රන්දෙවොල ගිනිගත්තේය…

කුසලානය එංගලන්තයට
සැබෑ ජයග‍්‍රාහකයෙක් නෑ
නූතන ක‍්‍රිකට් ඉතිහාසයේ ශ්‍රේෂ්ඨතම ක‍්‍රිකට් තරගය
බෙන් ස්ටෝක්ස් තරගයේ වීරයා

‘නවසීලන්තය එක්දින ක‍්‍රිකට් ලෝක කුසලානය ජයගත්තා, එංගලන්තය එක්දින ක‍්‍රිකට් ලෝක කුසලානය ජයගත්තා.‘ ලෝක කුසලානයේ මේ වාක්‍ය දෙකෙන් එකක් ලියා අවසන් තරගය ගැන ලියන්නට අප බලා සිටියා.
අපට ඕනෑ වුණේ සින්ඩරෙල්ලා ක‍්‍රිකට් කතාවක්. නෑඹුල් ලෝක ශූර කණ්ඩායමක්. සුන්දර අවසානයක්. ඒත් අප කිසිසේත්ම නොසිතූ දෙයක් සිදුවුණා. තරගය අවසන් වූ පසුව එක් සැබෑවක් පසක් වුණා. ඉහත කී වාක්‍ය දෙකෙන් එකක් ලියා මේ සටහන පටන්ගැනීම ලෝඞ්ස් පිටියේදී ජුලි 14 වැනිදා පැවති තරගයට අවමානයක්. මදිපුංචිකමක්.

ලෝක කුසලාන අවසන් තරගය පිළිබඳව ලියන සටහන ආරම්භ විය යුත්තේ වෙනත් වාක්‍යයකින්. ‘නූතන ලෝක ක‍්‍රිකට් ඉතිහාසයේ ශ්‍රේෂ්ඨතම ක‍්‍රිකට් තරගය අවසාන වුණා.‘ අප ඒ වාක්‍යයෙන් මේ සටහනට දෙවැනි ආරම්භයක් ගත යුතුයි. ඇත්තටම මේ තරගයේ ජයග‍්‍රාහකයාගේ නමට ලැබෙන්න ඕනෑ ද්විතීය වටිනාකමක්. අප අවංක වුණොත් මේ තරගයට ජයග‍්‍රාහකයෙක් නැහැ. කණ්ඩායම් දෙකම ලොව උණුසුම්ම ක‍්‍රිකට් තරගය පේ‍්‍රක්ෂකයන්ට දායාද කරමින් ජයගත්තා. ක‍්‍රිකට් නීතිපොතේ එක් වගන්තියකින් මිස, ලකුණුවලින් එංගලන්තය තරගය ජයගත්තේ නැහැ.

සුපිරි පන්දුවාරය

මාටින් ගප්ටිල් හා ජිමී නීෂම් පිති අතැතිව පිටිය කරා එමින් සිටිනවා. එංගලන්ත පිළ පිටිය මැද්දේ පන්දු රකින්නට සූදානම් වෙනවා. ගප්ටිල්. ලොව භයානකම පිතිකරුවෙක්. නවසීලන්තය මෙවර ලෝක කුසලාන තරගාවලියට එද්දී නවසීලන්තයට සිටි ලොකුම බලාපොරොත්තුවක්. එහෙත් මෙවර ලෝක කුසලානයේදී ගප්ටිල් භයානක පිතිකරුවෙක් ලෙස මතුව ආවේ නැහැ. එහෙව් ගප්ටිල් නීෂම් සමග පිටියට එමින් සිටියේ සුපිරි පන්දුවාරයකට මුහුණදෙන්නට. ගප්ටිල්ට සිය අසාර්ථකත්වය සම්පූර්ණයෙන්ම මකා වෙනත් කතාවක් ලියන්නට මේ පන්දුවාරයෙන් හැකිවේවිද. ඔහු අසාර්ථකත්වයක් ලෙසම ඉතිහාසගත වේවිද.

