රේඛා නිලූ‍ක්ෂි හේරත්
ප‍්‍රගීත් එක්නැලිගොඩ අතුරුදන් වීම පිළිබඳ නඩුවට ඥානසාර හිමි සම්බන්ධ වුණේ කොහොමද?
ප‍්‍රගීත් එක්නැලිගොඩගේ නඩුවට ඥානසාර හිමි කිසිම සම්බන්ධයක් නෑ. ඒ නඩුව 2010දී පටන් අරගෙන 2015 වෙනතුරු කිසි දෙයක් වුණේ නෑ. එකම දේ නැවත නැවත කිව්වා. බොරු තොගයක් තිබුණා. 2015 ආණ්ඩු මාරුවෙන් පසුව අපරාධයක් විදියට බාර අරගෙන පරීක්ෂණ කළා. ලැබුණු සාක්ෂි මත හමුදා බුද්ධි අංශ නිලධාරීන්ව අත්අඩංගුවට ගත්තා. මේ පාර්ශ්වකරුවන් නොවෙන ඕනෑම කෙනෙකුට උසාවියට ඇවිත් නඩුව නරඹන්න පුළුවන්. ඥානසාර හිමියන් එහෙම බලන්න ආ කෙනෙක්.
ඥානසාර හිමියන්ගෙන් පළිගන්න ඔබ ක‍්‍රියා කළ බව ඇතැම් අය කියනවා. ඥානසාර හිමියන්ට දඬුවම් දීම ඔබේ වුවමනාවට කළ දෙයක්ද?
ඥානසාර හිමියන් මට තර්ජනය කළ මොහොතේ මම ක‍්‍රියාමාර්ග දෙකක් කළා. එකක් හෝමාගම පොලීසියට පැමිණිලි කළා. අනෙක පූජ්‍ය ඉත්තෑපානේ ධම්මාලංකාර ස්වාමීන් වහන්සේට පැමිණිල්ලක් කළා. ධම්මාලංකාර හිමියන් තමයි කෝට්ටේ සංඝ සභාවේ නායක හිමියන්. ඥානසාර හිමියන්ගේ නායක හිමි. මම පැමිණිලි කළා භික්ෂු විනයට අනුව ඥානසාර හිමියන් සම්බන්ධයෙන් පියවරක් ගන්න කියලා. සංඝ සභාව ඒ සම්බන්ධයෙන් කිසිම ක‍්‍රියාමාර්ගයක් ගත්තේ නැහැ. එහෙම පසුබිමක මට සිදුවෙනවා නීතියෙන් තියෙන රැුකවරණය ලබාගන්න. මේක පෞද්ගලික නඩුවක් නෙවෙයි. මේක අපරාධ නඩුවක්.
මා කළ පැමිණිල්ල මත සාධාරණ සැකයකින් තොරව පොලීසිය චෝදනාව ඔප්පු කිරීම නිසා පැහැදිලි දඬුවමක් දීමට අධිකරණයට සිදුවෙනවා. ඒක තමයි මහේස්ත‍්‍රාත්තුමා කළේ. මේක මගේ පෞද්ගලික පළිගැනීමක්වත් රජය කළ පළිගැනීමක්වත් නෙවෙයි. මම කළේ පොලීසියට පැමිණිල්ලක් කිරීම පමණයි. පැමිණිල්ල ක‍්‍රියාත්මක කළේ පොලීසිය විසින්. ඒක තමයි පොලීසියේ රාජකාරිය.
ඥානසාර හිමි බන්ධනාගාරගත කිරීම උපසම්පදාවේ ගෞරවය කෙළෙසීමක් බව කියනවා. ඔබට ඒ ගැන තියෙන අදහස මොකක්ද?
