සිය පියාවූ දිවංගත හිටපු ජනාධිපති ආර්. පේ‍්‍රමදාස සිහිවීම පිණිස ධන පරිත්‍යාගශිලීන්ගේ අනුග‍්‍රහයෙන් අනුරාධපුර ශ‍්‍රී ස්වර්ණ ජයන්ති විහාරස්ථානයේ ඉදිකළ චෛත්‍යය සසුනට පූජා කිරීමේ උත්සවය එජාප නියෝජ්‍ය නායක සජිත් පේ‍්‍රමදාස විසින් පවත්වනු ලැබුවේ ජුනි 08 වැනිදාය.
ඒ අස්ගිරි පාර්ශ්වයේ මහානායක වරකාගොඩ ඥානරතන ස්වාමීන්වහන්සේ ඇතුළු ත්‍රෛනිකායික ස්වාමීන්වහන්සේලාගේ සහභාගිත්වයෙනි.
මෙය දේශපාලන වශයෙන් අවධානය යොමුවූ උත්සවයක්ද වූ අතර එයට හේතුවූයේ ඉදිරි ජනාධිපතිවරණය පිළිබඳ සජිත් පේ‍්‍රමදාසගේ අභිලාෂය ඔහු විසින් හෝ ඔහු වෙනුවෙන් වෙනත් අයෙකු විසින් ප‍්‍රකාශයට පත් කිරීමත් එදින සිදුවෙතැයි පැතිර ගිය ආරංචිය නිසාය.
එවැනි අභිලාෂය ප‍්‍රකාශ කිරීමක් එම උත්සවයේදී කළහොත් එය විශාල අවුලක් ඇති කරන්නක් බැවින් එසේ නොකරන ලෙස එජාපය පාර්ශ්වයෙන් ඔහුට බලකිරීමක් කර තිබූ අතර ඒ නිසාම එය එදින සිදු නොවීය.
එහෙත් එදිනම අනුරාධපුරයේ ශ‍්‍රාවස්තිපුර පැවති ජනහමුවකදී ‘බයවෙන්න එපා, මම වෙලාවට එනවා’ යනුවෙන් ඉදිරි ජනාධිපතිවරණය ගැන ඔහුගේ ඉඟිය ප‍්‍රකාශ කර තිබේ.
ඉදිකළ චෛත්‍යය සසුනට පූජා කිරීමේ උත්සවයේදී ඒ සඳහා උදව් කළ පෞද්ගලික ධන පරිත්‍යාගශීලීන්ටත්, ඉදිකිරීම් සංවර්ධන අධිකාරියේ උපසභාපති ඇතුළු එහි සේවක සේවිකාවන්ටත් සජිත් පේ‍්‍රමදාස ස්තූතිය පුද කර තිබුණි.
මේ ඉදිකිරීම් සංවර්ධන අධිකාරිය යනු ඔහුගේ නිවාස, ඉදිකිරීම් හා සංස්කෘතික අමාත්‍යාංශය යටතේ ඇති ඉදිකිරීම් කර්මාන්ත සංවර්ධන අධිකාරිය විය යුතුය. එය පැහැදිලිවම රාජ්‍ය ආයතනයකි. මේ රාජ්‍ය ආයතනයේ ඉහළ නිලධාරීන් ඇතුළු සේවක සේවිකාවන් එහි ඇති වාහන ඇතුළු රාජ්‍ය සම්පතුත් සමඟ එම කටයුත්තට සජිත් පේ‍්‍රමදාස උපයෝගි කරගන්නට ඇත. එමෙන්ම ඔහුගේ අමාත්‍යාංශයෙන් හා ඒ යටතේ ඇති අනෙකුත් ආයතනවලින් ප‍්‍රචාරක හා අනෙකුත් පහසුකම් ලබාගන්නට ඇත.
මෙය සිය පියා සිහිවීම පිණිස පෞද්ගලික ධන පරිත්‍යාගයෙන් කරන පෞද්ගලික කටයුත්තක් සඳහා රාජ්‍ය සම්පත් අවභාවිත කිරීමකි. එය ගෝඨාභය රාජපක්ෂ මැදමුලන ඞී.ඒ. රාජපක්ෂ අනුස්මරණ කෞතුකාගාරය හා ස්මාරකය ඉදිකිරීම සඳහා රාජ්‍ය මුදල් අවභාවිත කළා වැනිම දෙයකි.
එදා අනුරාධපුරයේදී සඟ සතු කළේ සිය පියා වෙනුවෙන් ඉදිකිරීමට නියමිත චෛත්‍ය 25න් පළමු එක බව ඔහු කීය. ඉතිරි චෛත්‍ය සඳහාත් ඔහු රාජ්‍ය සම්පත් අවභාවිත කරනවාට සැක නැත. දැනටතමත් අවභාවිත කරමින් සිටිනවා විය හැකිය.
ඒ පළමු වටය දිවයිනේ දිස්ත‍්‍රික්ක 25 සඳහා චෛත්‍ය 25ක්ය. දෙවැනි වටය සෑම දිස්ත‍්‍රික්කයකටම චෛත්‍ය 4 බැගින් චෛත්‍ය 100ක්ය. ඔහුගේ අවසන් සිහිනය සෑම දිස්ත‍්‍රික්කයකටම චෛත්‍ය 40 බැගින් චෛත්‍ය 1000ක්ය. ඒ ගැන එම උත්සවයේදී ඔහු කීවේ මහා සංඝරත්නයේ අනුශාසනා මත ඉදිරි වසර තුන හතර තුළ දිවයින පුරා චෛත්‍ය නොමැති විහාරස්ථානවලට චෛත්‍ය 1125ක් ඉදිකර සසුනට පූජා කිරීම තමා දිවි හිමියෙන්ම ඉටු කරන බවය.
රටේ අනාගත නායකත්වය බාර ගන්නට හොර රහසේ සූදානම් වන අයෙකුගේ සිහිනය අපූරුය. රටේ ප‍්‍රමුඛම අවශ්‍යතාව චෛත්‍ය ඉදිකිරීම බව ඔහු සිතයි. බිඳවැටී ඇති නීතියේ ආධිපත්‍යයට පණ ලබාදීම, මානව අයිතිවාසිකම් තහවුරු කිරීම, ප්රජාතන්ත්රවාදය ශක්තිමත් කිරීම, වංචාව ¥ෂණය නැති කිරීම ආදි යහපාලන ගුණාංග ගැන ඔහුට කිසිදු අදහසක් නැත.
කුමන්ත‍්‍රණ ආණ්ඩු සමයේදී එකී කුමන්ත‍්‍රණයේ නිර්මාතෘ වූ ජනාධිපතිවරයාට ඔහු වචනයකින් හෝ නොබැන්නේ ඒ නිසාය. ශ‍්‍රීමත්යැයි ගරු කළේ ඒ නිසාය. තවමත් ව්‍යවස්ථා විරෝධීව කටයුතු කරන ජනාධිපතිවරයා හා සමීප වෙමින් අමුතු සංහිඳියාවක් ඔහු පෙන්වන්නේ ඒ නිසාය.
රාජ්‍ය සම්පත් විෂයේදී පමණක් නොව අනෙකුත් විෂයන්හිදීද ඔහු කටයුතු කරන්නේ කෙසේදැයි හිතාගන්නට දැන්ම අපහසු නැත. උස නම් සිකියුරිටි, කොට නම් කම්කරු යන මීට පෙර ඔහු පෙන්නූ පිළිවෙත අපට ඒ සඳහා අවබෝධය සපයයි. x
