බටලන්ද කොමිෂන් වාර්තාව ජනාධිපති චන්ද්‍රිකා බණ්ඩාරනායක කුමාරතුංග මහත්මියට ලබා දී අවුරුදු 27කට පසුව එම වාර්තාව මාර්තු 14 දින පාර්ලිමේන්තුවට ඉදිරිපත් කරන බව රජයේ ප්‍රවෘත්ති දෙපාර්තමේන්තුව නිවේදනයක් නිකුත් කරමින් පවසා ඇත.
බටලන්ද කොමිෂන් සභා වාර්තාව මෙම සතියේදී පාර්ලිමේන්තුවට ඉදිරිපත් කරන බව කැබිනට් ප්‍රකාශක, සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතා මාර්තු 11 වන දින රජයේ ප්‍රවෘත්ති දෙපාර්තමේන්තුවේ පැවති කැබිනට් තීරණ දැනුම්දීමේ මාධ්‍ය හමුවේදී පැවසීය.
එවක ජනාධිපති චන්ද්‍රකා බණ්ඩාරනායක මහත්මියගේ මැතිවරණ පාඨයක් ලෙස ඉදිරිපත් වූ ‘දූෂණයට – භිෂණයට එරෙහිව’ මැතිවරණ පොරොන්දුවේ ප්‍රධාන පොරොන්දුවක් වූයේ එක්සත් ජාතික පක්ෂ රජය යටතේ සිදු වූවායැයි පැවැසෙන වඳ හිංසා සහ ඝාතනවලට තමන් යුක්තියක් ඉටු කරන බවය. ඒ පොරොන්දුව අනුව ජනාධිපතිනිය බලයට පත්වී කෙටි කාලයකින් බටලන්ද වඳකාගාරය සහ එම ප්‍රදේශයේ සිදු වූවා යැයි පැවැසෙන ඝාතන සහ වඳහිංසා සම්බන්ධයෙන් පරීක්ෂණයක් පැවැත්වීමට ජනාධිපති කොමිෂන් සභාවක් පිහිටුවා තිබිණි.
1995 දෙසැම්බර් මස 15 දන දරණ අධිකාර පත්‍රයට අනුව, 1990 පෙබරවාරි මස 20 දින හෝ ඊට ආසන්නයේදී උප පොලිස් පරීක්ෂක රෝහිත ප්‍රියදර්ශණ අතුරුදහන්වීමට අදාල අවස්ථානූ ගත කරුණු සහ ඒ අතුරුදහන්වීමට වගකිව යුතු පුද්ගලයන් , 1990 පෙබරවාරි 24 දින හෝ ඊට ආසන්නයේදී උප පොලිස් පරීක්ෂක අජිත් ජයසිංහ අත්අඩංගුවට ගැනීම සහ රඳවා තබා ගැනීමට අදාළ කරුණු සහ එකී අත්අඩංගුවට ගැනීම රඳවා තබාගැනීම ගැන වගකිවයුතු පුද්ගලයන්, 1988 වර්ෂයේ ජනවාරි 01 දින සිට 1990 වර්ෂයේ දෙසැම්බර් 31 දක්වා කාලය තුළ එවකට පැවැති එක්සත් ජාතික පක්ෂ රජය, රාජ්‍ය පොහොර සමාගමට අයත් බටලන්ද නිවාස සංකීර්ණයේ නිත්‍යානූකූල නොවන ආකාරයට පුද්ගලයන් රඳවා තබා ගැනීම සහ අමානුෂික වඳ හිංසා පැමිණවීම සම්බන්ධයෙන් වගකිව යුත්තෝ කවුද යැයි සෙවීම කොමිසමට පැවරුණු වගකීම් ය.
බටලන්ද කොමිසමේ වාර්තාව 1995 සැප්තැම්බර් 20 දින ජනාධිපතිනියට ලබා දිය යුතු බවට කොමිසමේ නියෝගයේ සදහන් වූවත්, එම වාර්තාව හිටපු ජනාධිපතිනියට භාරදෙන්නේ නියමිත දිනයට අවුරුදු 3කට ආසන්න කාලයට පසුව, එනම් 1998 මැයි 05 වන දින ය.
