ගනේමුල්ලේ සංජීව ඝාතනය – සංජීව රෝහල්ගත නොකර විත්ති කූඩුවේම තබාගත්තේ ඇයි?

පෙබරවාරි 19 දින උදෑසන අලු‍ත්කඩේ අධිකරණයේ අංක 5 මහේස්ත්‍රාත් අධිකරණ ශාලාවේ තුළ සිදු වූ වෙඩි තැබීමකින් ප්‍රකට සංවිධානාත්මක අපරාධ කල්ලි නායකයෙකු යැයි පැවසෙන සංජීව කුමාර සමරරත්න නොහොත් ගනේමුල්ල සංජීව විත්ති කූඩුවේ සිටියදී නීතිඥයෙකු ලෙස සැරසී එම ස්ථානයට පැමිණි පුද්ගලයෙකුගේ පිස්තෝලයකින් වෙඩි ප්‍රහාරයට ලක්විය.

ගනේමුල්ල සංජීවට වෙඩි තැබුවේ නඩු කටයුත්තක් සඳහා බූස්ස බන්ධනාගාරයේ සිට කොළඹ මහේස්ත්‍රාත් අධිකරණයට රැගෙන ආ අවස්ථාවේදීය. ගාල්ලේ බූස්ස අධි ආරක්ෂිත බන්ධනාගාරයේ සිට ඔහු කොළඹ ගෙනැවිත් තිබුණේ ආයුධ සන්නද්ධ පොලිස් විශේෂ කාර්ය බලකායේ (එස්ටීඑෆ්) නිලධාරීන් 12 දෙනකුගේ ආරක්ෂාව යටතේය. ඊට අමතරව ආයුධ සහිත බන්ධනාගාර නිලධාරීන්ද ඔහු රැගෙන ආ බස්රථයේ සිටියහ. මේ තරම් ආරක්ෂක තත්වයන් යටතේදීත්, ඔහු විශේෂයෙන් ආරක්ෂා කරගත යුතු රැඳවියකු හැටියට හඳුනාගෙන තිබියදීත්, අධිකරණ ශාලාව තුළදී ම ඉතාම සැලසුම් සහගතව ඔහු මරාදැමීමට ඝාතකයන්ට හැකිවිය.

වෛද්‍ය වාර්තා අනුව සංජීවගේ උරය ප්‍රදේශයට වෙඩි උණ්ඩ හයක් පමණ වැදී ඇති අතර, හදිසි ප්‍රතිකාර සඳහා කොළඹ ජාතික රෝහල වෙත ඇතුළත් කර සිටියදී මියගොස් ඇත.

එහෙත් සමාජ මාධ්‍ය හරහා වෙඩිතැබීම සිදුවූ අවස්ථාවේදී අධිකරණ භුමිය තුළ සිටි අයෙකු ගෙන තිබුණු වීඩියෝවක ගනේමුල්ල සංජීව අවසන් සුසුම් හෙළන ආකාරය සටහන් වී තිබේ. ඒ සංසරණය වෙමින් තිබෙන විඩියෝව නිරීක්ෂණය කරන විට දැකගන්නට ලැබෙන්නේ අධිකරණ භුමියේ රැඳී සිටි පොලිස් නිලධාරීන් හෝ විශේෂ කාර්ය බලකා නිලධාරීන් හෝ කිසිවෙකු ඔහුට හදිසි ප්‍රථමාධාර කිසිවක් ලබා නොදී, හදිසි අවස්ථාවක කටයුතු කරන්නේ කෙසේදැයි යන්න ගැන නොදැන කලබල වී සිටින බවයි.

වෙඩි තැබීමට යොදාගත් රිවෝල්වරය අතහැර දමා ගොස් තිබියදී අධිකරණ භූමිය තුළදීම පොලීසිය සොයාගෙන තිබිණි. වෙඩි තබා පලා ගිය පුද්ගලයාට රිවෝල්වරය අධිකරණ භූමිය තුළ දී ලබා දී ඇත්තේ නීතිඥවරියක ලෙස සැරසී ආ කාන්තාවක බවද පොලිසිය කියයි. එය රිවෝල්වරය හැඩයට පිටු කපා සකස් කළ අපරාධ නඩු විධාන සංග්‍රහය පොතක සඟවා ගෙනැවිත් දී තිබේ. දෙදෙනාම උසාවි භූමියට ඇතුළු වී ඇත්තේ නීතිඥ වේශයෙන් බව පොලිසිය කියයි.

අධිකරණ භූමියේ සවිකර ඇති සීසීටීවී දර්ශනවලින් සොයාගෙන තිබුණේ වෙඩික්කරු සහ ඔහුගේ සහායට පැමිණි නීතිඥවරියක ලෙස පෙනී සිටින කාන්තාව සංජීවට වෙඩි තබා අධිකරණයෙන් පලායන ආකාරයයි. ‘ඇතුළෙ වෙඩි තියනවා. ගනේමුල්ලේ සංජීව පැන්නා’ යැයි ඝාතන සැකකරු උසාවි භූමියෙන් පිටවෙමින් එහි සිටි අනෙක් පුද්ගලයන්ට පවසා ඇතැයිද මාධ්‍යවල වාර්තා විය.

