පවුලකට අපේක්ෂකයාව තෝරන්න බැහැ

පාර්ලිමේන්තු මන්ත්‍රී ඩිලාන් පෙරේරා

ශ්‍රීලනිපය හා පොහොට්ටුව අතර සන්ධානය ගොඩනැඟීමේ දැන් තත්වය කොහොමද?
මේක පොරොන්දම් බලලා වුණ කසාදයක්. අවුරුදු ගාණක් පෙම්කරලා ඇතිවුණ කසාදයක් නෙවෙයි. අවුරුදු ගණන් දැන හඳුනගෙන හිටියාට තරහා වෙලානේ හිටියෙ. පස්සේ පොරොන්දම් බලලයි බැන්දෙ. මනමාලයාගේ පැත්තෙන් දැන් කියනවා පොරොන්දු වෙච්ච දෑවැද්ද නෙවෙයි දුන්නෙ කියලා. මනමාලිගේ පාර්ශ්වයෙන් කියනවා සම්පූර්ණ දෑවැද්ද දැන් දෙන්න බැහැ කියලා.

මොකද මනමාලයා පොරොන්දු වුණ විදියේ ගෙයක් හදලා තිබුණෙ නැති හින්දා. ගේ සම්පූර්ණයෙන් හැදුවොත් දෑවැද්ද දෙනවාලු. ඔය වගේ තමයි ශ්‍රීලනිපයයි පොහොට්ටුවයි සන්ධානගත වීමේදී දැන් තියෙන ප්‍රශ්ණය. ඒත් දැන් කසාදෙ කැඩෙන්නෙ නැහැ. මොකද මනමාලි ගැබ් අරන් හමාරයි. දැන් ඉතින් උපදින දරුවා සෞඛ්‍ය සම්පන්න දරුවෙක් කරගන්නයි ඕනෑ. නැත්නම් 2015 ජනවාරි 08 දා හැදුණ ආණ්ඩුවට සිද්ධවුණා වගේ දරුවා අංගවිකල වේවි. ඊළඟ ජනාධිපතිවරණය වෙද්දී සියල්ල හරියට කරන්න ඕනෑ. නැත්නම් එකිනෙකාට ප්‍රතිවිරුද්ධ පක්ෂ දෙකකින් ජනාධිපතිවරයෙක් පත්වුණොත් පක්ෂ දෙකට එකට වැඩකරන්න බැහැ. මේ කසාදය කඩන්න බලාගෙන විවිධ පාර්ශ්ව ඉන්නවා. පොහොට්ටුව පැත්තේත්, ශ්‍රීලනිපය පැත්තේත් ඉන්නවා. ඔවුන් විරුද්ධ වෙන්නේ පටු අරමුණු නිසයි. දේශපාලනිකව බලලා නෙවෙයි. ශ්‍රීලනිපයේ ඉන්නවා ඇමතිකම් නැතිවුණ ශෝකයෙන් ඉන්න පිරිසක්. පොහොට්ටුවේ ඉන්නවා අනෙක් පැත්තෙන් ආපු ජෙඨෂ්ඨයෝ නිසා අනාගතයේදී ඇමතිකම් අහිමිවේවි කියලා බියපත් වුණ පිරිසක්. ගොඩනැගෙන සංවාදය පිළිබඳ නිල වශයෙන් සාකච්ඡා ආරම්භ වෙලා දේශපාලන වශයෙන් ඉස්සරහට යනවා. මේ කණ්ඩායම් දෙක දෙකඩ වේවි කියලා මම හිතන්නෑ.

