ඇමති, නියෝජ්‍ය ඇමති පරිහරණයට වාහන දෙකක් දීම නාස්තිය අවම කිරීමක්ද?

වැඩිපුර වාහනවලට වසරක ඉන්ධන වියදම මිලියන 77ක්

පෞද්ගලික කාර්ය මණ්ඩලත් අඩුකරලා නෑ

එම කාර්ය මණ්ඩලයට වාහනත් වැඩිකරලා

‘නව රජයේ අමාත්‍යවරුන්ගේ කාර්යයන් සහ ප්‍රතිපත්ති සම්පාදන ක්‍රියාවලිය ශක්තිමත් කිරීම සඳහා පහසුකම් සැලසීම සඳහා වන උපදෙස්’ යනුවෙන් වත්මන රජයේ අමාත්‍යවරුන්ගේ හා නියෝජ්‍ය අමාත්‍යවරුන්ගේ උපදේශකවරුන් පත්කර ගැනීම, සහාය කාර්ය මණ්ඩලය, වාහන සහ ඉන්ධන, දූරකථන සම්බන්ධයෙන් ජනාධිපති ලේකම් ආචාර්ය නන්දිත සනත් කුමානායක 2025 ජනවාරි 21 දින සහිතව සියලුම අමාත්‍යාංශ ලේකම්වරුන් අමතමින් නිකුත් කළ චක්‍රලේඛය පිළිබඳ සමාජය තුළ මෙන්ම පාර්ලිමේන්තුවේද දැඩි කතාබහක් ඇති වී තිබේ.

එහිදී ඉදිරිපත් වන එක් කරුණක් වන්නේ මෙතෙක් ඇමතිවරුන්ට, නියෝජ්‍ය ඇමතිවරුන්ට හා ඔවුන්ගේ කාර්ය මණ්ඩලය සඳහා ලබාදී තිබූ පහසුකම් මෙම චක්‍රලේඛය මගින් තවදුරටත් වැඩිකර ඇති බවයි. එහෙත් ආණ්ඩුව පාර්ශ්වයෙන් ඊට ලබාදෙන පිළිතුර වී ඇත්තේ එම පහසුකම් තවදුරටත් කප්පාදු කර ඇති බවයි.

ඒ සම්බන්ධයෙන් වන පාර්ලිමේන්තුවේ අදහස් දැක්වීමකදී විපක්ෂයේ චෝදනාවලට පිළිතුරු ලබාදෙමින් මහජන ආරක්ෂක ඇමති ආනන්ද විජේපාල පැවසුවේ එම පහසුකම් අඩුකර ඇති බවයි. එහෙත් එම චෝදනා එල්ල කළ විපක්ෂයේ මන්ත්‍රීවරයා පාර්ලිමේන්තුවෙන් පිටත ඒ සම්බන්ධයෙන් විවාදයකට මහජන ආරක්ෂක ඇමතිවරයාට කළ අභියෝගය ඔහු බාර ගත්තේ නැත.
ඒ නිසාම වත්මන් චක්‍රලේඛයෙන් ඇමති, නියෝජ්‍ය ඇමති හා සහාය කාර්ය මණ්ඩලයට මෙතෙක් ලබාදී තිබූ පහසුකම් වැඩිකර ඇද්ද නැද්ද යන්න සොයා බැලීම මෙම ලිපියේ අරමුණයි.

ඒ සඳහා අපට මුලින්ම අවධානය යොමු කරන්නට සිදුවන්නේ එම පහසුකම් සම්බන්ධයෙන් 2010 මැයි 14 වන දින එවක ජනාධිපති ලේකම් ලලිත් වීරතුංග නිකුත් කළ චක්‍රලේඛය වෙතයි. එහි සියලු අමාත්‍යාංශ ලේකම්වරුන් අමතමින් ‘රාජ්‍ය වියදම් කළමනාකරණය’ යටතේ පූර්විකාව වශයෙන් සඳහන් කරන්නේ,‘ඒ අනුව, රාජ්‍ය සම්පත් පාලනය කිරීමේදී විශේෂ අවධානයට ලක්කළ යුතු ක්ෂේත්‍රයන් වන නිල වාහන, ඉන්ධන, දූරකථන, කාර්ය මණ්ඩල හා ගොඩනැගිලි යන ක්ෂේත්‍රයන් කෙරෙහි අවධානය යොමු කරමින් ගරු අමාත්‍යවරුන්ගේ හා ගරු නියෝජ්‍ය අමාත්‍යවරුන්ගේ පුද්ගලික කාර්ය මණ්ඩල හා අනෙකුත් පහසුකම් සම්බන්ධයෙන් පහත දැක්වෙන සීමාවන් යටතේ කටයුතු කළ යුතු බව අතිගරු ජනාධිපතිතුමා අවධාරණය කරයි.’ යන්නය.

