‘හිටපු ජනාධිපති රනිල් වික්‍රමසිංහ මහතා සහ මහාචාර්ය මෛත්‍රී වික්‍රමසිංහ මහත්මිය රජයේ මුදල් වැය කරමින් වර්ෂ 2023 දී ලන්ඩනයේ සංචාරයක නිරත වූ බවට කෙරුණු ප්‍රකාශය සම්පූර්ණයෙන් අසත්‍යය.
රනිල් වික්‍රමසිංහ මහතා 2023 වර්ෂයේදී තුන්වරක් ලන්ඩනයේ සංචාරය කරනු ලැබීය. ප්‍රථම සංචාරය 2023 මැයි 09 වැනි දින කරනු ලැබුයේ iii වැනි චාල්ස් රජතුමාගේ අභිෂේක උත්සවයට සහභාගි වීම සඳහාය. දෙවැනි වර පැරිස් සමුළුවට සහභාගි වන අතරතුර ජාත්‍යන්තර ප්‍රජාතාන්ත්‍රිකයින්ගේ සංගමයේ (IDU) 40 වැනි සංවත්සර සැසි වාරය සඳහා ලන්ඩන් නුවරට ගියේය.
හවානා නුවර G 77 සමුළුවට සහභාගි වූ රනිල් වික්‍රමසිංහ මහතා නිව්යෝක් නුවර එක්සත් ජාතීන්ගේ ජගත් සමුළුවටද එක්වීමෙන් අනතුරුව ලන්ඩන් නගරයට පැමිණීම තුන්වැනි සංචාරයේදී සිදුවිය.
මෛත්‍රී වික්‍රමසිංහ මහත්මියට මහා බි්‍රතාන්‍යයේ වුල්වර්හැම්ප්ටන් (wolverhampton) විශ්වවිද්‍යාලයෙන් මහාචාර්ය පදවිය ප්‍රදානය කිරීමේ උත්සවය මේ දිනවලදී වුල්වර්හැම්ප්ටන්හිදී පවත්වන ලදි. ඒ උත්සවයට රනිල් වික්‍රමසිංහ මහතාටද ආරාධනා කර තිබූ අතර නිව්යෝක් නුවරට ගොස් පැමිණෙන අතර වාරයේදී හිටපු ජනාධිපතිවරයා ඊට සහභාගි වූයේය.
මෙම සංචාරවලදී රනිල් වික්‍රමසිංහ මහතා රාජ්‍ය නායකයින් රැසක් හමුවීමද සිදුකරනු ලැබීය. එසේම ජනපති බිරිඳ ලෙස මහාචාර්ය මෛත්‍රී වික්‍රමසිංහ මහත්මිය ඒ අතරතුරදී ජාත්‍යන්තර මට්ටමින් සංවිධානය කෙරුණු රැස්වීම්, වැඩමුළු ආදියටද සහභාගි වූවාය.
නිව්යෝක් නුවර සිට පැමිණ දිවා කාලයෙන් පසුව ලන්ඩන් නගරයෙන් පිටවීමට කලින් සැලසුම් කර තිබුණද එදින පස්වරුවේ හමුවීම් කිහිපයක් පැවති බැවින් රනිල් වික්‍රමසිංහ මහතා ශ්‍රී ලංකාවට පැමිණීම පසුදා තෙක් කල් දැමිණි.
හිටපු ජනාධිපති රනිල් වික්‍රමසිංහ මහතා සහ නිලධාරීන්ගේ ලන්ඩන් සංචාරයක් සඳහා ප්‍රකාශිත ආකාරයේ අධික මුදලක් වැය වූයේ යැයි පැවසීම අතිශය ගැටලු සහගතය. රාජ්‍යතාන්ත්‍රික වශයෙන් කරන සංචාර පිළිබඳ වත්මන් රජයට අවබෝධයක් නැති බව මේ කරුණ හමුවේදී ද පැහැදිලි වෙයි. ජනාධිපති ලෙස රනිල් වික්‍රමසිංහ මහතා රජයේ වියදමින් ලන්ඩන් නුවරට 2023 වර්ෂයේදී කිසිදු පෞද්ගලික සංචාරයක නිරත වී නැත. ඒ පිළිබඳව කරන සියලු ප්‍රකාශ සාවද්‍යය.’
