පෞද්ගලික අංශයේ සේවකයන්ගේ මාසික අවම වැටුප රුපියල් 30,000 දක්වා වැඩි කිරීමට හාම්පුතුන්ගේ සම්මේලනය කැමැත්ත පළකර ඇති බව අයවැය යෝජනා ඉදිරිපත් කරමින් මුදල් ඇමතිවරයා ලෙස ජනාධිපති අනුර කුමාර දිසානායක ප්‍රකාශ කළේය. දැනට පෞද්ගලික අංශයේ මාසික අවම වැටුප රුපියල් 21,000ක් වන අතර එය රුපියල් 17,500ක ජාතික අවම වැටුපකින් සහ රුපියල් 3500ක අයවැය සහන දීමනාවලින් සමන්විතය.
ජනාධිපතිවරයා ප්‍රකාශ කළ ආකාරයට පෞද්ගලික අංශයේ අවම වැටුප රුපියල් 30,000 දක්වා වැඩි වන්නේ මෙම වසරේ අප්‍රේල් මාසයේ සිට රුපියල් 27,000ක් දක්වා හා 2026 වසරේ සිට රුපියල් 30,000 දක්වා අදියර දෙකකින්ය.
පෞද්ගලික අංශයේ සේවකයන්ගේ සේවක අර්ථ සාධක හා සේවක භාරකාර යන අරමුදල් සඳහා වන ගෙවීම්ද, විශ්‍රාම යනවිට හෝ සේවයෙන් ඉවත් වීමේදී ලැබෙන පාරිතෝෂික දීමනාද ගණනය කරන්නේ අවම වැටුපට හෙවත් මූලික වැටුපට වන අතර දීමනා ඒ සඳහා සලකා බලන්නේ නැත.
එහෙත් ජනාධිපතිවරයාගේ පෞද්ගලික අංශයේ වැටුප් වැඩි කිරීමේ කතාවේදී එම දීමනා මූලික වැටුපට එකතු වෙනවාද නැද්ද යන්න කීවේ නැත. ජනාධිපතිවරයාගේ කතාවේදී කියනු ලැබුයේ ඒ සඳහා හාම්පුතුන්ගේ කැමැත්ත එකඟතාව ලැබී ඇති බවයි. දෙවන වර සම්මත වීම හෙවත් අයවැය සම්මත වීම පෙබරවාරි 25 දින පාර්ලිමේන්තුවේදී වැඩි ඡන්ද 109 කින් සිදුවිය. ඒ එයට පක්ෂව ඡන්ද 155ක් හා විරුද්ධව ඡන්ද 46 ක් ලැබීම මගින්ය. එහෙත් හාම්පුතුන්ගේ සම්මේලනය පෞද්ගලික අංශයේ අවම වැටුප් වැඩි කිරීම සම්බන්ධයෙන් වන ජනාධිපතිවරයාගේ යෝජනාව සම්බන්ධයෙන් ඔවුන්ගේ මතය මෙතෙක් කියා නැත.
දීමනාද සමඟ වන රාජ්‍ය හා අර්ධ රාජ්‍ය අංශයේ අවම වැටුප රුපියල් 24,250 සිට රුපියල් 40,000 දක්වා රුපියල් 15,750කින් වැඩි කරන බව එම අයවැය කතාවේදී ජනාධිපතිවරයා කී අතර එහිදී රාජ්‍ය සේවකයන්ට දැනට හිමිවන තාවකාලික අතුරු දීමනාව සහ විශේෂ දීමනාව මූලික වැටුපට එකතු කරන බව පැවසීය. ඒ අනුව රුපියල් 8250ක ශුද්ධ වැටුප් වැඩිවීමක් රජයේ සේවකයන්ට හිමිවන බවද ප්‍රකාශ කළේය. එය රාජ්‍ය අංශයට අමතරව අධිකරණ සේවා, රාජ්‍ය සංස්ථා, ව්‍යවස්ථාපිත මණ්ඩල, විශ්වවිද්‍යාල කාර්ය මණ්ඩල හා ත්‍රිවිධ හමුදා සාමාජිකයන් සඳහාද හිමිවන බව ප්‍රකාශ කළේය. අදියර තුනකදී සිදුවන එම වැටුප් වැඩිවීම පළමු අදියර රුපියල් 5000ක් සහ ඉතිරි මුදලින් සියයට 30ක් ලෙස මෙම වසරේ අප්‍රේල් මාසයේ සිට ලැබීමට නියමිත අතර ඉතිරි 70% 2026 වසරේදී හා 2027 වසරේදී සමාන කොටස්වලින් ගෙවීමට නියමිතය.
