ලසන්ත ඝාතන නඩුව තීරණය ඒකමයි! ජනාධිපති හමුවෙන් පසු නීතිපති නිවේදනය කරයි

• ආණ්ඩුව මුනිවත රකියි

• නීතිපතිගේ නිවේදනයට අපෙන් ප්‍රශ්න පත්‍රයක්

• නිසාම් කාරියප්පර් නීතිපති වෙනුවෙන් කරුණු විකෘති කිරීමක

‘ගල්කිස්ස මහේස්ත්‍රාත් අධිකරණ නඩු අංක බී 92/2009 නඩුකරයට අදාළව නීතිපතිතුමා විසින් 2025.01.27 දිනැතිව අධ්‍යක්ෂ, අපරාධ පරීක්ෂණ දෙපාර්තමේන්තුව අමතා යොමු කොට ඇති ලිපියේ නම සඳහන් සැකකරුවන් ලසන්ත වික්‍රමතුංග මහතා ඝාතනය සම්බන්ධයෙන් අත්අඩංගුවට ගත් සැකකරුවන් නොවේ.’‘එම මහතාගේ ඝාතනය සම්බන්ධයෙන් විමර්ශන අවසන් වී නොමැත.’ ‘ජනමාධ්‍ය හා සමාජ මාධ්‍ය මගින් ලබා දී ඇති ප්‍රකාශවල පවතින අන්තර්ගතය, නීතිපතිවරයා වෙත අපරාධ පරීක්ෂණ දෙපාර්තමේන්තුව විසින් යොමු කොට ඇති විමර්ශන උද්ධෘත හා නොසැසඳේ.’

‘මාධ්‍යවේදී ලසන්ත වික්‍රමතුංග මහතාගේ ඝාතනය සිදුවී වසර 06ක් ඉකුත් වීමෙන් අනතුරුව එනම් 2015 වර්ෂයේ එම මහතා ඝාතනයේ ඇසින් දුටු සාක්ෂිකරුවකු නොවන ඔහුගේ රියැදුරු අපරාධ පරීක්ෂණ දෙපාර්තමේන්තුවට නැවත ප්‍රකාශයක් ලබාදෙන අතරවාරයේදී යම් පිරිසක් විසින් 2009 වර්ෂය අගභාගයේදී තමා පැහැරගත් බවට දැනුම් දී ඇත.’

‘එම දැනුම් දීම මත විමර්ශනයක් ආරම්භ කරමින් ඒ වන විට ගල්කිස්ස මහේස්ත්‍රාත් අධිකරණය ඉදිරියේ කැඳවූ නඩු අංක බී 92/2009 යටතේම කරුණු වාර්තා කිරීමට පියවර ගෙන ඇත.’ ‘එකී විමර්ශනයේදී සැකකරුවකු ලෙස නම් කරන ලද ප්‍රේම් ආනන්ද උදලාගම යන අය, ඉදිරිපත් වූ කරුණු අනුව සහ එම හඳුනා ගැනීම සම්බන්ධයෙන් උද්ගත වූ නෛතික දුර්වලතා හේතුකොට ගෙන අපරාධ චෝදනා ගොනු කිරීමට තරම් ප්‍රමාණවත් සාක්ෂි නොමැති වීම මත නිදහස් කිරීමට තීරණය කරන ලදි.’

‘තවද, ලසන්ත වික්‍රමතුංග මහතා ධාවනය කරන ලද වාහනයේ තිබූ ලේඛනයක් අස්ථානගත කිරීම සම්බන්ධයෙන් අපරාධ පරීක්ෂණ දෙපාර්තමේන්තුව විසින් සිදු කරන ලද විමර්ශනයේදී අත්අඩංගුවට ගත් පහත නම් සඳහන් සැකකරුවන්,
1. හෙට්ටිආරච්චිගේ දොන් තිස්සසිරි සුගතපාල
2. විතාරණ ආරච්චිගේ සිරිමෙවන් ප්‍රසන්න නානායක්කාර
අපරාධ චෝදනා ගොනු කිරීමට ප්‍රමාණවත් සාක්ෂි නොමැති වීම මත නිදහස් කිරීමටද තීරණය කරන ලදී.’
‘මෙම නිදහස් කිරීම, නව සාක්ෂි හෙළිදරව් වීම මත අපරාධ චෝදනා ගොනු කිරීම සලකා බැලීමට බාධාවක් නොවන බව මෙයින් දන්වා සිටිමි.’

