ලංකා මිනරල් සෑන්ඩ් ලිමිටඩ් ආයතනයේ හිටපු සභාපතිවරයෙකු විසින් 2022 වර්ෂයේ සැප්තැම්බර් මාසයේ සිට 2024 අගෝස්තු මාසය දක්වා අනුමත ඉන්ධන ප්‍රමාණයට වඩා ආසන්න වශයෙන් රුපියල් 38 ලක්ෂයක (රු. 3,846,802) අතිරේක ඉන්ධන පිරිවැයක් දරා ඇති බව විගණන විමසුමක් මගින් ප්‍රශ්න කර තිබේ.
ලංකා මිනරල් සෑන්ඩ් ලිමිටඩ් හි වත්මන් සභාපතිවරයා අමතමින් 2025 ජනවාරි 31 දින සහිතව යවා ඇති එම විගණන විමසුමෙන් දන්වා ඇත්තේ විගණන විමසුමේ සඳහන් කර ඇති කරුණු සම්බන්ධයෙන් දින 7ක කාලයක් තුළ අදහස් ඉදිරිපත් කරන ලෙසයි. ජාතික විගණන කාර්යාලයේ ජ්‍යෙෂ්ඨ සහකාර විගණකාධිපති වෙනුවට විගණන අධිකාරි එම්එම්බීසී උදයංගනී විසින් එම විගණන විමසුම යොමු කර තිබේ.
එම විගණන විමසුමට අනුව එම කාලයේදී ලංකා මිනරල් සෑන්ඩ් ලිමිටඩ් හිටපු සභාපතිවරයාට අනුමත ඉන්ධන දීමනා ලෙස ආසන්න වශයෙන් රුපියල් 13 ලක්ෂයක (රු. 1,370,409 ) මුදලක් ගෙවා තිබේ.
එම විගණන විමසුමේ සඳහන් කරන්නේ අනුමත මාසික ඉන්ධන දීමනාව ප්‍රමාණවත් නොවන විශේෂ අවස්ථාවන් හිදී අධ්‍යක්ෂ මණ්ඩලයේ නිර්දේශ සහිතව අදාල රේඛීය අමාත්‍යාංශයේ ලේකම්වරයාගේ අනුමැතිය ඒ සඳහා ලබාගත යුතු බවත්, අතිරේක ඉන්ධන භාවිතයේදී එවන් අනුමැතියක් ලබාගෙන නැති බවත්ය.
