ලා ලීගා හෙවත් වාර්ෂික ස්පාඤ්ඤ පාපන්දු ලීග් තරගාවලියේ අවසන් බාසිලෝනා කණ්ඩායම හා එයිබර් කණ්ඩායම අතර අපේ‍්‍රල් 19 වැනිදා පැවැත්වුණා. කණ්ඩායම් දෙකම ගෝල දෙක බැගින් වාර්තා කළ නිසා තරගය ජය පරාජයෙන් තොරව අවසන් වුණා. එයිබර් කණ්ඩායමේ ගෝල රකින ක‍්‍රීඩක මාර්කෝ ද්මිත්‍රොවික් පසු කර දෙවතාවක්ම පන්දුව යවන්නට බාසිලෝනා වෙනුවෙන්ම බිහිවූ අග‍්‍රගණ්‍ය පාපන්දු ක‍්‍රීඩකයා වන ලයනල් මෙසී සමත්වුණා.
ලීග් තරගාවලියක් වන නිසා මෙය අවසන් පූර්ව තරග හෝ අවසන් තරග තිබෙන තරගාවලියක් නොවන බව ඔබ දන්නවා ඇති. තරගවල ජය පැරදුම මත ලැබෙන ලකුණු මට්ටම අනුව ස්ථාන තෝරනු ලබනවා. ඒ අනුව මෙවර ලා ලීගා අවසාන වුණේ බාසිලෝනා කණ්ඩායම ලකුණු ලැයිස්තුවේ පළමු තැනට ගෙන එමින්.
ලයනල් මෙසී එයිබර් කණ්ඩායම සමඟ තරගයේදී වාර්තා කළ ගෝල දෙක සමග මෙවර ලා ලීගා තරගාවලියේදී ඔහු වාර්තා කළ ගෝල සංඛ්‍යාව 36ක්. පිට පිට හයවැනි වතාවටත් ලා ලීගා තරගාවලියේ වැඩිම ගෝල වාර්තා කළ ක‍්‍රීඩකයා බවට ඔහු පත්වුණා. මෙවර ප‍්‍රංශ ලීගයේදී ගෝල 32ක් වාර්තා කළ කිලියන් ම්බාප්පේ ඉක්මවා, යුරෝපයේ ප‍්‍රධාන තරගාවලියකදී වැඩිම ගෝල ගණනක් වාර්තා කර සිටින ක‍්‍රීඩකයා ලෙස ලයනල් මෙසී තම ස්ථානය තහවුරු කරගෙන සිටිනවා.
මෙසීට තිබෙන්නේ යුගයට නොගැළපෙන ක‍්‍රීඩා විලාසයක්යැයි ලියුම්කරුට විටෙක සිතෙනවා. ඔහු උසින් අඩු ක‍්‍රීඩකයෙක්. ඒ නිසා ඔහුගේ සිරුරෙහි ගුරුත්ව කේන්ද්‍රය පිහිටන්නේ පහළ ස්ථානයක. පාපන්දු ක‍්‍රීඩකයෙකු නිතර බෝලය තබාගත යුත්තේ තමන්ගේ සිරුරෙහි ගුරුත්ව කේන්ද්‍රයේයි. උසින් වැඩි ක‍්‍රීඩකයෙකුට බෝලය තබාගන්නට සිදුවෙන්නේ වඩා ඈතින් පිහිටි ගුරුත්ව කේන්ද්‍රයකයි. මෙසී වැනි මිටි ක‍්‍රීඩකයන්ට සිරුරට සමීපයේ බෝලය තබාගත හැකියි. කෙටි ගුරුත්ව කේන්ද්‍රයක් හිමි ඔහුගේ සිරුරෙහි ඉහළ කොටස වඩා ශක්තිමත් බව කියැවෙනවා. ඒ නිසා ඔහුට හොඳ සමබරතාවක් තබාගනිමින් බෝලය හැසිරවිය හැකියි. ඒ සියල්ල මැද ඔහුගේ දෙපාවල තිබෙන අධික වේගය මුසුවෙනවා. බෝලයට වඩා වේගයෙන් දිවීමේ හැකියාවත්, ඒ වේගයෙන් බෝලයත් රැුගෙන දිවීමේ හැකියාවත් ඔහුට තිබෙනවා. ප‍්‍රතිවාදී පිලේ පසුපෙළ ක‍්‍රීඩකයන්ට හසුවෙන්නට නොදී, පසුපෙළ ක‍්‍රීඩකයන් අතරින් පන්දුව යොමු කරමින්, ඔවුන් මඟහැර යන්නට මෙසී දක්ෂයි.