හිටපු ජනාධිපති රනිල් වික්‍රමසිංහගේ කාර්යාලය කලබලයට පත්ව එසේ පිළිතුරු සපයන්නේ සභානායක බිමල් රත්නායක විදේශ කටයුතු අමාත්‍යාංශය සම්බන්ධයෙන් වන අයවැය කාරක සභා විවාදයට එක්වෙමින් මාර්තු 15 වැනිදා පාර්ලිමේන්තුවේදී කළ කරුණු දැක්වීමකට ප්‍රතිචාර වශයෙනි. එහිදී සභානායක බිමල් රත්නායක කීවේ හිටපු ජනාධිපති රනිල් වික්‍රමසිංහ 2023 සැප්තැම්බර් 22 හා 23 දිනවල බි්‍රතාන්‍යයේ ලන්ඩන් නුවරට රජයේ මුදල් වැය කරමින් පෞද්ගලික සංචාරයක නිරත වී ඇති බවයි. එම පෞද්ගලික සංචාරය සඳහා ජනාධිපතිවරයාට අමතරව ඔහුගේ බිරිඳ ඇතුළු 10 දෙනෙකුගෙන් සමන්විත කණ්ඩායමක් සහභාගි වී ඇති බවත්, ඒ සඳහා ජනාධිපති කාර්යාලයෙන් කරන ලද දැනුම් දීමට අනුව ලන්ඩනයේ ශ්‍රී ලංකා මහා කොමසාරිස් කාර්යාලය සියලු කටයුතු මෙහෙයවා ඇති බවත්ය. ඒ සඳහා 2023 වර්ෂයේ වියදම බි්‍රතාන්‍ය පවුම් 40,445ක් වී ඇති බවත්, එම මුදල් ජනාධිපති කාර්යාලයේ ප්‍රතිපාදන යටතේ ගෙවා ඇති බවත් ඔහු කීවේය.
ඒ සම්බන්ධයෙන් සභානායක බිමල් රත්නායක වැඩිදුරටත් කීවේ පෞද්ගලික සංචාරයක් සඳහා එසේ මහජන මුදල් වැය කිරීම අපරාධ වරදක් බවත්, ඒ සම්බන්ධයෙන් පරීක්ෂණයක් සිදුකරන ලෙස විදේශ කටයුතු අමාත්‍යාංශයට නියෝග කොට ඇති බවත්ය.
හිටපු ජනාධිපති රනිල් වික්‍රමසිංහ මහතා ඔහුගේ එම නිවේදනයෙන් ඔහුට එරෙහි චෝදනාව සාවද්‍ය බව සඳහන් කළද, එම චෝදනාව සාවද්‍ය නොවේ. සාවද්‍ය වන්නේ රනිල් වික්‍රමසිංහ මහතාගේ නිවේදනයේ ඇති කරුණුය.
එම නිවේදනයේ සඳහන් කර ඇති ආකාරයටම රනිල් වික්‍රමසිංහ මහතා කියුබාවේ ජී 77 සමුළුවට හා ඇමරිකාවේ නිව්යෝක් නුවර පැවති එක්සත් ජාතීන්ගේ මහ මණ්ඩල රැස්වීමට සහභාගි වීමෙන් පසු ලන්ඩන් නුවරට ගිය බව කීම ඇත්තය. එහෙත් ලන්ඩන් නුවර ඔහු වැඩිපුර දිනක් ගත කරන්නේ නිවේදනයේ ඇති ආකාරයට අහම්බෙන් නොවේ. එය ඊට පෙර සැලසුම් කරන ලද, ලන්ඩනයේ ශ්‍රී ලංකා මහා කොමසාරිස් කාර්යාලයට හෝටල් වෙන්කිරීම, ප්‍රවාහනය ඇතුළු කටයුතු සංවිධානය කරන ලෙස දැනුම් දී ඇති සංචාරයකි.
ඇත්ත වශයෙන්ම එම ලන්ඩන් සංචාරය සිදුකර ඇත්තේ නිවේදනයේද සඳහන් කර ඇති මෛත්‍රී වික්‍රමසිංහ මහත්මියට මහා බි්‍රතාන්‍යයේ වුල්වර්හැම්ප්ටන් විශ්වවිද්‍යාලයෙන් ලබාදුන් මහාචාර්ය පදවිය පිරිනැමීමේ උත්සවයට සහභාගි වීම සඳහාය.
