ව්‍යවස්ථා සම්පාදක මණ්ඩලයේදී ඇති කරගත් එකඟතා අනුව බලය බෙදීම පමණක් සිදුකිරීම වෙනුවෙන් ව්‍යවස්ථා සංශෝධන කෙටුම්පතක් සකස් කිරීම පිළිබඳව අමාත්‍ය රාජිත සේනාරත්න හා පාර්ලිමේන්තු මන්ත්‍රී එම්.ඒ. සුමන්තිරන් අතර සාකච්ඡාවක් ඇතිවී තිබෙන බව වාර්තා වෙයි.
අප්‍රේල් 03 වැනිදා පාර්ලිමේන්තුවේදී පැවති උතුරු නැගෙනහිර නැවත පදිංචිකිරීම්වලට අදාළ ජනාධිපති කාර්ය සාධක බලකායේ සාකච්ඡාවකින් අනතුරුව මේ කතාබහ ඇතිවී තිබේ.
ව්‍යවස්ථා සම්පාදක මණ්ඩලයේදී හා නව ව්‍යවස්ථාව පිළිබඳ මෙහෙයුම් කමිටුවේදී ඇති කරගත් එකඟතා මත දළ යෝජනා සකස් කිරීම එහිදී එම්.ඒ. සුමන්තිරන් මන්ත්‍රීවරයා විසින් භාරගෙන තිබේ. එම යෝජනා මත පදනම්ව ආණ්ඩුවේ ව්‍යවස්ථා සංශෝධන කෙටුම්පතක් ලෙස එය සකස් කිරීමට එහිදී එකඟ වී තිබේ.
නව ආණ්ඩුක්‍රම ව්‍යවස්ථාවකින් 13 වැනි සංශෝධනය ශක්තිමත් වන ආකාරයට බලය බෙදීමට එකඟ වන නමුත් විධායක ජනාධිපති ක්‍රමය අහෝසි කිරීමට එකඟ නොවෙන බව මෙහෙයුම් කමිටු වාර්තාවට ශ්‍රී ලංකා නිදහස් පක්ෂය ඉදිරිපත් කළ යෝජනාවලියෙහි ඇතුළත්ව තිබුණි. ඒ මත පදනම්ව මෙහෙයුම් කමිටුවේ ශ්‍රීලනිප නියෝජිතයන් වන නිමල් සිරිපාල ද සිල්වා සහ ඩිලාන් පෙරේරා මහත්වරුන් පෙන්වා දී තිබුණේ සම්පූර්ණයෙන්ම නව ව්‍යවස්ථාවක් සකස් කිරීමට ජනමත විචාරණයක් අවශ්‍ය වෙන නිසා එයට කල්ගත වෙන බවයි. ඒ නිසා බලය බෙදීමට අදාළ ව්‍යවස්ථා සංශෝධනයක් පමණක් කළ යුතු බව ඔවුන් එහිදී කියා තිබුණි.
එම යෝජනාව මත පදනම්ව බලය බෙදීමට ව්‍යවස්ථා කෙටුම්පතක් සකස් කිරීම වෙනුවෙන් සරත් අමුණුගම, රාජිත සේනාරත්න, එම්.ඒ. සුමන්තිරන්, ඩිලාන් පෙරේරා යන සිව්දෙනාගෙන් යුත් කමිටුවක් ජනාධිපතිවරයාගේ හා අගමැතිවරයාගේ නිර්දේශයෙන් පත්කර තිබුණු නමුත් එම කමිටුව හරිහැටි ක්‍රියාත්මක වී තිබුණේ නැත. ආරංචිමාර්ග පවසන්නේ ශ්‍රීලනිපය යෝජනා කළ සාමාජිකයන් දෙදෙනාගේ උදාසීනත්වය එයට හේතුවී තිබෙන බවයි.
එම කමිටුවේ සාමාජිකයන් දෙදෙනෙකු වන රජිත සේනාරත්න හා එම්.ඒ. සුමන්තිරන් යන මන්ත්‍රීවරුන් දෙදෙනා ඉහත සකච්ඡාව කර ඇත්තේ එම කමිටුව ක්‍රියාත්මක නොවීම නිසාය. ■
