මෙතෙක් නොවිසඳී ඇති පසුගිය කාලයේ සිදුවූ මිනීමැරුම් ඇතුළු රටේ කතාබහට ලක්වූ අපරාධ සම්බන්ධයෙන් යළි විමර්ශන අරඹා ඒවාට සම්බන්ධ වූ අපරාධකරුවන්ට දඬුවම් ලබාදෙන බව ජනාධිපති අනුර කුමාර දිසානායක ජනාධිපතිවරණ හා පාර්ලිමේන්තු මැතිවරණවලට පෙර මෙන්ම ඉන් පසුත් යළි ශපථ කර ඇත. සිරස රූපවාහිනියේ සටන වැඩසටහනකට ජනවාරි 21 වැනිදා සහභාගි වෙමින් ජනාධිපතිවරයා පැවසුවේ එම පරීක්ෂණවලදී බාධාවකට ඇත්තේ ඒ සඳහා විශාල කාලයක් ගතවී තිබීමත්, එම සිදුවීම්වලට අදාල ප්‍රධාන සාක්ෂිකාරයන් මේ වනවිට මියගොස් තිබීමත් බවය.
කෙසේ වෙතත්, මාධ්‍යවේදීන් වන කීත් නොයාර්, ලසන්ත වික්‍රමතුංග, ප්‍රගීත් එක්නැලිගොඩ, පෝද්දල ජයන්ත වැනි සිදුවීම්, රගර් ක්‍රීඩක වසීම් තාජුඩීන් යන අපරාධ සම්බන්ධයෙන් මෙන්ම පාස්කු ඉරිදා ප්‍රහාරය සම්බන්ධයෙන් වන ආන්දෝලනාත්මක සිදුවීම් සම්බන්ධයෙන් පරීක්ෂණ අවසන් කර නුදුරු දිනකදීම ඒ පිළිබඳ නඩු පැවරීම් සිදුකරන බව ජනාධිපතිවරයා කීවේය.
එසේ වුවද ඒ සම්බන්ධයෙන්ම ඊට පෙර දිනයක කළුතර පැවති ජන හමුවකදී ජනාධිපතිවරයා පෝද්දල ජයන්ත පැහැරගෙන ගොස් ඔහුගේ කකුල් කැඩීම සම්බන්ධයෙන් කී කතාවට පදනමක් නැත. ජනාධිපතිවරයා එහිදී නීතිපති දෙපාර්තමේන්තුව විවේචනය කරමින් පැවසුවේ පොද්දල ජයන්තට පහර දීම සම්බන්ධයෙන් වන ඇඳ ඉහපත වාර්තා ඇතුළු වෛද්‍ය වාර්තා නීතිපති දෙපාර්තමේන්තුව තුළ සතුව තිබූ ලිපිගොනුවෙන් අතුරුදහන්ව ඇති බවයි.
පොද්දල ජයන්ත සිදුවීම සම්බන්ධයෙන් නීතිපති දෙපාර්තමේන්තුව සතුව කිසිදු ලිපිගොනුවක් තිබෙන්නට හැකියාවක් නැත. ඒ එම සිදුවීම සම්බන්ධයෙන් රටේ කිසිදු අධිකරණයකට පොලීසිය මෙතෙක් කරුණු වාර්තා කර හෝ නොතිබීම හේතුවෙනි. යහපාලන ආණ්ඩුව බලයට පැමිණීමෙන් පසු පොද්දල ජයන්ත පළමු වරට රටට පැමිණි අතර එම අවස්ථාවේදී ලියුම්කරු සමඟ ගොස් එම අපරාධය සම්බන්ධයෙන් අපරාධ පරීක්ෂණ දෙපාර්තමේන්තුවට අලුතින් පැමිණිල්ලක් ඉදිරිපත් කිරීමට කටයුතු කළේය. පොද්දල ජයන්ත ඔහුගේ පහරදීමට අදාලව තිබූ වෛද්‍ය වාර්තා ඇතුළු ලේඛන ඉදිරිපත් කළේ අපරාධ පරීක්ෂණ දෙපාර්තමේන්තුවට හෙවත් ශ්‍රී ලංකා පොලීසියටය. එසේ පැමිණිලි කළා කියා එම කාලයේදීද ඒ සම්බන්ධයෙන් අපරාධ පරීක්ෂණ දෙපාර්තමේන්තුව පාර්ශ්වයෙන් හෝ ශ්‍රී ලංකා පොලීසිය පාර්ශ්වයෙන් අලුත් විමර්ශනයක් සිදුකරන බවට කරුණු වාර්තා වූයේ නැත. ඒ සම්බන්ධයෙන් රටේ කිසිදු අධිකරණයකට කරුණු වාර්තා කළේද නැත.