එම විශ්වවිද්‍යාලයේ වෙබ් අඩවිය හිටපු ජනාධිපති බිරිඳ මහාචාර්ය මෛත්‍රී වික්‍රමසිංහගේ ඡායාරූපයක්ද පළකරමින් ඒ ගැන සඳහන් කිරීමක් කර ඇති අතර එහි උද්ධෘතය ලෙස දක්වා ඇත්තේ ‘වුල්වර්හැම්ප්ටන් විශ්වවිද්‍යාලය තම විශේෂඥතා ක්ෂේත්‍රයට සැලකිය යුතු දායකත්වයක් ලබාදුන් පුද්ගලයින්ට ගෞරව සම්මාන පිරිනමනු ලැබේ.’ යන්නය. මහචාර්යවරියට එම ගෞරවය ලබාදීම සඳහා හේතු වශයෙන් එහි මෙසේ සඳහන් කර තිබේ.
‘මහාචාර්ය මෛත්‍රී වික්‍රමසිංහ ශ්‍රී ලංකාවේ කැලණිය විශ්වවිද්‍යාලයේ ස්ත්‍රී පුරුෂ සමාජභාවය පිළිබඳ අධ්‍යයන මධ්‍යස්ථානයේ ආරම්භක අධ්‍යක්ෂවරිය මෙන්ම එහි ඉංග්‍රීසි දෙපාර්තමේන්තුවේ ජ්‍යෙෂ්ඨ මහාචාර්යවරියක් වේ. සසෙක්ස් විශ්වවිද්‍යාලයේ උසස් අධ්‍යාපන හා සමානාත්මතා පර්යේෂණ මධ්‍යස්ථානයේ ආරාධිත මහාචාර්යවරියකද වන ඇය ඇයගේ වසර 33ක අධ්‍යයන ජීවිතය තුළ ශ්‍රී ලංකාවේ විශ්වවිද්‍යාල ගණනාවක ආරාධිත ශාස්ත්‍රාලිකවරියක ලෙස කටයුතු කර ඇත.
ස්ත්‍රී පුරුෂ සමාජභාවය පිළිබඳ විශේෂඥවරියක වන ඇය, පර්යේෂණ, ඉගැන්වීම්/පුහුණුව, ප්‍රතිපත්ති සංවර්ධනය, ඇගයීම, උපදේශනය හා ක්‍රියාකාරිත්වය යන ක්ෂේත්‍රවලට සම්බන්ධ වන විශාරදවරියකි. ස්ත්‍රී පුරුෂ සමානාත්මතාව පිළිබඳ ප්‍රතිපත්ති/උපාය මාර්ග සකස් කිරීම, ස්ත්‍රී පුරුෂ සමාජභාවය පිළිබඳ සංවේදීකරණ පුහුණුව පැවැත්වීම, දේශීය හා ජාත්‍යන්තර උසස් අධ්‍යාපන ආයතන සහ සංවිධාන සඳහා කාන්තා හා ස්ත්‍රී පුරුෂභාවය පිළිබඳ වැඩසටහන් ඇගයීම සම්බන්ධයෙන් ඇයට වසර තිහකට ආසන්න පළපුරුද්දක් ඇත. පොදු රාජ්‍ය මණ්ඩල විශ්වවිද්‍යාල සංගමයේ ස්ත්‍රී පුරුෂ සමාජභාවය පිළිබඳ වැඩසටහන සඳහා ස්ත්‍රී පුරුෂභාවය පිළිබඳ උපදේශක කණ්ඩායමේ සාමාජිකාවක ලෙස සහ ශ්‍රී ලංකා විශ්වවිද්‍යාල ප්‍රතිපාදන කොමිෂන් සභාවේ ස්ත්‍රී පුරුෂ සමානාත්මතාව පිළිබඳ ස්ථාවර කමිටුවේ සාමාජිකාවක ලෙස සේවය කිරීම එයට ඇතුළත්ය.
