අන්තවාදී ක‍්‍රියාවලට සම්බන්ධ පුද්ගලයන්ට එරෙහිව ක‍්‍රියාත්මක කළ හැකි නීතිරීති තිබියදී මැයි 12, 13 දින දෙකේ ප‍්‍රදේශ කිහිපයක මුස්ලිම් ජනතාව ඉලක්ක කරමින් කළ අන්තවාදී ප‍්‍රහාර සම්බන්ධයෙන් සැකපිට අත්අඩංගුවට ගත් සිංහල ජාතික සැකකරුවන්ට සාමාන්‍ය නීතිය යටතේ චෝදනා ගොනු කිරීම නිසා එම පුද්ගලයන්ට පොලිස් ඇප හා මහේස්ත‍්‍රාත් උසාවියේ ඇප ලබාගැනීමට හැකිවී තිබේ.
ජාතීන් අතර වෛරය ඇතිකරන පුද්ගලයන් අධිකරණයට ඉදිරිපත් කිරීමේදී පාවිච්චි කළ යුතු නීතිය වන 2007 අංක 56 දරන සිවිල් හා දේශපාලන අයිතිවාසිකම් පිළිබඳ ජාත්‍යන්තර සම්මුතිය පනත හෙවත් අයිසීසීපීආර් පනත යටතේ අධිකරණයට ඉදිරිපත් කර නැත. එම පුද්ගලයන් දණ්ඩ නීති සංග‍්‍රහයේ සාමාන්‍ය වගන්ති යටතේ අධිකරණයට ඉදිරිපත් කර ඇත. අයිසීසීපීආර් පනත යටතේ අධිකරණයට ඉදිරිපත් කරන ලද පුද්ගලයෙකුට ඇප අයදුම් කළ හැක්කේ මහාධිකරණයකින් පමණි.
මැයි 12 සහ 13 දින දෙක තුළ ඇතිවූ කලහකාරී සිදුවීම්වලට සම්බන්ධ වී සිටියදී අත්අඩංගුවට ගත් පිරිසක් මහේස්ත‍්‍රාත් අධිකරණයකට ඉදිරිපත් නොකර පොලිස් ඇප මත නිදහස් කිරීමට කටයුතු කර තිබේ. මැයි 13 වැනිදා බිංගිරිය පොලීසියේ පොලිස් ඇප ලැබූ පුද්ගලයෝ 6 දෙනාද මේ අතර වෙති. ඊට අමතරව පොලීසිය භාරයේ මඳ වේලාවක් රඳවා තබාගෙන පුද්ගලයන් මුදාහැරීමේ සිදුවීම්ද ඇතැයි ආරංචිමාර්ග පවසයි. මැයි 22 වැනිදා මිනුවන්ගොඩ මහේස්ත‍්‍රාත් අධිකරණය පුද්ගලයන් 30කු ඇප මත නිදහස් කර තිබෙන අතර එම පුද්ගලයන් අධිකරණයට ඉදිරිපත් කර තිබුණේද අයිසීසීපීආර් පනත යටතේ නොවේ.
අත්අඩංගුවට ගත් පුද්ගලයන් අතරින් පිරිසක් අත්අඩංගුවට ගෙන අයිසීසීපීආර් පනත යටතේද අත්අඩංගුවට ගෙන ඇතත් එම පිරිස සිදුවීම්වලට සම්බන්ධ වූ පුද්ගලයන් අතරින් ඉතා සුළු පිරිසක් බව පොලිස් ආරංචිමාර්ග පවසයි. දිවයින පුරා මෙම අන්තවාදී ක‍්‍රියාවලට සැකපිට අත්අඩංගුවට ගෙන අයිසීසීපීආර් පනත යටතේ බන්ධනාගාරගත කළ පුද්ගලයන් සංඛ්‍යාව පිළිබඳව විමසීමේදී පොලිස් මාධ්‍ය ප‍්‍රකාශක රුවන් ගුණසේකර පැවසුවේ තමා සතුව ඒ පිළිබඳව නිවැරදි දත්ත නොමැති බවය. මිනුවන්ගොඩ මහේස්ත‍්‍රාත් උසාවියෙන් මැයි 22 දා ඇප ලබාදුන් පුද්ගලයන් සම්බන්ධයෙන් පොලිස් මාධ්‍ය ප‍්‍රකාශකවරයා පැවසුවේ එම පුද්ගලයන් අත්අඩංගුවට ගෙන තිබුණේ මැයි 12,13 දින දෙකේ නොවන බවය. එම සිදුවීම්වලින් පසු දිනවලදී අත්අඩංගුවට ගත් පුද්ගලයන් වන නිසා ඔවුන් සාමාන්‍ය නීති යටතේ අත්අඩංගුවට ගත් බවද ඔහු කීය. කෙසේ වෙතත් එසේ මහේස්ත‍්‍රාත් ඇප ලැබූ පුද්ගලයන් අත්අඩංගුවට ගෙන තිබුණේද සාමාන්‍ය අපරාධවලට සැකපිට නොව මෙම කලහකාරී ක‍්‍රියාවලට සම්බන්ධයක් ඇතැයි සැකපිටය.