2025.02.07 දින සහිතව මාධ්‍ය නිවේදනයක් නිකුත් කරමින් නීතිපති වෙනුවට එසේ සඳහන් කරන්නේ, රජයේ අධිනීතිඥ (පරිපාලන) ඇන්ජලෝ වැන්හෝෆ්ය.

එවැනි පැහැදිලි කිරීමක් නීතිපතිවරයා ප්‍රසිද්ධ මාධ්‍ය නිවේදනයක් ලෙස නිකුත් කරන්නේ, සන්ඩේ ලීඩර් පුවත්පතේ කර්තෘ ලසන්ත වික්‍රමතුංගේ ඝාතනය සම්බන්ධ නඩුවේ සාක්ෂිකරුවන්ට මරණ තර්ජනය කිරීම හා සාක්ෂි වසන් කිරීම සම්බන්ධ චුදිතයින් තිදෙනෙකු නිදහස් කිරීමට ඔහු දෙන ලද උපදෙස්වලට අදාලව සමාජයේ පැනනැඟි විරෝධයට පිළිතුරක් වශයෙන්ය. නීතිපතිවරයාගේ එම ප්‍රසිද්ධ නිවේදනයේ ඇති කරුණු පිළිබඳ අවධානය යොමු කිරීමට පෙර එය ඊට දින කිහිපයකට පෙර ඔහුට එරෙහිව නීතිපති දෙපාර්තමේන්තුව ඉදිරිපිට පැවැත්වූ විරෝධතා අවස්ථාවෙන් පසු සිදුවීම්වලටද පටහැනි එකකි. එම විරෝධතාවෙන් පසු විරෝධතාකරුවන් කිහිප දෙනෙකු නීතිපති දෙපාර්තමේන්තුවට ගොස් නීතිපතිවරයාගේ එම තීරණයට හේතු විමසා තිබූ අතර එහිදී නීතිපති දෙපාර්තමේන්තුවේ ඉහළ නිලධාරියෙකුගෙන් ලැබී තිබුණු පිළිතුර වී ඇත්තේ නීතිපතිවරයාගේ තීන්දු තීරණ සම්බන්ධයෙන් මහජනයාට කරුණු පැහැදිලි කිරීමට ඔහු බැඳී නැති බවත්, අවශ්‍ය නම් ඉහළ අධිකරණයකට පෙත්සමක් ගොනුකර එය අභියෝගයට ලක්කර ඒ සඳහා හේතු දැනගන්නා ලෙසත්ය.

ලසන්ත ඝාතන නඩුවේ චුදිතයින් නිදහස් කිරීමේ එම තීන්දුව සම්බන්ධයෙන් සාකච්ඡා කිරීම සඳහා ජනාධිපතිවරයාද නීතිපතිවරයා කැඳවා තිබූ අතර ඒ සඳහා අධිකරණ ඇමතිවරයා මෙන්ම එම අපරාධ පරීක්ෂණය සිදුකළ පොලීසියේ නිලධාරීන්ද කැඳවා තිබුණ බව වාර්තා විය. එම සාකච්ඡාවේ ප්‍රතිඵල කුමක්ද යන්න පිළිබඳව නිල වශයෙන් වාර්තා නොවුණද, එම සාකච්ඡාවෙන් පසු නීතිපතිවරයාගේ එම කරුණු පැහැදිලි කිරීමේ මාධ්‍ය නිවේදනය නිකුත් කිරීමෙන් පෙන්නුම් කර ඇත්තේ ද සැකකරුවන් නිදහස් කිරීමේ ඔහුගේ තීරණයේ වෙනසක් නැති බවයි. එම සාකච්ඡාවේදී මොනවා කීවද, එම පැහැදිලි කිරීමේ නිවේදනය එක් අතකින් තමාගේ තීරණයේ වෙනසක් නැති බව නීතිපතිවරයා රටට පමණක් නොව ජනාධිපතිවරයාට ද කියූ අවස්ථාවක් ලෙස ද ගත හැකිය.