පොලිස් මාධ්‍ය ප්‍රකාශක, ජ්‍යෙෂ්ඨ පොලිස් අධිකාරි බුද්ධික මනතුංග: ‘කොළඹ අපරාධ කොට්ඨාසය මඟින් විමර්ශණයක් ආරම්භ තිබෙනවා. විමර්ශනයට අපරාධ පරීක්ෂණ දෙපාර්තමේන්තුව සහයෝගය ලබා දෙනවා. වෙඩි තැබීමට පැමිණි වෙඩික්කරු නීතිඥවරයෙකු විදියට පැමිණි නිසා අධිකරණයට ඇතුළු වීමේදී සාමාන්‍ය පුද්ගලයන් මෙන් පරීක්ෂාවට ලක් නොවී පැමිණ තිබෙනවා. ඒ වගේම වෙඩික්කරුට සහාය දක්වපු කාන්තාවත් නීතිඥවරියක් ලෙස සැරසී අධිකරණය තුළට පැමිණ තිබෙන්නේ. අධිකරණය තුළදී සංජීව විත්ති කූඩුව තුළ තනිව සිටින අවස්ථාවේදී, (විත්ති කූඩුවෙන් බැසීමට ආසන්න අවස්ථාවේදී) වෙඩික්කරු ඔහුගේ ආසන්නයටම ගොස් වෙඩි තබා තියෙනවා. දැනට පෙනීයන විදියට, නීතිඥවරුන් භාවිත කරන අපරාධ නඩු විධාන සංග්‍රහය නැමැති පොතේ රිවෝල්වරය තැන්පත් කළ හැකි ආකාරයට පොත තුළ හැඩය කපලා, ඒ තුළ අවිය සඟවා ගෙන ඇවිත් තිබුණේ. මෙම වෙඩික්කරු හිස් අතින් පැමිණ, නීතිඥවරියක ලෙස සැරසී ආ කාන්තාව ඔහුට මෙම පිස්තෝලය දුන්නා කියලායි විමර්ශනවලදී කරුණු අනාවරණය වෙලා තිබෙන්නේ.’ සිදුවීමට අදාළ සීසීටීවී දර්ශනවල පෙනෙන්නේ, ඝාතන සැකකරු අධිකරණ භූමිය තුළ සිටින විට ඒ අසළම එම කාන්තාවද සිටින ආකාරයයි.
වෙඩි තැබීම සිදුවී පැය කිහිපයකට පසුව, අධිකරණ අමාත්‍ය නීතිඥ හර්ෂණ නානායක්කාර කොළඹ අලු‍ත්කඩේ අධිකරණ සංකීර්ණයට පැමිණි අතර මාධ්‍යයට අදහස් දක්වමින් ඔහු මෙසේ පැවසීය.

‘මේක ඉතාම බරපතළ ප්‍රශ්නයක්. අපේ රජය මේ සිද්ධිය බරපතළ ලෙසස ගන්නවා. අපි දැඩි ආරක්ෂාවක් යටතේ සංජීවව අධිකරණයට ගෙනාවේ. අපිට දැන් මහේස්ත්‍රාත්වරු එක්කයි, අධිකරණ සේවා කොමිෂන් සභාවත් සමඟ කතාකරන්න වෙනවා. අධිකරණය භුමිය තුළ ආරක්ෂාව වැඩි කරන්න ඕනෑ. මැරුණු පාතාලයේ පුද්ගලයාගේ ජීවිතයත් ජීවිතයක්. ඒත් මෙතැන තවත් අහිංසක පුද්ගලයන් ගොඩක් ඉන්නවා. ඒ නිසා අපි මේ සිද්ධිය ඒ බරින්ම ගන්නවා. මේ සිද්ධියට විසඳුමක් අපි සොයනවා. මහජනතාවගේ ආරක්ෂාව තහවුරු කරන්න රජය වගකීම ගන්නවා. ඒකට අවශ්‍ය ක්‍රියාමාර්ගගන්නවා. ඒ වගේම මේ රටේ අපරාධ, මිනිමැරුම් අපේ ආණ්ඩුව කාලේ විතරක් නෙවෙයි කලිනුත් තිබුණා.

ඝාතන කවුරු ආරම්භ කළත්, විසඳන එක අපේ වගකීමක්. ඒකට අවශ්‍ය සියලු‍ම පියවර රජය ගන්නවා. අපිට හැම ජීවිතයක්ම වටිනවා. ආරක්ෂාව සම්බන්ධයෙන් කරුණු අපි සාකච්ඡා කරලා, ඒවාට අවශ්‍ය පියවර ගන්නවා. විඩියෝ හරහා ඔන්ලයින් ක්‍රමය යටතේ බන්ධනාගාරගත කර සිටින සැකකරුවන්ගේ සාක්ෂි ලබා ගැනීමට අපි මේ වෙද්දී පනතක් සම්මත කරන්න වැඩ කටයුතු කරමින් සිටිනවා. උසාවිය ඇතුළේ විතරක් නෙවෙයි, සමහර වෙලාවල්වල සැකකරුවන්ව අධිකරණය වෙත ගෙන එද්දී, පාරේදී පවා මේ වගේ ප්‍රශ්න මතුවෙන්න පුළු‍වන්. ඒ නිසා ඒ පනත ඉක්මනින්ම පාර්ලිමේන්තුවේදී සම්මත කරන්න අවශ්‍යයි. නීතිඥවරුන් අධිකරණය තුළට ඇතුළු‍ වෙද්දී, මේ දක්වා කිසිම පරීක්ෂාවක් කළේ නැහැ. ඒත් අපි ඉදිරියේදී නීතිඥ සංගමයත් සමඟ ඒ ගැන සාකච්ඡා කරලා ක්‍රියාමාර්ග ගන්න පුළුවන්.’