සුපිරි පන්දුවාරයක් යනු, තනි පන්දුවාරයකින් යුත් ක‍්‍රිකට් තරගයක් වගෙයි. පන්දුවාරයේදී වැඩිම ලකුණු ලබන කණ්ඩායම දිනුම්. එහෙත් සුපිරි පන්දුවාරයේදී පිතිකරණයේ යෙදිය හැක්කේ පිතිකරුවන් තිදෙනෙක්ට පමණයි. කඩුලූ දෙකක් බිඳවැටුණොත් සුපිරි පන්දුවාරයේ ඉනිම අවසන්. ඒ අනුව හොඳම පන්දු යවන්නා පමණක් නොව පන්දුවාරයකදී වැඩිම ලකුණු ලැබිය හැකි පිතිකරුවන් තිදෙනා තීරණය කරන්නත් නායකයාට සිදුවෙනවා. සුපිරි පන්දුවාරයේදීත් ලකුණු සමාන වුණොත් තරගයේ ජය හිමිවෙන්නේ සම්පූර්ණ තරගයේදී වැඩිම හතරේ හා හයේ පහරවල් රැුස්කළ කණ්ඩායමටයි. තීරණාත්මක වගන්තිය එයයි. වැඩිම හතරේ හා හයේ ඒවා ලබා සිටියේ එංගලන්තය.

ගප්ටිල් හා නීෂම් පිටියට එමින් සිටියේ මුලින්ම සුපිරි පන්දුවාරයට මුහුණදුන් එංගලන්තයේ ජොස් බට්ලර් හා බෙන් ස්ටෝක්ස් ලකුණු 15ක් රැුස් කිරීමෙන් පසුවයි. ඒ අනුව ඉලක්කය ලකුණු 16ක්.

ජොෆ්රා ආචර් පන්දුව අතැතිව සුපිරි පන්දුවාරය යවන්නට සූදානමින් සිටියා. ආචර් කියන්නේ කළු ජාතික නවක ක‍්‍රිකට් ක‍්‍රීඩකයෙක්. වයස අවුරුදු 24යි. ඔහු අන්තර්ජාතික එක්දින තරග විස්සකටවත් ක‍්‍රීඩා කර නැති නවකයෙක්. ලෝක කුසලාන සංචිතයට ඔහුව ඇතුළත් කළේත් සාමාන්‍ය ක‍්‍රමවේදයට පිටිනුයි. ඒ ගැන විවේචනත් බොහෝ තිබුණා. එහෙත් තරගාවලියේදී ඔහු හොඳට කඩුලූ ලබමින් සාර්ථක වුණා. ඒත් මේ නවක තරුණයාට ලෝක කුසලාන අවසන් මහා තරගයක තීරණාත්මකම පන්දුවාරය යවන්නට පන්දුව බාර කළ හැකිද නැද්ද යන්න තීරණාත්මක ප‍්‍රශ්නයක් වුණා. පළමු පන්දු දෙක අතර දැවැන්ත පහරකට ගියොත් මේ තරුණයාගේ මානසිකත්වය සම්පූර්ණයෙන්ම බිඳවැටිය හැකියි.

වමත් පිතිකරු නීෂම් පන්දුවට පහරදෙද්දී ගප්ටිල් අනෙක් අන්තයේ සිටියා. ආචර් තමන්ගේ සුපුරුදු පන්දු යැවීමේ අන්තය මාරු කර ඕවර් ද විකට් ආකාරයට පන්දුව යවන්නට තීරණය කළා. පළමු පන්දුව යැව්වා. එය වයිඞ් පන්දුවක්. පිතිකරුවා දැවැන්ත පහරකට යනවාටත් වඩා මේ නවක පන්දුයවන්නා මානසිකව වැටෙන්නට හොඳම ක‍්‍රමය තමයි ඔහුගේම අත්වරදින් වයිඞ් පන්දුවක් යැවීම.