මහාචාර්ය වික්‍රමසිංහ දැනට බංගලාදේශයේ පිහිටි ආසියානු කාන්තාවන් සඳහා වූ විශ්වවිද්‍යාලයේ භාරකාර මණ්ඩලයේ සාමාජිකාවක වන අතර මෑතකදී පොදු රාජ්‍ය මණ්ඩල ලේකම් කාර්යාලයේ සහ NO MORE පදනමේ මුලපිරීමක් වන පොදු රාජ්‍ය මණ්ඩලීය චැම්පියන් ෆෝ කොමන්වෙල්ත් ලෙස පත්කරන ලදි.’
එම ඇගයීම සම්බන්ධයෙන් මහාචාර්ය මෛත්‍රී වික්‍රමසිංහ දක්වන අදහසක්ද එහි දක්වා ඇති අතර ඒ මෙසේය.
‘ස්ත්‍රී පුරුෂ සමාජභාවය සහ උසස් අධ්‍යාපන ක්ෂේත්‍රවල ශාස්ත්‍රාලිකයෙකු සහ වෘත්තිකයකු ලෙස මගේ කාර්යයට ලැබුණු පිළිගැනීම ගැන මම සතුටු වෙනවා. උසස් අධ්‍යාපනය තුළ මෙන්ම අනෙකුත් ක්ෂේත්‍රවල ඉගැන්වීම, පුහුණුව, උපදේශනය, ප්‍රතිපත්ති සහ වැඩසටහන්කරණය බවට පර්යේෂණ පරිවර්තනය කළ ශ්‍රී ලංකාවේ සහ විදේශයන්හි ස්ත්‍රීවාදී සහ කාන්තා ශාස්ත්‍රාලිකයින්ගේ අඛණ්ඩ කාර්යයක කොටසක් මගේ දායකත්වයයි. මාර්ගය සකස් කළ අයට සහ මා සමඟ ගමන් කළ අයට මම බෙහෙවින් ණය ගැතියි. එය ගෞරවයක්, ඒ සඳහා වුල්වහැම්ප්ටන් විශ්වවිද්‍යාලයට මම මුළු හදින්ම ස්තූතිවන්ත වෙමි.’
එම පෞද්ගලික ලන්ඩන් සංචාරයට නිව්යෝක් නුවරට ගිය ශ්‍රී ලංකාවේ සියලුම නියෝජිත කණ්ඩායම සහභාගි වී නැති අතර ඒ සඳහා සහභාගි වී ඇත්තේ 10 දෙනෙකුගෙන් සමන්විත පිරිසකි. විදේශ කටයුතු අමාත්‍යාංශයේ ඇති ලිපි ලේඛන අනුව එම පිරිස වන්නේ, හිටපු ජනාධිපති රනිල් වික්‍රමසිංහ සහ ඔහුගේ බිරිද මහාචාර්ය මෛත්‍රී වික්‍රමසිංහ, ප්‍රධාන සංධාන නිලධාරි (Potocol) සෙනරත් දිසානායක, ජනාධිපතිවරයාගේ පෞද්ගලික ලේකම් සැන්ඩ්‍රා පෙරේරා, ජනාධිපති වෛද්‍ය නිලධාරි වෛද්‍ය බීටීඑම්පීඑස් ගුණවර්ධන, ජනාධිපතිවරයාගේ පෞද්ගලික ආරක්ෂක නිලධාරි ප්‍රධාන පොලිස් පරීක්ෂක අශෝක ආරියවංශ යටිගම්මන, ජනාධිපති ආරක්ෂක අංශයේ පොලිස් කොස්තාපල් බීඑච්එන්ඒඑස් ආරියරත්න, සංධාන නිලධාරි ඒටී කෝසල පෙරේරා, ජනාධිපති ආරක්ෂක අංශයේ සහකාර පොලිස් අධිකාරි පීඑන් ගුරුගේ හා ජනාධිපති ආරක්ෂක අංශයේ ප්‍රධාන පොලිස් පරීක්ෂක අයිඑම්ටීආර් දෙල්ගොඩය.
