රාජ්‍ය ආයතනවල ඉහළ තනතුරු සඳහා පත්කිරීමේදී ජනාධිපති ලේකම්වරයාගේ සභාපතිත්වයෙන් හා ජනාධිපති ජ්‍යෙෂ්ඨ උපදේශකයන්ගේ සාමාජිකත්වයෙන් පත්කර ඇති කමිටුවක් මගින් අනුමැතිය ලබාගෙන එම පත්කිරීම් කරන ලෙස ජනාධිපති ලේකම්වරයා සෑම අමාත්‍යාංශ ලේකම්වරයෙකුටම චක්‍රලේඛයක් නිකුත් කරනු ලැබුවේ පසුගිය ජනවාරි මාසයේදීය. එය හොඳ වැඩක්යැයි අග්‍රාමාත්‍ය රනිල් වික්‍රමසිංහද කියා තිබුණි.
එහෙත් ජනාධිපතිවරයා ඔහුගේ ලේකම්වරයා මගින් එම චක්‍රලේඛය යවා තිබුණේ කුමන්ත්‍රණකාරී ආණ්ඩුව පරාජය කිරීමෙන් පසු එක්සත් ජාතික පෙරමුණු ආණ්ඩුව යළි බලයට පත්වීමෙන් පසු බව අමතක කළ යුතු නැත. ඊට පෙරත් කුමන්ත්‍රණකාරී ආණ්ඩු සමයේදී රාජ්‍ය ආයතනවල ඉහළ තනතුරු සඳහා පත්කිරීමේදී තමා විසින් පත්කරන ලද කුමන්තණකාරී ආණ්ඩුවේ අගමැති වූ මහින්ද රාජපක්ෂද ඇතුළත් කමිටුවක් මගින් අනුමැතිය ලබාගෙන එම පත්කිරීම් කළ යුතු බව ජනාධිපතිවරයා ප්‍රකාශ කළද ඒ සඳහා ජනාධිපති ලේකම්වරයා මගින් චක්‍රලේඛයක් නිකුත් කළේ නැත.
කෙසේ හෝ බැරිම තැන ආණ්ඩුව පිහිටුවීමට අකැමැත්තෙන් එක්සත් ජාතික පෙරමුණට ඉඩදී ඔවුන්ගේ කකුලෙන් ඇදීම මේ චක්‍රලේඛය මගින් ජනාධිපතිවරයා බලාපොරොත්තු වූවාට සැක නැත. එජාපෙ ඇමතිවරුන් විසින් රාජ්‍ය ආයතනවල පත්කිරීම් සඳහා යවනු ලබන නම් ජනාධිපති කමිටුව විසින් ප්‍රතික්ෂේප කිරීමත්, ඒ නිසාම බොහෝ රාජ්‍ය ආයතනවල ඉහළ තනතුරු එම මුල් අවස්ථාවේදී පුරප්පාඩු වී පැවතීමත් දක්නට ලැබුණි.
තවමත් ජනාධිපතිවරයාගේ එම කමිටුව හා ඊට අදාළ චක්‍රලේඛය ක්‍රියාත්මක වෙනවාද යන්නට හරිහමන් තොරතුරු නැත. රාජ්‍ය ආයතනවල ඉහළ තනතුරුවල පුරප්පාඩු පිළිබඳව අසන්නට ලැබෙන්නේද නැත. එහෙත් රාජ්‍ය ආයතනවල ඉහළ තනතුරුවලට අවශ්‍ය සුදුසුකම් සහිත පුද්ගලයන් බඳවාගන්නවාට කිසිවෙකුට විරුද්ධ විය නොහැකිය. ඒ සඳහා යම් යාන්ත්‍රණයක් තිබෙනවා නම් එයද හොඳය. නමුදු එය සැමට සාධාරණ හා සමාන එකක් විය යුතුය. එහිදී ජනාධිපතිවරයා යටතේ තිබෙන රාජ්‍ය ආයතන, අගමැතිවරයා යටතේ තිබෙන රාජ්‍ය ආයතන හෝ වෙනත් ඇමතිවරුන් යටතේ තිබෙන රාජ්‍ය ආයතන ලෙස එහි වෙනසක් තිබිය නොහැකිය.
එහෙත් ඔවා දෙනු පරහට තමා සම්මතයේ පිහිටා යන්න කඩ කරමින් ජනාධිපතිවරයා, තමා යටතේ ඇති තමා වඩාත්ම ආස කරන ශ්‍රී ලංකා මහවැලි අධිකාරියේ අධ්‍යක්ෂ ජෙනරාල් ධුරයට සුදුසුකම් රහිත පුද්ගලයෙකු පත්කර ඇති බවට චෝදනා එල්ලවී තිබේ.
පොදු ව්‍යාපාර පිළිබඳ පාර්ලිමේන්තු කමිටුව හෙවත් කෝප් කමිටුවද එම පත්වීම සම්බන්ධයෙන් සාකච්ඡා කර ඇති අතර එහිදී ඔවුන්ගේ අවධානයට යොමුවී ඇත්තේ ශ්‍රී ලංකා මහවැලි අධිකාරියේ අධ්‍යක්ෂ ජෙනරාල් ධුරයට ජනාධිපතිවරයා පත්කර ඇති ඩී.එම්.එස්. දිසානායක මහතා ඊට පෙර ශ්‍රී ලංකා මහවැලි අධිකාරියේ මානව සම්පත් හා ආයතන සංවර්ධන අධ්‍යක්ෂධුරය ලබාගැනීමේදී ව්‍යාජ සුදුසුකම් පෙන්වා එම තනතුර ලබාගැනීම සම්බන්ධයෙනි.