නැවතත් ආචර් දිව ආවේ පළවැනි පන්දුව යවන්නට. ඒ පන්දුවට ලකුණු දෙකක් ලැබුවා. එක් පන්දුවක් අවසන්. ලකුණු තුනක්ම ලබා හමාරයි. පීඩනය ආචර්ටමයි. දෙවැනි පන්දුවට මුහුණදුන් ජිමී නීෂම් එය දැවැන්ත හයේ පහරක් බවට හැරෙව්වා. එය මේ පන්දුවාරයේ දැවැන්තම අවස්ථාවක්.
පළමු පන්දු තුනේදීම ආචර් අසාර්ථක වුණා. ඉන්පසු පන්දු දෙක ආචර් සාපේක්ෂව සාර්ථක වුණා. අවසන් පන්දුවේදී නවසීලන්තය එක් ලකුණක් ලබාගත යුතු වුණා. පන්දුව අවසන් පන්දුවට ආවා. සුපිරි පන්දුවාරයේදී ගප්ටිල් මුහුණදුන් පළමු පන්දුව වුණේත් එයයි. ඒ අනුව ගප්ටිල්ට තමන් ඔප්පු කරන්නට එකම එක පන්දුවක් ලැබුණා.

මිඞ්විකට් කලාපයට ගප්ටිල් පහරක් එල්ලකළා. ඉන්පසුව දෙවැනි ලකුණට දිව ආවා. කඩුලූ රකින්නා වන ජොස් බට්ලර් සූදානමින් සිටියා. ගප්ටිල් ලොව විශිෂ්ටම කඩුලූ අතර දිවයන්නෙක්. එහෙත් ජොස් බට්ලර් වේගයෙන් පන්දුව රැුගෙන කඩුල්ල බිඳහෙළුවා. සුපිරි පන්දුවාරයේත් ලකුණු සමවුණා. බට්ලර් ජයග‍්‍රාහී ලෙස හිස හැරුණු අතේ දිවගියා. සම්පූර්ණ කණ්ඩායමම බට්ලර් පසුපස දිවගියා. ස්ටෝක්ස් දුක සතුට දරාගත නොහැකිව තමන් සිටි තැනම ගල්ගැසී හිටියා. සම්පූර්ණ කණ්ඩායමම බට්ලර් පසුපස පිටියේ එක් කොණකට දිවයද්දී මාටින් ගප්ටිල් නම් පිතිකරණ විශිෂ්ටයා අසාර්ථකව, ශෝකයෙන් තමන් සිටි තැන ගල්ගැසුණා. නීෂම් අනෙක් පස ගල්ගැසුණා. අවසන් පන්දුව යැවූ නවක ක‍්‍රීඩක ජොෆ්රා ආචර් තම ක‍්‍රිකට් දිවියේ භයානකම රාත‍්‍රිය සාර්ථකව අවසන් කොට, හැඟීම්වල ගලායෑම දරාගත නොහැකිව පිටිය මත වැතිර තනිවම සිටියා. සුළු මොහොතකින් බට්ලර් පසුපස හඹාගිය කණ්ඩායම ආචර් වෙත දිවැවිත් ඔහු සමඟද සතුට සැමරුවා. සුපිරි ඕවරයකත්, අවසානම පන්දුවේ. අවසානම පන්දුව විසිකිරීම දක්වාම ලෝක කුසලානයක ජයග‍්‍රාහකයන් කවුදැයි සිතාගත නොහැකිව ලොව පුරා ගල්ගැසී සිටි පේ‍්‍රක්ෂකයන්ට ‘නිල’ පිළිතුරක් ලැබුණා. එංගලන්තය දිනුම්. එහෙත් ඇත්තටම එංගලන්තය ජය නොගත් බව, මේ තරගයට ජයග‍්‍රාහකයෙක් නැති බව මුළු ලෝකයම සිය හදවත්වලින් දැන සිටියා.

