විධායක ජනාධිපති ක්‍රමය හඳුන්වාදීමට එරෙහි උද්ඝෝෂණය මෙහෙයවූයේත් එය අහෝසි කිරීම සඳහා අඛණ්ඩව උද්ඝෝෂණ කළෙළත් වාමාංශික ව්‍යාපාරයයි. විධායක ජනාධිපති ක්‍රමය අහෝසි කිරීම 2024 ජනාධිපතිවරණයේදී ජාතික ජන බලවේගයේ සහ පෙර පැවති මැතිවරණවලදී ජනතා විමුක්ති පෙරමුණේ වේදිකාවල කේන්ද්‍රීය තලයක් විය.
මැතිවරණ ක්‍රම පිළිබඳ ගැටලු
ජනාධිපති අනුර කුමාර දිසානායක පසුගියදා සිරස රූපවාහිනියේ ‘සටන’ වැඩසටහනට එක්වෙමින් විධායක ජනාධිපති ක්‍රමය අහෝසි කිරීමට තම පක්ෂයේ කැපවීම යළිත් අවධාරණය කළ අතර මැතිවරණ ප්‍රතිසංස්කරණ පිළිබඳ ගැටළු හතරක් මතු කළේය.
පළමුවැන්න සමානුපාතික නියෝජනය යටතේ අවස්ථා කිහිපයකදී හැර ආණ්ඩු පක්ෂයට පැහැදිලි බහුතරයක් නොලැබීමෙන් ‘දුර්වල පාර්ලිමේන්තුවක්’ ඇති වීමයි. එබැවින් පාර්ලිමේන්තු ආණ්ඩු ක්‍රමයකට මාරුවීමේදී මැතිවරණ ප්‍රතිසංස්කරණ අත්‍යවශ්‍ය වේ.
දෙවනුව, විවිධ මත සහ ප්‍රජාවන් සමානුපාතිකව නියෝජනය වන බව සහතික කිරීම කේවල ක්‍රමය යටතේ අභියෝගාත්මක විය හැකිය. උදාහරණයක් ලෙස කුරුණෑගල දිස්ත්‍රික්කයේ මුස්ලිම් ප්‍රජාව විසිරී සිටින නිසා මුස්ලිම් බහුතරයක් සිටින ඡන්ද කොට්ඨාසයක් බිහිකිරීම අපහසුය. 2024 දී සිදු වූ පරිදි සමානුපාතික ක්‍රමය යටතේ බොහෝ මුස්ලිම්වරුන් ජාතික ජන බලවේගයට සහ එහි මුස්ලිම් අපේක්ෂකයාට ඡන්දය දීමෙන් එවැනි නියෝජනයක් සහතික විය.
තුන්වන කරුණ මිශ්‍ර මැතිවරණ ක්‍රමයක් යටතේ ඇතිවිය හැකි දුෂ්කරතාවකි. නිදසුනක් වශයෙන්, පසුගිය මැතිවරණවලදී ත්‍රිකුණාමලය දිස්ත්‍රික්කයෙන් සිංහල, දෙමළ සහ මුස්ලිම් අපේක්ෂකයෝ පත්වූහ. එහෙත් මිශ්‍ර ක්‍රමයක් තුළ ඡන්ද කොට්ඨාස සංඛ්‍යාව අඩු වන බැවින් එවැනි නියෝජන සහතික කිරීම දුෂ්කර වනු ඇත. ජනාධිපතිවරයා සඳහන් කලේ 1977 පාර්ලිමේන්තු මැතිවරණයේදී කේවල ක්‍රමය යටතේ මන්ත්‍රීන් 168 ක් පත් කල මැතිවරණ කොට්ඨාශ 160 ක් තිබුනද මිශ්‍ර ක්‍රමයක් යටතේ කොට්ඨාශ මන්ත්‍රීන් 140 කට පමණ අඩුකිරීමට කර ඇති යෝජනාව ගැන බව පෙනේ.
