ත්‍රස්ත ප්‍රහාරයෙන් පසුව ආණ්ඩුව සාමූහික වගකීමෙන් මිදී දේශපාලන මත ගැටුම් ඉදිරියට ගැනීම පිළිබඳව අමාත්‍යවරුන් වන මනෝ ගනේෂන් හා රවුෆ් හකීම් ඇතුළු පිරිසක් අප්‍රේල් 23 වැනිදා පැවති කැබිනට් රැස්වීමේදී ජනාධිපතිවරයාට සහ අගමැතිවරයාට දෝෂාරෝපණය කර ඇතැයි වාර්තා වෙයි.
අප්‍රේල් 21 වැනිදා ත්‍රස්ත ප්‍රහාරයෙන් අනතුරුව අගමැතිවරයා හා කැබිනට් මණ්ඩලය සමඟ සාකච්ඡා කිරීමට ත්‍රිවිධ හමුදා ප්‍රධානීන්ට ජනාධිපතිවරයා අවසර නොදීම, ජනාධිපතිවරයා අප්‍රේල් 22 පැවති කැබිනට් මණ්ඩල රැස්වීම මඟහැරීම ඇතුළු කාරණා ගැන මෙහිදී ජනාධිපතිවරයා දෝෂදර්ශනයට ලක්වී ඇත. අගමැතිවරයා ප්‍රමුඛ එක්සත් ජාතික පක්ෂය අප්‍රේල් 21 වැනිදා සිට ජනාධිපතිවරයාට දෝෂාරෝපණය කොට, වගකීමෙන් ගැලවීමට ක්‍රියාකිරීම ගැන අගමැතිවරයාට දෝෂාරෝපණ එල්ලවී තිබේ.
අනිද්දා සමඟ සම්මුඛ සාකච්ඡාවකට එක්වෙමින් මේ බව තහවුරු කළ අමාත්‍ය මනෝ ගනේෂන් ප්‍රකාශ කළේ සාමූහිකව වැඩ කළ නොහැකි නම් ආණ්ඩුව ඉල්ලා අස්විය යුතු බව තමා නායකයන් දෙපළට යෝජනා කළ බවයි. අමාත්‍ය රවුෆ් හකීම්ද සම්මුඛ සාකච්ඡාවකට එක්වෙමින් කීවේ තමන් ඇතුළු සුළුතර ජනවර්ග නියෝජනය කරන දේශපාලන පක්ෂ නායකයන් මේ ගැන අභ්‍යන්තර රැස්වීම්වලදී දැඩිව අදහස් දැක්වූ බවයි. ■