මේ සම්බන්ධයෙන් ජනාධිපතිවරයා ප්‍රමුඛ ආණ්ඩුව ගන්නා තීරණය කුමක්ද යන්න පැහැදිලි නැතත්, ජනාධිපතිවරයාගේ ද සමීපතමයකු ලෙස සැලකෙන ජාතික ජන බලවේගයේ විධායක කමිටු සාමාජික ජනාධිපති නීතිඥ උපුල් කුමරප්පෙරුම නීතිපතිවරයෙකුගේ එවන් තීරණවලට විසඳුම අභිචෝදක කාර්යාලයක් පිහිටුවීම බවට ෆේස්බුක් සටහනක් තබා තිබූ අතර එය ඉන් පසු ආණ්ඩුව ඒ සම්බන්ධයෙන් ඉදිරියේදී සිදුකිරීමට යන ප්‍රතිසංස්කරණයක් බවට ද පත්වී ඇත.

මෙහිදී මුලින්ම නීතිපතිවරයාගේ ඉහත පැහැදිලි කිරීම අප සලකා බැලිය යුතුය. එහි ඔහු අවධාරණය කරන එක් කරුණක් වන්නේ එම චුදිතයින් නිදහස් කිරීමට ඔහු තීරණය කර ඇති බවය. මෙහිදී පැන නඟින බරපතළම ප්‍රශ්නයක් වන්නේ අප පසුගිය ලිපියෙන්ද පෙන්වා දුන් පරිදි අධිකරණ කටයුත්තක් වන චුදිතයන් නිදහස් කිරීමේ බලය නීතිපතිවරයා භාවිත කරන්නේ කෙසේද යන්නය. ඔහුට කිව හැක්කේ ප්‍රමාණවත් සාක්ෂි නැති හෙයින් එම චුදිතයින් සම්බන්ධයෙන් තවදුරටත් කටයුතු නොකරනවා යන්න එම දෙපාර්තමේන්තුවේ නීතිඥයින් මගින් හෝ පොලීසිය මගින් අධිකරණයට දැන්වීම පමණය. එහෙත් නීතිපතිවරයා ඔහුගේ එම සීමාවෙන් ඉදිරියට ගොස් ඇති බව එම චුදිතයින් සම්බන්ධයෙන් අපරාධ අපරාධ පරීක්ෂණ දෙපාර්තමේන්තුවේ අධ්‍යක්ෂවරයාට යැවූ ලිපියෙන් මෙන්ම මෙම පැහැදිලි කිරීමේ මාධ්‍ය නිවේදනයෙන්ද පෙන්නුම් කර තිබේ.
එම නිවේදනයේ නීතිපතිවරයා සඳහන් කරන තවත් කරුණක් වන්නේ නිදහස් කි්රීමට උපදෙස් ලබාදුන් එම චූදිතයින් ලසන්ත වික්‍රමතුංග ඝාතනයේ සැකකරුවන් නොවන බවයි. ඔහු ඒ බව අමුතුවෙන් පැහැදිලි කළ යුතු නැත. හිටපු පොලිස් පරීක්ෂක සුගතපාලවත්, හිටපු නියෝජ්‍ය පොලිස්පති ප්‍රසන්න නානායක්කාරවත් ආයුධ සන්නද්ධව ගොස් ලසන්ත වික්‍රමතුංග ඝාතනය කළේ නැත. ඔවුන් සිදුකර තිබුණේ එම ඝාතකයින් අනාවරණය කර ගැනීමට තිබූ වැදගත් සාක්ෂි විනාශ කිරීමය. තම පෞද්ගල්ික වුවමනාව අනුව ඔවුන් එසේ නොකළ බව පැහැදිලි අතර තවදුරටත් ඔවුන්ගෙන් අනාවරණය කරගත යුතුව ඇත්තේ එසේ සාක්ෂි විනාශ කිරීමට ඔවුන්ට බලපෑම් කළ පුද්ගලයන් පිළිබඳවය.