උපසම්පදාවේ ගෞරවය රකින්නට නම් සංඝ සභාවට හොඳාකාරවම විනය පියවර ගන්න තිබුණා. මොකද ඒ අය ගාවට බෞද්ධ ස්ත‍්‍රියක් තමන්ට භික්ෂුවක් විසින් හිරිහැර කළා කියලා පැමිණිල්ලක් කරලා තිබුණා. මේ තර්ජනය බුද්ධ ධර්මයට අනුව වරදක් නොවන බව මැදගොඩ අභයතිස්ස හිමි කියලා තිබුණා. හැබැයි මම දන්නේ නැහැ දකුණතේ දබරැුඟිල්ල දිගුකරලා තර්ජනාත්මකව ‘තෝ පලයන්, තොගේ මිනිහා කොටියෙක්, තෝ ගිහින් හිඟා කාපිය’ කියද්දී ඒක පරුෂාවාචා වේරමණී සික්ඛාපදං කියන සිල් පදයටවත් වැටෙන්නෙ නැත්තේ කොහොමද කියලා.
මම සතුටට පත්වෙන එක කාරණයක් තියෙනවා. 2016 ජනවාරි 26 වැනිදා ඥානසාර හිමියන්ව මුලින්ම රක්ෂිත බන්ධනාගාර කළ දවසේ ‘කිරිබත් කෑ’ නාලාගිරි වගේ හාමුදුරුවරු සිවුරු ගලවාගෙන, වැටවල් උඩ නැඟගෙන, පොලීසියේ මහත්වරුන්ගේ ඇඳුම් ඉරලා, බන්ධනාගාර බස්රිය ළඟ නිදාගෙන පුදුම කලහකාරී හැසිරීමක යෙදුණා. ඒත් පහුගිය 14 වැනිදා ඥානසාර හිමියන්ව බන්ධනාගාරගත කළ වෙලාවේ මේ භික්ෂූන් වහන්සේලා කළේ පිරිත් කීම. මම සතුටට පත්වෙනවා අන්තිමේදී නීතිය විසින් මේ භික්ෂූන් වහන්සේලාව විනයගත කිරීම ගැන. එහෙත් මම බෞද්ධ කාන්තාවක් විදියට දුක්වෙනවා මේ කලහකාරී භික්ෂූන් වහන්සේලාව විනයගත කරන්න ලංකාවේ සංඝ සභාව අසමත් වීම ගැන.
ඔබට තර්ජනය කරන අය වෙනුවෙනුත් ප‍්‍රගීත් ලියලා තියෙනවා කියලා සිහිවෙද්දී ඔබට ඇතිවෙන හැඟීම මොකක්ද?
මට හිනා ඉතින්. මම එකම එක දෙයක් තේරුම් ගත්තා. ලංකාවෙ බහුතරයක් පිරිමි පරපීඩක කාමුකත්වයෙන් පෙළෙනවා. ඒ අය අඩු වශයෙන් ලිංගික වචනවලින් මට හිරිහැර කරලා හරි තෘප්තියක් ලබන්න බලනවා.
මාධ්‍යවල හැසිරීම ගැන ඔබේ අදහස මොකක්ද?
මාධ්‍යවලින්ම දැන් කියනවා පීඩකයා හරි කියලා. පීඩකයාට දඬුවම් දෙන්න ඕනෑ නැහැ කියලා. මට හිනහ යනවා. මම දන්න තරමින් බුද්ධ කාලයේදීවත් කවදාවත් චීවරය දැම්මා කියලා වරදකරුවෙක්ව නිවැරදි කරන්නැයි කියලා නැහැ. බුද්ධ වචනය අනුවම තමන් කරන හොඳ නරක ගොනා පසුපස කරත්තය ඇදෙනවා සේ තමන් පසුපස එනවා. ඥානසාර හිමි වරදක් කරලා තියෙනවා. බුද්ධ වචනය අනුව ඥානසාර හිමි පසුපස දඬුවම එනවා. ඒක කර්මය ලෙසවත් පිළිගන්න බෞද්ධයන්ට බැරි ඇයි? බුද්ධ කාලයේදී දේවදත්ත කියලා හිමිනමක් හිටියේ නැද්ද? බෞද්ධ දේශනා අනුව පව් පටිසන් දීලා දේවදත්ත හිමියන් පොළොව පළාගෙන නිරයට ගියා.
ඔබට මීට පෙරත් තර්ජන තිබුණා. දැන් ඒවා තව වර්ධනය වෙලා. ඒ ගැන බියක් දැනෙනවාද?