ඇමතිවරයාගේ ප්‍රකාශයෙන් පෙනෙන්නේ මේ සිදුවීම අවශ්‍ය තරම් බැරෑරුම්කමකින් යුතුව ඔහු සලකා ඇති බවයි. මීට පෙරද අධිකරණ භූමිය තුළදී සැකකරුවන් මරාදැමීම් සිදුවී තිබේ. මේ එවැනි පළමුවැන්න නොවේ. එහෙත්, ඇමතිවරයා කියන්නේ, තමන්ගේ වගකීම එම ප්‍රවණතාව අවසන් කිරීම බවයි. එය වැදගත් ප්‍රකාශයකි. විශේෂයෙන්ම, බරපතළ හා සංවිධානාත්මක අපරාධවල සැකකරුවන් රඳවා සිටින බන්ධනාගාරවල සිටම වීඩියෝ මගින් නඩු විභාගවලට සම්බන්ධ කර ගැනීම පසුගිය කාලය පුරාම කතාබහට ලක්වී ඇති වැදගත් පියවරකි.

අනෙක් අතට, මියගිය සංජීව සමග තවත් කිසිවකු විත්ති කූඩුව තුළ සිටියේ නම්, එවැන්නන්ගේ ජීවිතවලටද මේ අවදානම එසේම පවතින බව අමතක නොකළ යුතුය.

කොළඹ ප්‍රධාන මහේස්ත්‍රාත් අධිකරණ නීතිඥ සංගමයේ සභාපති නීතිඥ ගුණරත්න වන්නිනායක අනිද්දාට අදහස් දක්වමින් මෙසේ පැවසීය.‘මේ සැකකරු අලු‍ත්කඩේ මහේස්ත්‍රාත් අංක 09 අධිකරණ ශාලාවට ඉදිරිපත් කරන්න රැගෙන ආ සැකකරුවෙක්. විශේෂ කාර්ය බලකායේ ආරක්ෂාව යටතේ මේ සැකකරු අධිකරණය වෙත ගෙන ඇවිත් තිබුණා. සැකකරු අධිකරණයට ගෙන ආ විට, අංක 09 කාමරයේ විනිසුරුවරයා හිටපු නැති නිසාත්, සැකකරුගේ තවත් නඩු කිහිපයක් අංක 05 අධිකරණ භුමියේ විභාග වීමට නියමිත නිසාත් ඔහු අංක 05 අධිකරණ ශාලාව වෙත නිලධාරීන් ගෙනැවිත් තිබෙනවා.
අංක 05 අධිකරණ ශාලාවේ එදිනට විභාග වීමට ඇති නඩුවල සේවාදායකයන් අධිකරණයෙන් පිටතට යවලා, ඔන්ලයින් තාක්ෂණය ඔස්සේ විභාගයට ගන්නා රිමාන්ඩ් නඩු ඒ වෙලාවේ අධිකරණයේ විභාග වෙමින් තිබිලා තියෙන්නේ. ඒ නිසා බන්ධනාගාර නිලධාරීන් ඔහුව අධිකරණයට ඉදිරිපත් කරලා තිබෙනවා. ඒ අවස්ථාවේදී නීතිඥවරුන් ඉඳගන්නා මේසයේ හිටපු පුද්ගලයෙක්, මේ සැකකරු විත්ති කූඩුවේ සිටින අවස්ථාවේ දී නීතීඥයෙකු ලෙසින් විත්ති කූඩුව දෙසට ගිහින් තියෙනවා. මහේස්ත්‍රාත්තුමිය විශ්වාස කරලා තියෙන්නේ ඒ නීතිඥයා සැකකරුගේ නීතිඥයා, තමන්ගේ සේවාදායකයාගේ උපදෙස් ලබාගන්න ඔහු ළඟට යන බවයි. වෙඩික්කරු කූඩුවේ හිටපු සැකකරුට වෙඩි තබා තිබෙනවා. සාමාන්‍යයෙන් සැකකරුවෙක් අධිකරණය වෙත භාර දුන්නාම විශේෂ කාර්ය බලකායේ නිලධාරීන් අධිකරණයේ දොරෙන් එළියේ ඉන්නේ. සැකකරුවන්ගේ අධිකරණ කටයුතු අවසන් වූ අවස්ථාවේදී බන්ධනාගාර නිලධාරීන් විසින් විශේෂ කාර්ය බලකායට සැකකරුවන්ව නැවත භාර දෙනවා. මේ සිද්ධියෙන් පසුව අධිකරණයේ විනිසුරුවරුන් සහ නීතිඥවරුන්ගේ ජීවිතවලටත් යම් බලපෑමක් එල්ල වී තිබෙනවා. අපි සංගමයක් විදියට අධිකරණයේ විනිසුරුවරුන් සමඟ කතාකරලා ඉදිරියේදී ක්‍රියාමාර්ග ගන්න බලාපොරොත්තු වෙනවා.
අපරාධ සැකකරුවන් උදෑසන අධිකරණය වෙත රැගෙන එන්නේ නැතිව හවස් වරුවල අධිකරණයට රැගෙන එන්න හෝ මහේස්ත්‍රාත්වරුන් බන්ධනාගාර තුළට ගිහින් සැකකරුවන්ගේ නඩු විසඳන්න කියලා අපි සාකච්ඡා පවත්වන්න බලාපොරොත්තු වෙනවා. අධිකරණ අමාත්‍යවරයා සහ මහජන ආරක්ෂක නියෝජ්‍ය අමාත්‍යවරයා අලු‍ත්කඩේ අධිකරණය වෙත පැමිණියා. අපි ඒ අයත් එක්කත් සාකච්ඡාවක් පැවැත්තුවා. සියලු‍ම නීතිඥවරුන් අධිකරණ භුමියට ඇතුළු වන අවස්ථාවේදී, ගේට්ටුව අබියස තමන්ගේ නීතිඥ අනන්‍යතාව පොලිස් නිලධාරීන් වෙත ඉදිරිපත් කර අධිකරණ භුමියට ඇතුල් වෙන ලෙස අපි සියලු‍ නීතිඥයන් වෙත දැනුම් දී තිබෙනවා’ යැයි ඒ මහතා පැවසීය.

