හිටපු අගවිනිසුරු ජයන්ත ජයසූරිය, අමෙරිකාවේ නිව්යෝර්ක්හි එක්සත් ජාතීන්ගේ සංවිධානයේ ලංකාව පිළිබඳ නිත්‍ය නියෝජිත හැටියට පසුගියදා පත්කරන ලදි. ඔහු මේ තනතුරට පත්කරන ලද්දේ පසුගිය වසර අවසානයේ අගවිනිසුරුධුරයෙන් ඔහු විශ්‍රාම ලබාගත් වහාම මෙන්ය. මීට පෙර එම තනතුර දැරුවේ හිටපු අගවිනිසුරුවරයකු වූ ජනාධිපති නීතිඥ මොහාන් පීරිස්ය.
ඉහළ අධිකරණ විනිසුරුවරුන් විශ්‍රාම ගිය වහාම මෙවැනි ආණ්ඩුවේ ඉහළ තනතුරුවලට පත්කිරීමෙන්, නරක පූර්වාදර්ශයක් ඇති වන බවට නීති ක්ෂේත්‍රයේ කතාබහක් පසුගියදා ඇතිවිය.
එක් හේතුවක් නම්, විශ්‍රාම ගිය පසු ආණ්ඩුවේ ඉහළ තනතුරක් බලාපොරොත්තුවෙන් ධුරයේ සිටියදී ආණ්ඩුවට හිතවත්ව තීන්දු දීමට විනිසුරුවරුන් පෙළඹේය යන අදහසයි. දෙවැන්න, එවැනි තනතුරු ලැබී ඇති විනිසුරුවරුන් ධුරයේ සිටියදී දුන් තීන්දු සම්බන්ධයෙන් මහජනතාව තුළ ආපස්සට සැකයක්, අවිශ්වාසයක් මතුවීමට ඇති හැකියාවයි.
මේ කාරණා සම්බන්ධයෙන් නීතිඥ සාමූහිකය පසුගියදා නිවේදනයක් නිකුත් කළේය. මේ එම නිවේදනයයි.
විශ්‍රාමික විනිශ්චයකාරවරුන් තනතුරුවලට පත්කිරීම පිළිබදව නීතිඥ සාමූහිකයේ ප්‍රකාශය. විශ්‍රාමික විනිශ්චයකාරවරුන්, විශේෂයෙන්ම උපරිමාධිකරණවලින් විශ්‍රාම ලැබූ විනිශ්චයකාරවරුන්, රාජ්‍ය හා පෞද්ගලික යන දෙඅංශයේම තනතුරු සඳහා පත් කිරීම ශ්‍රී ලංකාවේ මෙන්ම වෙනත් රටවලද නීති ප්‍රජාවගේ සහ සාමාන්‍ය මහජනතාවගේ අවධානයට ලක් වූ කරුණකි. එවැනි පත්කිරීම් ඔවුන්ගේ නඩු තීන්දුවල ගුණාත්මක භාවය පැත්තකින් තබා ඒවායේ පරිශුද්ධභාවය පිළිබඳ ප්‍රශ්න මතු කරයි. එසේම අධිකරණයේ ස්වාධීනත්වය පිළිබඳ මහජන විශ්වාසය පළුදු කිරීමට ද නැඹුරු වේ. විශ්‍රාම ගිය වහාම පත්වීමක් සිදු කරන විට එය වඩාත් නරක ය.
විනිශ්චයකාරවරුන් ලබා ගත් වටිනා අත්දැකීම් සහ අවබෝධය විශ්‍රාම ගිය පසු අපතේ හැරිය යුතු බවක් මින් අදහස් නොවේ. ඔවුන් තම ධුර කාලය තුළ අපක්ෂපාතීව කටයුතු කළේ නැතැයි යන සැකය මතු නොවන අයුරින් ඔවුන්ගේ දැනුමෙන් හොඳ ප්‍රයෝජන ගත යුතුය. පත්වීම් පිළිබඳ ජාතික එකඟත්වයක් සහතික කරන ආණ්ඩුක්‍රම ව්‍යවස්ථා සභාව වැනි යාන්ත්‍රණයන් හරහා පත් කරනු ලැබුවහොත්, විශ්‍රාමික විනිශ්චයකාරවරුන් ආණ්ඩුක්‍රම ව්‍යවස්ථාවෙන් පිහිටුවා ඇති කොමිෂන් සභා, විමර්ශන කොමිෂන් සභා හෝ ශ්‍රී ලංකා නීති කොමිෂන් සභාව වැනි ආයතනවල සාමාජිකයන් හෝ සභාපතිවරුන් ලෙස පත් කිරීමට විරුද්ධත්වයක් තිබිය නොහැක. ඔවුන්ගේ විශේෂඥ දැනුම නීති අධ්‍යාපනය සහ විනිශ්චයකාරවරුන් සහ නීතිඥයින් පුහුණු කිරීම සඳහා ද යොදා ගත හැකිය.
උපරිමාධිකරණවලින් විශ්‍රාමගත් විනිශ්චයකාරවරුන් සඳහා වන විශ්‍රාම ප්‍රතිලාභ සේවයේ සිටින විනිශ්චයකාරවරුන්ගේ වැටුප් හා ප්‍රතිලාභවලට සමාන විය යුතු බව නීතිඥ සාමූහිකය යෝජනා කරයි. ආණ්ඩුක්‍රම ව්‍යවස්ථාවෙන් හෝ ලිඛිත නීතියෙන් අවසර දී ඇති පරිදි මිස ඔවුන්ට මුදල් ලාභයක්, වාසියක් හෝ ප්‍රතිලාභයක් ගෙන දෙන කිසිදු කාර්යයක් ඔවුන් ඉටු නොකළ යුතුය. මෙම කරුණු ආණ්ඩුක්‍රම ව්‍යවස්ථාවෙන් හෝ නීතිමය විධිවිධාන මගින් නියාමනය කළ යුතුය.
නීතිඥ සාමූහිකය වෙනුවෙන්, ජනාධිපති නීතිඥ රියෙන්සි අර්සකුලරත්න, ජනාධිපති නීතිඥ, ආචාර්ය ජයම්පති වික්‍රමරත්න, මහාචාර්ය, නීතිඥ සාවිත්‍රි ගුණසේකර, ජනාධිපති නීතිඥ එම්.ඒ. සුමන්තිරන්, ජනාධිපති නීතිඥ ජෙෆ්රි අලගරත්නම්, ජනාධිපති නීතිඥ සාලිය පීරිස්, ජනාධිපති නීතිඥ එස්.ටී. ජයනාග, මහාචාර්ය දීපිකා උඩගම, නීතිඥ නොයෙල් ඩයස් පියතුමා, නීතිඥ කේ.ඩබ්ලියු. ජනරංජන, නීතිඥ ශ්‍රීනාත් පෙරේරා, නීතිඥ අර්මීසා ටීගල්, නීතිඥ දර්ශන කුරුප්පු, නීතිඥ මනෝජ් නානායක්කාර, නීතිඥ අමිල එගොඩමහවත්ත, නීතිඥ ජයන්ත දෙහිඅත්තගේ
2025 මාර්තු 02
- සංහිතා පතිරණ