අයවැයේදී වතු ක්ෂේත්‍රයේ වැටුප් ගැන කීවේ, දැනට යෝජිත දිනකට රුපියල් 1700ක් වන වැටුප් ලබාදීම සඳහා රජය මැදිහත් වන බවයි. වතු ක්ෂේත්‍රය සඳහා රුපියල් 1700ක දෛනික වැටුපක් ලබාදීමට හාම්පුතුන්ගේ සම්මේලනය මෙතෙක් කැමැත්ත ප්‍රකාශ කළ බවක් දැන ගන්නට නැත. ඒ සම්බන්ධයෙන් වන පඩිපාලක සභාවේ වැටුප් රජය ඒකපාර්ශ්විකව වැඩි කිරීම සම්බන්ධයෙන් එම සම්මේලනය නියෝජනය කරන වතු ක්ෂේත්‍රයට අදාළ සංගමය අධිකරණ ක්‍රියාමාර්ග ගත්තේය. ඒ නිසාම අදටත් රුපියල් 1700ක දෛනික වැටුපක් පෞද්ගලික අංශයේ වතුවල සේවකයන්ට ලැබෙන්නේ නැත.
මෙවන් තත්වයක් තිබියදී හාම්පුතුන්ගේ සම්මේලනය කැමැත්ත නොදුනහොත් පෞද්ගලික අංශයේ වැටුප් වැඩි කිරීමට රජයට සිදුවන්නේ ජාතික අවම වැටුප වැඩි කිරීමේ ක්‍රියාාමාර්ගයකින් පමණය. එහිදීත් හාම්පුතුන්ගේ සම්මේලනය වතු ක්ෂේත්‍රයේදී මෙන් අධිකරණ ක්‍රියාමාර්ග ගතහොත් උදාවිය හැක්කේ දැනට වතු ක්ෂේත්‍රයේ ඇතිවී ඇති තත්වය මෙන් තත්වයකි. එවැන්නක් ඇති නොවීමට වගබලා ගැනීම ආණ්ඩුවේ වගකීමකි.
එම තත්වය එසේ වෙද්දී වැටුප් වැඩි කිරීම සම්බන්ධයෙන් වන අනෙක් තත්වය වන්නේ රාජ්‍ය අංශයේ හා පෞද්ගලික අංශයේ පහළ ශ්‍රේණිවල සේවකයන්ගේ වැටුප් අතර පවතින පරතරයයි. මෙම වැටුප් පරතරය පැහැදිලි කරමින් පෙබරවාරි 25 දින සහිතව නිදහස් වෙළඳ කලාප සහ පොදු සේවා සේවක සංගමය ජනාධිපති අනුර කුමාර දිසානායකට, සභානායක බිමල් රත්නායකට හා විපක්ෂ නායක සජිත් ප්‍රේමදාසට ලිපියක් යවා ඇත.
එහි සඳහන් කරන ආකාරයට රජයේ සේවකයන් සඳහා අවමය රුපියල් 15,750කින් වැටුප් වැඩි කරන විට පෞද්ගලික අංශයේ අවම වැටුප් වැඩි කරන්නට යන්නේ රුපියල් 9000කින්ය. ඒ අනුව මෙතෙක් රුපියල් 3500ක ප්‍රමාණයක පැවති රජයේ සේවකයන්ගේ හා පෞද්ගලික අංශයේ සේවකයන්ගේ අවම වැටුපේ පරතරය රුපියල් 10,000ක් දක්වා වැඩි වන්නේය.
එහි වැඩිදුරටත් අවධාරණය කර ඇත්තේ සේවක අර්ථ සාධක අරමුදල් ලාභීන් වන සංස්ථා හා ව්‍යවස්ථාපිත මණ්ඩල සේවකයින්ටද රජයේ සේවකයන්ට ලබාදෙන රුපියල් 15,750ක වැටුප් වැඩි වීම ලබාදීම මගින් තවදුරටත් පෞද්ගලික අංශයේද වැටුප් විෂමතාවක් ඇතිකර ඇති බවයි. එමෙන්ම වතුකරයේ දෛනික වැටුප රුපියල් 1700ක් ලෙස තීන්දු කිරීමට රජයේ මැදිහත් වීම සහතික කිරීමෙන් ඔවුන්ගේ මාසික වැටුප සාම්ප්‍රදායික පෞද්ගලික අංශය සඳහා වැඩිකරන රුපියල් 30,000ක මාසික වැටුපට වඩා රුපියල් 12,500කින් වැඩි වන බවද එහි සඳහන් කර ඇත.
එම සංගමයේ යෝජනාව වශයෙන් එහි වැඩිදුරටත් සඳහන් කර ඇත්තේ රාජ්‍ය, පෞද්ගලික, වැවිලිකරය හා අවිධිමත් ක්ෂේත්‍රය යැයි කිසිදු වෙනසක් නොමැතිව ජාතික අවම මාසික වැටුපක් නියම කරන ලෙසයි. එය 2026 ජනවාරි මාසයේ සිට රුපියල් 65,000ක් ලෙස තීන්දු කරන ලෙසයි. ඒ සඳහා හේතුව වශයෙන් සඳහන් කරන්නේ ජන හා සංඛ්‍යාලේඛන දෙපාර්තමේන්තුවේ 2019 ගෘහ ආදායම් හා වියදම් සමීක්ෂණයට අනුව නාගරික සමාජයේ පවුලක මාසික වියදම රුපියල් 61,425ක් ලෙස සඳහන් වෙතත් එතරම් වැටුපක් නොලැබෙන බවයි.