මේ සම්බන්ධයෙන් බි්‍රතාන්‍යයේ ලන්ඩන් නුවර ශ්‍රී ලංකා මහ කොමසාරිස් කාර්යාලයට යවන දැනුම් දීමේ සඳහන් කරන්නේ ඇමරිකාවේ නිව්යෝක් නුවර පැවැත්වෙන එක්සත් ජාතීන්ගේ 78 වන මහ සමුළුවෙන් පසු ජනාධිපතිවරයා සහ ඔහුගේ බිරිඳ බි්‍රතාන්‍යයේ වුල්වර්හැම්ප්ටන් සහ ලන්ඩන් යන නගරවලට පෞද්ගලික සංචාරයක නිරතවන බවත්, ඇමණුම්වල සඳහන් ආකාරයට ඊට අදාල පහසුකම් වෙන් කරන ලෙසත්ය.
ඒ අනුව බර්මින්හැම් නුවර හිල්ටන් හෝටලයේ කාමර දෙකක් 2023 සැප්තැම්බර් 22 දින දිවා කාලයේ භාවිතය සඳහා වෙන්කරන ලෙස දැනුම් දී ඇති අතර ඒ ජනාධිපතිවරයා හා බිරිඳට එක් කාමරයක් හා අනෙක් නියෝජිත පිරිසට එක් කාමරයක් ලෙසටයි. එමෙන්ම එදින දහවල් ආහාරයද බර්මින්හැම් හෝටලයෙන් සියල්ලන්ට වෙන්කරන ලෙස දැනුම් දී ඇත.
එදිනම රාත්‍රියේ නවාතැන් ගැනීම සඳහා ලන්ඩනයේ සුදුසු හෝටලයක් වීවීඅයිපී නියෝජිත පිරිසට වෙන්කරන ලෙස දැනුම් දී ඇත. ඊට අදාල ඇමුණුමට අනුව ජනාධිපතිවරයාට හා ඔහුගේ බිරිඳට විධායක සුයිට් හෝටල් කාමරයක් (Executve Suite) වෙන්කරන ලෙස දැනුම් දී ඇත. සුයිට් හෝටල් කාමරයක් යනු නිවසක් වැනි හෝටල් කාමරයකි. එහි කාමරයට අමතරව සාලයක් හා පැන්ටි්‍රයක් වැනි පහසුකම්ද ඇත.
ප්‍රධාන පොටෝකෝල් නිලධාරි සෙනරත් දිසානායක, ජනාධිපති පෞද්ගලික ලේකම් සැන්ඩ්‍රා පෙරේරා හා ජනාධිපති වෛද්‍ය නිලධාරි වෛද්‍ය බීටීඑම්පීඑස් ගුණවර්ධනට සාමාන්‍ය (standard) හෝටල් කාමර වෙන්කරන ලෙස දැනුම් දී ඇත. ජනාධිපතිවරයාගේ පෞද්ගලික ආරක්ෂක නිලධාරි ප්‍රධාන පොලිස් පරීක්ෂක අශෝක ආරියවංශ යටිගම්මනට හා ජනාධිපති ආරක්ෂක අංශයේ ආරක්ෂක නිලධාරි බීඑච්එන්ඒ ආරියරත්න යන දෙදෙනාට තිදෙනෙකුට නවාතැන් ගත් හැකි සාමාන්‍ය හෝටල් කාමරයක් වෙන්කරන ලෙස දැනුම් දී ඇති අතර ප්‍රොටෝකෝල් නිලධාරි කෝසල පෙරේරාට ද සාමාන්‍ය හෝටල් කාමරයක් වෙන්කරන ලෙස දැනුම් දී ඇත.
එමෙන්ම නියෝජිත පිරිසට බර්මින්හැම් හරහා වුල්වර්හැම්ප්ටන් කරා ගමන් කිරීමට සහ ලන්ඩන් ගුවන් තොටුපල වෙත මහාමාර්ගයෙන් ගමන් කිරීම සඳහා සුදුසු ප්‍රවාහන සේවයක් වෙන්කරන ලෙසද දැනුම් දී ඇත.
එහි වැඩිදුරටත් සඳහන් කර ඇත්තේ වීවීඅයිපී නියෝජිත පිරිසට නවාතැන්, ප්‍රවාහන පහසුකම් හා අනෙකුත් සුපුරුදු ආචාරශිලීත්වයන් සැපයීමට කටයුතු කරන ලෙසයි.