පන්දුවාර 50

තරගය සුපිරි ඕවරයකට ආවේ බෙන් ස්ටෝක්ස් හා ජොස් බට්ලර්ගේ විශිෂ්ට ඉනිම නිසායි. ඒ ගැන කතා දෙකක් නැහැ. නවසීලන්තය මුලින් පන්දුවට පහරදී ලකුණු 241ක් ලබාගත්තා. එය බැලූ බැල්මට අඩු ලකුණු ප‍්‍රමාණයක් වුව, මේ පිටිය සම්පූර්ණයෙන්ම වේගපන්දු යවන්නන්ගේ පාලනයේ තිබුණා. එහෙත් කණ්ඩායම් දෙකේම වේගපන්දු යවන්නන් මේ පිටියේ කඩුලූ ගත්තේ තණතිල්ලේ උදව්වෙන්ම නොවෙයි. පන්දු යැවීමේ විශිෂ්ටත්වය නිසායි. කිසිම පිතිකරුවෙක්ට විශ්වාසයෙන් පන්දුවට පහරදෙන්නට අවස්ථාවක් ලැබුණේ නැහැ. අත්දැකීම් බහුල ලියාම් ප්ලන්කට් කෙටි පන්දු කිහිපයක් හා ෆුල් කලාපයේ පන්දු උපක‍්‍රමශීලීව පෙළගස්වා කඩුලූ ගත් අන්දම අතිවිශිෂ්ටයි.
දෙවැනියට පන්දුවට පහරදුන් එංගලන්ත ඉනිමේදීත් දකින්නට ලැබුණේ ඒ කාරණයයි. එංගලන්තය ලකුණු 90 ලබද්දී ඔවුන්ගේ කඩුලූ 4ක්ම බිඳවැටී තිබුණා. ඒ කඩුලූ හතරම නවසීලන්තයේ විශිෂ්ට පන්දුයැවීමේ උපක‍්‍රම, පන්දු රැුකීමේ උපක‍්‍රමවල ප‍්‍රතිඵල වුණා. විශේෂයෙන්ම ග‍්‍රෑන්ඞ්හෝම් රූට් දවාගත්තේ විශිෂ්ට පන්දු යැවීමේ සැලැස්මක් පාවිච්චි කරමින්. රූට්ගේ පීඩනය වැඩිවෙන මොහොත හරිහැටි මැන බලා යැවූ පන්දුවකින්. මෝගන් කෙටි පන්දුවලින් උගුලට කොටු කරගත්තා. ඒත් ඇත්තටම මෝගන්ගේ කඩුල්ල බිඳවැටුණේ ලොකී ෆර්ගියුසන් ඇල්ලූ ඓතිහාසික උඩපන්දුව නිසායි. එය ලෝක ක‍්‍රිකට් ඉතිහාසයේ වටිනාම උඩපන්දුවක් ලෙස මතකයේ රැුඳේවි. මෝගන්ගේ කඩුල්ල බිඳවැටුණු පසුව එංගලන්තයේ බලාපොරොත්තු බිඳවැටී තිබුණා. කඩුලූ හතරක් දැවී ගොස් අවසන්. ලකුණු 90ක්වත් නැහැ. ඉලක්කය ලකුණු 241ක්. තරගය නවසීලන්තය අතට ආවා.