පොද්දල ජයන්ත පසුගිය වසරේ දෙසැම්බරයේදී ඔහුගේ පෞද්ගලික කටයුත්තක් සඳහා යළි ශ්‍රී ලංකාවට පැමිණි අතර එහිදී ලියුම්කරු හමුවීමට ආපසු යෑමට පෙර එන බව පවසමින් කීවේ අපරාධ පරීක්ෂණ දෙපාර්තමේන්තුවට බාරදුන් වෛද්‍ය වාර්තා කිසිවක් එම ලිපිගොනුවල නැති බව ඒ පිළිබඳව සොයා බැලීමේදී ඔහුට දැනුම් දුන් බවයි. එසේම කොළඹ ජාතික රෝහල සතුවද ඔහුගේ ඇඳ ඉහපත වාර්තා ඇතුළු වෛද්‍ය වාර්තා නැති බව දැන ගන්නට ලැබුණු බවයි.
එම සිදුවීම සම්බන්ධයෙන් වන වෛද්‍ය වාර්තා ඇත්නම් යළි ඉදිරිපත් කරන ලෙස පොලීසියේ කටයුතු සම්බන්ධයෙන් වත්මන් ආණ්ඩුව පත්කරන ලද බලධාරීන් කිහිප දෙනෙකු ඔහුට කියා තිබූ අතර එහිදී විශේෂයෙන්ම ලබාදී තිබූ උපදේශය වී තිබුණේ එම වාර්තා තවදුරටත් අතුරුදහන් නොවීම සඳහා ලියාපදිංචි කරන ලද තැපෑලෙන් අපරාධ පරීක්ෂණ දෙපාර්තමේන්තුවට හෝ ශ්‍රී ලංකා පොලීසියට යොමු කරන ලෙසයි.
ඒ නිසා අධිකරණයට කරුණු වාර්තා කිරීමක්වත් මෙතෙක් නොකළ පොද්දල ජයන්ත සිදුවීම සම්බන්ධයෙන් වූ වාර්තාවක් නීතිපති දෙපාර්තමේන්තුවේ තිබිය නොහැකි අතර අදාළ වෛද්‍ය වාර්තා අතුරුදහන් වී ඇත්තේ අපරාධ පරීක්ෂණ දෙපාර්තමේන්තුවෙන් ලෙස ජනාධිපතිවරයා නිවැරදි කරගත යුතුය.
ඒ ආකාරයට මේ රටේ ජනතාව වසර ගණනාවක් තිස්සේ බලාපොරොත්තු වූ නොවිසඳුණු අපරාධ සම්බන්ධයෙන් පරීක්ෂණ සිදුකර අපරාධකරුවන්ට දඬුවම් ලබාදීම ජනාධිපතිවරයා ඇතුළු ජාතික ජන බලවේගයට මේ රටේ ජනතාව ලබාදුන් ජන වරමේද එක් බලාපොරොත්තුවකි. ඒ යළි එවැනි ඝාතන හා අපරාධ සංස්කෘතියක් මේ රටේ ඇති නොවීම සඳහා දණ්ඩ මුක්තිය (අපරාධ සිදුකර දඬුවම් නොලබා සිටීමේ සංස්කෘතිය අවසන් කිරීම) අවසන් කිරීම සඳහාය.