මූලිකම කාරණා ගැන එකඟතා ඇති කරගන්නේ නැතිව පක්ෂ දෙක අතරේ ගෙනයන සාකච්ඡාව එතරම් සෞඛ්‍ය සම්පන්න නැති බව වාසුදේව නානායක්කාර විසින් කියා තිබුණා..
වාසුදේව නානායක්කාර මැතිතුමා දිගින් දිගටම අපේ සමගිය වෙනුවෙන් පෙනී හිටියා. එතුමාගේ අත්දැකීම් මත පහුගිය දවසක කියලා තිබුණා මේ සමගිය ඇතිවුණේ නැත්නම් දේශපාලනය නොකර ගෙදර ඉන්න එක හොඳයි කියලා. එතුමා කියන කාරණය එහෙම්පිටින්ම බැහැර කරන්න බැහැ. එතුමා ජීවිත කාලය පුරාවට එජාපයට විරුද්ධව පෙරමුණු හැදීමේ දේශපාලනයේ හිටපු කෙනෙක්. මූලික කාරණා කියලා ඔහු කීවේ ජනාධිපතිවරණ අපේක්ෂකයා වගේ කාරණා ගැන නම්, එතුමා කෙරෙහි ගරුත්වය ඇතිවම කියන්න ඕනෑ මේ වෙලාවේ අපේක්ෂකයා ගැන කතාකිරීමෙන් පලක් නැති බව. එහෙම වුණොත් ප්‍රශ්ණ්‍යක් මතුවෙන්න පුලුවන්. ඒ නිසා අපේක්ෂකයා කවුද කියන කාරණය අවසානයට කකතාකිරීම හොඳයි කියලයි මම හිතන්නෙ.

පක්ෂ දෙක අතර සාකච්ඡාවේ තත්වය කොහොමද?
ඒ සාකච්ඡාවට සහභාගී වෙන දෙපාර්ශ්වයේම පිරිස් කියන කාරණා තමයි ගන්න ඕනෑ. මේ සාකච්ඡාවලට හයදෙනෙක් සහභාගී වෙනවා. ඒ හයදෙනාගෙන් මම කිට්ටුවෙන් ආශ්‍රය කරන හතරදෙනෙක් ඉන්නවා. ඒ හතරදෙනා කියන විදියට නම් සාකච්ඡාව සාමාන්‍යයෙන් එකතුවෙන පැත්තට තමයි ගමන් කරන්නේ.

ඔබ මේ වෙලාවේ නියෝජනය කරන්නෙ මොන පක්ෂයද?
මම පොදුජන පෙරමුණට ගියේ නැහැ. මම ශ්‍රීලනිපයේ ඉන්නවා. 16 දෙනාගේ කණ්ඩායමේ සමහර අය පොදුජන පෙරමුණට ගියා. මම ගියේ නැහැ.

සන්ධානගතවීමට විපක්ෂව ශ්‍රීලනිපයේ දැඩි මතයක් තියෙනවා නේද?
ශ්‍රීලනිපය තුළ මත තුනක් තියෙන බව පිළිගන්න වෙනවා. දෙවැනිවර අයවැය විවාදෙන් පස්සේ ශ්‍රීලනිපයේ පාර්ලිමේන්තු මන්ත්‍රීවරුන් සුළු පිරිස තුනට කැඩිලා තියෙන්නෙ. එක පිරිසක් විජිතමුණි සොයිසා, ලක්ෂ්මන් සෙනෙවිරත්න වගේ යූඇන්පී ආණ්ඩුවටම ගිහිල්ලා ඉන්නවා. තවත් පිරිසක් විපක්ෂයේ ඉන්න ඕනෑ බව පිළිගන්නවා. ඒත් ඒ පිරිස හොරගල් අවුලමින් ආණ්ඩුවට හොරෙන් සහාය දක්වමින් ඉන්න උත්සාහ කරනවා. ඒත් මම ඇතුළු හතරදෙනෙක් ඉන්නේ විපක්ෂයට ආවානම් විපක්ෂය ලෙස ක්‍රියාකරන්න ඕනෑය කියන මතයේ. ඉතින් මේ මන්ත්‍රීවරුන් 30ට ආසන්න සංඛ්‍යාව තුනට බෙදිලා ඉන්නවා.

