x කාලෝ ෆොන්සේකා
මේ ලිපිය මා යොමු කරන්නේ 2019.05.26 දාතමින් යුත් ‘අනිද්දා’ පත‍්‍රයේ 3 වැනි පිටුවේ පළ වූ ‘ඥානසාර හිමිට සමාව දීමෙන් ජනාධිපති අධිකරණයට අපහාස කරයි, මුස්ලිම් ජනතාව තවත් වරක් බියපත් කරයි’ නම් ලිපිය පරිශීලනය කිරීමෙන් අනතුරු ව ය. ලිපියේ කර්තෘ කේ. ඩබ්ලිව්. ජනරංජන අදාළ නඩුවේ නෛතික පක්ෂය මැනවින් විග‍්‍රහ කොට තිබේ. නඩුවේ සැබෑ තතු, ජනාධිපති සමාව හේතු කොටගෙන සිදු විය හැකි අනිෂ්ට විපාක ආදිය මට තරමක් අවබෝධ කරගැනීමට හැකි වූයේ, ඒ අගනා ලිපියේ අනුභාවයෙන් බව කෘතඥතා පූර්වක ව පවසමි. අදාළ ජනාධිපති සමාව පිළිබඳ මගේ ආකල්පය ඒ ලිපිය කියවීමෙන් සංශෝධනය වූ බව ද නොවළහා කිය යුතු ය.
මේ අවස්ථාවේ දී සංක්ෂිප්ත ව කරුණු ඉදිරිපත් කිරීම යෙහෙකි යැයි හගිමි.
x අභියාචනාධිකරණය ඉදිරියේ 2016.01.25 වෙනි දා පූජ්‍ය ඥානසාර හිමි අධිකරණයට අපහාස වන අයුරින් හැසිරුණේ යැයි කියා පැමිණිලි කළේ රංග දිසානායක නමැති හෝමාගම උසාවියේ මහේස්ත‍්‍රාත්වරයා ය.
x ඒ පැමිණිල්ල පදනම් කොටගෙන පූජ්‍ය ඥානසාර හිමියන්ට විරුද්ධ ව චෝදනා 4ක් එල්ල විය. චෝදනාවල අන්තර්ගතය වූයේ, පූජ්‍ය ඥානසාර හිමියන් අනවසරයෙන් හෝමාගම අධිකරණයට පිවිසී යුක්තිය පසිඳලීමේ ක‍්‍රියාවලියට බාධා වන අයුරින් මහේස්ත‍්‍රාත්වරයාට සහ දිලීප පීරිස් නම් වූ රජයේ ජ්‍යේෂ්ඨ නීතිඥවරයාට අපහාස කළ බවයි.
x ජ්‍යේෂ්ඨ විනිසුරුවරුන් දෙදෙනකුගෙන් යුක්ත අභියාචනාධිකරණ මණ්ඩලය විසින් නඩු විභාගය සිදු කරන ලදි. නඩුවේ සාක්ෂ්‍යකරුවන් වූයේ, හෝමාගම මහේස්ත‍්‍රාත්වරයා (රංග දිසානායක*, ජ්‍යේෂ්ඨ රාජ්‍ය නීතිඥ දිලීප පීරිස් සහ ඒ අවස්ථාවේ අධිකරණයේ රාජකාරියකට පැමිණ සිටි උපුල් කුමරප්පෙරුම නමැති ජ්‍යේෂ්ඨ නීතිඥවරුන් ය.
x 2018. 08. 08 වැනි දා චෝදනා හතරට ම වරදකරු බවට තීන්දු කරමින් පූජ්‍ය ඥානසාර හිමියන්ට විනිසුරු මඬුල්ල විසින් බරපතළ වැඩ සහිත සය වසරක සිර දඬුවම් පනවනු ලැබී ය.
x පූජ්‍ය ඥානසාර හිමි කිසි දු අවස්ථාවක වරද පිළිගෙන අධිකරණයෙන් සමාව අයැද සිටියේ නැත. උන්වහන්සේ ක‍්‍රියා කළේ තමන් වහන්සේ රටේ නීතිය අතික‍්‍රමණය කළ සාකල්‍යයෙන් ම නිර්දෝෂී අයකු ලෙස ය.
x එවැනි සන්දර්භයක් තුළ වසර 6ක සිර දඬුවමෙන් මාස 9ක් වැනි කෙටි කාලයක් ගෙවී ගොස් තිබියදී 2019 මැයි 18 වෙනි දා වෙසක් පෝය දිනයේ දී අතිගරු ජනාධිපතිතුමන් විසින් ඥානසාර හිමිට පූර්ණ සමාවක් පිරිනමන ලදි. x යථොක්ත කරුණු කාරණා කෙරෙහි සිය නෛතික ඇස යොමු කරන කේ. ඩබ්ලිව්. ජනරංජනගේ ඒකායන විනිශ්චය වූයේ, පූජ්‍ය ඥානසාර හිමිට එලෙස සමාව දීමෙන් ජනාධිපතිතුමා හිතා මතා ම අපේ ආණ්ඩුක‍්‍රම ව්‍යවස්ථාවට පටහැනි ව මෙරට අධිකරණ පද්ධතියට දරුණු සාපරාධි අපහාසාත්මක අතුල් පහරක් ගැසූ බවයි.
x ඒ සමාව ආණ්ඩුක‍්‍රම ව්‍යවස්ථාවට අනුව අධිකරණයේ ගරුත්වය රැුක ගැනීමට බැඳී සිටින ජනාධිපතිතුමා විසින් කරන ලද නොපනත්කමක් වන බැවින් එතුමා අධිකරණය ඉදිරියේ චූදිතයකු වන බව ඉන් කියවෙයි.
x නීතිය පිළිබඳ ගැඹුරු අවබෝධයක් නොමැති මගේ වෛද්‍ය ඇසට පෙනී යන්නේ, ජනාධිපතිතුමන් මෙහි දී කර තිබෙන්නේ ජනාධිපති ලෙස එතුමාට තිබෙන සුවිශේෂ වරප‍්‍රසාදයක් හෙවත් වරද කරුවන්ට සමාව දීමේ බලය භාවිත කර ඇති බවයි.
x ජනරංජනගේ මේ ලිපිය කියවීමේ ප‍්‍රතිඵලයක් ලෙස දැන් මට හැගී යන්නේ මේ අවස්ථාවේ දී මේ සමාව මේ අයුරින් පූජ්‍ය ඥානසාර හිමියන්ට පිරිනැමීමෙන් ජනාධිපතිතුමා තමාගේ කීර්ති නාමයට හෝ මේ රටේ අධිකරණ පද්ධතියේ යහ පැවැත්මට නම් හිතකර ක‍්‍රියාවක් කර නොමැති බවයි. x