එහෙත් එතැන් පටන් එංගලන්තය තමන්ගේ පිතිහරඹයෙහි විශිෂ්ටත්වය පෙන්වුවා. ජොස් බට්ලර් යනු විවියන් රිචර්ඞ්ස් කෙනෙක් බව කියන්නේ විචාරකයන් පමණක් නෙවෙයි. විවියන් රිචර්ඞ්ස්ම ඒ බව කියනවා. ඇත්තටම නවසීලන්ත පන්දු යවන්නන්ගේ විශිෂ්ට පන්දුවලට සීරුවෙන් මුහුණදෙමින් බට්ලර් හා ස්ටෝක්ස් ලකුණු සියයකට වැඩි සම්බන්ධතාවක් ගොඩනැගුවා. ක‍්‍රමයෙන් ඉලක්කයට ළංවුණා. ඉන්පසුව බට්ලර් දැවී යෑමෙන් පසුව එංගලන්තය නැවතත් අසීරු තත්වයකට මුහුණදුන්නා. බට්ලර්ගේ දැවී යෑමත් අපූරුයි. 2015 ලෝක කුසලානයේදී එංගලන්ත පිතිකරුවන්ව පන්දු යවන්නෙක් ලෙස වැනසූ ටිම් සවුති මේ තරගයට ක‍්‍රීඩා කළේ නැහැ. එහෙත් ඔහු අතිරේක පන්දු රකින්නෙක් ලෙස පිටියේ සිටියා. පීඩනය මැද සුපිරි උඩපන්දුවක් රැුකගනිමින් බට්ලර් දවාගත්තේ ටිම් සවුති. මේ තීරණාත්මක කතාවට තවත් හැරවුම් ලක්ෂ්‍ය කිහිපයක්ම තිබුණා. තරගය එහේ මෙහේ දෝලනය වුණා.
අවසානයේදී පන්දු නවයකට ලකුණු 22ක් ලබාගත යුතුව තිබුණා. එවැනි මොහොතක බෙන් ස්ටෝක්ස් එල්ලකළ දැවැන්ත පහරක් ට‍්‍රනේට් බෝල්ට් උඩපන්දුවක් ලෙස රැුකගත්තා. එහෙත් ඔහුට අඟලක් පසුපසින් හතරේ සීමාව. පන්දුව සමග ඔහුගේ පාදය සීමාව ස්පර්ශ වුණා. රැුකගත් උඩපන්දුව හයේ පහරක් බවට හැරුණු අන්දම විස්මයජනකයි.

අවසන් පන්දුවාරය එද්දී එංගලන්තය ඒ පන්දුවාරයෙන් ලකුණු 15ක් ලබාගත යුතු වුණා. ලොව පන්දු යවන ශ්‍රේණිගතකිරීම්වල දෙවැන්නා වන ට‍්‍රනේට් බෝල්ට් පන්දුව අතැතිව සිටියා. පරාජිත තරගය ජයග‍්‍රහණයක් දක්වා හරවමින් සටන්වැදුණු ක‍්‍රීඩකයා වන බෙන් ස්ටෝක්ස් පිත්ත අතැතිව සිටියා. කඩුලූ නවයක් දැවීගොස් හමාරයි. එක කඩුල්ලක් ගතහොත් නවසීලන්තය දිනුම්.

ඒ පන්දුවාරයේ පළමු පන්දු දෙකටම ලකුණු නැහැ. පන්දු 4කින් ලකුණු 15ක් ලබාගත යුතුයි. එංගලන්තය පරාජය වී හමාරයි. තුන්වැනි පන්දුවත් පහරක් එල්ලකරන්නට අමාරු කලාපයක් වූ ඕෆ්සයිඞ් ෆුල් කලාපයටයි වැටුණේ. එහෙත් පිතිකරු බෙන් ස්ටෝක්ස් සිටියේ තරගය අත්හරින හැඟීමක නොවෙයි. ඔහු ඒ පැත්තට සම්පූර්ණ සිරුරම බර කොට දෑතේ වීර්යයෙන් ලෙග්සයිඞ් දෙසට පහරක් එල්ලකළා. හයේ පහරක්. එංගලන්තයේ හුස්ම තවමත් වැටෙනවා. පන්දු 3ට ලකුණු 9ක් ඕනෑ. තරගය තවමත් නවසීලන්තය අතේ. ඒත් වාසනාව ඔවුන් අතේ නොවෙයි.