හිටපු යුද හමුදා බුද්ධි අංශ සාමාජික ප්‍රේම් ආනන්ද උදලාගම සම්බන්ධයෙන් වන තත්වයද එසේමය. ඔහු ලසන්ත වික්‍රමතුංගගේ රියැදුරා පැහැරගෙන ගොස් මරණ තර්ජනය කර තිබුණේ එම ඝාතනයට ගෝඨාභය රාජපක්ෂ සම්බන්ධ බවට තවදුරටත් කීවොත් ලසන්තට සිදුකළ දෙයම ඔහුට සිදුකරන බව පවසමින්ය. එවන් වුවමනාවක් උදලාගමට ඇතිවීමේ පෞද්ගලික කාරණයක් තිබිය නොහැකි අතර ඔහු කර ඇත්තේ ද කාගේ හෝ වුවමනාවක් ඉටු කිරීම බව පැහැදිලිය. එම වුවමනාව කාගේද යන්න උදලාගම මගින්ම අනාවරණය කරගත යුත්තකි. ඉන්පසු කාලයේදී උදලාගම ජර්මනියේ ශ්‍රී ලංකා තානාපති කාර්යාලයට රාජපක්ෂවරුන් පත්කළ බවද සටහන් විය යුතුමය.

නීතිපතිවරයාම සිය පැහැදිලි කිරීමේ සඳහන් කරන පරිදි ලසන්ත වික්‍රමතුංග ඝාතනය තවම විමර්ශන අවසන් කර නැති එකකි. ඒ නිසා එම චුදිතයින් අවශ්‍ය කරන්නේ එම විමර්ශන සාර්ථක අවසානයක් කරා ගෙන යෑමටය. දැනට ඇප මත සිටින ඔවුන්ට අනිවාර්යයෙන්ම රටින් පිටවීම වැළැක්වීමේ නියෝගයක් ලබාගත යුතුමය. නැතහොත් ඉදිරි විමර්ශනවලට එය බලපානු ඇත. නීතිපතිවරයා කියන ආකාරයට ඔවුන් නිදහස් කළහොත් සිදුවන්නේ ඔවුන්ට රටෙන් පිටවී යෑමට අවස්ථාවක් සැලසීමය.
නීතිපතිවරයා සිය පැහැදිලි කිරීමේ සඳහන් කරන තවත් එක් කරුණක් වන්නේ, නිදහස් කිරීම සඳහා ඔහු විසින් නියෝග ලබාදී ඇති චුදිතයින් සම්බන්ධයෙන් අපරාධ චෝදනා ගොනු කිරීමට තරම් කරුණු අනාවරණය වී නැති නිසා ඔවුන් නිදහස් කරන බවයි. ඒ සම්බන්ධයෙන් නීතිපතිවරයාගෙන් ඇසිය යුතුව ඇත්තේ විමර්ශන අවසන් නැති ඝාතනයක් සම්බන්ධයෙන් අපරාධ චෝදනා ගොනු කරන්නේ කෙසේද යන්නයි.