රාජ්‍ය අංශයේ රැකියාවකට යෑමේ කැමැත්ත සමාජයේ බහුතරයක් අතර තවමත් තිබේ. ඒ විශ්‍රාම වැටුප, ණය ලබා ගැනීම, නිවාඩු ලබා ගැනීම ඇතුළු රාජ්‍ය සේවකයන්ට ලැබෙන අනෙකුත් පහසුකම් හා රැකියා සුරක්ෂිතභාවය ආදි කරුණු නිසාය. රාජ්‍ය සේවයේ ඇබෑර්තු සඳහා පෞද්ගලික අංශයේ ඉතා හොඳ රැකියා අවස්ථා වලින් පවා ඉවත් වී පුද්ගලයන් යන්නේ ඒ නිසාය. එහෙත් කාර්යක්ෂමතාව අතින් ගත්කළ රාජ්‍ය සේවය ඇත්තේ අන්තිම නරක තැනකය. රටේ ජනතාවට ඒ මගින් ඉටුවිය යුතු සේවය නිසි කලට නිසි වේලාවට ඉටු වන්නේ නැති තරම්ය.
එහෙත් කලින් කලට බලයට පත්වන ආණ්ඩු විසින් රජයේ සේවකයන්ගේ වැටුප් වැඩි කරන විට ඒ සඳහා බදුවලින් වැඩිම දායකත්වය ලබාදීමට සිදුවන්නේද මේ රටේ පෞද්ගලික අංශයේ හා රාජ්‍ය අංශයේ නොවන පුද්ගලයන්ටය. මන්ද මෙසේ වැඩි කරන වැටුප් ඒ සඳහා තීන්දු තීරණ ගන්නා දේශපාලනඥයින් ් ඔවුන්ගේ සාක්කුවෙන් හෝ පක්ෂ අරමුදල් මගින් ගෙවන්නේ නැති නිසාය.
ඒ නිසා අප රටක් ලෙස තීන්දු තීරණ ගැනීමේදී කළ යුත්තේ දැනටමත් වැඩි යැයි කියනු ලබන රාජ්‍ය අංශයට ඒම අධෛර්යවත් කිරීමය. නොඑසේව රාජ්‍ය අංශ තෝරා ගැනීම දිරි දෙන තීන්දු තීරණ ගැනීම නොවේ.
රාජ්‍ය අංශය රටේ ජනගහනයට සාපේක්ෂව ඔරොත්තු නොදෙන තත්වයක තිබියදී මෙම අයවැය කාලයේදී වත්මන් ආණ්ඩුවද කර ඇත්තේ රාජ්‍ය අංශයේ පුරප්පාඩු ඇතැයි කියමින් ඒ සඳහා 9459 ක පිරිසක් බඳවා ගැනීමට අවස්ථා දෙකකදී කැබිනට් මණ්ඩල තීන්දු ගැනීමය. එය ඉදිරියේදී තවත් අවස්ථා ගණනක් දක්වා දිගු වුවහොත් අඩු කළ යුතු යැයි කියනු ලබන රාජ්‍ය අංශය තවත් වැඩි වනු ඇති අතර එය අඩු වන්නේ නැත. එමෙන්ම රජයේ විශ්‍රාම වැටුප් ගෙවීම සඳහාද තවත් පිරිසක් ඒ මගින් එකතු වනු ඇත. ඒ බරටද කර ගැසීමට අවසානයේ සිදුවනු ඇත්තේ මේ රටේ බදු ගෙවන ජනතාවට වන අතර තීන්දු තීරණ ගන්නා දේශපාලනඥයන්ට නොවේ. රට ආර්ථික වශයෙන් ගොඩ දැමීමට බලයට ආ දේශපාලනඥයින් තේරුම් ගත යුතු සත්‍යය එයයි.
අනිද්දා වට්සැප් සමුහයට එක්වීමට පහත යොමු භාවිතා කරන්න
Group 01- https://chat.whatsapp.com/FW9ZAqXBotT5vFHZoDCIg1
Group 02 – https://chat.whatsapp.com/KLYP9OhQfhlHubxPspW3J3
Group 03 – https://chat.whatsapp.com/L9NV2gK1MfO6lUCpCyUVTZ
අනිද්දා වට්සැප් චැනලයට එක්වීමට පහත යොමුව භාවිතා කරන්න
https://whatsapp.com/channel/0029Vb7PJ8nDeON9UrGsSx0C
අනිද්දා ෆේස්බුක් චැනලයට එක්වීමට පහත යොමුව භාවිතා කරන්න
https://www.messenger.com/channel/AniddaNews