මේ ආකාරයට වත්මන් ආණ්ඩුව දේශීය වශයෙන් සිදුවූ අපරාධ සම්බන්ධයෙන් කටයුතු කරන්නේ නම් ප්‍රශංසනීය වන අතර එසේම රට තුළ සිදුවන විදේශිකයන්ට එරෙහි අපරාධ සම්බන්ධයෙන්ද කටයුතු කිරීම රටක් වශයෙන් ජාත්‍යන්තරයෙන් අප ලබන ප්‍රශංසාවක්ද වනු ඇත. පසුගිය මහින්ද රාජපක්ෂ පාලන කාලයේදී රටේ දකුණේ රාජපක්ෂ හිතවාදී මැර දේශපාලනඥයන් විදේශිකයන්ට එරෙහිව සිදුකළ මිනී මැරුම්, ස්ත්‍රී දූෂණ, පහරදීම් ආදි අපරාධ මෙහිදී අමතක කළ නොහැකිය. ඒ සම්බන්ධයෙන් වූ යම් යුක්තියක් එම විදේශිකයන්ගේ වින්දිතයන්ට හිමිවූයේ සාමාන්‍ය පොලිස් පරීක්ෂණවලින් ඔබ්බට ගොස් විශේෂ පොලිස් පරීක්ෂණ එම සිදුවීම් සම්බන්ධයෙන් සිදුවීම නිසාය.
එවැනි පරීක්ෂණ වැදගත් වන්නේ තවත් කරුණක්ද නිසාය. ඒ ආර්ථික වශයෙන් රට ගොඩනැඟීමේ ඉදිරි කටයුතුවල එක් ඉලක්කයක් වශයෙන් 2024 වර්ෂයේ පැමිණි සංචාරකයන් මිලියන දෙක වෙනුවට 2025 වර්ෂයේ සිට සංචාරකයන් මිලියන තුනක් ශ්‍රී ලංකාවට වර්ෂයකට ගෙන්වා ගැනීම අරමුණ වන නිසාය. විදේශිකයන් ශ්‍රී ලංකාවට සංචාරකයන් ලෙස පැමිණියද, වෙනත් කටයුත්තක් සඳහා පැමිණියද ඔවුන්ගේ ආරක්ෂාව සම්බන්ධයෙන් වන වගකීම ශ්‍රී ලංකා රජය සතු එකක් වන අතර විදේශිකයෙක් සම්බන්ධයෙන් වන සිදුවීමකදී ඒ සම්බන්ධයෙන් විනිවිද පෙනෙන නිසි විමර්ශනයක් සිදුකර සත්‍යය අනාවරණය කිරීමද රජය සතු වගකීමකි.
2024 වර්ෂයේ දෙසැම්බර් මස 03 වැනිදා කොළඹ ක්‍රෙස්කැට් ගොඩනැගිල්ලේ 7 වැනි මහලේ සඳළුතලයකින් පැන සියදිවි හානිකර ගත් බව ශ්‍රී ලංකා පොලීසිය පැය 24ක් යන්නට පෙර පැවසූ ඕස්ටේ්‍රලියානු ජාතික කාලෙබ් ඩෙලානෝ ඇලෙක්සැන්ඩර්ගේ මරණය සැක සහිත බව ඔහුගේ පවුලේ සාමාජිකයන් ශ්‍රී ලංකාවට පැමිණ ප්‍රකාශ කරනු ලැබුයේ ප්‍රසිද්ධ ජනමාධ්‍ය සාකච්ඡාවක් පවා පවත්වමින් 2024 දෙසැම්බර් 28 වැනිදාය. ඔවුන් එහිදී ශ්‍රී ලංකා ජනාධිපති ඇතුළු පොලීසිය බාර වගකිවයුත්තන්ගෙන් ඉල්ලා සිටියේ එම පොලිස් නිගමනයෙන් පසු අනාවරණය වී ඇති වීඩියෝ සාක්ෂි ඇතුළු සාක්ෂි සම්බන්ධයෙන් නිසි විමර්ශනයක් සිදුකර ඇත්තටම සිදුවී ඇත්තේ කුමක්දැයි අනාවරණය කරන ලෙසයි.