මේ අතර ජාතීන් අතර කලහකාරී ක‍්‍රියාවලට සම්බන්ධයක් නැති පුද්ගලයන් බෞද්ධ අන්තවාදීන්ගේ මැදිහත්වීම් මත මෙම නීතිය යටතේ අත්අඩංගුවට ගෙන තිබේ. කෙටිකතාවක් ලියා සමාජ මාධ්‍යවල පළ කරන ලද ශක්තික සත්කුමාර නම් ලේඛකයාද, සුක්කානමක රුව සහිත ගවුමක් ඇඳ සිටීම නිසා හසලකදී අත්අඩංගුවට ගෙන තිබුණු කාන්තාවකද අයිසීසීපීආර් පනත යටතේ ඇප ලබා නොදී බන්ධනාගාරගත කර තිබේ.
ශක්තික සත්කුමාර අත්අඩංගුවට ගෙන ඇත්තේ බෞද්ධ තොරතුරු කේන්ද්‍රය නම් බෞද්ධ හිමිවරුන්ගෙන් සමන්විත සංවිධානයක පැමිණිල්ලක් මත අපේ‍්‍රල් 09 වැනිදාය. මැයි 23 වැනිදා වනවිටද ඔහු සිටින්නේ බන්ධනාගාරගතවය. ශක්තිකගේ කෙටිකතාව ‘සමස්ත බෞද්ධ ජනතාවගේ සිත් රිදීමට හේතු වී ඇති බව’ බෞද්ධ තොරතුරු කේන්ද්‍රය ප‍්‍රකාශ කිරීම නිසා ඔහු අත්අඩංගුවට ගෙන තිබෙන නමුත්, ඔහුගේ කෙටිකතාව නිසා කිසිදු සමාජ කැළඹීමක් ඇතිවූ බවට වාර්තා වී නොමැත.
හසලකදී කාන්තාවක අත්අඩංගුවට ගෙන ඇත්තේ මැයි 18 වැනිදාය. එයට සම්බන්ධ වූ පොලිස් නිලධාරියෙකු අනිද්දා සමඟ නිර්නාමිකව අදහස් දක්වමින් ප‍්‍රකාශ කළේ එම කාන්තාව හැඳ සිටි ගවුමේ පැහැදිලිවම සුක්කානමක රූපයක් තිබෙන බවයි. එහෙත් එය ධර්ම චක‍්‍රයක් බව පවසමින් බෞද්ධ හිමිවරුන් හා ප‍්‍රදේශවාසීන් කළ බලපෑම මත එම කාන්තාව අයිසීසීපීආර් පනත යටතේ අධිකරණයට ඉදිරිපත් කොට බන්ධනාගාරගත කිරීමට සිදුවූ බව ඔහු කීය.
අයිසීසීපීආර් පනතට අදාළ සම්මුතිය 1966 දී එක්සත් ජාතීන්ගේ මහා මණ්ඩලය සම්මත කරගෙන ඇත්තේ සුළුතර කොටස්වල සිවිල් හා දේශපාලන අයිතිවාසිකම් තහවුරු කිරීම පිණිසය. ශ‍්‍රී ලංකාව 1980 දී එම සම්මුතියට අත්සන් තබා ඇති අතර 2007 නොවැම්බර් මාසයේදී එයට අදාල පනත ශ‍්‍රී ලංකා පාර්ලිමේන්තුව සම්මත කරගෙන තිබේ. මේ වන විට එම පනත ශ‍්‍රී ලංකාවේ වැඩි වශයෙන් ක‍්‍රියාත්මක වන්නේ සුළුතර ජනවර්ගවලට අයත් කොටස්වල සිවිල් හා දේශපාලන අයිතිවාසිකම් සීමා කිරීමට හා බෞද්ධ සංවිධාන එකඟ නොවෙන අයගේ අදහස් මර්දනය කිරීමටය. අපේ‍්‍රල් 21 ත‍්‍රස්ත ප‍්‍රහාරයෙන් පසුව ත‍්‍රස්තවාදී ක‍්‍රියාවලට සම්බන්ධ නැති සාමාන්‍ය මුස්ලිම් ජනතාව කෙරෙහි වෛරය ඇතිවන අන්දමේ ප‍්‍රසිද්ධ අදහස් ප‍්‍රකාශ කිරීම් රැුසක් සිදුවුණත්, ඒවා සම්බන්ධයෙන් එම පනත යටතේ කටයුතු කර නැත.
