ආණ්ඩුක්‍රම ව්‍යවස්ථාවේ සඳහන් නොවන ‘කැබිනට් නොවන අමාත්‍ය’ තනතුරුවලට මන්ත්‍රීවරුන් 10 දෙනෙකු පත්කිරීම සඳහා එක්සත් ජාතික පක්ෂයෙන් ජනාධිපති මෛත්‍රීපාල සිරිසේනට නම් යවා ඇතැයි ආණ්ඩුවේ ප්‍රබල ඇමතිවරු කිහිපදෙනෙක් අනිද්දා සමඟ කීහ.
එම නම් 10 සඳහා ජනාධිපතිවරයා තවම ප්‍රතිචාර දක්වා නැති නමුත් එම නම් යැවුවේ ජනාධිපතිවරයා සමඟ ඇති කරගත් පූර්ව එකඟතාවක් මත බවද ඔවුහු පැවසූහ.
පාලිත රංගේ බණ්ඩාර, විජිත් විජයමුණි සොයිසා, ඒ.එච්.එම්. ෆවුසි, ලක්ෂ්මන් සෙනෙවිරත්න ඇතුළු පිරිසකගේ නම් 10ක් එසේ යවා ඇත.
අනිද්දා සමඟ අදහස් දැක්වූ අමාත්‍යවරයෙකු පැවසුවේ, 19 වැනි සංශෝධනයෙන් කැබිනට් අමාත්‍යවරුන් සංඛ්‍යාවට සීමාවක්ද, රාජ්‍ය හා නියෝජ්‍ය අමත්‍යවරුන්ට සීමාවක්ද පනවා ඇතත් කැබිනට් නොවන අමාත්‍ය තනතුරු ගැන එහි සඳහනක් නොවන බවයි. ඒ නිසා කැබිනට් නොවන අමාත්‍යධුර ඕනෑ තරම් ලබාදිය හැකි බවට ඔහු තර්ක කළේය. ■