එමෙන්ම එම සිදුවීම සම්බන්ධයෙන් ඕස්ටේ්‍රලියානු මහ කොමසාරිස් කාර්යාලය මගින්ද ශ්‍රී ලංකා පොලීසියෙන් විමසීමක් කර ඇතත් සැකයට හේතුවී ඇති කරුණු සම්බන්ධයෙන් නිසි විමර්ශනයකින් තොරව මුල් අවස්ථාවේ මාධ්‍යයට ලබාදුන් පිළිතුරුම එහිදීත් ඔවුන් ලබාදී තිබුණි.
කොල්ලුපිටිය පොලිස් ස්ථානාධිපති ප්‍රධාන පොලිස් පරීක්ෂක එච් එල් දුෂ්මන්ත ඕස්ටේ්‍රලියානු මහ කොමසාරිස් කාර්යාලයේ තිලාන් වික්‍රමආරච්චි මහතා විසින් එම මරණය සම්බන්ධයෙන් කරන ලද විමසීමකට පිළිතුරු වශයෙන් 2024.12.05 දින සහිතව ලිපියක් යොමුකර ඇති අතර එහි උද්ධෘතය වශයෙන් සඳහන් කර ඇත්තේ ක්‍රෙස්කැට් මහල් නිවාස සංකීර්ණයේ නවාතැන් ගෙන සිටි ඕස්ටේ්‍රලියානු ජාතිකයකු මියයෑම සම්බන්ධයෙනි වශයෙනි.
එම ලිපියේ පරිවර්තනයට අනුව වැඩිදුරටත් විස්තර වශයෙන් මෙසේ සඳහන් කර ඇත. ‘2024.12.03 දින ලද තොරතුරක් මත විදෙස් ජාතිකයකු ක්‍රෙස්කැට් මහල් නිවාස සංකීර්ණයේ ඉහළ මහලක සිට කෑකෝ ගසමින් ඉහළ සිට පහලට භාණ්ඩ විසි කරමින් එම මහලෙන් බිමට පැනීමට උත්සාහ කරන බවට ලද තොරතුරු පරීක්ෂා කිරීමට නිලධාරීන් කණ්ඩායමක් යොමු කළ අතර එහිදී එම නිලධාරීන් එම මහල් නිවාස භුමිය වෙත ළඟා වනවිට පුද්ගලයකු ක්‍රෙස්කැට් මහල් නිවාස සංකීර්ණයේ ඉහළ මහලක සිට බිමට වැටී ඇති අතර මාගේ ස්ථානයේ නිලධාරින් එම ස්ථානයේ රැඳී සිටි පිරිස සමඟ එක්ව එම ස්ථානයේදී යෙදිය යුතු මූලික ප්‍රතිකාර ලබාදී 1990 සුවසැරිය ගිලන් රථයෙන් කඩිනමින් තුවාලකරු රෝහල් ගතකර ඇත.’
‘මෙහිදී මෙම සිදුවීම වනවිට මහල් නිවාස සංකීර්ණයේ හා පිටත භූමියේ රැඳී සිටි පුද්ගලයින් කිහිප දෙනෙකුගෙන්ම ඇසින් දුටු සාක්ෂි පොලිස් නිලධාරීන් විසින් සටහන් කරගෙන ඇත. එම ස්ථානයට පොලිස් ස්ථානීය අපරාධ පරීක්ෂණ නිලධාරින් (ිදජද) කැඳවා පරීක්ෂා කරන ලදි. මෙම පුද්ගලයා මෙම මහල් නිවාසයේ 07 වන මහලේ නිවසක තනිව පදිංචිව සිට ඇති අතර එම නිවස පරීක්ෂා කිරීමේදී එහි වීදුරු දොරවල් හා භාණ්ඩද ඔහු විසින් කඩා දමා පොළොවේ ගසා ඇති ආකාරය නිරීක්ෂණය විය. මෙහිදී මෙම පුද්ගලයා සිදුවීම වන දින අසාමාන්‍ය ලෙස උමතුවෙන් කෑ ගසමින් සිට කලහකාරී ලෙස හැසිරී මෙම මහල් නිවාසයේ 07 වන මහලෙන් බිමට පැන සිය දිවි නසාගෙන ඇති බවට අනාවරණය වී ඇත.’