සිව්වැන්න, නව ක්‍රමයක් යටතේ ඇතැම් කුල නියෝජනය නොවිය හැකි බව ය. එවැනි නියෝජනයකට ඉඩ සැලසීම සඳහා පැරණි මැතිවරණ ක්‍රමය යටතේ ආසන කිහිපයක් නිර්මාණය කර තිබූ ගාල්ල දිස්ත්‍රික්කය ඔහු උපුටා දැක්වීය.
ජනාධිපති දිසානායක මතු කළ කරුණු හතරේම සැලකිය යුතු වලංගු භාවයක් ඇති බව ඍජුවම කිව හැක. කෙසේ වෙතත්, මෙම ලියුම්කරු පෙන්වීමට උත්සාහ කරන පරිදි, ඒවා ජයගත නොහැකි බාධක නොවේ.
- 2016-18 ආණ්ඩුක්‍රම ව්‍යවස්ථා මණ්ඩලයේ යෝජනා
- 2015 පාර්ලිමේන්තුව පත්කළ ආණ්ඩුක්‍රම ව්‍යවස්ථා මණ්ඩලයේ මෙහෙයුම් කමිටුව විසින් ඉදිරිපත් කරන ලද යෝජනා සහ පක්ෂවල අදහස් සලකා බැලීම වටී.
අවසාන ප්‍රතිඵලයෙන් සමානුපාතිකත්වය සහතික කිරීමට උත්සාහ කරන මිශ්‍ර-මන්ත්‍රී සමානුපාතික ක්‍රමයක් යටතේ තේරී පත්වන මන්ත්‍රීවරුන් 233 දෙනෙකුගෙන් යුත් ප්‍රථම මන්ත්‍රී මණ්ඩලයක් කමිටුව යෝජනා කළේය. ආසන 140 ක් (60%) කේවල ක්‍රමයෙන් පුරවනු ලැබේ. සීමා නිර්ණය කොමිෂන් සභාව විසින් වාර්ගික, ආගමික හෝ වෙනත් ආකාරයකින් බැඳි ඇති ප්‍රජාවන්ගේ නියෝජනය සහතික කිරීම සඳහා බහු-මන්ත්‍රී ආසන සහ කුඩා ආසන නිර්මාණය කළ හැකිය. සමානුපාතිකත්වය සහතික කිරීම සඳහා ‘අනුපූරණ’ ආසන 93 ක් (40%) පුරවනු ලැබේ. මෙයින් 76ක් පළාත් මට්ටමින් ගණනය කෙරෙන සමානුපාතික ක්‍රමය යටතේද 12ක් ජාතික මට්ටමින් ගණනය කෙරෙන සමානුපාතික ක්‍රමය යටතේද පුරවනු ලබන අතර ඉතිරි ආසන 5 ජාතික වශයෙන් වැඩිම ඡන්ද සංඛ්‍යාවක් ලබා ගන්නා පක්ෂයට හිමිවනු ඇත.
ශ්‍රී ලංකා නිදහස් පක්ෂය ප්‍රතිපත්තිමය වශයෙන් එම යෝජනාවලට එකඟ වූ අතර ඒකාබද්ධ විපක්ෂය (ශ්‍රී ලංකා පොදුජන පෙරමුණේ පූර්වගාමියා) නිශ්චිත යෝජනාවක් ඉදිරිපත් කළේ නැත. මූලික කාරණා පිළිබඳව ප්‍රධාන පක්ෂ දෙක අතර ඇතිවන ඕනෑම එකඟතාවක් සලකා බැලීමට දෙමළ ජාතික සන්ධානය කැමැත්ත පළකළේය. ජාතික හෙළ උරුමයේ ස්ථාවරය වූයේ ජනාධිපති බලතල අඩු කරනවා නම් වැඩිම ඡන්ද සංඛ්‍යාවක් ලබා ගන්නා පක්ෂයට බහුතර ආසන සංඛ්‍යාවක් හිමි විය යුතු බවය. ඒ අතරම කුඩා දේශපාලන පක්ෂ නියෝජනය සහතික කළ යුතුය. එබැවින් ජයග්‍රාහී පක්ෂයට එකතුකරන ‘බෝනස්’ මන්ත්‍රී ධුර සංඛ්‍යාව අඩුවිය යුත්තේ දෙවැනි තැනට පත්වන පක්ෂයේ අවාසියටය.