මීට පෙරත්

අධිකරණය තුළදී වෙඩි තැබීමේ සිදුවීම් කිහිපයක් පසුගිය කාලවකවානුවේදී සිදු විය. සංවිධානාත්මක අපරාධ කල්ලි නායකයෙකු ලෙස හැඳින්වූ චින්තක අමරසිංහට මීගමුව අධිකරණයේදී නාඳුනන තුවක්කුකරුවෙකු වෙඩි තැබීමක් කර තිබිණි. එම වෙඩි තැබීමෙන් ඔහුගේ ජීවිතයට හානියක් සිදු නොවීය. 2004 වර්ෂයේ අලු‍ත්කඩේ අධිකරණ භුමියේ කාමර අංක 06දී සංවිධනාත්මක අපරාධ කණ්ඩායම් සාමාජිකයෙකු වන ධම්මික අමරසිංහට වෙඩි තබා ඝාතනය කර තිබිණි. 2015 වර්ෂයේදී පාතාල කණ්ඩායම් සාමාජිකයෙකු වන අරුණ දමිත් උදයංග හෙවත් සමයංට කඩුවෙල අධිකරණ භුමිය තුළදී වෙඩි තැබීමක් සිදු විය. 2022. 08. 04 දින ගල්කිස්ස මහේස්ත්‍රාත් අධිකරණය තුළදී විත්තිකූඩුවේ සිටි සැකකරුවෙකුට නාඳුනන පුද්ගලයෙකු වෙඩි තබා පළාගොස් තිබිණි.

වෙඩිකක්කරු අත්අඩංගුවට

පෙබරවාරි 19 දින, පෙරවරුවේ පොලිස් විශේෂ කාර්ය බලකාය විසින් ගණේමුල්ල සංජීව ඝාතනයේ ප්‍රධාන සැකකරු අත්අඩංගුවට ගෙන තිබිණි. විශේෂ ප්‍රවෘත්ති සාකච්ඡාවක් කැඳවමින් පොලිස් මාධ්‍ය ප්‍රකාශක, ජ්‍යෙෂ්ඨ පොලිස් අධිකාරි බුද්ධික මනතුංග පවසා සිටියේ, පුත්තලම පාලවිය ප්‍රදේශයේ මෙම සැකකරු අත්අඩංගුවට ගෙන ඇති බවය.
ඔහු සතුව හැඳුනුම්පත් කිහිපයක් තිබෙන බවත්, ඒ අතර නීතිඥවරයෙක් වශයෙන් සකසන ලද නීතිඥ හැඳුනුම්පතක්ද තිබෙන බව ඔහු පැවසීය. සැකකරු පළමු අවස්ථාවේදී මොහොමඩ් අස්ලාම් ෂෙරිෆ්ඩීන් නමින් පෙනීසිට ඇති අතර, පසුව සමිඳු ඩිල්ෂාන් පියුමංග කඳනආරච්චි යන නමින්ද, ව්‍යාජ ලෙස සැකසූ නීතිඥ හැඳුනුම්පතේ කොඩිකාරගේ කසුන් ප්‍රභාත් නිශ්ශංක යන නමින්ද පෙනී සිට ඇති බව කියැවිණි.

සැකකරු ව්‍යාජ ලෙස සකස් කර ගෙන තිබුණු නීතිඥ හැඳුනුම්පතේ සඳහන් කර ඇති කිව්ආර් කෝඩ් සංකේතය ස්කෑන් කළ අවස්ථාවේදී අපට දැකගන්නට ලැබෙන්නේ එම කිව්ආර් කෝඩ් යෙදවුම හරහා යෑමට හැකිවන්නේ කෝවිඩ් 19 වසංගත සමයේ රජයෙන් කෝවිඩ් එන්නත ලබා දුන්නේ යැයි සහතික කරමින් ලබාගන්නා සහතිකයේ වෙබ් සම්බන්ධතාවටය.