එහි අංක 1 වශයෙන්, කාර්යාල ගොඩනැගිලි සම්බන්ධයෙන් සඳහන් කරන්නේ අමාත්‍යාංශ සහ ඒ යටතේ පවත්නා සියලුම ආයතනයන්හි කාර්යාල හැකිතාක් දුරට රජයේ හෝ රාජ්‍ය සංස්ථාවලට අයත් ගොඩනැගිලිවල පවත්වාගෙන යා යුතු බවයි. පෞද්ගලික ගොඩනැගිලි කුලියට හෝ බද්දට ලබා ගැනීමට අවසර දෙනු ලබන්නේ රජයේ තක්සේරුව අනුව සුවිශේෂී තත්වයක් යටතේදී පමණක් බවයි.

අමාත්‍යවරුන්ගේ හා නියෝජ්‍ය ඇමතිවරුන්ගේ සහාය කාර්ය මණ්ඩලය සම්බන්ධයෙන් එහි සඳහන් කරන්නේ එම කාර්ය මණ්ඩලය පෞද්ගලික ලේකම්, සම්බන්ධීකරණ ලේකම්වරුන් 2ක්, මාධ්‍ය ලේකම්, මහජන සම්බන්ධතා නිලධාරි, පෞද්ගලික සහකාර, කළමනාකරණ සහකාර 5ක්, කාර්යාල කාර්ය සහායක 2ක්, රියැදුරු (ආරක්ෂක රථයේ රියැදුරු හැර) 2ක් වශයෙන් 15ක් බවයි.

පෞද්ගලික ලේකම්, සම්බන්ධීකරණ ලේකම්, මාධ්‍ය ලේකම් සහ මහජන සම්බන්ධතා ලේකම් යන නිලධාරීන් ඇමති, නියෝජ්‍ය ඇමති ධුරය දරන කාලයට පමණත් සීමාවන පරිදි තාවකාලික පදනම මත සේවයේ යොදවා ගත යුතු බවද, එම තනතුරු සඳහා රාජ්‍ය සංස්ථා හෝ ව්‍යවස්ථාපිත ආයතනයක නිලධාරියකු අනුයුක්ත කරන්නේ නම් ඔහුට ගෙවිය යුත්තේ එකී ආයතනයේ ලබමින් සිටි වැටුප නොව අනුයුක්ත කරන ලද තනතුරුට අදාල වැටුප බවද සඳහන් කර ඇත.

එහෙත් ඉන්පසු එම චක්‍රලේඛයට 2022 සැප්තැම්බර් 09 දින එවක ජනාධිපති ලේකම් සමන් ඒකනායක විසින් ගෙනෙන ලද සංශෝධනයේදී සිදුකර ඇත්තේ රාජ්‍ය හා නියෝජ්‍ය ඇමතිවරුන්ගේ සහාය කාර්ය මණ්ඩලය 11 දක්වා අඩු කිරීමය.
ඒ අනුව එම කාර්ය මණ්ඩලය සමන්විත වන්නේ පෞද්ගලික ලේකම්, සම්බන්ධීකරණ ලේකම්, මාධ්‍ය ලේකම්, මහජන සම්බන්ධතා නිලධාරි, කළමනාකරණ සහකාර, සංවර්ධන නිලධාරීන් 3ක්, කාර්යාල කාර්ය සහායක 2ක් හා රියැදුරු (ආරක්ෂක රථයේ රියැදුරු හැර) 2ක් වශයෙන් වශයෙනි. එහෙත් 2024 අප්‍රේල් මස 5 වන දින ජනාධිපති ලේකම් සමන් ඒකනායකගේ චක්‍රලේඛය අනුව 2022 සැප්තැම්බර් 09 චක්‍රලේඛයේ සඳහන් සම්බන්ධීකරණ ලේකම් තනතුරු සංඛ්‍යාව 1සිට 2 දක්වා වැඩිකර කර ඇත. ඒ අනුව එම කාර්ය මණ්ඩලය 12 දක්වා යළි ඉහළ ගොස් ඇත.