ජනාධිපති මෛත්‍රීපාල සිරිසේන ඉන්නේ මොන මතයේද?
ජනාධිපතිතුමා බොහෝ අවස්ථාවලදී නිශ්චිතව ශ්‍රීලනිප ප්‍රතිපත්තිවල ඉඳගෙන වැඩකළා. ඒ නිසා අපට එතුමා ගැන විශ්වාසයක් තියෙනවා. ඒත් ආණ්ඩුවේ ජනාධිපතිවරයාය කියන බර එතුමාගේ හිසේ තියෙනවා. ඒ බර නිසා අයවැය වැනි අවස්ථාවලදී සමහර වෙලාවට ගන්න තීන්දු ගැන අපට එකඟ වෙන්න බැහැ. පක්ෂයේ තීන්දුවට පිටින් අපි අයවැයට විරුද්ධව ඡන්දය දුන්නෙ ඒ නිසා. ඒත් ජනාධිපති මෛත්‍රීපාල සිරිසේන මහතා පක්ෂයට ගෙනාපු හොඳම ජීවගුණය තමයි තීරණ ගැනීමේ නිදහස. අභ්‍යන්තර ප්‍රජාතන්ත්‍රවාදය. ඒ නිසා විරෝධය පාමින් පක්ෂය ඇතුලේ දේශපාලන සංවාදය කරමින් අපි ඉන්නවා.

මේ සාකච්ඡාව සාර්ථකව ඉදිරියට යන්නට නම්, අයවැය තෙවැනිවර ඡන්දය විමසීමේදී කණ්ඩායම් දෙකම විරුද්ධව ඡන්දය දිය යුතු බව ඇතැම් අය කියනවා නේද?
මම හිතන්නෙ ඒ සාකච්ඡාව හා මේක අතර සම්බන්ධයක් නැති බව. ඒත් පැහැදිළිවම අයවැයට විරුද්ධව ඡන්දය දෙන්නේ නැත්නම් ඒකේ තෙරුම මේ අයවැය පිළිගන්නවා කියන එකයි. මේ අයවැය පිළිගන්න අපට බැහැ. මේක අයක් නැති වැයක් විතරක් තියෙන අයවැයක්. මේ ප්‍රෝඪාකාරී අයවැයට විරුද්ධ වෙන්න ඕනෑ. පක්ෂ අතර සාකච්ඡාව කෙසේ තිබුණත් ඒක වෙන්න ඕනෑ. අනෙක් පැත්තෙන් ඉතින්, ශ්‍රීලනිපය අයවැයට විරුද්ධව ඡන්දය දුන්නොත් මේ සාකච්ඡාව කෙරෙහි තියෙන සැක තැන් දුරු කරගන්නට උදව්වක් වේවි. ඒත් අප්‍රේල් 05 වැනිදාත් ඡන්දය නොදී ඉන්න තීන්දුවක් ගත්තත් මේ දෙපාර්ශ්වය එකතුකිරීමේ සාකච්ඡාව නවතින්න ඕනෑ බව ඒකෙන් හැදෙන්නෙ නැහැ.

අපට දැනගන්නට ලැබුණු විදියට ජනාධිපති මෛත්‍රීපාල සිරිසේනගේ ඍජු මැදිහත්වීමෙන් තමයි අයවැය දෙවැනිවර කියැවූ මොහොතේ ඡන්දය නොදී හිටියේ..
මම කලිනුත් කීවා වගේ ආණ්ඩුවේ නායකත්වය තමයි එතුමාට තිබුණු බාධාව. මුළු අයවැය ඇතුලේම ජනාධිපති වැය ශීර්ෂය තිබුණු නිසා මුළු අයවැයට විරුද්ධව ඡන්දය දීලා ජනාධිපති වැය ශීර්ෂයට පමණක් පක්ෂව ඡන්දය නොදෙන්නේ කොහොමද කියන ප්‍රශ්ණයයි තියෙන්නෙ. ඒත් චන්ද්‍රිකා බණ්ඩාරණායක මැතිණියගේ කාලයේදී අපි ඔය කාර්යයම කළා. එතුමා පක්ෂයේ මහලේකම් කාලයේදී අපි විපක්ෂයේ ඉඳගෙන මුළු අයවැයටම විරුද්ධ වුණා. ඒ කාලේ ආණ්ඩුවෙන් බෙදීමක් ඉල්ලුවේ නැහැ. බෙදීමක් ඉල්ලුවානම් ජනාධිපති වැය ශීර්ෂයට පක්ෂව ඡන්දය දෙන්නයි අපි හිටියේ. මෙතැනදී පක්ෂයේ ධාරා තුනක් හිටියානේ. ඒ කණ්ඩායම ජනාධිතුමාව බය කළා. බෙදීමක් ඉල්ලුවොත් ජනාධිපති වැය ශිර්ෂය පරාජය වේවි කියලා. මම නම් දිගටම කීවා මේක බයකිරීමක් පමණක් බව. රනිල් වික්‍රමසිංහ මහත්තයා අගමැතිව සිටියදී තමන්ගේම කණ්ඩායම දාලා ජනාධිපතිවරයාගේ වැය ශීර්ෂය පරාජය කරන්නෙ නැහැ. එහෙම වුණොත් ලෝකෙටම යනවා වෙනත් පණිවුඩයක්. ඒ හින්දා තමයි පසුපෙළ මන්ත්‍රීවරුන්ව දාලා ජනාධිපතිවරයාට දැඩි මඩ ප්‍රහාරයක් එල්ලකරලා ජනාධිපති වැය ශීර්ෂය ගැන අවිනිශ්චිත හැඟීමක් ඇතිකළේ. ඒක සම්පූර්ණ රංගනයක්.