දින 127ක් පුරා එනම් 1996 ජනවාරි 16 දින කොමිෂන් සභාවේ ප්‍රසිද්ධ රැස්වීම් ආරම්භ කර, කොළඹ අලුත්කඩේ මහාධිකරණ සංකීර්ණයේ අංක 2 මහාධිකරණය තුළ කැඳවා තිබිණි.
කොමිසමේ දී සාක්ෂිකරුවන් 82 දෙනෙකු ගෙන් ප්‍රශ්න කර තිබුණු අතර, එවක විපක්ෂනායකවරයා ලෙස කටයුතු කළ රනිල් වික්‍රමසිංහ, ජෝසප් මයිකල් පෙරේරා, ජෝන් අමරතුංග යන මහත්වරුන්ගෙන්ද කොමිෂන් සභාව ප්‍රශ්ණ කර තිබිණි. කොමිෂණ් වාර්තාවේ සඳහන් වන පරිදි ‘ විපක්ෂ නායක ගරු රනිල් වික්‍රමසිංහ මහතා කොමිෂන් සභාව කැඳවන තුරු කොමිෂන් සභාවට නොපැමිණ සිටයේය.’ යනුවෙන් සදහන් කර ඇත. බටලන්ද කොමිසමේ සියලු ලිඛිත වාර්තා වෙළුම් 28 කින් යුක්ත ඇති අතර පිටු 6,780කින් සමන්විත වාර්තාවක් වේ.
එම කොමිෂන් සභාවේ මුල් අවධියේදී ලේකම්වරයා ලෙස ශ්‍රී ලංකා පරිපාලන සේවයේ හිටපු නිලධාරියෙකු වූ නීතිඥ එස්. ගුණවර්ධන කටයුතු කර, ඉල්ලා අස්වී තිබුණු අතර පසුව ශ්‍රී ලංකා පරිපාලන සේවයේ නිලධාරියෙකු වූ ජී. කේ. ජී. පෙරේරා කොමිසමේ ලේකම්වරයා වශයෙන් කටයුතු කර තිබිණි.
එවකට රජයේ නීතිඥ යසන්ත කෝදාගොඩ, ජනාධිපති නීතිඥ ආර්.අයි.ඔබේසේකර,අභියායචනාධිකරණයේ විනිසුරු ඩී. ජයවික්‍රම, මහාධිකරණ විනිසුරු එන්.ඊ.දිසානායක, රජයේ නීතිඥ සරත් ජයමාන්න මහත්වරුන් සාක්ෂකරුවන්ගේ සාක්ෂි විමර්ෂණය කිරීමට පත් කර තිබිණී. කොමිෂන් සභාවට අවශ්‍ය විමර්ෂණයන් කිරීමට නියෝජ්‍ය පොලිස්පති ටී. වී. සුමනසේකර, ජ්‍යෙෂ්ඨ පොලිස් අධිකාරී එස්. සී. පතිරණ, පොලිස් අධිකාරී එච්. එච්. එම්. ආර්. ප්‍රේමරත්න යන මහත්වරුන්ගේ ප්‍රධානත්වයෙන් යුත් පොලිස් නිලධාරීන් කණ්ඩායම් දෙකක් කොමිෂන් සභාවට සහය වී ඇත.
බටලන්ද කොමිෂන් වාර්තාවේ වැඩි විස්තර කියවීමට මේ සතියේ අනිද්දා පුවත්පත කියවන්න
අනිද්දා වට්සැප් සමුහයට එක්වීමට පහත යොමු භාවිතා කරන්න
Group 01- https://chat.whatsapp.com/FW9ZAqXBotT5vFHZoDCIg1
Group 02 – https://chat.whatsapp.com/KLYP9OhQfhlHubxPspW3J3
Group 03 – https://chat.whatsapp.com/L9NV2gK1MfO6lUCpCyUVTZ
අනිද්දා වට්සැප් චැනලයට එක්වීමට පහත යොමුව භාවිතා කරන්න
https://whatsapp.com/channel/0029Vb7PJ8nDeON9UrGsSx0C
අනිද්දා ෆේස්බුක් චැනලයට එක්වීමට පහත යොමුව භාවිතා කරන්න
https://www.messenger.com/channel/AniddaNews