‘මෙහිදී මෙම සිදුවීම දැක තිබූ ක්‍රෙස්කැට් මහල් නිවාස සංකීර්ණයේ ප්‍රධාන පාලන නිලධාරියාගේද, ක්‍රෙස්කැට් මහල් නිවාස සංකීර්ණයේ නඩත්තු අංශයේ නිලධාරියාගේද, සිනමන් ග්‍රෑන්ඩ් හෝටලයේ පිටත ආරක්ෂාවට යොදවා සිටි ආරක්ෂක නිලධාරියාගේද, සිනමන් ග්‍රෑන්ඩ් හෝටලයේ ප්‍රධාන ආරක්ෂකයාගේද ප්‍රකාශයන් හා ක්‍රෙස්කැට් මහල් නිවාසය ඉදිරිපිට රාජකාරියේ යොදවා සිටි පොලිස් රථවාහන අංශ නිලධාරීන්ගේද සටහන් හා ප්‍රකාශ සටහන් කර ඇත.’
කොල්ලුපිටිය පොලිස් ස්ථානාධිපතිවරයා ශ්‍රී ලංකාවේ ඕස්ටේ්‍රලියානු මහකොමසාරිස් කාර්යාලයේ නිලධාරියාට එසේ නිල වශයෙන් ලබාදී ඇති පැහැදිලි කිරීම හා සිදුවීම අතර වෙනසක් පවතින බවත්, එය සිදුවී ඇත්තේ එසේ නොවන බවත් ඉන් දින කිහිපයකට පසු එම සිදුවීම සම්බන්ධයෙන් යමකු විසින් රූගතකර මුදාහැර තිබූ වීඩියෝවෙන් පැහැදිලි වේ.
එම වීඩියෝවට අනුව සියදිවි හානිකර ගත්තේ යැයි කියනු ලබන කාලෙබ් ඩෙලානෝ ඇලෙක්සැන්ඩර් ඔහුගේ නිවසේ බැල්කනියේ සිටින අයුරු දිස්වේ. ඊට යාබද බැල්කනියේ පොලිස් නිලධාරියකු ඇතුළු කිහිප දෙනෙකු සිටින අයුරු දිස්වේ. මහල් නිවාස සංකීර්ණයේ පහතද පොලීසිය ඇතුළු පිරිසක් බලාගෙන සිටින බව දිස්වේ. මරණයට පත්වූ පුද්ගලයාගේ බැල්කනියට ඇතුළු වීමට ඇති දොර විවෘත කරමින් එක් පුද්ගලයකු හෝ දෙදෙනෙකු එම බැල්කනියට පිවිසෙන බව දිස්වේ. ඒ සමඟම මරණයට පත්වූ පුද්ගලයා බැල්කනියේ වැට දෙසට පසුපසට යන අයුරු දිස්වේ. බැල්කනියට ඇතුල්වූ පුද්ගලයා හෝ පුද්ගලයන් ඔහුගේ ඉන මට්ටමෙන් පහල යම් ක්‍රියාවක නිරත වන බව පෙනේ. ඒ සමඟම සියදිවි නසාගත්තේ යැයි කියූ ඇලෙක්සැන්ඩර් මුනින් අතට නොව උඩුබැලි අතට හෙවත් පිටුපසට (හිස පෙදෙසින්) බැල්කනියෙන් බිමට වැටීම සිදුවේ.