අත්අඩංගුවට ගත් සැකකරු 2015 වසරේදී යුද හමුදා සේවයෙන් පළා ගොස් ඇති අතර පොදු සමාව ලබා දුන් කාලයේදී හමුදා සේවයෙන් ඉවත්වී ඇති බවත් සති කිහිපයකට පෙර ගල්කිස්ස වටරප්පල පාර අසළ පුද්ගලයන් දෙදෙනෙකුට සිදු කළ වෙඩි තැබීමටද සැකකරු සම්බන්ධ වී ඇති බවත් වාර්තා වේ. තවද ගනේමුල්ල සංජීවගේ ඝාතනයට අධිකරණයට තුළට, පොතක් තුළ රිවෝල්වරය සඟවා ගෙන පැමිණි කාන්තාව මේ වන විට හඳුනාගෙන ඇති බවත් ඇය පින්පුර දේවගේ ඉසාරා සෙව්වන්දි බවත්, මත්ද්‍රව්‍ය ජාවාරමට සම්බන්ධ මීගමුව පදිංචිකාරියක බවත් පොලිසිය පවසයි.

පොලිස්පතිගේ ඉල්ලීම

අධිකරණ පරිශ්‍ර වෙත පැමිණෙන නීතිඥයන් පරීක්ෂා කිරීමකට ලක්නොවන බවත්, එලෙස පැමිණෙන සෑම නීතිඥවරයෙකුම පරීක්ෂා කිරීම සඳහා සහාය දෙන ලෙස තමා නීතිඥ සංගමයෙන් ඉල්ලා සිටින බව වැඩබලන පොලිස්පති ප්‍රියන්ත වීරසූරිය මාධ්‍ය ඉදිරියේ අදහස් දක්වමින් පවසා තිබිණි. “නීතිඥවරුන් අධිකරණයේ පරීක්ෂාවට ලක් වෙන්නේ නැහැ. ඒ නිසා අපරාධකරුවන් නීතිඥයින් විදියට පැමිණෙන්න තියෙන අවස්ථාව වැඩියි. ඒ අවස්ථාව උපරිම විදියට ප්‍රයෝජනයට අරගෙන තමයි මේ සැකකරු ඒ කාර්යය කරලා තියෙන්නේ. අපි නීතිඥ සංගමයෙනුත් ඉල්ලීමක් කරනවා, ඒ සම්බන්ධයෙන් අපිට සහාය දෙන්න කියා, සෑම නීතිඥවරයෙක්ම පරීක්ෂා කරන්න. ඒත් එක්කම අධිකරණය ඇතුළතත් අවි සහිත නිලධාරීන් රාජකාරියේ යොදවන්න අපි ඉල්ලීමක් කරනවා ඒ අවශ්‍ය අධිකාරීන්ගෙන්, අවශ්‍ය අනුමැතීන් ලබා ගැනීමටත් අපි කටයුතු කරනවා.”වැඩිදුරටත් අදහස් දක්වමින් ඒ මහතා පවසා තිබිණි.

මියගිය සංජීවට නඩු 22ක්

ගණේමුල්ල සංජීවට අධිකරණයේ තිබුණු නඩු ගණන 22ක් බව බන්ධනාගාර කොමසාරිස් ගාමිණී බී දිසානායක නිවේදනයක් නිකුත් කරමින් පවසා තිබිණි.බූස්ස අධි ආරක්ෂිත බන්ධනාගාරයේ රඳවාසිටි සංජීව කුමාර සමරරත්න පෙබරවාරි 19 වන දින අලු‍ත්කඩේ මහේස්ත්‍රාත් අධිකරණයේ අංක 09 වෙත අධිකරණ ශාලාව වෙත භෞතික ඉදිරිපත් කිරීමක් සඳහා ගෙන ආවේ අධිකරණය කර තිබූ නියෝගයකට අනුව බවත් අධිකරණ ශාලා අංක 05 වෙත සැකකරුව ගෙනගොස් ඇත්තේ ඔහුගේ නඩු දෙකක් සඳහා ඉදිරිපත් කිරීමට නියමිතව තිබූ නිසා බවත් නිවේදනයේ සඳහන් කර තිබිණි.

ගනේමුල්ලේ සංජීව විශේෂ ගණයේ සැකකරුවකු වන බැවින් ප්‍රමාණවත් ආරක්ෂාවක් යටතේ බන්ධනාගාර නිලධාරීන් භාරයේ, බන්ධනාගාර හදිසි ප්‍රතිචාර උපක්‍රමික බළකා නිලධාරීන් හා පොලිස් විශේෂ කාර්ය බළකා නිලධාරීන්ගේ විශේෂ ආරක්ෂාව යටතේ බූස්ස බන්ධනාගාරයේ සිට දක්ෂිණ අධිවේගී මාර්ගය ඔස්සේ අලු‍ත්කඩේ මහේස්ත්‍රාත් අධිකරණය ගෙන ආ බවත් පෙරවරු 09.45ට පමණ මහේස්ත්‍රාත් අධිකරණ ශාලාවේ විත්ති කූඩුව තුළදී මෙම වෙඩි ප්‍රහාරය එල්ල කර ඇති බවත් නිවේදනයේ සඳහන් කර ඇත.

අධිකරණයට ගෙනාවේ ඇයි?

