නව ආණ්ඩුක්‍රම ව්‍යවස්ථාවක් ගෙනඒම සඳහා පාර්ලිමේන්තුවේ මන්ත්‍රීවරුන් තුනෙන් දෙකක අනුමැතිය ප්‍රමාණවත් වන අතර, ජනමත විචාරණයකදී ජනතාවගේ අනුමැතිය අවශ්‍ය නොවන බව අධිකරණ අමාත්‍යාංශයේ හිටපු ලේකම්වරයකු මෙන්ම ප්‍රකට ව්‍යවස්ථා විද්වතකු වන ආචාර්ය නිහාල් ජයවික්‍රම කියයි.
ඔහු මේ බව කීවේ, සාධාරණ සමාජයක් සඳහා වන ජාතික ව්‍යාපාරය විසින් ‘ජාතික අපේක්ෂාවන්ට අනුගතව, ප්‍රජාතන්ත්‍රවාදී වටිනාකම් ශක්තිමත් කරන ආණ්ඩුක්‍රමයක්’ යන මැයෙන් පෙබරවාරි 25 වැනිදා කොළඹ, නාරාහේන්පිට ජානකී හෝටලයේ පැවැති සාකච්ඡා සභාවක් අමතමිනි.
‘අපේ ආණ්ඩුක්‍රම ව්‍යවස්ථාවේ විධිවිධාන අනුව, අලුත් ව්‍යවස්ථාවක් ගෙනෙන්න ජනමත විචාරණයක් අවශ්‍ය නැහැ. ජනමත විචාරණයක් අවශ්‍ය වන්නේ, ව්‍යවස්ථාවේ විශේෂයෙන් සඳහන් කෙරන විධිවිධාන සංශෝධනය කිරීමට පමණයි.’ ඔහු කීවේය.
ජයවික්‍රම මහතා ඒ බව පවසන්නේ ආණ්ඩුක්‍රම ව්‍යවස්ථාවේ දොළොස්වන පරිච්ඡේදයේ 82(5) ව්‍යවස්ථාව උපුටා දක්වමිනි. එහි මෙසේ සඳහන් වෙයි.
‘ආණ්ඩුක්‍රම ව්‍යවස්ථාවේ යම්කිසි විධිවිධානයක් සංශෝධනය කිරීම සඳහා වූ හෝ ආණ්ඩුක්‍රම ව්‍යවස්ථාව පරිච්ඡින්න කොට (අවලංගු කොට) ඒ වෙනුවට වෙනත් ආණ්ඩුක්‍රම ව්‍යවස්ථාවක් ප්‍රතියෝජනය කිරීම සඳහා වූ හෝ යම්කිසි පනත් කෙටුම්පතක් සම්මත වීමට, ඊට පක්ෂව මුළු මන්ත්‍රී සංඛ්‍යාවෙන් තුනෙන් දෙකකට නොඅඩු අනුමැතියක් අවශ්‍ය වෙයි.’
‘යම්කිසි නීතියක යම්කිසි විධිවිධානයක්, ඉහතින් දැක්වූ නියමයන්ට අනුකූලව පනවනු ලැබුවහොත් මිස, එයින් ආණ්ඩුක්‍රම ව්‍යවස්ථාව නැතහොත් ආණ්ඩුක්‍රම ව්‍යවස්ථාවේ යම්කිසි විධිවිධානයක් සංශෝධනය වන්නේ නැත. පරිච්ඡින්න වන්නේද නැත. ප්‍රතිශෝධනය වන්නේද නැත.’
ආචාර්ය ජයවික්‍රම පවසන්නේ, ජනමත විචාරණයකින් සම්මත විය යුතු විශේෂ විධිවිධාන 83 ව්‍යවස්ථාවේ දැක්වෙන බවයි.
එනම්, ‘1, 2, 3, 4, 6, 7, 8, 9, 10 සහ 11 ව්‍යවස්ථාවල හෝ 83 ව්‍යවස්ථාවේ විධිවිධාන, 30(2), 62(2) අනුව්‍යවස්ථාවල විධිවිධාන සංශෝධනය කිරීම සඳහා වූ හෝ පරිච්ඡින්න කොට ප්‍රතියෝජනය කිරීම සඳහා වූ හෝ, ජනාධිපතිවරයාගේ ධුර කාලය අවුරුදු හයක් ඉක්මවා දීර්ඝ කරන්නාවූ, නැතහොත් පාර්ලිමේන්තුවේ ධුර කාලය අවුරුදු හයකට වඩා දීර්ඝ කරන්නාවූද පනත් කෙටුම්පතකට, පාර්ලිමේන්තුවේ තුනෙන් දෙකක අනුමැතියට අමතරව, ජනමත විචාරණයකදී ජනතා අනුමැතියද අවශ්‍ය වෙයි.’
එම ව්‍යවස්ථාවෙහි අලුත් ව්‍යවස්ථාවක් ගෙනඒමට අදාළ වන විධිවිධාන අන්තර්ගත වන ව්‍යවස්ථා අංක ඇතුළත් කර නැත.
එම සාකච්ඡාවේදී අදහස් දැක්වූ කොළඹ විශ්වවිද්‍යාලයේ නීති පීඨයේ හිටපු අංශාධිපති මහාචාර්ය සාවිත්‍රි ගුණසේකර පැවසුවේ, එම කාරණය ගැන මත කිහිපයක් තිබෙන බවයි.
ජනාධිපති නීතිඥ ආචාර්ය ජයම්පති වික්‍රමරත්න එහිදී අදහස් දක්වමින් කීවේ, විධායක ජනාධිපති ක්‍රමය අහෝසි කිරීම සඳහා ජනමත විචාරණයකදී මහජන අනුමැතිය අවශ්‍ය නොවන බවයි. පාර්ලිමේන්තුවේ තුනෙන් දෙකක අනුමැතියක් පමණක් ඊට ප්‍රමාණවත් බවයි. ආණ්ඩුක්‍රම ව්‍යවස්ථාවේ ‘සංශෝධනය සඳහා ජනමත විචාරණයක් අවශ්‍ය වන’ විධිවිධානවලට විධායක ජනාධිපති ක්‍රමයට අදාළ විධිවිධාන ඇතුළත් කර නැති බවද ඔහු කීවේය. එහෙත් ඔහු පෙන්වා දුන්නේ, අලුත් ආණ්ඩුක්‍රම ව්‍යවස්ථාවක් සම්මත කර ගැනීමේදී ජනමත විචාරණයකින් ජනතාවගේ අනුමැතිය ලබාගැනීම ප්‍රජාතන්ත්‍රවාදී වන බවයි.
අනිද්දා වට්සැප් සමුහයට එක්වීමට පහත යොමු භාවිතා කරන්න
Group 01- https://chat.whatsapp.com/FW9ZAqXBotT5vFHZoDCIg1
Group 02 – https://chat.whatsapp.com/KLYP9OhQfhlHubxPspW3J3
Group 03 – https://chat.whatsapp.com/L9NV2gK1MfO6lUCpCyUVTZ
අනිද්දා වට්සැප් චැනලයට එක්වීමට පහත යොමුව භාවිතා කරන්න
https://whatsapp.com/channel/0029Vb7PJ8nDeON9UrGsSx0C
අනිද්දා ෆේස්බුක් චැනලයට එක්වීමට පහත යොමුව භාවිතා කරන්න
https://www.messenger.com/channel/AniddaNews