විශිෂ්ට හැකියාවකින් යුත් තනි ක‍්‍රීඩකයෙකුගේ දෙපා අතර වැඩි වෙලාවක් පාපන්දුව තබාගනිමින්, සතුරු කණ්ඩායමේ පසුපෙළ ක‍්‍රීඩකයන් පසුකොට ගොස් ගෝල වාර්තා කිරීම පාපන්දු ක‍්‍රීඩාවේ පැරණි යුගයේදී වැඩිපුරම පාවිච්චි කළ උපක‍්‍රමයක්. ලංකාවේ සිටින පාපන්දු පුහුණුකරුවන් පවා එදිනෙදා භාෂාවෙන් කියන්නේ එය ‘පේලේගේ, මැරඩෝනාගේ කාලයේ‘ පාවිච්චි කළ උපක‍්‍රමයක් බව.
එහෙත් මෑත කාලයේදී තනි ක‍්‍රීඩකයෙකුගේ දෙපා අතර පන්දුව තබාගැනීම වෙනුවට ක‍්‍රීඩකයන් පන්දුව එකිනෙකා අතර හුවමාරු කරගනිමින් කණ්ඩායමක් ලෙස ගෝල වාර්තා කිරීමේ උපක‍්‍රම දියුණු වී තිබෙනවා. ඒ නිසා ජාත්‍යන්තර පාපන්දු කණ්ඩායම්වල තනි ක‍්‍රීඩකයන් වෙනුවට එකිනෙකා අතර මනා අවබෝධයක් ඇති ක‍්‍රීඩකයන් යුගල බිහිවෙන අන්දමත් දකින්නට ලැබෙනවා. විශිෂ්ට හැකියාව නිසා ප‍්‍රසිද්ධ නමක් ඇති යුත් තනි ක‍්‍රීඩකයන් වෙනුවට සාමූහික බැඳීමක් ඇති කණ්ඩායම්වලට ජය ලැබෙන අන්දම මෑත කාලයේ පාපන්දු ලෝක කුසලානවලදීත් දකින්නට ලැබෙන්නට ඇති.
එක් ක‍්‍රීඩකයෙකු තමන්ගේ ළඟම වැඩි වෙලාවක් පාපන්දුව තබාගනිමින් තවත් ක‍්‍රීඩකයෙකුට පන්දුව හුවමාරු නොකර තබාගනිද්දී නූතන ලංකාවේ පාපන්දු පුහුණුකරුවන් පවා එයට විරෝධය පානවා. ‘එකයි දෙකයි ඩුම්’ යනු පාපන්දු පුහුණුකරුවන් පාවිච්චි කරන යෙදුමක්. පන්දුව තමා අතට ආ පසු බෝලය ස්පර්ශ කළ යුත්තේ තෙවරක් පමණක් බව ඔවුන් කියනවා. පන්දුව බාරගැනීමත්, ස්ථානගත කරගැනීමත්, තවත් ක‍්‍රීඩකයෙකුට බෝලය හුවමාරු කිරීමත් පමණක් කළ යුතු බව ඔවුන් කියනවා. එසේ කියන්නේ අන්තර්ජාතික තරගවලදී පන්දුව හුවමාරු කිරීමේ පුරුද්ද නිසායි.
මෙවැනි යුගයක අපගේ කථානායක මෙසී ගැළපෙන්නේ පේලේ, මැරඩෝනා වැනි ක‍්‍රීඩකයන්ගේ කාලයට බව ලියුම්කරුට හිතෙනවා. ඒ මෙසී බෝලය රැුගෙන තනිවම ක‍්‍රීඩා කරන ක‍්‍රීඩකයෙක් නිසා නොවෙයි. ඔහු කණ්ඩායම් උපක‍්‍රම අනුව අපූරුවට ක‍්‍රීඩා කරන ක‍්‍රීඩකයෙක්. එහෙත් ඔහුට තනිවම බෝලය රැුගෙන යමින් ගෝල වාර්තා කිරීමේ අපූරු හැකියාවක් තිබෙනවා. එලෙස ඔහු බෝලය රැුගෙන යන අවස්ථාවක පේ‍්‍රක්ෂකයන්ගේ උද්යෝගය වැඩිවෙන අන්දමත්, ක‍්‍රීඩා පිටියේ හැඩ මැවෙන අන්දමත් අපූරුයි. එලෙස රැුගෙන යන බෝලය ගෝල රකින්නාගේ දෙපා අතරින් අපූරුවට ගෝල් කණු දෙක අතරින් යොමු කරන්නේ මහා වේගවත් පා පහරකින් නොවෙයි. ගෝල රකින්නා මඟහැර බෝලය යවන්නට සමත් ලෙස කිරා මැන යොමුකරන තට්ටුවකින් ගෝල වාර්තා කරන්නට තරම් ඔහු හුරුබුහුටියි. මේ ඡුායාරූපයෙනුත් මෙසීගේ ඒ හුරුබුහුටි විලාසය ප‍්‍රකට වෙනවා. x