දීර්ඝ කලක් සිට පොලිසියෙන් සැඟව සිටි ගනේමුල්ලේ සංජීව අත්අඩංගුවට ගෙන තිබුණේ 2023 සැප්තැම්බර් 13 වන දින කටුනායක ගුවන් තොටුපොළේ දීය. ඒ එදින කත්මණ්ඩු නුවර සිට කොළඹ බලා පැමිණි ශ්‍රීලංකන් ගුවන් යානයෙන් ගුවන් මඟියෙකු ලෙස පැමිණි අවස්ථාවේදීය. සේනාධීරගේ කරුණාරත්න නම් කාන්තාවකගේ ගමන් බලපත්‍රයක් ව්‍යාජ ලෙස සකස් කර ව්‍යාජ ගුවන් ගමන් බලපත්‍රයකින් මෙරටට පැමිණෙද්දීය.

කැලණිය ප්‍රදේශයේ නිවසක් තුළ නිදාගෙන සිටි එම්.ඒ. සජිත් රංග නැමැති පුද්ගලයකුට වෙඩි තබා ඝාතනය කිරීම හා කොළඹ ප්‍රදේශයේ පුද්ගලයන් සිව් දෙනකුට මරණීය තුවාල සිදුකළ බව කියන සිද්ධීන් දෙකක් සම්බන්ධයෙන් රක්ෂිත බන්ධනාගාර ගත කර සිටි ගණේමුල්ලෙ සංජීව 2025 පෙබරවාරි 19 දින දක්වා රක්ෂිත බන්ධනාගාරගත කරන ලෙස කොළඹ අතිරේක මහේස්ත්‍රාත් පවිත්‍රා සංජීවනී පතිරාජ පෙබරවාරි 05 වන දින කළ නියෝගයෙන් පසු සැකකරුව අධිකරණය වෙත ඉදිරිපත් කිරීමට රැගෙන විත් තිබිණි.

කැලණිය පට්ටිය හන්දිය ප්‍රදේශයේ යතුරුපැදියක යමින් සිටි පුද්ගලයකු වෙඩි තබා ඝාතනය කිරීම සම්බන්ධයෙන්ද සැකකරුට එරෙහිව අධිකරණය හමුවේ චෝදනා ගොනුකර තිබූ අතර එම නඩුකරය සම්බන්ධයෙන් ඔහු ලකෂ පහක් බැගින්වූ ශරීර ඇප දෙකක් මත මුදා හරින ලෙස අධිකරණයෙන් නියම වී තිබිණි. කැලණිය ප්‍රදේශයේ නිවෙසක නිදාසිටියදී පුද්ගලයකු ඝාතනයට සංජීව ඇතුළු තවත් නාඳුනන පුද්ගලයන් දෙදෙනකු සම්බන්ධ විමර්ශන සිදුකරන බව පෑලියගොඩ පොලිසිය අධිකරණයට දක්වා තිබුණු අතර එම චෝදනා සම්බන්ධයෙන් තම සේවාදායකයා දීර්ඝ කාලයක් රක්ෂිත බන්ධනාගාරගත කර ඇති බැවින් ඔහුට ඇප ලබාදෙන ලෙසට පෙබරවාරි 05 වන දින සැකකරු වෙනුවෙන් පෙනීසිටි නීතිඥවරුන් අධිකරණයෙන් ඉල්ලා තිබුණු අතර එම ඉල්ලීම මහේස්ත්‍රාත්වරිය ප්‍රතික්ෂේප කර තිබුණි.

අධිකරණය තවදුරටත් ආරක්ෂිතද?

අධිකරණයේ ආරක්ෂාව සම්බන්ධයෙන් නීතිඥවරුන්ගේ අදහස පිළිබඳව අනිද්දා නීතිඥවරුන් කිහිපදෙනෙකුගෙන්ම අදහස් විමසීමක් කළ අතර, නීතිඥ සේනක පෙරේරා මෙසේ පැවසීය. ‘අධිකරණයේ නඩුවක් විභාග වෙමින් පවතින අවස්ථාවක මේ විදියට සැකකරුවෙකුට වෙඩි තැබීම බරපතළ කාරණයක්. මිනිස්සු විශ්වාස කරන්නේ නීතිය ක්‍රියාත්මක කිරීමේ අයිතිය තියෙන්නේ අධිකරණයට. මිනිසුන්ගේ යුක්තිය, ජීවිත ආරක්ෂාව සහ අයිතිවාසිකම් සම්බන්ධයෙන් විශ්වාසය දීලා තියෙන්නේ අධිකරණයට. ඒ අධිකරණය ඇතුළේ මිනිස්සු අනාරක්ෂිතයි කියන අදහස මිනිසුන්ට ඇතිවුණොත් ඒ කාරණාව සමාජයට බොහෝම නරක විදියට බලපානවා. අනෙක් කාරණාව ඝාතනයට ලක් වුණේ පාතාලයේ පුද්ගලයෙකු කියලා අපිට සතුටු වෙන්න බැහැ. මේ ඝාතනය සිදු වූ අවස්ථාවේදී පොලිසිය, බන්ධනාගාරය සහ එස්ටීඑෆ් නිලධාරීන් හරියාකාරව තමන්ගේ රාජකාරිය සිදු කළාද කියලාත් අපිට සැකයක් තියෙනවා. රිමාන්ඩ් කර සිටින පුද්ගලයන්ගේ නඩු පමණයි ඒ වෙලාවේ අධිකරණයේ විභාග වෙමින් තිබුණේ, කොවිඩ්වලින් පස්සේ රිමාන්ඩ් බන්ධනාගාරයේ හිටපු රැඳවියන්ගේ නඩු විභාග වුණේ ස්කයිප් තාක්ෂණය හරහා බන්ධනාගාරයේ සිටයි. මේ වගේ විශේෂ ගණයේ, අධිආරක්ෂිත බන්ධනාගාරවල රඳවා ඇති සැකකරුවෙකු අධිකරණයට හමුවට ගෙන එන්නේ නැතිව, ස්කයිප් තාක්ෂණය හරහා ඔහුගේ නඩුව විභාග කරන්න හැකියාවක් තිබුණා නම්, ඒ අවස්ථාව මඟ හැරියේ ඇයි කියන සැකයත් අපිට තිබෙනවා.’