හතරවැනි පන්දුවට දැවැන්ත පහරක් එල්ලකරන්නට ස්ටෝක්ස් උත්සාහ කළා. මේ පන්දුවට හතරේ හෝ හයේ පහරක් එල්ල කළා නම් තරගය එංගලන්තය අතට හැරෙනවා. ඒත් පන්දුව පිටියේ ඈතට ගියා පමණයි. බලාපොරොත්තුව එංගලන්තයෙන් ඈතට ගියා. ස්ටෝක්ස් හා අනෙක් පස පිතිකරු වේගයෙන් කඩුලූ අතර දිවයමින් ලකුණු දෙකක්ම ලබන්නට උත්සාහ කළා. පන්දුව රැුකගත් ක‍්‍රීඩකයා කඩුල්ල වෙත පන්දුව වේගයෙන් එව්වා. බෙන් ස්ටෝක්ස් කඩුල්ල රැුකගනු පිණිස පිත්ත ඉදිරියට දමමින් කඩුල්ල දෙසට ලිස්සා ගියා. ඔහුගේ පිත්තෙහි අහම්බයෙන් වැදුණු පන්දුව කඩුලූ රකින්නා මඟහැර මඳ වේගයකින් හතරේ සීමාව දෙස ඇදී ගියා. කඩුලූ රකින්නා වේගයෙන් පන්දුව පසුපස දිව යනවා. අත්වැරදීමකින් පිත්තේ පන්දුව වැදුණු නිසා බෙන් ස්ටෝක්ස් සමාව ඉල්ලනවා. මඳ වේගයෙන් ඇදීගිය පන්දුව හතරේ සීමාව පසු කරමින් සිව්වැනි බෝලයේදී එංගලන්තයට ලකුණු 6ක් ලබාදෙනවා. ස්ටෝක්ස් 6 පහරක් එල්ලකළේ නැහැ. එහෙත් වාසනාව ඔහුට අතිරේක ලකුණු 4ක් දුන්නා. එතැනින් පසුව වැටුණු හද පුපුරවන පන්දු තුන අවසන් වෙද්දී එංගලන්තය ලකුණු 241ක් ලබමින් නවසීලන්තය සම කළා. සුපිරි පන්දුවාරයට තරගය ගියා. එතැනදී වුණ දේවල් අප කලින් කීවා.
විශිෂ්ටම එකද?