රියැදුරන්ගේ උපරිම අතිකාල දීමනා පැය 200ක් වශයෙන් හා සංයුක්ත දීමනා මාසිකව උපරිම දින 12ක් වශයෙන් 2010 පළමු චක්‍රලේඛයේ සඳහන් කර ඇතත් 2022 සැප්තැම්බර් 09 චක්‍රලේඛයේ එය රාජ්‍ය හා නියෝජ්‍ය ඇමතිවරුන්ගේ සහාය කාර්ය මණ්ඩලය සම්බන්ධයෙන් අතිකාල පැය 150ක් හා සංයුක්ත දීමනා දින 8ක් වශයෙන් අඩුකර තිබේ.

2010 පළමු චක්‍රලේඛයේ වාහන සම්බන්ධයෙන් සඳහන් වන්නේ ඇමති හා නියෝජ්‍ය ඇමති සඳහා පරිහරණය සහ ආරක්ෂක කටයුතු වෙනුවෙන් වෙන් කරනු ලබන උපරිම නිල වාහන සංඛ්‍යාව (මෝටර් රථ, ජීප්, ඩබල් කැබ්) 03ක් වේ යන්නයි. සහාය කාර්ය මණ්ඩලයේ 1 සිට 4 දක්වා වන පෞද්ගලික ලේකම්, සම්බන්ධීකරණ ලේකම්, මාධ්‍ය ලේකම් හා මහජන සම්බන්ධතා නිලධාරී යන නිලධාරීන් එක් නිල වාහනයක් සඳහා හිමිකම් ලබන බවයි. එහෙත් 2022 සැප්තැම්බර් 09 චක්‍රලේඛයෙන් රාජ්‍ය හා නියෝජ්‍ය ඇමතිවරුන්ගේ සහාය කාර්ය මණ්ඩලයේ පෞද්ගලික ලේකම්ට පමණක් වාහන හිමිකම ලබාදී ඇති අතර සහාය කාර්ය මණ්ඩලයේ අනෙකුත් අය සඳහා වාහන දෙකක් වෙන්කර දී තිබේ.

පළමු චක්‍රලේඛයේ ඉන්ධන දීමනා සම්බන්ධයෙන් සඳහන් කරන්නේ ඇමති හා නියෝජ්‍ය ඇමති නිල වාහන සඳහා උපරිම මාසික ඉන්ධන දීමනා බස්නාහිර පළාතෙන් පිටත මන්ත්‍රීවරුන්ට පෙට්‍රල් වාහනයක් සඳහා ලීටර් 750ක් සහ බස්නාහිර පළාත තුළ ලීටර් 600ක් වශයෙන් හිමි බවයි. එමෙන්ම ඩීසල් වාහනයක් සඳහා බස්නාහිර පළාතෙන් පිටත මන්ත්‍රීවරයෙකුට ලීටර් 600ක් හා බස්නාහිර පළාත තුළ මන්ත්‍රීවරයෙකුට ලීටර් 500ක් හිමි බවයි. එහෙත් 2022 සැප්තැම්බර් 09 චක්‍රලේඛයෙන් එය රාජ්‍ය හා නියෝජ්‍ය ඇමතිවරයෙකුට එක් වාහනයක් සඳහා පෙට්‍රල් හෝ ඩීසල් ලීටර් 500කට අඩුකර තිබේ.

ඇමති හා නියෝජ්‍ය ඇමතිවරුන් සඳහා කාර්යාලයට 2ක්, නිවාසයට 2ක්, ජංගම 1ක් හා කාර්යාල ෆැක්ස් 1 දූරකථනයක් වශයෙන් 2010 චක්‍රලේඛයෙන් දූරකථන ලබාදී ඇති අතර මාසික ස්ථාවර ගාස්තුව හා බදු මුදල් හැර ඇමති හා නියෝජ්‍ය ඇමතිවරුන්ගේ කාර්යාල දූරකථන 2 සඳහා රු. 20,000 ක්, නිවාස දූරකථන සඳහා රු. 10,000 ක් හා ජංගම දූරකථනය සඳහා රු. 10,000 ක් වශයෙන් රුපියල් 40,000ක මුදලක් ලබාදී තිබේ.