මට වෙලාවක දරුවන් පවා කියනවා පාරට යන්න එපා කියලා. යාළුවො කතාකරලා කියනවා. මේ අය මට කරදර කරයි කියලා. මටත් බයයි තමයි. ඒත් නවතින්නේ නැහැ. අපි හොඳාකාරවම දන්නවා මේක කරවන්නේ රාජපක්ෂලාගේ කඳවුර විසින් කියලා. මේ තර්ජන සංවිධානාත්මක පසුබිමකින් එන ඒවා කියලා. එයාලාගේ අරමුණත් මාව බය කරලා නතර කරන එකනේ.
ප‍්‍රගීත් කොටියෙක් නිසා ඔහුව අතුරුදන් කරවීම සාධාරණ බව ඇතැම් අය කියනවා නේද?
2016 අගෝස්තු 23 හෝමාගම මහේස්ත‍්‍රාත් අධිකරණයේ 741710 කියන නඩුවට අපරාධ පරීක්ෂණ දෙපාර්තමේන්තුවෙන් ගොනු කළා ලංකාවේ ආරක්ෂාවට සම්බන්ධ ආයතන 11කින් කළ විමසීමක ප‍්‍රතිඵල. එයින් අහලා තිබුණේ ප‍්‍රගීත් කිසියම් හෝ ත‍්‍රස්තවාදී සංවිධානයකට සම්බන්ධ වෙලා ඉඳලා තියෙනවාද, ඒවා සමඟ සම්බන්ධවෙලා තියෙනවාද, යම්කිසි ආකාරයකට උදව්වෙලා තියෙනවාද කියලා. එයින් කියනවා ප‍්‍රගීත් කිසිම ක‍්‍රියාවකට සම්බන්ධ නැහැ, ඒවා සම්බන්ධ කිසිම නඩුවක් නැහැ කියලා. එහෙම සාක්ෂි නැතිව තියෙද්දී තමයි ප‍්‍රගීත් කොටියෙක් බව කියන්න උත්සාහ කරන්නේ.
අනෙක රසායනික අවි ගැන මම කී කතාවක හඬ පටයක් දැන් පාවිච්චි කරනවා. අපි දන්නවා ලංකාවේ තිබුණු යුද්ධය ලංකාවේ ජාතීන් දෙකක් අතර ගැටුමක ප‍්‍රතිඵලයක්. ඒක ප‍්‍රතික්ෂේප කරන්න කාටවත් බෑ. බලය ඇති ජාතිය සහ බලය නැති ජාතියක් හිටියා. මේ යුද්ධයේදී මනුෂ්‍ය ඝාතන ගොඩක් සිද්ධකළා. ඒ කාරණය ලංකාවේ මිනිස්සු ගැන භේදයක් නැතිව කල්පනා කරන ඕනෑම මනුෂ්‍යයෙකුගේ සිත කම්පා කරන කාරණයක්. රසායනික අවි සම්බන්ධ කාරණයේදී ප‍්‍රගීත් කියන්නේ කොතැනකදී හෝ කවුරුහරි කෙනෙක් මිනිසුන්ට විරුද්ධව රසායනික අවි පාවිච්චි කරනවා නම්, ඒක පාවිච්චි කරන්නේ තෝරලා ත‍්‍රස්තවාදීන් විතරක් මරන්න නෙවෙයි කියලා. ඒක කරන්නෙ යම් ජනවර්ගයක් සමූලඝාතනය කරන්නයි. උදාහරණයක් කිව්වොත් කුඹුරකට රසායනික ද්‍රව්‍ය ගැහුවොත් ඒකෙන් විනාශකාරී සත්තු විතරක් නෙවෙයි, සියලූ සත්තු මැරෙනවා. අනෙක මේ රසායනික අවි ලෝකයේ කොහෙන් හෝ ගෙන ආ යුතුයි. එහෙම ගෙනෙන රසායනික අවි මේ බිමේ පාවිච්චි කිරීමෙන් ලෝකයේ කොහේ හෝ සිටින කෙනෙකුට රසායනික අවි ලංකාවේ අත්හදා බලන්න අපේ භූමිය පාවිච්චි කරන්න අවස්ථාව ලැබෙනවා.