සමස්ත ලංකා මක්කල් කොංග්‍රසය, ඊළාම් ජනතා ප්‍රජාතන්ත්‍රවාදී පක්ෂය, ශ්‍රී ලංකා මුස්ලිම් කොංග්‍රසය සහ දෙමළ ප්‍රගතිශීලී සන්ධානය එක්ව යෝජනා කළේ පවතින සමානුපාතික නියෝජන ක්‍රමයේ මූලධර්ම එලෙසම තබා ගත යුතු අතර සංඛ්‍යාවෙන් 40ක් සහ 50ක් අතර වන මැතිවරණ කලාප පදනම් කරගෙන මැතිවරණ පැවැත්විය යුතු බවත් සහ කඩඉම් ප්‍රතිශතය 2% ක් විය යුතු බවත්ය. ජනතා විමුක්ති පෙරමුණ විධායක ජනාධිපති ක්‍රමය අහෝසි කිරීම සඳහා වූ අතර, අවසාන ප්‍රතිඵලය සමානුපාතික බව සහතික කෙරෙන මිශ්‍ර මැතිවරණ ක්‍රමයක් යෝජනා කිරීම සැලකිය යුතු කරුණකි.
ප්‍රජාතන්ත්‍රවාදය සහ නීතියේ ආධිපත්‍යය උදෙසාවූ සාමූහිකයේ යෝජනා
මෙම ලියුම්කරු ඇතුළු වෘත්තිකයන් සහ ශාස්ත්‍රඥයින් පිරිසකගෙන් සැදුම්ලත් ප්‍රජාතන්ත්‍රවාදය සහ නීතියේ ආධිපත්‍යය සඳහා වූ සාමූහිකය 2024 දී ව්‍යවස්ථා ප්‍රතිසංස්කරණ පිළිබඳ සවිස්තරාත්මක යෝජනා ඉදිරිපත් කළේය. පාර්ලිමේන්තු ආණ්ඩුක්‍රමයක් නැවත ඇතිකිරීම එය යෝජනා කළේය. ව්‍යවස්ථාදායකය ද්වි-මණ්ඩල වන අතර, මන්ත්‍රීවරුන් 200 දෙනෙකුගෙන් යුත් නියෝජිත මන්ත්‍රී මණ්ඩලයක් පහත සඳහන් පරිදි තේරී පත් වේ: පොදු අභිලාෂයන් ඇති සමාජ කංඩායම්වල නියෝජනය සහතික කිරීමට පහසුකම් සැලසීම සඳහා වන බහු-මන්ත්‍රී සහ කුඩා මැතිවරණ කොට්ඨාස ඇතුළු මැතිවරණ කොට්ඨාසවලින් මන්ත්‍රීවරුන් 130ක් තෝරා පත් කර ගනු ලැබේ. ජාතික හෝ පළාත් මට්ටමින් සමානුපාතික පදනමින් 60 දෙනෙකු තෝරා පත් කර ගනු ලැබේ. ප්‍රාදේශීය සංකේන්ද්‍රණයකින් නැති, එහෙත් ජාතික මට්ටමින් සැලකිය යුතු සහයෝගයක් ඇති කුඩා පක්ෂවලට නියෝජනයක් ලබා ගැනීමට හැකි වන පරිදි මැතිවරණ කොට්ඨාස හරහා හෝ ඉහත සඳහන් කළ ආසන හැටෙන් එක් ආසනයක් හෝ ලබා ගැනීමට අපොහොසත් වූ පක්ෂ අතරින් ජාතික මට්ටමෙන් ආසන දහයක් සමානුපාතික ක්‍රමයට පුරවනු ඇත. කාන්තා, තරුණ සහ ඌන-නියෝජනයක් සහිත කණ්ඩායම්වල නියෝජනයක් සහතික කිරීම සඳහා සුදුසු ප්‍රතිපාදන ඇතුළත්කළ යුතුය.