එම නිදහස් කිරීම ඉදිරියේදී නව සාක්ෂි අනාවරණය වීම් මත අපරාධ චෝදනා ගොනු කිරීමට බාධාවක් නොවන බවද එහි වැඩිදුරටත් නීතිපතිවරයා සඳහන් කර ඇත. කොහොමත් එම තිදෙනාට එරෙහිව ලසන්ත වික්‍රමතුංග ඝාතනය සම්බන්ධයෙන් අපරාධ චෝදනා ගොනු කළ හැකි වන්නේ නැත. ඔවුන්ට එල්ල කළ හැකි චෝදනා වන්නේ සාක්ෂිකරුවන්ට මරණ තර්ජනය කිරීම, එම අපරාධය සම්බන්ධයෙන් හමුවූ සාක්ෂි වසන් කිරීම යන චෝදනාය. එහෙත් ලසන්ත ඝාතනයේ අපරාධකරුවන් අනාවරණය කර ගැනීමේ මාවත එම චුදිතයින් හරහා වැටී ඇති බව නම් පැහැදිලිය.

නීතිපතිවරයා මෙහිදී අමතක කරන කරුණක් තිබේ. ඒ ශ්‍රී ලංකාවේ අපරාධ විමර්ශන ක්‍රියාවලිය පසුගිය දශක කිහිපයක් තිස්සේ දේශපාලනීකරණයට ලක්වී ඇති බවයි. පසුගිය යුද සමයේදී උතුරේ වව්නියාව වැනි ප්‍රදේශවලදී පුපුරන බෝම්බයක් සම්බන්ධයෙන් දකුණේ කොළඹ වැනි ප්‍රදේශවලදී මෙන්ම, කොළඹ වැනි ප්‍රදේශවලදී පුපුරන බෝම්බයක් සම්බන්ධයෙන් උතුරේ ප්‍රදේශවලදී එල්ටීටීඊ සැකකරුවන් අත්අඩංගුවට ගැනීමේ හැකියාවකින් යුත් බුද්ධි අංශයක් හා අපරාධ විමර්ශකයෝ අපට සිටියෝය. ඔවුන් ලෝකයේ හොඳම බුද්ධි අංශ සාමාජිකයෝ යැයිද කීවෝය. එහෙත් ඔවුන් අසමත් වූයේ ලසන්ත වික්‍රමතුංග ඝාතනය ඇතුළු මාධ්‍යවේදීන්ගේ ඝාතන, මාධ්‍යවේදීන්ට හා මාධ්‍යයට එරෙහි අනෙකුත් අපරාධ සම්බන්ධයෙන් සහ රගර් ක්‍රීඩක වසීම් තාජුදීන් ඝාතනය ඇතුළු තවත් ඝාතන හා අපරාධ කිහිපයක් සම්බන්ධයෙන් පමණය.

එසේ අපරාධ විමර්ශකයන් අසමත් වූයේ පැහැදිලිවම එම ඝාතන හා අපරාධ සම්බන්ධයෙන් ඒ ඒ කාලවල පැවති ආණ්ඩුවල නායකයන්ගේ සම්බන්ධයක් තිබූ නිසාය. ඒ නිසා එම අපරාධ සම්බන්ධයෙන් දැන දැන නොමඟ යැවූ බුද්ධි තොරතුරු නිකුත් වූ අතර අපරාධ විමර්ශන ද නතර විය. ඒ සඳහා හොඳම උදාහරණයක් වන්නේ ලසන්ත ඝාතන පරීක්ෂණ ක්‍රියාවලියයි. ඇත්ත වශයෙන්ම නොමඟ යවා තිබූ හා නතර කර තිබූ ලසන්ත ඝාතන පරීක්ෂණ නිවැරදිව යළි ආරම්භ වන්නේ 2015 දී යහ පාලන ආණ්ඩුව බලයට පත්වීමෙන් පසුය. ඒ බලයට පැමිණීමට පෙර ලබාදුන් පොරොන්දුවක් අනුවය. එහෙත් අවුරුදු කිහිපයකින් එම විමර්ශන කඩාකප්පල් වන්නේ දේශපාලන නායකත්වය සිදුකළ බලපෑම් හේතුවෙන්ය.