මේ කාරණය මට කියන්න හේතුවක් තිබුණා. ප‍්‍රගීත් අතුරුදන් වෙලා වසර ගණනක් යන තෙක් කිසිම දෙයක් නැති හිස් කඩදාසියක් තිබුණා. මේක ගැන හොයපු අය හෙව්වා ප‍්‍රගීත්ව අතුරුදන් කරන්න හේතුව මොකක්ද කියලා. මම ඒ සඳහා හේතුවිය හැකි හේතු ගණනාවක් ඉදිරිපත් කළා. රාජපක්ෂලාව විවේචනය කිරීම, යුද්ධය සහ රසායනික අවි ගැන ලිවීම, ෆොන්සේකා මහතා සමඟ මැතිවරණයට ඉදිරිපත් වීම යන හේතු මම ප‍්‍රධාන වශයෙන් කිව්වා. මම හමුදාවට හෝ වෙන කිසි කෙනෙකුට චෝදනාව එල්ල කරන්නේ නෑ. රාජපක්ෂ ආණ්ඩුවටයි මේ සාපරාධී අතුරුදන් කරවීම ගැන චෝදනා කරන්නේ.
ඔබට කොටි කාන්තාවක්යැයි කියනවා…
මට කොටි ලේබලය අලවන අය කියන්නේ මම උතුරේ මිනිස්සු වෙනුවෙන් පෙනීසිටීම. මම සිංහල වීම නිසාත් මගේ සැමියා මාධ්‍යවේදියෙකු ලෙස ලංකාවේ සමාජය දන්නා කෙනෙක් වන නිසාත් සැමියා අතුරුදන් කාන්තාවක් විදියට මට වරප‍්‍රසාදයක් තියෙනවා. ඒ වරප‍්‍රසාදය එක්ක මට වගකීමක් පැවරෙනවා එහෙම කතාකරන්න පසුබිමක් නැති අවවරප‍්‍රසාදිත කාන්තාවන් වෙනුවෙන් කතාකරන්නට. ඒ කාන්තාවන් එක්ක එක පෙළට හිටගන්නට. මම ඒ වගකීම ඉටු කරනවා.
යහපාලන ආණ්ඩුව ඔබ සහ ප‍්‍රගීත් වෙනුවෙන් දැක්වූ සැලකිල්ල ගැන තෘප්තිමත්ද?
යහපාලන ආණ්ඩුව බලයට පත්වුණාට පස්සෙ මටවත් මගේ දරුවන්ටවත් පොඞ්ඩක්වත් උදව්වක් ලැබුණේ නැහැ. ඒක පැහැදිලියි. එහෙත් එක් කාරණාවක් සිද්ධවුණා. රාජපක්ෂලා බලයෙන් පහවීමෙන් පසුව ප‍්‍රගීත් අතුරුදන් කිරීම පිළිබඳව නඩුව ඉදිරියට ගෙනයන්න පුළුවන් වුණා. ඒ නිසා මේ වෙද්දී ප‍්‍රගීත්ව අතුරුදන් වීම ගැන සාධක බොහොමයක් හෙළිදරව් කරගන්න පුළුවන් වුණා. ඒක හැර වෙන කිසිම දෙයක් යහපාලන ආණ්ඩුවෙන් ලැබුණේ නෑ.
ප‍්‍රගීත් අතුරුදන් කිරීම පිළිබඳ පරීක්ෂණ තියෙන්නේ මොන මට්ටමේද?
හමුදාව නිසා පරීක්ෂණ හිරවෙලා තියෙන්නේ. එක වෙලාවක හමුදාපතිවරයා කියලා තිබුණා රණවිරුවා සහ අපරාධකරුවා දෙන්නෙක්. වෙනස හඳුනාගන්න කියලා. එහෙත් එක්තරා නිලධාරියෙක් අපරාධ පරීක්ෂණ දෙපාර්තමේන්තුව ඉල්ලා සිටින කරුණු නොදී ඉන්නවා. ඒවා යුද්ධයට සම්බන්ධ කරුණු නෙවෙයි. කොළඹ තියෙන කඳවුරු කිහිපයක් ගැන අතීතයට සම්බන්ධ පොඩි ලේඛන කිහිපයක්. ජාතික ආරක්ෂාවට ප‍්‍රශ්නයක් කියලා මේ ලේඛන නොදී ඉන්නවා. මේ නිලධාරියා ළඟ තමයි මේක නැවතිලා තියෙන්නේ.