යම් පුද්ගලයකු බිමට පැන හෝ වෙනත් ආකාරයට සියදිවි නසා ගැනීමක් සිදුකර ගන්නේ නම් එය සියල්ලන් රැස්කර සිදුකරන්නක් නොවන අතර පසුගිය දිනවල වාර්තා වූ ජාත්‍යන්තර පාසල්වල සිසුන් දෙදෙනෙකු ගොඩනැගිලිවල ඉහල සිට බිමට පැන සියදිවි හානිකරගෙන තිබුණේ රහසිගතවය.
මෙම සිදුවීමේදී මරණයට පත්වූ පුද්ගලයාට සියදිවි නසා ගැනීමේ වුවමනාවක් තිබුණේ නම් ඔහු බිමට පැනිය යුත්තේ මුනින් අතට මිස උඩුබැලි අතට නොවේ. යමකු ඉදිරිපසට පැන මිස පිටුපසට පැන සියදිවි නසා ගැනීම් සිදුකර ගන්නේ නැත.
මෙම සිදුවීම සම්බන්ධයෙන් පසුව ලැබී ඇති එම වීඩියෝ සාක්ෂි තොරතුරු අනුව එම පවුලේ සාමාජිකයන්ට සැකයක් මතුවීම සාධාරණ වන අතර එහි සත්‍යය හෙළිකරන ලෙස ඉල්ලීමද සාධාරණය.
ඒ නිසා මෙම මරණය පිළිබඳ විධිමත් පරීක්ෂණයක් සිදුකළ යුතුමය. ඒ සැක දුරු කිරීම සඳහා පමණක් නොවේ. ඒ සියදිවි හානිකර ගැනීමක් ලෙස අවසන් කර ඇති එම මරණය සම්බන්ධයෙන් විධිමත් පරීක්ෂණයක් සිදුවී නොමැති බවද පෙනෙන නිසාය. සිදුවීම සිදුවූ දිනම ඩේලිමිරර් වෙබ් අඩවිය පවා පොලීසිය උපුටා දක්වමින් වාර්තා කර ඇත්තේ මෙය සියදිවි නසා ගැනීමක් බවය.
පොලීසියට මෙම තොරතුරු දැන්වූයේ කවුද, එසේ තොරතුරු දැන්වීමට හේතුව කුමක්ද, එම පුද්ගලයා කලහකාරි ලෙස හැසිරෙන බව යාබද නිවාසවල සිටි පුද්ගලයන් දැන්වූයේද, පොලීසිය එන විටත් සිදුවීම සිදුවී අවසන් බව කීවත්, වීඩියෝවට අනුව යාබද නිවසේ බැල්කනියේ සිටින පොලිස් නිලධාරියා ඇතුළු පිරිස කවුද, ඔවුන් එහි ආවේ හෝ එහි කැඳවූයේ කවුද, මරණයට පත්වූ පුද්ගලයාගේ කාමරය කඩාගෙන එහි ඇතුල් වූ පුද්ගලයන් කවුද, ඔවුන්ට ඒ සඳහා උපදෙස් ලබාදුන්නේ කවුද, එසේ කාමරයටත් ඇතුල් වී ඉන්පසු බැල්කනියටත් ඇතුල් වී ඔවුන් කරන්නට උත්සාහ කළේ කුමක්ද, එම උත්සාහයේදී මරණයට පත්වූ පුද්ගලයා කිසිවකු විසින් උස්සා බිමට දැමූවේද, නොඑසේනම් ඔහු උඩුබැලි අතට බිමට වැටුණේ කෙසේද? අනිවාර්යෙන්ම විධිමත් පරීක්ෂණයකට ලක්විය යුතු කරුණු ඒවාය.
මෙම සැකයන්ට බලපාන වෙනත් හේතූන්ද සමහරවිට ඒ සඳහා හේතු වී තිබිය හැකිය.