සිය නිවේදනය මගින් හිටපු ජනාධිපති රනිල් වික්‍රමසිංහ ලන්ඩනය තුළ ඔහු ගෙවූ කාලයේදී රාජ්‍යතාන්ත්‍රික හමුවීම් ඇතුළු හමුවීම් කිහිපයක් සිදුකළ බව සඳහන් කළද, ඔහුගේ ලන්ඩන් පැමිණීමට අදාල මහ කොමසාරිස් කාර්යාලයේ කාල සටහනේ දැක්වෙන්නේ ඔහු 2023 සැප්තැම්බර් 22 වැනිදා පෙරවරු 07.10 හීත්රෝ ගුවන් තොටුපලේ වින්ඩ්සර් සුයිට් වෙත පැමිණෙන බවයි. එහි සිට පෙරවරු 07.45ට වාහනයකින් නොවෙටෙල් වුල්වහැම්ප්ටන් වෙත යන බවයි. පෙරවරු 10.30ට නොවෙටෙල් වුල්වර්හැම්ප්ටන් හි නවතින බවයි. 12.20ට වුල්වර්හැම්ප්ටන් විශ්වවිද්‍යාලය සඳහා පිටත් වන බවයි. 12.30ත් 13ත් අතර කාලයේදී වුල්වර්හැම්ප්ටන් විශ්වවිද්‍යාලයේ උපකුලපති පෝල් සාමිවරයා විසින් පවත්වනු ලබන දිවා ආහාරයට සහභාගි වන බවයි. 14.30තත් 16ත් අතර කාලයේදී වුල්වර්හැම්ප්ටන් විශ්වවිද්‍යාලයේ උපාධි ප්‍රදානෝත්සවයට සහභාගි වන බවයි. 16.30ට වුල්වර්හැම්ප්ටන් විශ්වවිද්‍යාලයෙන් ලන්ඩනය වෙත පිටතත් වන බවයි. ඉන්පසු 19.15ට ලන්ඩනයේ නවාතැන් ගන්නා හෝටලයට පැමිණෙන බවයි.
නැවත 2023 සැප්තැම්බර් 23 වැනිදා 12.30ට හීත්රෝ ගුවන් තොටුපලට යෑම සඳහා හෝටලයෙන් පිටත් වන බවත්, එහිදී පෙරවරු 10.30ට ගමන් මලු සූදානම් කර තිබිය යුතු බවත් සඳහන් කර ඇත. ඉන්පසු 14.20ට හීත්රෝ ගුවන් තොටුපලේ වින්ඩ්සර් සුයිට් සිට නැවත පැමිණීම සිදුකරන බවත් සඳහන් කර ඇත.
ජනාධිපතිවරයාගේ එම පෞද්ගලික විදේශ සංචාරය වෙනුවෙන් වූ මුදල් වෙන් කිරීම ජනාධිපති කාර්යාලය විසින් සිදුකර ඇති අතර එම මුදල් වෙන් කිරීම සම්බන්ධයෙන් වන දැනුම් දීම 2023 සැප්තැම්බර් 12 දින සහිතව විදේශ කටයුතු අමාත්‍යාංශයේ ලේකම්වරයාට දැනුම් දී ඇත්තේ ජනාධිපති ලේකම් වෙනුවට එම කාර්යාලයේ ප්‍රධාන මූල්‍ය නිලධාරි තාරක ලියනපතිරණ විසින්ය.
එම දැනුම් දීමේ පිටපත් ජනාධිපති ලේකම් කාර්යාලයේ සම්බන්ධීකරණ ලේකම් තිළිණි ගමගේට යොමුකර ඇති අතර ඒ ජනාධිපති ලේකම්වරයාට දැනුම් දීම සඳහාය. තවත් පිටපතක් ජ්‍යෙෂ්ඨ අතිරේක ලේකම් මානව සම්පත් කළමනාකරණ (පරිපාලන සහ මූල්‍ය කටයුතු) වෙත යොමු කර ඇති අතර ඒ දැන ගැනීම සඳහාය. අනෙක් පිටපත භාණ්ඩාගාර මෙහෙයුම් දෙපාර්තමේන්තුවේ අධ්‍යක්ෂ ජනරාල්ට යොමුකර ඇති අතර ඒ එම මුදල් නිදහස් කරන ලෙස දැනුම් දීම සඳහාය.