එම තනතුර සඳහා පිළිගත් විශ්වවිද්‍යාලයක උපාධියක් සමඟ මානව සම්පත් කළමනාකරණය සංවර්ධනය පිළිබඳව වසර 20ක පළපුරුද්දක් හා ඉන් වසර 7ක් ජ්‍යෙෂ්ඨ විධායක මට්ටමේ කටයුතු කළ යුතු බවට වූ කොන්දේසිය ඔහු උල්ලංඝනය කර ඇති බවට චෝදනා එල්ලවී ඇත.
ඒ අනුව ඔහු ඔහුගේ අවුරුදු 20ක සේවා පළපුරුද්ද පෙන්වා ඇත්තේ ආදේශක ආදායම් පරිපාලක මහර ප්‍රාදේශීය සභාව, පර්යේෂන සහකාර හා පර්යේෂණ හා පුහුණු නිලධාරී ජාතික ධීවර සහයෝගීතා ව්‍යාපාරය, වයඹ පළාත් පළාත් පාලන දෙපාර්තමේන්තුවේ පළාත් පාලන නිලධාරී (සංවර්ධන), කෘෂිකර්ම අමාත්‍යාංශයේ මාධ්‍ය ඒකකයේ ප්‍රධානී, ශ්‍රීපාලි මණ්ඩපයේ බාහිර කථිකාචාර්ය හා ශ්‍රී ලංකා පළාත් පාලන ආයතනයේ නියෝජ්‍ය අධ්‍යක්ෂ (පුහුණු) වශයෙන්ය.
ඒ අතරින් විධායක ශ්‍රේණියේ පළපුරුද්ද වශයෙන් කෘෂිකර්ම අමාත්‍යාංශයේ මාධ්‍ය ඒකක ප්‍රධානී, ශ්‍රීපාලි මණ්ඩපයේ බාහිර කථිකාචාර්ය හා ශ්‍රී ලංකා පළාත් පාලන ආයතනයේ නියෝජ්‍ය අධ්‍යක්ෂ (පුහුණු) වශයෙන් පෙන්වා ඇත.
විධායක ශ්‍රේණියේ එම සුදුසුකම් අතරින් කෘෂිකර්ම අමාත්‍යාංශයේ මාධ්‍ය ඒකකයේ ප්‍රධානී යන්න හා ශ්‍රීපාලි මණ්ඩපයේ බාහිර කථිකාචාර්ය යන්න රාජ්‍ය සේවයට අදාළ ජ්‍යෙෂ්ඨ විධායක මට්ටමේ යන්න පිළිගත නොහැක්කකි. තවද යම් විශ්වවිද්‍යාලයක හෝ මණ්ඩපයක බාහිර කථිකාචාර්ය යනු ස්ථීර රැකියාවක්ද නොවේ. එමෙන්ම මාධ්‍ය ප්‍රධානීන් යන්නද බොහෝ විට දේශපාලන තනතුරුය. අමාත්‍යවරයා වෙනස් වූ හෝ ඉවත් වූ විට ගෙදර යා යුතු තනතුරුය. රාජ්‍ය අංශයේ ජ්‍යෙෂ්ඨ විධායක තනතුරු ලෙස ගැනෙන්නේ අධ්‍යක්ෂ හෝ ඊට ඉහළ තනතුරුත්, ජ්‍යෙෂ්ඨ සහකාර ලේකම් හෝ ඊට ඉහළ තනතුරුත්ය.
එමෙන්ම ඔහුගේ පළපුරුද්ද සඳහා පෙන්වා දී ඇති ජාතික ධීවර සහයෝගිතාව යනු හර්මන් කුමාර මහතාගේ නායකත්වයෙන් මීගමුව ප්‍රදේශයේ ක්‍රියාත්මක වන ධීවර ගැටලු පිළිබඳ කටයුතු කරන රාජ්‍ය නොවන සංවිධානයකි.
ඔහු පළපුරුද්ද ලෙස සඳහන් කර ඇති කාලවකවානුවද තවදුරටත් ප්‍රශ්න සහගත වී ඇත. ඒ එකම කාලවකවානුවක ඔහු ආයතන කිහිපයක රැකියාව කර ඇති බව සඳහන් කිරීමෙන් හෙවත් විශ්වකර්ම වැඩ කිරීමෙන්ය.
ඒ පිළිබඳව මේ වනවිට ජනාධිපති මෛත්‍රීපාල සිරිසේනට ලිඛිත පැමිණිල්ලක් ඉදිරිපත්ව ඇත. එහි පිටපත් ජනාධිපති ලේකම්වරයාට, අල්ලස් හෝ දූෂණ චෝදනා විමර්ශන කොමිසමට, රාජ්‍ය සේවා කොමිසමට, පාර්ලිමේන්තු කෝප් කමිටුවට, මහවැලි සංවර්ධන හා පරිසර අමාත්‍යාංශ ලේකම්වරයාට යොමු කර ඇත.
ඒ සම්බන්ධයෙන් ජනාධිපතිවරයා තීන්දුවක් ගනීද යන්න සැක සහිතය. මන්ද මේ ඔහුගේ ආසම රාජ්‍ය ආයතනයට ඔහු විසින්ම සිදුකරනු ලැබූ පත්කිරීමක් නිසාය. එහෙත් ඇසිය යුතු ප්‍රශ්නයක් තිබේ. ශ්‍රී ලංකා මහවැලි අධිකාරියේ අධ්‍යක්ෂ ජෙනරාල්ධුරයට පරිපාලන සේවයේ හෝ ඉංජිනේරු සේවයේ පුද්ගලයෙකු පත්කිරීමේ ක්‍රමවේදය කඩකරමින් ජනාධිපතිවරයා මෙම පත්කිරීම කළේ ඇයිද යන්නය.