ඇලෙක්සැන්ඩර් ඇතුළු පවුලේ සාමාජිකයන් ශ්‍රී ලංකාවේ ඉපදී යම් කාලයක් මෙහි ජීවත් වී ඕස්ටේ්‍රලියාවට සංක්‍රමණය වී ඇති පවුලක්ය. විශේෂයෙන්ම මරණයට පත්වූ ඇලෙක්සැන්ඩර් ඔහුගේ ධනය වැය කරමින් පුණ්‍ය සමාජ සේවා කටයුතුවල යෙදී සිටින පුද්ගලයෙකි. ඔහු පුණ්‍ය කටයුතු සිදුකරන එක් ප්‍රධාන රටක් වන්නේ ශ්‍රී ලංකාවයි. මහරගම පිළිකා රෝහලට මෙන්ම දෙමාපියන් නැති දරුවන්ටද, ආබාධිත ප්‍රජාවටද ඔහු අඛණ්ඩ සේවයක් සිදුකරමින් සිට ඇත. අවසන් වතාවට ඔහු ශ්‍රී ලංකාවට පැමිණ ඇත්තේ එවන් කටයුත්තක් සඳහාය. අප්‍රිකාවේ තවත් රටකටද ඔහු ඒ ආකාරයට උදව් කරන බව ඔහුගේ පවුලේ සාමාජිකයෝ පවසති.
ඔහු ලංකාවට පැමිණි විට ක්‍රෙස්කැට් මහල් නිවාසවල සාමාන්‍යයෙන් නතර වන බවත්, ඔහුගේ එම සමාජ සේවා කටයුතු සම්බන්ධයෙන් එහි සේවකයන් පවා දැන සිටි බවත් කියවේ. එමෙන්ම එම සේවකයන් ඔහුගෙන් උදව් ලබා ගැනීම දක්වා සමීප සම්බන්ධතා පවත්වාගෙන තිබූ බවත් කියවේ.
සියදිවි හානිකර ගැනීමක් ලෙස අවසන් කර ඇති එම සැකකටයුතු මරණය සම්බන්ධයෙන් ඔහුගේ වැඩිමහල් සහෝදරයා වන රැන්ඩල් ඇලෙක්සැන්ඩර් ජනාධිපතිවරයා, පොලීසිය බාර ඇමතිවරයා ඇතුළු රජයේ බලධාරීන්ට විධිමත් පරීක්ෂණයක් සිදුකරන ලෙස දැනුම් දී ඇතත්, ඔහුට ප්‍රතිචාර ලැබී ඇත්තේ අපරාධ පරීක්ෂණ දෙපාර්තමේන්තුවේ අධ්‍යක්ෂවරියගෙන් පමණී. අධ්‍යක්ෂවරියද එහිදී කර ඇත්තේ එම පැමිණිල්ල අපරාධ එම කොට්ඨාසයේ විෂය පථයට අයත් නොවන එකක් බව සඳහන් කරමින් එය කොළඹ දකුණ කොට්ඨාසයේ ජ්‍යෙෂ්ඨ පොලිස් අධිකාරිවරයාට යොමු කිරීමය. එසේම දැනුම් දී ඇත්තේ එම පැමිණිල්ල සම්බන්ධයෙන් ගන්නා ක්‍රියාමාර්ග පැමිණිලිකරු දැනුවත් කර ඇයටද පිටපතක් යොමු කරන ලෙසයි. එහෙත් මෙතෙක් පැමිණිලිකරුට නම් පොලීසිය පාර්ශ්වයෙන් වෙනත් කිසිදු දැනුම් දීමක් ලැබී නැත.
ඒ නිසා දැන් මෙම සිදුවීම සම්බන්ධයෙන් වන විධිමත් පරීක්ෂණයක් සිදුකිරීම සඳහා මැදිහත් වීමේ වගකීම රටේ ජනාධිපතිවරයාගේත්, මහජන ආරක්ෂාව පිළිබඳ ඇමතිවරයාගේත්, එම නියෝජ්‍ය ඇමතිවරයාගේත්, එම අමාත්‍යාංශයේ ලේකම්වරයාගේත් හා පොලිස්පතිවරයාගේත් බවට පත්වී තිබේ.
