පක්ෂය ප්රතිසංස්කරණය කිරීම සඳහා යෝජනා ඉදිරිපත් කිරීමට පත්කළ රුවන් විජේවර්ධන කමිටු වාර්තාව ක්රියාත්මක නොකිරීම නිසා මේ වනවිට පක්ෂය තුළ නායක මට්ටමින් නැවතත් ගැටුම් ඇතිවෙමින් ඇති බව වාර්තා වේ.
පසුගිය සතියේ සිට සජිත් ප්රේමදාස සහ රවී කරුණානායක මහත්වරුන් අතර ගැටුමක් උත්සන්න වී ඇති අතර මේ වනවිට දෙදෙනාම එකිනෙකාට චෝදනා කරගනිමින් සිටිති. පක්ෂය තුළ ඉහළ තනතුරු පිරවීමේදී රහස් ඡන්දයකින් එය කළ යුතුයැයි මෙම කමිටුව නිර්දේශ කළත් එය නොකිරීම නිසා, තම නායකයන්ට තමන් පක්ෂය තුළ කවුරුන්දැයි තක්සේරුවක් නොමැතිකමින් මෙවැනි ගැටුම් නිර්මාණය වෙමින් ඇතැයි එජාප ජ්යෙෂ්ඨයෙක් අනිද්දා වෙත පැවසීය.
පවත්නා තත්ත්වය තුළ එජාපයේ ජනාධිපති අපේක්ෂකයා ලෙස කුමන නායකයාගේ නම යෝජනා වුණත් පක්ෂය තුළ බරපතළ බෙදීමක් හටගෙන එය ගැටුමක් දක්වා උත්සන්න වීමේ අවදානමක් ඇතැයිද සුදුසු දේ නම් රහස් ඡන්දයකින් පුද්ගලයන් තෝරාගැනීම යැයිද ඒ මහතා කීවේය. ■