එය 2022 සැප්තැම්බර් චක්‍රලේඛයෙන් රාජ්‍ය හා නියෝජ්‍ය ඇමතිවරුන් සඳහා කාර්යාල දූරකථන 2ක්, නිවාස දූරකථන 1ක් හා ජංගම දූරකථන 1ක් වශයෙන් අඩුකර ඇතත් ඒ සියල්ල සඳහා පෙර තිබූ පරිදිම රුපියල් 40,000ක දීමනාවක් ලබාදී ඇත.

සහාය කාර්ය මණ්ඩලයේ දූරකථන සම්බන්ධයෙන් පළමු චක්‍රලේඛයේ සඳහන් වන්නේ පෞද්ගලික ලේකම්, සම්බන්ධීකරණ ලේකම්, මාධ්‍ය ලේකම් හා මහජන සම්බන්ධතා නිලධාරි යන අයට කාර්යාල දූරකථන 1 ක්, නිවාස දූරකථන 1 ක් හා ජංගම දූරකථන 1 ක් හිමිවන බවයි. කාර්යාල ෆැක්ස් දූරකථනයක් ඇත්තේ පෞද්ගලික ලේකම් හා මාධ්‍ය ලේකම්ට පමණී.
ස්ථාවර ගාස්තු හා බදු හැර එම සහාය කාර්ය මණ්ඩලයේ උපරිම දූරකථන වියදම් සීමා වන්නේ, පෞද්ගලික ලේකම් රු. 6000ක්, සම්බන්ධීකරණ ලේකම්, මාධ්‍ය ලේකම් හා මහජන සම්බන්ධතා නිලධාරී සඳහා රු. 5000ක් වේ. එය 2022 චක්‍රලේඛයෙන්ද වෙනස් වී නැත.

මේ සම්බන්ධයෙන්ම 2022 සැප්තැම්බර් 12 දින එවක ජනාධිපති ලේකම් සමන් ඒකනායකගේ චක්‍රලේඛයක් නිකුත් වී ඇති අතර එහි උපදෙස් ලබාදීමක් මිස අන්තර්ගතයේ වෙනසක් වී නැත. තවද 2023 ජුනි 21 වන දින ජනාධිපති ලේකම් සමන් ඒකනායකගේ චක්‍රලේඛය අනුවද උපදෙස් ලබාදීමක් මිස අන්තර්ගතයේ වෙනසක් වී නැත.

ජනාධිපති ලේකම් ආචාර්ය නන්දික සනත් කුමානායක 2025 ජනවාරි 21 දින සහිතව නිකුත් කර ඇති වත්මන් චක්‍රලේඛය නම් කර ඇත්තේ ‘නව රජයේ අමාත්‍යවරුන්ගේ කාර්යයන් සහ ප්‍රතිපත්ති සම්පාදන ක්‍රියාවලිය ශක්තිමත් කිරීම සඳහා පහසුකම් සැලසීම සඳහා වන උපදෙස්’ යනුවෙනි.

එම චක්‍රලේඛයේ අංක 3 යටතේ වන වාහන සහ ඉන්ධන සම්බන්ධයෙන් වන උපදෙස්වල සඳහන් කරන්නේ අමාත්‍යවරුන්ගේ සහ නියෝජ්‍ය අමාත්‍යවරුන්ගේ පරිහරණය සඳහා පමණක් වෙන් කරන නිල වාහන සංඛ්‍යාව උපරිම වශයෙන් 2ක් වේ යන්නය. එය ඊට පෙර චක්‍රලේඛ සමඟ සංසන්දනයේදී වාහන සංඛ්‍යාව අඩු කිරීමක් වශයෙන් බැලූ බැල්මට පෙනුණද, එසේ නොවන බව පළමු චක්‍රලේඛයේ ඇති කරුණු අවබෝධ කරගත් විට පෙනේ. පළමු චක්‍රලේඛයේ ඇත්තේ ඇමති හා නියෝජ්‍ය ඇමතිවරුන්ගේ පරිහරණය සහ ආරක්ෂක කටයුතු සඳහා උපරිම වාහන තුනක් වශයෙන්ය. ඒ අනුව එම වාහන තුනෙන් ආරක්ෂක කටයුතු සඳහා එක් වාහනයක් ඉවත් කළේ නම් ඇමතිවරයෙකු හා නියෝජ්‍ය ඇමතිවරයෙකු සඳහා වාහන දෙකක් ලබාදීම සිදුකර ඇති බව පෙනේ. එසේත් නැත්නම් ආරක්ෂක කටයුතු සඳහා වාහන දෙකක් වෙන්කළේ නම් ඇමති හෝ නියෝජ්‍ය ඇමතිවරුන් සඳහා ලැබෙන්නේ එක් වාහනයක් බව පෙනේ.