නීතිඥ නුවන් බෝපගේ අනිද්දාට අදහස් දක්වමින් පැවසුවේ,‘සරත් අඹේපිටිය වැනි විනිසුරුවරයෙක් පාරේදී ඝාතනය කළ රටක් මේක. මේ සිද්ධියත් සමඟ අධිකරණ තුළ ඉදිරියේදී විනිසුරුවරුන්ගේ සහ නීතිඥයන්ගේ ජීවිත ගැන අවදානමක් තිබෙනවා. ඒ සම්බන්ධයෙන් ගත යුතු උපරිම ක්‍රියාමාර්ග ආණ්ඩුවට ගන්න වෙනවා. අධිකරණ භුමියේ ආරක්ෂාව සම්බන්ධයෙන් තාක්ෂණික උපකරණ යොදාගත යුතුයි. අධිකරණ භුමිය තුළ නීතිඥයන්ට තමන්ගේ රාජකාරිය සාමාන්‍ය විදියට සිදු කරගෙන යන්න පුළු‍වන් වෙන්න ඕනෑ. පහුගිය කාලයේ සැකකාරයන්ව ආයුධ හොයන්න ගිහින් පාරේ මරලා දාපු යුගයක් තිබුණා, ඒ ඝාතනවලට ආණ්ඩු මැදිහත් වුණා. මේ සිද්ධිය පාතාල සාමාජිකයන් අතර වුණ සිද්ධියක් වෙන්න පුළුවන්. ඒත් ආයුධයක් අධිකරණය ඇතුළට අරගෙන ඇවිත්, මේ ඝාතනය සිදු කර තියෙන්නේ. ඒ නිසා මේ ඝාතනය සැහැල්ලු‍වෙන් ගන්න බැහැ. මේ ගැන දැඩි පියවර ආණ්ඩුව ගත යුතුයි.’

නීතිඥ හිජාස් හිස්බුල්ලා මෙසේ පැවසීය. ‘ගනේමුල්ල සංජීව කියන්නේ ඉහළ පෙළේ සංවිධානාත්මක අපරාධකරුවෙකු යැයි චෝදනා ඇති පුද්ගලයෙක් නිසා ඔහුට අවශ්‍ය ආරක්ෂාව සපයන්න පොලිසිය කටයුතු කර තිබුණා නම්, මේ ඝාතනය අධිකරණය ඇතුළේ පොලිසියට වළක්වගන්න තිබුණා. නීති පද්ධතියේ විශේෂ නඩුකරවල නඩුවට සම්බන්ධ සෘජු පාර්ශ්වකරුවන් හැරෙන්නට, අනෙක් පාර්ශ්වයන් අධිකරණ සංකීර්ණයේ උසාවි ශාලාවෙන් පිටත් කරලා නඩුව විභාගයට ගන්න සම්ප්‍රදායක් තිබෙනවා. ගනේමුල්ල සංජීව වැනි සැකකරුවෙකුටත් අධිකරණ භුමියේදී ඒ පියවර ගන්න තිබුණා.අධිකරණ භුමිය තුළ ඉදිරියේදී මහජනතාවගේ සහ නිතීඥවරුන්ගේ ආරක්ෂාව සම්බන්ධයෙන් ක්‍රියාමාර්ගයක් ගත යුතුයි. ඒත් ඒ ක්‍රියාමාර්ග නීතිඥවරුන්ට සහ මහජනතාවට කරදරයක් නොවන ආකාරයෙන් නවීන ක්‍රම භාවිත කරමින් සිදු කළ යුතුයි. ආරක්ෂාව සම්බන්ධයෙන් මේ ආකාරයේ සිදුවීමක් වුණ ගමන්, මාස කිහිපයක් ආරක්ෂාව සම්බන්ධයෙන් විවිධ දේවල් කරනවා. නමුත් මාස කිහිපයක් ගියාට පස්සේ ඒවා සියල්ල අමතක කරලා, රටේ මිනිස්සු සාමාන්‍ය තත්වයට පත්වෙනවා. මේ සියල්ලට වඩා වෙඩි වැදුණු පුද්ගලයාට හදිසි ප්‍රතිකාර ලබා නොදීම ලොකු ප්‍රශ්නයක්. මේක ඉතාමත් බරපතළ කාරණයක්. මම දන්නවා සැකකරුවෙක්ව අධිකරණ භූමියේ සිට රෝහලකට රැගෙන යන්න අධිකරණයේ අනුමැතියක් තිබෙන්න ඕනෑ කියලා. ඒ නියෝගය ලබා ගන්න ඇයි පරක්කු වුණේ, වෙඩි වැදුණු පුද්ගලයාව ඇයි විත්ති කූඩුවේ තියාගෙන හිටියේ? අධිකරණ භුමිය ඇතුළට ගිලන් රථයක් ගෙන්වාගෙන හදිසි ප්‍රතිකාර දෙන්න තිබුණා. ගිලන් රථයේ වෙඩි වැදුණු පුද්ගලයා රෝහලට අරගෙන යන්න තිබුණා. මේ සිද්ධිය අවස්ථාවේ එතන හිටපු නිලධාරීන්ගෙන් හදිසි අවස්ථාවක ගත යුතු ක්‍රියාමාර්ග කිසිවක් අපි දැක්කේ නැහැ. වෙඩි වැදුණු පුද්ගලයා ඔහුගේ අත් සහ කකුල්වලින් උස්සගෙනපොලිස් නිලධාරීන් අරගෙන ඇවිත් දැම්මේ විශේෂ කාර්ය බලකායට අයත් ජීප් රථයකට. තුවාල වුණ, වෙඩි වැදුණු පුද්ගලයෙකුට දිය යුතු මූලික මානව හිමිකම්වත් වෙඩි වැදුණු සැකකරුට ලබා දීලා නැති බව අපිට පෙනුණා. ඒ ඔහු පාතාල සමාජිකයෙකු, චුදිතයෙකු ලෙස නම් කරලා තියෙන පදනම මතයි. ඒත් අයටත් අයිතිවාසිකම් තියෙනවා.’