මෙය ලොව විශිෂ්ටම ක‍්‍රිකට් තරගය බව පවසන්නේ ලියුම්කරු පමණක් නොවෙයි. ලොව පුරා විචාරකයන් රැුසක් මෙය විශිෂ්ටම තරගය ලෙස හඳුන්වා තිබෙනවා. ඒ ගැන කියන්නට පෙර ලොව ශ්‍රේෂ්ඨතම නූතන ක‍්‍රිකට් තරගය ලෙස හැඳින්වෙන තරග කිහිපයක් ගැන කතාකළ යුතුයි.
එජ්බැස්ටන් පිටියේ 2005 දී පැවති අළුබඳුන තරගාවලියේ දෙවැනි ටෙස්ට් තරගය, 1999 එක්දින ලෝක කුසලානයේදී දකුණු අප‍්‍රිකාව හා ඕස්ටේ‍්‍රලියාව අතර එජ්බැස්ටන්වලදීම පැවති තරගය, 2016 දී කොදෙව්වන්ට විස්සයි විස්ස ලෝක කුසලානය දිනාදුන් තරගය, පළවැනි විස්සයි විස්ස ලෝක කුසලානයේදී ඉන්දියාව හා පාකිස්ථානය අතර පැවති අවසන් තරගය, ඕස්ටේ‍්‍රලියාව ලොව වැඩිම ලකුණු ප‍්‍රමාණයට හිමි වාර්තාව තබමින් ලකුණු 434ක් ලැබූ පසුව පිළිතුරු ඉනිමේදී දකුණු අප‍්‍රිකාව ඒ ලකුණු ප‍්‍රමාණය හඹා ගොස් ලොව වැඩිම ලකුණු ප‍්‍රමාණයේ වාර්තාව කඩමින් ජයගත් තරගය, 1975 එක්දින ලෝක කුසලානයේ අවසන් තරගය, 1986 පාකිස්ථානය හා ඉන්දියාව අතර තරගය, 1999 දී බ‍්‍රයන් ලාරා සිව්වැනි ඉනිමේදී පරිපූර්ණ ඉනිමක් ක‍්‍රීඩා කරමින් ඕස්ටේ‍්‍රලියාව පැරදවූ ටෙස්ට් තරගය, 2001 දී වීවීඑස් ලක්ෂ්මන්ගේ විශිෂ්ට පිතිහරඹයට රාහුල් ඩ‍්‍රාවිඞ්ගේ සහායක ඉනිම එක්වෙමින් අංක එකේ ඕස්ටේ‍්‍රලියාව පැරදවූ ටෙස්ට් තරගය ආදි ලෙස ශ්‍රේෂ්ඨත්වයට උරුමකම් කියන නූතන ක‍්‍රිකට් තරග ගණනාවක් තියෙනවා. එහෙත් ඒ සියල්ලට වඩා මේ තරගය තීරණාත්මක වන්නේ ලොව ශ්‍රේෂ්ඨතම ක‍්‍රිකට් කිරුළ වෙනුවෙන් අවසන් පන්දුවාරයේ අවසන් පන්දුව විසිකිරීම දක්වා ඇදීගිය තරගයක් නිසායි. මේ තරගය පැවතුණේ ක‍්‍රිකට් රන්දෙවොලේ. ලෝඞ්ස් පිටියේ.

මෙය ක‍්‍රිකට් තරගයටත් එහා ගිය සියුම් ක‍්‍රීඩා තිර පිටපතක්. නැහැ. කිසිම සිනමාකරුවෙක්ටවත් මේ තරම් සුන්දර කතාවක් ලියන්නට බැරිවේවි. එය කළ හැක්කේ මේ තරගයේදී එංගලන්තය හා නවසීලන්තය වෙනුවෙන් පිටියට පිවිසි ක‍්‍රීඩකයන්ටමයි.

ඇත්තෙන්ම මේ තරගාවලියේ අවසන් පූර්ව තරග ගැන, තරගාවලියේ මීට පෙර තරග ගැන කතාකරන්නට ඉඩකඩ වෙන්කරගන්නටයි සිතාගෙන සිටියේ. එහෙත් මේ තරගය ගැන කතාකරන්නට දීර්ඝ ඉඩක් වෙන්වුණා. මේ තරගයේ කතාකරන්නට තවත් පැති ගණනාවක් තිබෙනවා. 2007, 2011 හා 2015 ලෝක කුසලාන තරගාවලිවලදී දුර්වල ලෙස පරාජය වූ එංගලන්තය වසර හතරක් තිස්සේ මේ ලෝක කුසලානයට කණ්ඩායම සූදානම් කළ අන්දම ගැන කතාකරන්නට වටිනවා. අයර්ලන්තයෙන් ක‍්‍රිකට් ඇරඹූ ඔයින් මෝගන් එංගලන්තයේ ලෝක කුසලාන තරගාවලියට නායකත්වය දුන් අයුරු කතාකරන්නට වටිනවා. බ්‍රෙක්සිට්වලින් පසු එංගලන්තයේ ජාතිවාදී ජනප‍්‍රිය දේශපාලනඥයන් සංක‍්‍රමණිකයන්ට බැණ වදිමින් සිටින්නේ. එහෙත් නායක මෝගන් හා ජොෆ්රා ආචර් කියන දෙදෙනා සංක‍්‍රමණයේ ප‍්‍රතිඵල. අනෙක් අතට මෙවර ලෝක කුසලානයේදීත් කැපී යන්නට ඔන්න මෙන්න තිබියදී එංගලන්තය අවසන් තරගය දක්වා පැමිණි අන්දම අපූරුයි. ඔවුන් අවසන් තරගයට මග විවෘත කරගත්තේ ඉන්දියාව හා නවසීලන්තය පරාජය කරමිනුයි. මේ සියලූ කතාවලට ඉඩකඩ මදිවෙද්දී සුන්දර අවසන් පූර්ව තරග දෙක ගැන කතාකරන්නටත් පිටුවේ ඉඩකඩ නැතිව ගියා.