ජනාධිපතිවරයා වරක් නොව කිහිප වරක් ප්‍රසිද්ධියේ කියා ඇති පරිදි ඔහු හැර ඔහුගේ ආණ්ඩුවේ කිසිදු ඇමතිවරයෙකු හෝ නියෝජ්‍ය ඇමතිවරයෙකු ආරක්ෂකයන් හා ආරක්ෂක රථ භාවිත කරන්නේ නැත. මෙම අලුත් චක්‍රලේඛය පිටවීමට පෙර ජනාධිපතිවරයා කීවේ ඔහු පමණක් ආරක්ෂකයන්ගේ වාහනය ඇතුළු වාහන දෙකක් භාවිත කරන බවත්, ආණ්ඩුවේ අනෙක් ඇමති හා නියෝජ්‍ය ඇමතිවරුන් එක් වාහනය බැගින් භාවිත කරන බවත්ය. එහෙත් මෙම චක්‍රලේඛය නිකුත් වීමෙන් පසු ජනාධිපතිවරයා පසුගිය දිනෙක යළි කීවේ ඔහු පමණක් වාහන තුනක් භාවිත කරන බවය. එය මෙම චක්‍රලේඛය සාධාරණීයකරණය කිරීමට ඔහු කියූ එකක්ද විය හැකිය.

කරුණු කෙසේ වෙතත්, ඇමතිවරයෙකුට හෝ නියෝජ්‍ය ඇමතිවරයෙකුට ආරක්ෂක වාහන භාවිත කරන්නේ නැත්නම් වාහන දෙකක් අවශ්‍ය වන්නේ නැත. මන්ද එකවර වාහන දෙකකින් ගමන් කිරීමේ හැකියාවක් නැති නිසාය. ජාතික ජන බලවේග ආණ්ඩුව කියා ඇති පරිදිම ඔවුන් පෙර සිටි පාලකයන්ට වඩා වෙනස් නිසා ඔවුන්ගේ පවුල්වල සාමාජිකයන්ට රජයේ වාහන භාවිත කිරීමට ඉඩ ලබාදී නැති තත්වය තුළ නාස්තිය අවම කිරීමේ ඔවුන්ගේ භාවිතය තුළ ඇමතිවරයෙකුට හෝ නියෝජ්‍ය ඇමතිවරයෙකුට නිල වාහන දෙකක් අවශ්‍ය වන්නේ නැත.

වත්මන් පාර්ලිමේන්තුවේ (අගමැතිනි ආචාර්ය හරිනි අමරසූරිය කියූ පරිදි දෘශාබාධිත මන්ත්‍රීවරයා හැර) කිසිදු මන්ත්‍රීවරයෙකුට වාහනයක් ආණ්ඩුවෙන් ලබාදී නැත. ජාතික ජන බලවේගයේ නායකයන් කියන්නේ ඔවුන්ගේ මන්ත්‍රීවරුන් පාර්ලිමේන්තුවට පැමිණෙන්නේ එක් වාහනයක කිහිප දෙනෙකු නැඟී බවය. එම ආණ්ඩුවේ ඇමතිවරුන් හා නියෝජ්‍ය ඇමතිවරුන් ඉවත් කළ විට (ඔවුන්ට වාහන ලබාදී ඇති නිසා) අනෙක් මන්ත්‍රීවරුන්ගෙන් මීට පෙර නීතිඥ, වෛද්‍ය, විශ්වවිද්‍යාල ආචාර්ය වැනි වෘත්තීය ජීවිතයක් ගතකර ඇත්තේ කිහිප දෙනෙකු පමණි. එම පිරිසට හා තවත් කිහිප දෙනෙකුට පාර්ලිමේන්තුවට තේරී පත්වීමට පෙර ඔවුන් සතු පෞද්ගලික වාහනයක් ඇතැයි සිතුවත් හා ජාජබ මන්ත්‍රීවරුන් වශයෙන් කටයුතු කරන සීයකට අධික පිරිස එම වාහනවලින් පාර්ලිමේන්තුවට රැගෙන ආ හැකිද යන ප්‍රශ්නය පැනනඟී.