ලියුම්කරුගේ යෝජනා
ජනතාව ජාජබ නායකයා ජනාධිපතිවරයා ලෙස පත් කර එම පක්ෂයට පාර්ලිමේන්තුවේ තුනෙන් දෙකක බලයක් ලබා දී ඇත. එබැවින් ජනාධිපතිවරයා මතුකළ කරුණු වලට පිළියම් යෙදෙන ක්‍රමවේදයක් යෝජනා කිරීම නුවණට හුරුය. එසේ නොමැති නම්, අප එකම චක්‍රය වටා කැරකෙනු ඇත. ප්‍රජාතන්ත්‍රවාදය සහ නීතියේ ආධිපත්‍යය සඳහා වූ සාමූහිකයේ යෝජනා තවදුරටත් සාකච්ඡා කිරීම සඳහා සුදුසු පදනමක් සලසන බව මෙම ලියුම්කරුගේ විශ්වාසයයි.
මන්ත්‍රීන් සංඛ්‍යාව වැඩි කිරීමට ජනතාව දැඩි ලෙස විරුද්ධ වන අතර, ජනාධිපතිවරයා මතුකළ කරුණු වලට කුඩා පාර්ලිමේන්තුවක් තුළින් පිළියම් සෙවීමද අභියෝගාත්මක වනු ඇත. ලියුම්කරුගේ යෝජනාව වන්නේ මන්ත්‍රීවරුන් 225කින් යුත් පාර්ලිමේන්තුවක් තුළ කටයුතු කිරීමයි.
මන්ත්‍රීවරුන් 150ක් කොට්ඨාස හරහාද 65ක් ජාතික මට්ටමේ සමානුපාතික ක්‍රමයෙන්ද තේරී පත් විය යුතු බව ලියුම්කරු යෝජනා කරයි. මැතිවරණ කොට්ඨාස හෝ ඉහත සඳහන් කළ ආසන 65 හරහා එක් ආසනයක් හෝ ලබා නොගත් පක්ෂ අතුරෙන් ජාතික මට්ටමේ සමානුපාතික ක්‍රමයෙන් ඉතිරි ආසන 10 පුරවනු ඇත. සීමා නිර්ණ කොමිෂන් සභාව විසින් එක් එක් පළාතේ ලියාපදිංචි ඡන්දදායක සංඛ්‍යාව අනුව සමානුපාතිකව පෙරකී මන්ත්‍රී ධුර 150 විවිධ පළාත් අතර බෙදිය යුතුය. කොමිෂන් සභාව විසින් එක් එක් පළාත මැතිවරණ කොට්ඨාසවලට බෙදනු ඇත. පොදු අභිලාෂයන් ඇති සමාජ කංඩායම්වල නියෝජනය සහතික කිරීමට කුඩා ඡන්ද කොට්ඨාස හෝ බහු-මන්ත්‍රී මැතිවරණ කොට්ඨාස නිර්මාණය කළ හැක.
පෙරකී ආසන 65 කඩඉම් ප්‍රතිශතයකින් තොරව ජාතික වශයෙන් ඒ ඒ පක්ෂ ලබාගන්නා ඡන්ද සංඛ්‍යාව අනුව සමානුපාතිකව බෙදී යනු ඇත. යම් පක්ෂයකට එසේ ලැබෙන ‘සමානුපාතික මන්ත්‍රීවරුන්’ සංඛ්‍යාව ඒ ඒ පළාත්වලින් ලබාගත් ඡන්දවලට සමානුපාතිකව විවිධ පළාත් අතරට බෙදනු ලැබේ. උදාහරණයක් වශයෙන්, යම් පක්ෂයකට ආසන 10 කට හිමිකම් ලැබී පක්ෂයේ මුළු ඡන්ද ප්‍රමාණයෙන් 20%ක් මධ්‍යම පළාතෙන් ලබාගෙන ඇති නම්, එම පළාතේ ‘සමානුපාතික’ අපේක්ෂකයින්ගෙන් ආසන 2ක් පුරවනු ඇත. ඒ සඳහා සෑම පක්ෂයක්ම අවම වශයෙන් එක් ආසනයක් හෝ තරඟ කරන සෑම පළාතක් සඳහා ‘සමානුපාතික’ අපේක්ෂකයින් අනුපිළිවෙළකට නම්කර තිබිය යුතුය. යම් පළාතක පක්ෂයට ලැබෙන ආසන ඒ අනුපිළිවෙළ අනුව පුරවනු ලැබේ. කලින් යෝජනා කර ඇති පරිදි ඉතිරි ආසන 10 කුඩා පක්ෂ විසින් පුරවනු ලැබේ.