අපි සතුටු වෙන්න එපැයි

මහජන ආරක්ෂක සහ පාර්ලිමේන්තු කටයුතු නියෝජ්‍ය අමාත්‍ය නීතිඥ සුනිල් වටගල මෙම වෙඩි තැබීම වූ අවස්ථාවෙන් පසුව අලු‍ත් කඩේ අධිකරණ භූමිය අසළ රැඳී සිටියේය. සිද්ධිය සම්බන්ධයෙන් අනිද්දා වටගල මහතාගෙන් විමසීමක් කළ අතර ඔහු මෙසේ පැවසීය.‘මාධ්‍යවේදී එක්නැලිගොඩ පැහැරගෙන යෑම සහ ලසන්ත වික්‍රමතුංග ඝාතනයට සාපේක්ෂව ගතහොත් ඒවා අවුරුදු 17ක් විතර පරණයි. නමුත් අපිට මේ ඝාතකයා අත්අඩංගුවට ගන්න ගතවුණේ පැය 24කට අඩු කාලයක්. කලින් ඝාතන වගේ මේ සිද්ධියේදී කවුරු හරි හිතාගෙන ඉන්නවා නම් කාලාවරෝධි වෙයි කියා ඒ අදහස සම්පූර්ණ වැරදියි. අපිට තවත් අවුරුදු 3ක් තියෙනවා. අපි පරණ ඝාතනවලටත් පියවර ගනිමින් ඉන්නවා. පැය 24ක් ඇතුළත ඝාතකයා අත්අඩංගුවට ගැනීම ගැන අපි සතුටු වෙන්න ඕනෑ. පහුගිය ආණ්ඩු කාලේ මේ විදියේ සූක්ෂ්ම ලෙස කටයුතු කර පැය කිහිපයක් තුළ අපරාධකරුවන් අත්අඩංගුවට ගැනීම් සිදු වුණේ නැහැ. සමහර වෙලාවල්වල අදාළ පුද්ගලයන්ව නෙවෙයි අත්අඩංගුවට ගත්තේ, දැන් එහෙම අභියෝග අපිට නැහැ. ඇත්ත ඝාතකයන් අත්අඩංගුවට ගන්න කියන සටන් පාඨය අනුර දිසානායක ජනාධිපතිවරයාගේ පාලනය තුළ ක්‍රියාත්මක වෙනවා. ඒ වෙනසේ ප්‍රතිඵලයක් ලෙසයි පැය 24ක් තුළ වෙඩි තැබීම කළ වෙඩික්කරුව අපි අත්අඩංගුවට ගත්තේ.’

දුර්වලතාවක් තිබුණාද කියා හොයනවා

ඉදිරියේදී විවිධ චෝදනා මත අත්අඩංගුවට ගෙන සිටින සංවිධානාත්මක අපරාධකරුවන් සම්බන්ධ නඩු විභාග අධිකරණයෙන් බැහැරව සිදු කිරීමට අවධානය යොමු කර ඇති බව මහජන ආරක්ෂක අමාත්‍ය ආනන්ද විජේපාල පෙබරවාරි 20 දින මාධ්‍ය වෙත පවසා තිබිණි. අධිකරණය තුළදී ගිනි අවි භාවිතයට ආරක්ෂක නිලධාරීන් සඳහා අවසරය නොමැති බවත් ප්‍රවේශවීමේදී නීතිඥවරුන් පරීක්ෂණයට ලක් නොකරන බවත් අධිකරණ පරිශ්‍රයට පිවිසෙන පුද්ගලයින් පිළිබඳ සොයා බැලීමේ ක්‍රමවේදයේ යම් දුර්වලතාවක් පැවතුණේ නම් ඉදිරියට එවැන්නක් සිදු නොවීමටත් දැඩි අවධානය යොමු කරන බවත් බුද්ධි අංශ ලබා දෙන තොරතුරු මත පදනම්ව මහජන ආරක්ෂක සැලසුම් ශක්තිමත් කිරීම තම අමාත්‍යංශයේ බලාපොරොත්තුව බවත් ඒ මහතා පවසා තිබිණි.