තරුණය් පස්දෙනෙකු ඇතුළු පුද්ගලයන් එකොළොස් දෙනෙකු කප්පම් ලබාගැනීම සඳහා පැහැරගෙන ගොස් අතුරුදන් කළ සිද්ධියේ සැකකාර නාවික හමුදා සාමාජිකයන් වෙනුවෙන් සාකච්ඡුා කිරීම සඳහා විමල් වීරවංශ මන්ත‍්‍රීවරයා ආරක්ෂක අමාත්‍යාංශයේ ලේකම්වරයාව හා ජනාධිපතිවරයාව හමුවී ඇත.
මේ සම්බන්ධයෙන් සාකච්ඡුා කිරීම සඳහා පෙබරවාරි 12 වැනිදා සවස ආරක්ෂක අමාත්‍යාංශ ලේකම්වරයා හමුවීමට විමල් වීරවංශ මන්ත‍්‍රීවරයා ගොස් ඇති අතර එම අවස්ථාවට එකී සැකකාර නාවික හමුදා සාමාජිකයන්ගේ බිරින්දෑවරුන්, ළමයින් හා පවුලේ සාමාජිකයන්ද සහභාගි වී ඇත.
මෙම නඩුවේ ප‍්‍රධාන සැකකරුවකු වන දැනට ඇප මත සිටින නාවික හමුදා කමාන්ඩර් සුමිත් රණසිංහද ඊට සහභාගී වී ඇත. එමෙන්ම මෙම නඩුවේ පරීක්ෂණ සඳහා ප‍්‍රකාශයක් ලබා ගැනීමට අවශ්‍ය වී සිටින නාවික හමුදා සාමාජිකයෙකු වන පොඩි කුමාර නැමැත්තාගේ බිරිඳ ද එම හමුවට සහභාගි වී ඇත.
ප‍්‍රකාශයක් ලබා ගැනීම සඳහා පොඩි කුමාර නැමැත්තාව අපරාධ පරීක්ෂණ දෙපාර්තමේන්තුවට එවන ලෙස දැනුම් දී ඇති අතර ඊට පිළිතුරු ලෙස නාවික හමුදාව දැනුම් දී ඇත්තේ විශේෂ බුද්ධි මෙහෙයුමක් සඳහා ඔහුව යොදවා ඇති බැවින් එම කටයුතු අවසන් වූ පසු ප‍්‍රකාශයක් ලබාදීමට එවන බවය.
මෙම හමුවේදී ආරක්ෂක අමාත්‍යාංශ ලේකම් හේමසිරි ප‍්‍රනාන්දුව හමුවීමට මුලින්ම ගොස් ඇත්තේ දැනට ඇප මත සිටින නාවික හමුදා කමාන්ඩර් සුමිත් රණසිංහ වන අතර ඔහු සමග හිටපු ජනාධිපති බිරිඳ ශිරන්ති රාජපක්ෂගේ කටයුතු සඳහා අනුයුක්ත කර සිටි නාවික හමුදා කාන්තා නිලධාරිනියක්ද ගොස් ඇත.
ඉන් ටික වෙලාවකට පසු විමල් වීරවංශ මන්ත‍්‍රීවරයා සමග අනෙකුත් නාවික හමුදා සැකකරුවන්ගේ බිරින්දෑවරුන්, ළමයින් හා පවුලේ සාමාජිකයන් පැමිණ ඇති අතර පසුව මේ සියල්ලන්වම ජනාධිපතිවරයා හමුවට කැඳවා ගෙන ගොස් ඇති ආරක්ෂක අමාත්‍යාංශ ලේකම්වරයා ඔවුන්ට ජනාධිපතිවරයාට මුණගස්සවා තිබේ.
පුද්ගලයන් අතුරුදන් කිරීමේ සිද්ධිය සම්බන්ධයෙන් දැනට කමාන්ඩර් සුමිත් රණසිංහ, කමාන්ඩර් ඞී.කේ.පී. දසනායක, ලූතිනන් කමාන්ඩර් දයානන්ද ඇතුළු නාවික හමුදා සාමාජිකයන් 7 දෙනෙකු ඇප පිට සිටින අතර ලූතිනන් කමාන්ඩර් හෙට්ටිආරච්චි ඇතුළු තිදෙනෙක් බන්ධනාගාර ගතව සිටී.
මෙම අතුරුදහන් කිරීමේ සිද්ධිය සම්බන්ධයෙන් හිටපු නාවික හමුදාපතිවරයෙකු වූ වසන්ත කරන්නාගොඩ අත්අඩංගුවට ගැනීමේ සූදානමක් පවතින බවට විමල් වීරවංශගේ පක්ෂයේ නියෝජ්‍ය නායකයා වන ජයන්ත සමරවීර මන්ත‍්‍රීවරයා මාධ්‍ය හමුවක් පවත්වමින් ප‍්‍රකාශ කර ඇති අතර ඊට මාධ්‍ය මඟින් විශාල ප‍්‍රචාරයක් ලබාදී ඇත. එහිදී සමරවීර මන්ත‍්‍රීවරයා කියා ඇත්තේ ජිනිවා මානව හිමිකම් සැසිවාරයට පෙර මෙම අත්අඩංගුවට ගැනීම සිදුකිරීමට නියමිත බවයි.
ඊට අමතරව එම මාධ්‍ය හමුවේදී සමරවීර මන්ත‍්‍රීවරයා මෙම අතුරුදන් කිරීමේ සිදුවීම සම්බන්ධයෙන් සාක්ෂි ලබාදී ඇති හිටපු නාවික හමුදාපති ට‍්‍රැවිස් සින්නයියා, විශ‍්‍රාමික රියර් අද්මිරාල් ශ්‍යමාල් ප‍්‍රනාන්දු හා ලූතිනන් කමාන්ඩර් ක‍්‍රිෂාන්ත වෙලෙගෙදර ද්‍රෝහීන් ලෙස නම්කරමින් වාග් ප‍්‍රහාරයක්ද එල්ල කර ඇත.
විශ‍්‍රාමික රියර් අද්මිරාල් ශ්‍යාමාල් ප‍්‍රනාන්දු යනු ශ‍්‍රී ලංකා රේගු අධ්‍යක්ෂ ජෙනරාල් වශයෙන් පත්කරන්නට නියමිත පුද්ගලයා ලෙස රේගු වෘත්තීය සමිත විරෝධය දැක්වූ හිටපු නාවික නිලධාරියාය.