යෝජිත මැතිවරණ ක්‍රමයෙන් ජනාධිපති දිසානායක මතුකළ ගැටලු ආමන්ත්‍රණය වන්නේ කෙසේද?
සමානුපාතික ක්‍රමයෙන් දුර්වල පාර්ලිමේන්තුවක් ඇතිවන්නේය යනුවෙන් ජනාධිපතිවරයා මතුකරන කාරණය බහුතර මන්ත්‍රීවරුන් පිරිසක් කේවල ක්‍රමය යටතේ තේරී පත් වූ විට ප්‍රමාණවත් ලෙස විසඳේ. අනෙක් කරුණු තුන සාකච්ඡා කිරීමට පෙර, ඡන්දදායකයින් සෑම විටම තම ප්‍රජාවන්ගේ අපේක්ෂකයින්ටම ඡන්දය නොදෙන බව පැවසිය යුතුය. හොඳ උදාහරණයක් වන්නේ අති බහුතරය එක්තරා කුලයකින් සමන්විත, එසේම වමට බර ආසනයක් ලෙස පිළිගැනුණු බලපිටියේ 1965 මැතිවරණ ප්‍රතිඵලයයි. ලංකා සමසමාජ පක්ෂය විශාල අවදානමක් ගනිමින් වෙනත් කුලයකට අයත් එල්. සී. ද සිල්වා නම් කළේ දිගු කලක් ආසනය නියෝජනය කර ශ්‍රීලනිප-ලසසප හවුල් ආණ්ඩුව පරාජය කිරීමට පැතිමාරු කළ ලක්ෂ්මන් ද සිල්වාට එරෙහිවය. බලපිටිය ඡන්දදායකයෝ එල්.සී. දිනවා ලක්ෂ්මන්ට දඬුවම් කළහ.
බහු-මන්ත්‍රී ඡන්ද කොට්ඨාස බොහෝවිට ඒවා නිර්මාණය කළ අරමුණ ඉටු කර ඇති නමුත් සෑම විටම එසේ නොවීය. මඩකලපුව බහු-මන්ත්‍රී ආසනය නිර්මාණය කළේ දෙමළ සහ මුස්ලිම් ජාතිකයෙකු තෝරා පත් කර ගැනීම පහසු කිරීම සඳහා ය. 1970 මැතිවරණයේදී ප්‍රමුඛ අපේක්ෂකයන් හතර දෙනා වූයේ ෆෙඩරල් පක්ෂයේ රාජදුරෙයි, එජාපයේ මාකන් මාකර්, ශ්‍රීලනිපයේ රහුමාන් සහ ස්වාධීන අපේක්ෂක සෙල්වනායගම් ය. මුස්ලිම් ඡන්ද මාකන් මාකර් සහ රහුමාන් අතර සමීපව බෙදී යාමෙන්, දෙදෙනාම පරාජයට පත්වූහ. ඡන්ද බෙදී යාමෙන් මුස්ලිම් නියෝජනය නැති විය හැකි බව මුස්ලිම් ඡන්දදායකයෝ නිසැකවම දැන සිටි නමුත් ඔවුන් තම දේශපාලන විශ්වාසයන්ට අනුව ඡන්දය දීමට වඩා කැමති වූහ.