ගෝඨාභය රාජපක්ෂ බලයට පත්වීමෙන් පසු ලසන්ත ඝාතනය පමණක් නොව ඒ ආකාරයේම දේශපාලන සබඳතාවන් තිබූ අපරාධ සම්බන්ධයෙන් පරීක්ෂණ සිදුකළ ශානි අබේසේකර ඇතුළු අපරාධ පරීක්ෂණ දෙපාර්තමේන්තුවේ නිලධාරීන්ගෙන් පළිගත් ආකාරය අමුතුවෙන් කිව යුතු නැත.

වත්මන් ආණ්ඩුවේ පොරොන්දුව වූයේද බලයට පත්වීමෙන් පසු යට ගසා ඇති එම අපරාධ සම්බන්ධයෙන් යළි විමර්ශන ආරම්භ කර අපරාධකරුවන්ට තරාතිරම නොබලා දඬුවම් කරන බවයි. නීතිපතිවරයා කර ඇත්තේ යළි විමර්ශන ආරම්භ කර ආණ්ඩුවේ එම අභිලාෂයට වැඩෙන්නට කාලයක්වත් ලබානොදීමය. එම අපරාධය සිදුකර ගතවී ඇති දිගු කාලය පෙන්නමින් තවත් පැත්තකින් අපරාධකරුවන්ට දණ්ඩ මුක්තිය ලබාදීම සඳහා වංගුවක් ගැසීමට උත්සාහ කිරීමය.

මෙහිදී නීතිපතිවරයාගෙන් සමාජයක් ලෙස අප ඇසිය යුතු ප්‍රශ්නය වන්නේ නව ආණ්ඩුව යටතේ ලසන්ත ඝාතන පරීක්ෂණ බාරව සිටින නිලධාරීන් ගෙන්වා එම නිදහස් කිරීම්වලට පෙර ඔහු සාකච්ඡාවක් හෝ කළාද යන්නය. මෙම සැකකරුවන් සම්බන්ධයෙන් චෝදනා ගොනු කිරීමට තරම් ප්‍රමාණවත් කරුණු තිබෙන බවට මීට පෙර ගල්කිස්ස මහේස්ත්‍රාත් අධිකරණයේදී තර්ක කර තිබුණේ නීතිපති දෙපාර්තමේන්තුව බවද මෙහිදී නීතිපතිවරයාට මතක් කළ යුතුය.

එපමණක් නොව නීතිපතිවරයාගේ නිදහස් කිරීමේ තීරණයෙන් පසු ලසන්ත වික්‍රමතුංගගේ දියණිය වන අහිම්සා වික්‍රමතුංග අගමැතිනි හරිනි අමරසූරියට යොමුකළ ලිපියේ සඳහන් කර ඇති, ගෝඨාභය රාජපක්ෂ පාලන සමයේදී අපරාධ පරීක්ෂණ දෙපාර්තමේන්තුවේ අධ්‍යක්ෂවරයා ලෙස පත්කරන ලද ප්‍රසන්න අල්විස් විසින් හිටපු පොලිස් පරීක්ෂක සුගතපාලව හා හිටපු නීතිපති ප්‍රසන්න නානායක්කාරව නිදහස් කරන ලෙස හිටපු නීතිපති දප්පුල ද ලිවේරාට කර තිබූ දැනුම් දීමද නොසලකා හැරිය නොහැකි එකකි. ඒ ලසන්ත ඝාතනය පිටුපස ඇති දේශපාලනය තේරුම් ගැනීමට එය උපකාරි වන නිසාය.

