුදල් අමාත්‍යාංශය ප්‍රතික්ෂේප කර ඇත. දැන් එම මුදල ලබාගැනීමට යන්නේ විදුලිබල අමාත්‍යාංශය යටතේ ඇති ලංකා විදුලි පෞද්ගලික සමාගම හෙවත් ලෙකෝ සමාගමෙන්ය. මේ වනවිටත් එම ගනුදෙනුව සඳහා ලංකා විදුලිබල මණ්ඩලයේ වෘත්තිය සමිති විරෝධය දක්වා ඇත.
මේ ගොඩනැගිලි ගනුදෙනුව අනුමත කරගැනීම සඳහා විදුලිබල, බලශක්ති හා ව්‍යාපාර සංවර්ධන අමාත්‍ය රවී කරුණානායක අමාත්‍ය මණ්ඩලයට අවසන් සටහන ඉදිරිපත් කර ඇත්තේ 2019 ජුලි 31 වැනිදාය. ඊට අනුව මේ සඳහා මුල්ම කැබිනට් පත්‍රිකාව ඉදිරිපත් කර ඇත්තේ 2019 ජුනි 14 වැනිදාය. පසුව ඊට අදාල අමාත්‍ය මණ්ඩල සටහනක් 2019 ජුලි 02 වැනිදා ඉදිරිපත් කර ඇත.
මේ ගොඩනැගිලි ගනුදෙනුව සඳහා විවෘත තරගකාරී ලංසු කැඳවා ඇත්තේ 2019 මාර්තු 03 වැනිදාය. ඒ ඔහු අලුත් අමාත්‍යධුරයට පත්වී මාස තුනක් ගතවෙද්දීය. එම ලංසුවේදී ලංසු 5ක් ඉදිරිපත් කර ඇත. තාක්ෂණික ඇගයීම් කමිටුව හා ස්ථාවර ප්‍රසම්පාදන කමිටුව ඒවා සලකා බලා ඇත.
එම ලංසුවේදී ඉදිරිපත් වූ කොන්දේසි හා අනෙකුත් දුර්වලතා නිසා නැවත දින දහයක හදිසි මිල ගණන් කැඳවීමක් සිදුකර ඇත. එහිදී ලංසු දෙකක් ඉදිරිපත් වී ඇති අතර ඒවා තාක්ෂණික ඇගයීම් කමිටුව ඇගයීමට ලක්කර ඇත. කුලී මුදල සම්බන්ධයෙන් රජයේ තක්සේරුකරුගේ මතය ලබාගන්නා ලෙස ස්ථාවර ප්‍රසම්පාදන කමිටුව දන්වා ඇත.
ඒ අනුව රජයේ තක්සේරුකරු මෙම ගොඩනැගිල්ලේ එක් අඩියක් සඳහා තක්සේරු කර ඇති මුදල රුපියල් 212.50කි. එහෙත් රජයේ තක්සේරුකරුගේ නිගමනය පසෙක දා මිල සඳහා කැබිනට් මණ්ඩලය අනුමැතිය ලබාදී ඇත.
නව ගොඩනැගිල්ලේ එක් අඩියකට රුපියල් 260ක් වූ මිල ඉදිරිපත් කළ ලංසුකරු ඉදිරිපත් කර ඇති මිල වී ඇත්තේ වර්ග අඩියකට රුපියල් 285කි. එම මිල රුපියල් 260 දක්වා අඩු කරගෙන ඇත්තේ ඒ සඳහා කරන ලද සාකච්ඡාවකින් පසුවය. මේ ආකාරයට සාකච්ඡා කර මිල තීරණය කිරීමේ හැකියාව ලැබී ඇත්තේ අවසන් හදිසි මිල කැඳවීමේදී ලංසුකරුවන්ට අභියාචනා සඳහා අවස්ථාව නොදීම නිසාය. මේ තෝරාගත් ලංසුකරුම පළමු මිල කැඳවීමේදී වර්ග අඩියක් සඳහා රුපියල් 300ක මුදලක් ඉදිරිපත් කර ඇත.
එළැඹෙන සැප්තැම්බර් 15 දින විදුලිබල බලශක්ති හා ව්‍යාපාර සංවර්ධන අමාත්‍යාංශය නවම් මාවතේ අලුත් ගොඩනැගිල්ලකට යන බව ප්‍රකාශයට පත්කර ඇත. ඒ අනුව ඊට අදාල ගිවිසුම්ද අත්සන් කර සම්පූර්ණ කුලී මුදල හෝ ඉන් කොටසක් මේ වනවිට ගෙවා අවසන්ද විය හැක. කොහොමත් ලෙකෝ සමාගමෙන් ලැබෙන රුපියල් මිලියන 200ක මුදලින් අවුරුදු දෙකේ සම්පූර්ණ කුලී මුදල ගෙවිය නොහැකිය.
මෙහිදී පැනනගින ප්‍රශ්නය වන්නේ අමාත්‍ය රවී කරුණානායක වර්ග අඩියක් සඳහා වැඩිම කුලී මුදලක් ගෙවා අමාත්‍යාංශයක් පවත්වාගෙන යෑමේ වාර්තා ගොන්නට ඔහුගේ නමද ඇතුළත් කරගැනීමට උත්සාහ දරනවාද යන්නයි.
ඒ වෙන කිසිවක් නිසා නොව පසුගිය කාලයේ මහත් ආන්දෝලනයකට ලක්වූ රාජගිරියේ කෘෂිකර්ම අමාත්‍යාංශ ගොඩනැගිල්ල දුමින්ද දිසානායක හිටපු ඇමතිවරයා කුලියට ගෙන තිබුණේ වර්ග අඩියක් රුපියල් 228කට වන නිසාය.
වත්මන් යහපාලන ආණ්ඩුවේ බරපතළ වංචා දූෂණ සොයාබලන ජනාධිපති විමර්ශන කමිටුව දැන් එම ගොඩනැගිල්ල කුලියට ගැනීම පිළිබඳව කරුණු විමසමින් සිටියි. ඊට කරුණු කීම සඳහා හිටපු අමාත්‍ය දුමින්ද දිසානායක ඇතුළු කෘෂිකර්ම අමාත්‍යාංශයේ නිලධාරීන්ටද, ගොඩනැගිලි හිමිකාර පාර්ශ්වය වූ ඩී.පී. ජයසිංහ සමාගම වෙනුවෙන් නිළි සබීතා පෙරේරාටද එහි යන්නට සිදුවී තිබුණි.
රවී කරුණානායක අමාත්‍යවරයාගේ මේ ගොඩනැගිලි ගනුදෙනුව තවත් කෘෂිකර්ම ගොඩනැගිලි ගනුදෙනුවක් මෙන් නොවනු ඇතැයි කිව නොහැකිය.■