කේවල ක්‍රමය යටතේ විසිර ගිය ප්‍රජාවකට නියෝජනයක් නොලැබී යනු ඇති බවට වූ ජනාධිපතිවරයාගේ දෙවන උත්සුකය ද යෝජිත ක්‍රමය යටතේ වඩා හොඳින් විසඳනු ඇත. කුරුණෑගල දිස්ත්‍රික්කයම උදාහරණයට ගත්තොත් යම් පක්ෂයකට මුස්ලිම් ජාතිකයෙකු සමානුපාතික ලැයිස්තුවේ ඉහළින්ම තැබීමෙන් මුස්ලිම් ඡන්දදායකයන් ආකර්ෂණය කර ගත හැකිවනු ඇති අතර මුස්ලිම් අපේක්ෂකයෙකු තේරී පත්වීමේ ඉඩකඩද ඉහළ යයි. එසේම, උතුරේ පක්ෂයකට පීඩිත ප්‍රජාවන්ගේ ඡන්දදායකයින් ආකර්ෂණය කර ගැනීමට සහ ඔවුන්ගේ නියෝජනය සහතික කිරීම සඳහා උතුරු පළාතේ සමානුපාතික ලැයිස්තුවේ ඉහලින්ම පීඩිත ප්‍රජාවක අපේක්ෂකයෙකු නම් කළ හැක.
තුන්වන කාරණය වූයේ මිශ්‍ර ක්‍රමයක් යටතේ මැතිවරණ කොට්ඨාස සංඛ්‍යාව අඩුවීම නිසා විවිධ ප්‍රජාවන් නියෝජනය වන පරිදි මැතිවරණ කොට්ඨාස නිර්මාණය කිරීම අභියෝගාත්මක වීමය. ත්‍රිකුණාමලය දිස්ත්‍රික්කය උදාහරණයක් ලෙස ගැනිණ. කුඩා මැතිවරණ කොට්ඨාස නිර්මාණය කිරීමට සීමා නිර්ණය කොමිෂන් සභාවට බලය ලබා දීම මෙම උත්සුකය හොඳින් සමනය කරයි. මන්ත්‍රීධුර සංඛ්‍යාවක් වෙන් කරන්නේ ත්‍රිකුණාමලය දිස්ත්‍රික්කයට නොව මුළු නැගෙනහිර පළාතටමය. එයින් මැතිවරණ කොට්ඨාස නිර්මාණය කිරීමට කොමිසමට පුළුල් අභිමතයක් ලැබේ. එසේම පොදු අභිලාෂයන් ඇති සමාජ කංඩායම්වල නියෝජනය සහතික කිරීමට බහු-මන්ත්‍රී මැතිවරණ කොට්ඨාසද නිර්මාණය කළ හැකිය. කුල නියෝජනය පිළිබඳ සිව්වන උත්සුකයද ඒ හා සමානව ආමන්ත්‍රණය කෙරේ.
යෝජිත ක්‍රමය යටතේ කොට්ඨාසවලින් පත්වන මන්ත්‍රීවරුන් 150 ක සංඛ්‍යාව 1975 වසරේ සීමා නිර්ණය යටතේ පත්වූ 168 ට අඩුවන්නේ 10% කින් පමණක් බව සටහන් කළ යුතුය. එසේම, දැනට පවතින 5% ක කඩඉමට සාපේක්ෂව යෝජිත ක්‍රමය යටතේ කඩඉමක් ඇත්තෙම නැත. මෙය කුඩා පක්ෂවලට මෙන්ම එතරම් කුඩා නොවන පක්ෂවලටද උපකාරී වනු ඇත. කුඩා පක්ෂ සඳහා ආසන 10 ක් වෙන් කිරීමද ජනාධිපතිවරයාගේ දෙවන උත්සුකයට තවත් ප්‍රතිකර්මයක් සලසයි.
‘ස්පොයිලර්ලා’ එපා
ලියුම්කරු ඉහත යෝජනා ඉදිරිපත් කරන්නේ සාකච්ඡාවට පදනමක් ලෙසය. ස්ථාවර රජයක් සහ විවිධ අනන්‍යතා නියෝජනය කිරීම අත්‍යවශ්‍ය වන අතර, බිහිසුණු විධායක ජනාධිපති ක්‍රමය අහෝසි කිරීම ද ඒ හා සමානව වැදගත්ය. මේවා එකිනෙකට පරස්පර, එකට සිදුකළ නොහැකි ඒවා නොවේ.