එමෙන්ම චුදිතයින් නිදහස් කිරීමේ නීතිපතිවරයාගේ තීරණය සාධාරණය කරමින් ශ්‍රී ලංකා මුස්ලිම් කොංග්‍රසයේ මහලේකම් සමගි ජන බලවේගයේ ජාතික ලැයිස්තු මන්ත්‍රී නීතිඥ නිසාම් කාරියප්පර් පාර්ලිමේන්තුවේදී දැක්වූ අදහස්ද මෙහිදී සැලකිල්ලට ගත යුතුය. තමාද නීතිපති දෙපාර්තමේන්තුවේ සේවය කළ අයකු බව පවසමින් ඔහු එහිදී කළේ එම ලිපියේ අන්තර්ගතය විකෘති කරමින් කොළය වසා ගැසීමකි. එම ලිපිය ලියා ඇත්තේ අපරාධ පරීක්ෂණ දෙපාර්තමේන්තුවේ අධ්‍යක්ෂවරයාට බව කියමින් ඔහු කීවේ අවශ්‍ය නම් එය කුණු කූඩයට දැමීමේ හැකියාවක් එම දෙපාර්තමේන්තුවේ අධ්‍යක්ෂවරයාට ඇති බවයි. එහෙත් පසුගිය සතියේ අප පෙන්වා දුන් පරිදි එම ලිපියෙන් අපරාධ පරීක්ෂණ දෙපාර්තමේන්තුවේ අධ්‍යක්ෂවරයාට නීතිපතිවරයා නියෝග දී ඇත්තේ එම චුදිතයන් සම්බන්ධයෙන් ඉදිරියට කටයුතු නොකරන බැවින් ඔවුන් නිදහස් කළ හැකි බව අධිකරණයට දන්වා ඒ සම්බන්ධයෙන් අධිකරණය ගත් ක්‍රියාමාර්ග ඔහුට දින 14ක කාලයකදී දැනුම් දෙන ලෙසය.

එම විකෘති කිරීමට අදාළ නිසාම් කාරියප්පර් මහතාගේ රෙදි තවදුරටත් ගලවා ඇත්තේ නීතිපතිවරයා වෙනුවෙන් නිකුත් කරන ලද ඉහත සඳහන් කළ පැහැදිලි කිරීමේ මාධ්‍ය නිවේදනයේය.

එහෙත් ශ්‍රී ලංකාව වැනි නීතිය වල්වැදී ඇති රටවල අපරාධ පරීක්ෂණ දෙපාර්තමේන්තුවට හෝ වෙනත් විමර්ශන ඒකකයකටවත් දේශපාලන වුවමනාවක් නොමැතිව ලසන්ත වික්‍රමතුංග ඝාතනය වැනි දේශපාලන වුවමනාවක් තිබූ ඝාතන ස්වාධීනව විමර්ශනය කළ නොහැකි බව අමුතුවෙන් පැහැදිලි කළ යුතු නැත. එම අපරාධ පරීක්ෂණ සිදුවන්නේම ඒ සඳහා සුදුසු පරිසරයකදී පමණය. දැන් උදාවී ඇත්තේද එවැන්නකි. එවැනි අපරාධ පරීක්ෂණ සාක්ෂි ප්‍රමාණවත් නැහැ හා කල් ගතවී ඇත යන විත්තිවාචකවලට මුවා වී අකර්මණ්‍ය කිරීමට නීතිපතිවරුන්ට ඉඩදිය යුතු වන්නේ නැත. මන්ද අපරාධකරුවන් අනාවරණය කර ගැනීමත් ඔවුන්ට නීතිය මගින් දඬුවම් ලබාදීමත් කල්ගත වී හෝ සාක්ෂාත් කර ගැනීම නීතිගරුක රටක් වෙනුවෙන් අත්‍යවශ්‍ය කොන්දේසියක් වන බැවිනි.

අනිද්දා වට්සැප් සමුහයට එක්වීමට පහත යොමු භාවිතා කරන්න

Group 01- https://chat.whatsapp.com/FW9ZAqXBotT5vFHZoDCIg1
Group 02 – https://chat.whatsapp.com/KLYP9OhQfhlHubxPspW3J3
Group 03 – https://chat.whatsapp.com/L9NV2gK1MfO6lUCpCyUVTZ