රනිල් වික්‍රමසිංහ අගමැතිවරයා රාජ්‍ය සේවා කොමිෂන් සභාව කැඳවලා විදුහල්පතිවරුන්ව පත්කිරීමේ කටයුතුවලට මැදිහත්වෙන්න උත්සාහ කළ බව පසුගිය සතියේ අනිද්දා පුවත්පත වාර්තා කළා. කාලයක් තිස්සේ ව්‍යවස්ථාව කඩකිරීමේ චෝදනාව ජනාධිපතිවරයාට එල්ලවුණ පසුබිමක මේ චෝදනාව ගැන ඔබේ අදහස මොකක්ද?
මම ජනාධිපතිතුමා ව්‍යවස්ථාව කඩ කරපු බවට කරන චෝදනා මම පිළිගන්නෙ නැහැ. මම ඕනෑ තැනක ඒක කියනවා. ව්‍යවස්ථාව හරියට ක්‍රියාත්මක කරන්න ඕනෑ නිසා ජනාධිපතිතුමා ස්වාධීන කොමිෂන් සභාවල වත්මන් ක්‍රියාකාරීත්වය විවේචනය කළා. ඒ ආයතන විවේචනය කරන්න හැකියාවක් තියෙනවා. ජනාධිපතිතුමාගේම මැදිහත්වීමෙන් 19 වැනි සංශෝධනය සම්මත කරලා ඇතිකරපු ස්වාධීන කොමිෂන් සභා ස්වාධිනත්වය කඩ කරනවානම් ඒක ගැන චෝදනා කිරීම ව්‍යවස්ථාව කඩකිරීමක් නෙවෙයි. මහින්ද රාජපක්ෂ මැතිතුමාව අගමැති විදියට පත්කිරීම ව්‍යවස්ථාව කඩකිරීමක් විදියටත් මම දකින්නෙ නැහැ. අගමැතිතුමා දැන් රාජ්‍ය සේවා කොමිෂන් සභාව කැඳවලා වේදිකාව ඉදිරියේ කරන වැඩකොටස මීට කලින් තිරය පසුපස ඉඳගෙන කළා. අපි පැහැදිළිව ඒ චෝදනාව කරනවා. ඒකට කතානායකතුමාත් හවුල්. ස්වාධීන කොමිෂන් සභා සංකල්පය සම්පූර්ණයෙන්ම විනාශ කිරීමට තිරය පසුපස සිට කටයුතු කළා. සමහර මාධ්‍ය සහ රාජ්‍ය නොවන සංවිධාන නිහඬව හිටියා. මුනිවත රැක්කා. දැන් තිරය පසුපස කරපු දේවල් තිරය ඉදිරිපිට කරද්දී තමයි මාධ්‍යවලින් ඒ ගැන අවධානය යොමුකරලා තියෙන්නෙ.

