ජාතික පාසල්වල පවතින විදුහල්පති පුරප්පාඩු පිරවීම සම්බන්ධයෙන් සාකච්ඡා කිරීමට අගමැති රනිල් වික්‍රමසිංහ රාජ්‍ය සේවා කොමිසමත් එහි අධ්‍යාපන සේවා කමිටුවත් කැඳවා ඇත.
මෙම කැඳවීම 19 වැනි සංශෝධනය යටතේ පිහිටුවා ඇති ස්වාධීන කොමිසමකට කරන ලද බලපෑමක් බව රාජ්‍ය සේවා කොමිසමේ මතය වී ඇත. කොමිසම හෝ කොමිසම විසින් බලය පවරා ඇති කිසිදු කමිටුවක් කැඳවීමේ බලයක් අගමැතිවරයාට නැති බවද එම කොමිසමේ සාමාජිකයෙක් අප කළ විමසීමකදී පැවසීය.
මේ ආකාරයට අග්‍රාමාත්‍යවරයා රාජ්‍ය සේවා කොමිසම හා එහි අධ්‍යාපන සේවා කමිටුව කැඳවා ඇත්තේ මාර්තු 18 වැනිදාය. එදින රාජ්‍ය සේවා කොමිසමේ සභාපතිවරයා ඇතුළු සාමාජිකයනුත්, අධ්‍යාපන සේවා කමිටුවේ සභාපතිවරයාත් එම කැඳවීමට සහභාගි වී නැත. දෙවන පෙළ නිලධාරීන් කණ්ඩායමක් පමණක් එම සාකච්ඡාව සඳහා සහභාගි වී ඇත.
මේ ආකාරයට කොමිසමේ වගකිවයුත්තන් හා එහි අධ්‍යාපන සේවා කමිටුවේ වගකිවයුත්තන් සාකච්ඡාවට සහභාගි නොවීම නිසා අග්‍රාමාත්‍යවරයා එම සාකච්ඡාව අහෝසි කර ඇත. නැවත කොමිසමේ සාමාජිකයන් හා එහි අධ්‍යාපන සේවා කමිටුවේ සාමාජිකයන්ට මාර්තු 24 වැනිදා අග්‍රාමාත්‍යවරයා හමුවන ලෙස දැනුම්දීමක් කර ඇතැයි වාර්තාවේ.
මේ සම්බන්ධයෙන් අනිද්දා කළ විමසීමකදී ලංකා ගුරු සංගමයේ ප්‍රධාන ලේකම් ජෝසෆ් ස්ටාලින් පැවසූවේ අග්‍රාමාත්‍යවරයා රාජ්‍ය සේවා කොමිසමේ සාමාජිකයන් කැඳවීම ස්වාධීන කොමිෂන් සභාවකට කරන ලද බලපෑමක් බවත්, එය සදාචාරාත්මක නොවන වැරදි පූර්වාදර්ශයක් බවත්ය. එමෙන්ම ඔහුගේ සාකච්ඡාවට නොයා සිය ස්වාධීනත්වය ආරක්ෂා කරගන්නා ලෙසද ස්ටාලින් මහතා කොමිසමෙන් ඉල්ලා සිටියි.
අග්‍රාමාත්‍යවරයා අධ්‍යාපනය ලැබූ කොළඹ රාජකීය විද්‍යාලය ඇතුළු ජාතික පාසැල් 302 ක විදුහල්පති පුරප්පාඩු පිරවීම සඳහා 2018 වර්ෂයේදී අධ්‍යාපන අමාත්‍යාංශය අයදුම්පත් කැඳවා සම්මුඛ පරීක්ෂණ පවත්වා තෝරාගත් විදුහල්පතිවරුන්ගේ නාමලේඛනය අනුමැතිය සඳහා රාජ්‍ය සේවා කොමිසමට යොමු කර ඇත. එහිදී කොමිසම එම තෝරාගැනීම් ප්‍රතික්ෂේප කරමින් නැවත අයදුම්පත් කැඳවීමට අධ්‍යාපන අමාත්‍යාංශයට උපදෙස් දී ඇත.
මෙහිදී කොළඹ රාජකීය විදුහලේ විදුහල්පති තනතුරට දැනට මොරටුව වේල්ස් කුමාර විද්‍යාලයේ විදුහල්පතිවරයා සුදුසුකම් ලබා ඇතැයි වාර්තා වන අතර එයට අගමැතිවරයා ඇතුළු රාජකීය විද්‍යාලයීය සංගමය විරුද්ධ වී ඇත. ඒ වේල්ස් කුමාර විදුහල්පතිවරයා වයස අවුරුදු තිස් ගණනක පුද්ගලයෙකුය යන්න හේතු කරගනිමින්ය. ■