පළාත් පාලන මැතිවරණය අවසන් වූ පසු ජාතික ජන බලවේගය ඉහත කාරණා ප්‍රථමයෙන් අභ්‍යන්තරව සාකච්ඡා කරන බව දිසානායක ජනාධිපතිවරයා සිරස රූපවාහිනිය ඔස්සේ ප්‍රකාශ කළේය. එවිට ආණ්ඩුවේ ස්ථාවරය පැහැදිලි වන බැවින් එය අගය කළ යුතුය. එය වැඩිදුර සාකච්ඡාවට පදනමක්ද වේ.
විධායක ජනාධිපති ක්‍රමය අහෝසි කිරීමට කැපවූ තනි දේශපාලන පක්ෂයක් තුනෙන් දෙකක බලයක් ලබාගත් පළමු අවස්ථාව මෙයයි. එවැනි තවත් අවස්ථාවක් නැවත ඒම සැකසහිතය. කඩාකප්පල්කරුවන් නොහොත් ස්පොයිලර්ලා කිසිම පැත්තකින් මතු නොවේවා, මැතිවරණ ක්‍රමය ගැන එකඟත්වයක් නොමැතිවීම විධායක ජනාධිපති ක්‍රමය තබා ගැනීමට නිදහසට කරුණක් නොවේවා, නොකෙරෙන වෙදකමට කෝඳුරු තෙල් හත් පට්ටයක් සහ තව ටිකක් අවශ්‍ය නොවේවා යන්න ජනතාවගේ පැතුමයි.
ශ්‍රේෂ්ඨාධිකරණයේ මෑත තීරණවලට අනුව, පාර්ලිමේන්තු ආණ්ඩු ක්‍රමයකට යාමට ජනමත විචාරණයකදී ජනතා අනුමැතිය අවශ්‍ය වේ. ජාතික ජන බලවේගයට තුනෙන් දෙකක බහුතරයක් ඇති නමුත්, ප්‍රමාද වී පවත්වන ලද ජනමත විචාරණයකදී තත්ත්වය වෙනස්ය. ඒ, එවිට එය ව්‍යවස්ථා කෙටුම්පත පිළිබඳ ජනමත විචාරණයකට වඩා ආණ්ඩුවේ ක්‍රියාකාරිත්වය පිළිබඳ ජනමත විචාරණයක් බවට පත්වන බැවිනි. එවිට විපක්ෂයද අවස්ථාවාදී වනු ඇත. කුඩා කණ්ඩායම් සහ පක්ෂ මස් රාත්තලම ඉල්ලනු ඇත. විධායක ජනාධිපති ක්‍රමය තව වසර කීපයක් තබා ගැනීමට ආණ්ඩුවට අවශ්‍ය නම්, අහෝසි කිරීම සඳහා පනතක් ඉක්මනින් ඉදිරිපත් කර අහෝසි වන නිශ්චිත දිනය ලෙස ඉදිරි දිනයක් නියම කළ හැක. ප්‍රමාදය නිසැකවම ප්‍රතිසංස්කරණ ක්‍රියාවලිය ව්‍යාකුල කරවන අතර ආණ්ඩුව නොකෙරෙන වෙදකමට කෝඳුරු තෙල් සොයන්නේය යන චෝදනාවට නිරාවරණය වනු ඇත.
අනිද්දා වට්සැප් සමුහයට එක්වීමට පහත යොමු භාවිතා කරන්න
Group 01- https://chat.whatsapp.com/FW9ZAqXBotT5vFHZoDCIg1
Group 02 – https://chat.whatsapp.com/KLYP9OhQfhlHubxPspW3J3
Group 03 – https://chat.whatsapp.com/L9NV2gK1MfO6lUCpCyUVTZ
අනිද්දා වට්සැප් චැනලයට එක්වීමට පහත යොමුව භාවිතා කරන්න
https://whatsapp.com/channel/0029Vb7PJ8nDeON9UrGsSx0C
අනිද්දා ෆේස්බුක් චැනලයට එක්වීමට පහත යොමුව භාවිතා කරන්න
https://www.messenger.com/channel/AniddaNews