ඔබත් ප්‍රතිපත්තියක් විදියට ස්වාධීන කොමිෂන් සභා ක්‍රමයට විරුද්ධයිද?
ස්වාධීන කොමිෂන් සභා කියන සංකල්පය නරක සංකල්පයක් නෙවෙයි. ඒත් එහෙම කියපු අපට සමහර ප්‍රශ්ණ නැfÛද්දී උත්තර දෙන්න බැරිවෙලා තියෙනවා. ස්වාධීන කොමිෂන් සභා සංකල්පය විනාශ කරලා තියෙනවා. මේ වගේ තවත් උදාහරණයක් විදියට මේ ආණ්ඩුවට යහපාලන ආණ්ඩුව කියලා කීවාට, මේ ආණ්ඩුවෙන් යහපාලන සංකල්පය විනාශ කිරීම පෙන්වන්න පුලුවන්. දැන් අපට යහපාලනය වෙනුවෙන් පෙනීහිටින්න අමාරුයි. අපි ඉතිහාසය පුරාවට දේශපාලන විද්‍යාවට හා අපි දන්නා දේශපාලනයට අනුව තියෙන යහපත් සංකල්ප වෙනුවෙන් පෙනී ඉන්න දැන් අපට බැරිවෙලා තියෙනවා. ස්වාධීන කොමිෂන් සභා පත්කරන්නට පෙර බොහෝ ආයතනවල තිබුණු ප්‍රශ්ණ විසඳන්නට ස්වාධීන කොමිෂන් සභා පත්කිරීමෙන් පස්සේ හැකිවෙලා නැහැ. ඒ විතරක් නෙවෙයි, සමහර තැන්වල කලින් තිබුණාටත් වඩා ගැටලු වැඩිවෙලා තියෙනවා.

ඇතැම්විට ඒකාධිපතියන්ට, ජාතිවාදීන්ට වඩා ඒ සංකල්පවලට විරුද්ධව ව්‍යාජ ලෙස පෙනීසිටින අය භයානකයි නේද?
ප්‍රභාකරන් මීට කලින් දෙමළ ජනතාව තුළ ජාතිවාදය පතුරවමින්, තමන්ට විරුද්ධව වැඩකරනවායැයි හිතන දේශපාලන නායකයන්ව මැරුවා. උමා මහේෂ්වරන්, සභාරත්නම්, පද්මනාදන්, නීලන් තිරුචෙල්වම් වගේ උතුරේ නායකයන්ව. ලක්ෂ්මන් කදිරගාමර් වගේ දකුණේ නායකයන්වත් මැරුවා. ඒත් කිසිම අවස්ථාවක අන්ත ජාතිවාදී සිංහල නායකයන්ට කැටපෝලෙකින්වත් ගැහුවෙ නැහැ. දකුණේ සිංහල ජාතිවාදය පෝෂණය කරමින් හිටපු චම්පික රණවකට, ජවිපෙට, ගුණදාස අමරසේකරට, දඹර අමිල හිමිට කවදාවත් ගැහුවේ නැහැනේ. මොකද ප්‍රභාකරන් දැනගෙන හිටියා දකුණේ අන්ත සිංහල ජාතිවාදයෙන් තමන්ගේ මතවාද පෝෂණය කරන බව. දැනුත් ජාතිවාදයට, ඒකාධිපතිවාදයට විරුද්ධව ප්‍රජාතන්ත්‍රවාදී සංකල්ප වෙනුවෙන් පෙනී ඉන්න බව කියමින් බොරු කරන අය කරන්නේත් ඒ වගේ විනාශයක් තමයි. ඒ අන්ත දෙකේම අය එකිනෙකාව පෝෂණය කරනවා.