බෙන් ස්ටෝක්ස්

අවසන් තරගයේ වීරයා බෙන් ස්ටෝක්ස්. කොතැනින් ඔහු ගැන කතාකරන්නද. 2016 විස්සයි විස්ස ලෝක කුසලාන අවසන් තරගය පැවතුණේ එංගලන්තය හා බටහිර ඉන්දීය කොදෙව්වන් අතර. කොදෙව්වන් අවසන් පන්දුවාරයේදී ලකුණු 19ක් ලබාගත යුතුවුණා. කොදෙව්වන් අතර සිටි අත්දැකීම් බහුල පිතිකරුවන් වෙනුවට සිටියේ කාලෝස් බ්‍රෙතවේට්. පන්දු යවන්නෙක්. ලකුණු 19ක් ලබාගැනීම ඔහුට කොහෙත්ම කළ නොහැකියි. ඒ තරගයේදී පන්දු යවන්නට සිටියේ බෙන් ස්ටෝක්ස්. ලකුණු 19ක්ම තිබුණා. ප‍්‍රබල නැති පිතිකරුවෙක් පිත්ත අතැතිව සිටියා. ඒත් ඒ අවසන් පන්දුවාරයේ පළමු පන්දු හතරේදී පිට පිට හයේ පහර හතරක් එල්ලකරමින් කාලෝස් බ්‍රෙතවේට් කොදෙව්වන්ට ලෝක කුසලානය දිනාදුන්නා.

‘කාලෝස් බ්‍රෙතවේට්……… කාලෝස් බ්‍රෙතවේට්, නම මතක තියාගන්න‘ කුසලානය කොදෙව්වන්ට දෙමින් අවසන් හයේ පහර එල්ලවෙද්දී ඉයන් බිෂොප් කෑගැසුවා. මුළු ලෝක ක‍්‍රිකට් ඉතිහාසයම ශ්‍රේෂ්ඨම ක‍්‍රිකට් තරගයක අවසානයත් සමග කාලෝස් බ්‍රෙතවේට්ව මතක තබාගත්තා. මළගිය තරගයකට යළි පණදී ලෝක කුසලානයක් දිනාදුන් බ්‍රෙතවේට් මතක තබාගත්තා. ඒත් ඒ තරගය සමගම එදා බ්‍රෙතවේට්ගෙන් පහර කෑ බෙන් ස්ටෝක්ස්වත් කිසිවෙකුට අමතක නොවේවි. ස්ටෝක්ස් 2016 දී එංගලන්තයට ලෝක කුසලානයක් අහිමි කළා. ඉන්පසුව බෙන් ස්ටෝක්ස් අවන්හලකදී ගැටුමකට මැදිව ප‍්‍රවෘත්ති මැව්වා. ස්ටෝක්ස්ගේ ක‍්‍රිකට් දිවියේ අඳුරු තැන් ගණනාවක් තියෙනවා. ඒත් මේ තරගය ජයගැනීමෙන් පසුව ඔහුගේ කතාව ඇරඹෙන්නේ මේ තරගයෙනුයි. බ්‍රෙතවේට්ගේ හා අවන්හලේ අවමානයන් පසුව කුඩාවට ලියැවේවි. බෙන් ස්ටෝක්ස් ධෛර්යයසම්පන්න ඉනිමකින් ඉතිහාස පොත්වලට එක්වුණා.