යුද සමයේ පාවිච්චි කරන ලද ත්‍රිවිධ හමුදාව සතුව තිබු අධිතාක්ෂණයෙන් යුතු දූරකථන සංවාදවලට සවන්දීමට හැකියාව ඇති යන්ත්‍ර යළි ක්‍රියාත්මකව පවතින බව අපගේ ආරක්ෂක හමුදා ආරංචි මාර්ග පවසයි.
මේ පිළිබඳව විමසුමකදී හමුදා මාධ්‍ය ප්‍රකාශක සුමිත් අතපත්තු ප්‍රකාශ කළේ කිසිදු සාමාන්‍ය පුද්ගලයකුගේ දූරකථන සංවාදවලට ශ්‍රී ලංකා යුද හමුදාව සවන් නොදෙන බවත් යම් යම් අවස්ථාවල ජාතික ආරක්ෂාවට බාධාවක් ලෙස හඳුනාගත් පුද්ගලයන්ගේ පමණක් අදාළ අවශ්‍යතාවන් අනුව එවැනි දූරකථන සංවාදවලට සවන් දෙන බවත්ය.
තවද විමසුමකදී නාවික හමුදා මාධ්‍ය ප්‍රකාශක ලු‍තිනන් කමාන්ඩර් ඉසුරු සූරියබණ්ඩාර ප්‍රකාශ කළේ නාවික හමුදාව එවැනි දූරකතන සංවාදවලට සවන් නොදෙන බවත් මෙම කාරණාව ජාතික ආරක්ෂාවට බාධාවක් බැවින් මෙම ප්‍රශ්නයට තමන්ට පිළිතුරු දිය නොහැකි බවත් ය.
ශ්‍රී ලංකා ගුවන් හමුදාවේ මාධ්‍ය ප්‍රකාශක ගෲප් කැප්ටන් ගිහාන් සෙනවිරත්න ප්‍රකාශ කළේ ගුවන් හමුදාව කිසිදු දිනෙක එලෙස දූරකථන සංවාදවලට සවන් දී නොමැති බවත්ය. එවැනි සංවාදවලට සවන්දෙන්නේ පොලීසිය හා විදුලි සංදේශ නියාමන කොමිෂන් සභාව විසින් බවත්ය.■
හමුදාව දූරකථනවලට යළි සවන්දෙයි
- Advertisement -