මීළඟ ජනාධිපතිවරණයට රාජපක්ෂ පවුලෙන් ඉදිරිපත්වෙන අපේක්ෂකයා ලෙස පවුලේ සාකච්ඡාවකදී ගෝඨාභය රාජපක්ෂව තෝරාගත් බව බැසිල් රාජපක්ෂ මාධ්‍ය ඉදිරියේ කියා තිබෙනවා…
මේ වෙලාවෙ එක පවුලක් එකතුවෙලා අපේක්ෂකයාව තීන්දු කරන්න බැහැ. මමනම් හිතන්නෙ රාජපක්ෂ පවුලේ හමුවක් තිබුණේ අපේක්ෂකයාව තීන්දු කරන්න නෙවෙයි. ඔවුන් රාජක්ෂ පවුල වූ පලියට තේ එකක් බොන්න එකතුවෙන්න බැරිකමක් නැහැනේ. එතැනදී දේශපාලනය කතාකරන්න ඇති. ඒත් මම හිතන්නෙ නැහැ එතැනදී අපේක්ෂකයාව තීන්දු කරන්න ඇති කියලා. බැසිල් රාජපක්ෂ වුණත් දන්නවා පවුලකට එකතුවෙලා අපේක්ෂකයාව තෝරන්න බැරි බව.
එහෙත් ගෝඨාභය රාජපක්ෂ ගැන සංවාදයක් තියෙන නිසා ඔහු ගැන ඔබේ අදහස කීවොත්..
ගෝඨාභය රාජපක්ෂව අපේක්ෂකයා හැටියට තෝරනවානම්, ඒක දෙමළ හා මුස්ලිම් ජනතාව ඡන්දය දීමේ විලාසය අමතක කරලා අපේක්ෂකයාව තේරීමක් වෙනවා. මම නියෝජනය කරන බදුල්ල දිස්ත්‍රික්කය වගේ පැතිවල සිටින ජනතාවට එහෙම අපේක්ෂකයෙකුට සහාය දෙන්න අමාරුයි. ඒ නිසා වාසුදේව නානායක්කාර කරන දේශපාලන විවේචනය ඉතාමත් සාධාරණයි. වෙල්ගම මහත්තයාගේ විවේචනය නම් බොළඳ එකක්. ඒත් වාසුදේව නානායක්කාර මහත්තයාගේ විචාරය හරි වැදගත්. මමත් ඉන්නේ වාසු සහෝදරයා ඉන්න තැනම තමයි. මට ගෝඨාභය රාජපක්ෂ ගැන පෞද්ගලික තරහක් නැහැ. ඒත් ගෝඨාභය රාජපක්ෂ හා සරත් ෆොන්සේකා කියන දෙපළගේ මිලිටරිමය ක්‍රියාදාමයේ වෙනසක් පෙනෙන්නේ නැහැ. සරත් ෆොන්සේකාට වඩා ගෝඨාභය රාජපක්ෂගේ කළමණාකාරීත්වය, ගතිගුණ ගැන මට විශ්වාසයක් තියෙනවා. ඒත් මිලිටරිමය මානසිකත්වය පැත්තෙන් මටනම් වෙනසක් පෙනෙන්නේ නැහැ.

හමුදාමය විදියටයි ගෝඨාභය රාජපක්ෂ මහතා හිතන්නේ. දැන් එළිය, වියත්මඟ වැනි සංවිධානවල ඉදිරියෙන්ම ඉන්න කෙනෙක් තමයි සරත් වීරසේකර කියන්නෙ. සරත් වීරසේකර කියන්නේ අන්ත ජාතිවාදී, වර්ගවාදී, මිලිටරිමය මානසිකත්වයකින් පෙළෙන, දැඩි හීනමානයක් තියෙන කෙනෙක්. ඒ වගේ උදවිය ළඟින් හිටුවාගත්තාම සාමාන්‍ය දෙමළ හා මුස්ලිම් ජනතාව ළඟට එන්නේ නැහැ. දුවනවා. එවැනි අයත් එක්ක ජනාධිපතිවරණ අපේක්ෂකත්වය ලබාගන්නෙ කොහොමද කියලා මම දන්නේ නැහැ. ගෝඨාභය රාජපක්ෂ මහතා ජනාධිපතිධූරයට පත්වුණොත් මොන මානසිකත්වයෙන් වැඩ කරනවාද කියන එක එතුමාගේ තීන්දුවක්. ඒත් දැන් එතුමා වටේ ඉන්න චරිත ටික දිහා බැලුවාම ජනාධිපතිවරණ අපේක්ෂකත්වය ලබාගැනීම සඳහා අවශ්‍යම කොන්දේසියක් වන දෙමළ හා මුස්ලිම් ජනතාවගේ ඡන්දය දිනාගැනීම කියන කාරණය වෙනුවෙන් එතුමා ගන්න උත්සාහය පිළිබඳව මම සෑහීමට පත්වෙන්නෙ නැහැ.