ඒ අනුව එම සංචාරය සම්බන්ධයෙන් ලන්ඩනයේ ශ්‍රී ලංකා මහ කොමසාරිස් කාර්යාලය ඇස්තමේන්තුවක් ඉදිරිපත් කරමින් 2023 සැප්තැම්බර් 06 දින දැනුම් දීමක් කර ඇත. එම දැනුම් දීමට අනුව එම විදේශ සංචාරයේ මුළු වැය බි්‍රතාන්‍ය පවුම් 40,445ක් වී ඇත. බි්‍රතාන්‍ය පවුමක් සඳහා එවකට පැවති ශ්‍රී ලංකා රුපියල් අගය වූ රුපියල් 402.29 යටතේ ගණනය කර ඒ සඳහා රුපියල් 16,270,572.83ක් හෙවත් ආසන්න වශයෙන් රුපියල් එක් කෝටි 62 ලක්ෂයක මුදලක් වෙන්කර තිබේ.
මෙසේ හිටපු ජනාධිපතිවරයා සිය බිරිඳගේ උපාධි ප්‍රදානෝත්සවය සඳහා වන පෞද්ගලික සංචාරයට රජයේ මුදලින් බි්‍රතාන්‍ය පවුම් 40,445ක් වියදම් කර ඇත්තේ ඔහු වැල් පාලමක් මතින් ශ්‍රී ලංකාව නැමැති ආර්ථික වශයෙන් අසාධ්‍ය දරුවා එගොඩ කිරීමට අවදානමක් ගෙන ඇතැයි කී කාලයකදී බව මෙහිදී මතක් කරගත යුතුය. මන්ද එම සමයේ විදේශගතව සිටි සිය දරුවන්ගේ අධ්‍යාපන කටයුතු සඳහා ඩොලරයක්වත් යැවීමට මේ රටේ ජනතාවට ඉඩ නොදුන් තත්වයක නොදුන් තත්වයක මෙම විදේශ මුදල් සිය පෞද්ගලික කටයුත්තක් සඳහා නීති විරෝධිව හිටපු ජනාධිපති රනිල් වික්‍රමසිංහ වැයකර ඇති නිසාය.
හිටපු ජනාධිපති රනිල් වික්‍රමසිංහ සිය නිවේදනය මගින් කෙසේ කියන්නට උත්සාහ කළත් ආරාධනා සහිත හා රාජ්‍ය තාන්ත්‍රික වන ඔහුගේ ජී 77 කියුබා සංචාරය හා එක්සත් ජාතීන්ගේ නිව්යෝක් සංචාරය සාධාරණය වුවද, සිය බිරිඳගේ උපාධි ප්‍රදාන ලන්ඩන් සංචාරය සාධාරණීකරණය කළ නොහැකිය. එය ඔහුට සාධාරණීයකරණය කළ හැක්කේ ඔහුගේ හෝ මෛත්‍රී වික්‍රමසිංහගේ පෞද්ගලික මුදල් වැය කරමින් එම කටයුතු සිදුවී තිබුණා නම් පමණය. එහෙත් මෙහිදී සිදුවී ඇත්තේ එම පෞද්ගලික කටයුත්ත වෙනුවෙන් රජයේ මුදල් වැය කිරීමය. එය පැහැදිලිවම රාජ්‍ය මුදල් අවභාවිත කිරීමකි. දියුණු රටවල්වල භාවිත වන රාජ්‍ය මුදල් සම්බන්ධයෙන් වන උසස් තත්වයන් ගැන දන්නා රනිල් වික්‍රමසිංහ මහතාට මෙය නොතේරීමට හේතුවක් නැත. ඔහු නිවේදනයක් නිකුත් කරමින් කලබල වී ඇත්තේ එය තේරෙන නිසා විය හැකිය.
විය යුත්තේ මෙම සිදුවීම සම්බන්ධයෙන් මෙන්ම රාජ්‍ය මුදල් මෙයාකාරයෙන් සිය පෞද්ගලික කටයුතු සඳහා යොදාගෙන ඇති පුද්ගලයන්ට එරෙහිව තරාතිරම නොබලා කටයුතු කිරීමය. වත්මන් ආණ්ඩුව කියූ ලෙසම එසේ කටයුතු කරාවිදැයි අපි බලා සිටිමු.