මෙහිදී විපක්ෂයේ මන්ත්‍රීවරයෙකු පාර්ලිමේන්තුවේ මතුකළ ප්‍රශ්නයක්ද මතකයට එයි. ඒ ආණ්ඩුවේ මන්ත්‍රීවරුන්ට රජයේ වාහන ලබාදී තිබේ යන්න හා ඔවුන් එම වාහනවලින් ගමන් කරන බව යන්නයි. ඇමතිවරුන් හා නියෝජ්‍ය ඇමතිවරුන් සඳහා ආරක්ෂක කටයුතු සඳහා නොවන පරිහරණය සඳහා වාහන 2 බැගින් ලබාදී ඇත්තේ මේ නිසාද? එම අනෙක් වාහනය භාවිත කරන්නේ ජාජබ මන්ත්‍රීවරුන්ගේ ප්‍රවාහන කටයුතු වෙනුවෙන්ද?

වාහන සම්බන්ධයෙන් එසේ වුවද ඉන්ධන සම්බන්ධයෙන් නම් අලුත් චක්‍රලේඛයේ වෙනසක් වී ඇත. ඒ එය ඇමති හා නියෝජ්‍ය ඇමති සම්බන්ධයෙන් එක් වාහනයක් සඳහා ලීටර් 450ක් දක්වා අඩුවී ඇති නිසාය. ආරක්ෂකයන් නොමැති නිසා ඇමති හා නියෝජ්‍ය ඇමතිවරයෙකුට ඇත්තටම අවශ්‍ය වන්නේ එක් වාහනයකි. ජනාධිපතිවරයා හා අගමැතිවරිය හැර ඇමති මණ්ඩලයේ සාමාජිකයන් සංඛ්‍යාව 20ක් වන අතර නියෝජ්‍ය ඇමතිවරයෙකු වශයෙන්ද කටයුතු කරන කම්කරු ඇමති අනිල් ජයන්ත ප්‍රනාන්දු ඉවත්කළ විට නියෝජ්‍ය ඇමති සංඛ්‍යාව 28 ක් වේ. ඒ අනුව 48ක් වන ඇමති හා නියෝජ්‍ය ඇමති පිරිස එක් වාහනයක් භාවිත කළේ නම් ලීටර් 450 බැගින් මාසයකට ඉතිරිවන ඉන්ධන ප්‍රමාණය ලීටර් 21,600කි. එය වසරකට ලීටර් 259,200කි. පෙට්‍රල් හෝ ඩීසල් ලීටරයක සාමාන්‍ය මිල රුපියල් 300ක් ලෙස ගත්විට එය වසරකට රුපියල් 77,760,000 ක මුදලකි. එම මුදල වත්මන් ආණ්ඩුවේ තර්කනය අනුව නාස්තියක් හෝ අවභාවිතයක් නොවන්නේද?

සහාය කාර්ය මණ්ඩලයේ වාහන සම්බන්ධයෙන් ගත්කලද ඇමති කාර්ය මණ්ඩලයේ හැර නියෝජ්‍ය ඇමති කාර්ය මණ්ඩලයේ වාහන සංඛ්‍යාව අවසන් වරට බලපැවැත්වූ 2022 සැප්තැම්බර් 09 චක්‍රලේඛයට වඩා වැඩිකර ඇත. එම චක්‍රලේඛයේ පෞද්ගලික ලේකම්ට පමණක් වාහන හිමිකම තිබූ අතර අනෙකුත් කාර්ය මණ්ඩලය සඳහා වෙන්කර තිබුනේ වාහන දෙකක් පමණය. අලුත් චක්‍රලේඛයෙන් නියෝජ්‍ය ඇමති කාර්ය මණ්ඩලයේ පෞද්ගලික ලේකම්ට අමතරව සම්බන්ධීකරණ ලේකම්, මාධ්‍ය ලේකම් හා මහජන සම්බන්ධතා නිලධාරි යන අයටද වාහන ලබාදී තිබේ.

ඇමතිවරුන්ගේ හා නියෝජ්‍ය ඇමතිවරුන්ගේ දූරකථන දීමනා එක් නිවාස දූරකථනයක් ඉවත් කර රුපියල් 40,000 සිට රුපියල් 30,000 දක්වා අඩුකර තිබේ (ස්ථාවර ගාස්තු හා බදු හැර). එහෙත් නිවසේ, කාර්යාලයේ හා ජංගම දූරකථනය සඳහා ස්ථාවර ගාස්තු හා බදු හැරුණු විට වත්මන් දූරකථන සම්බන්ධතා පැකේජ අනුව මාසයකට රුපියල් 30,000ක මුදලක් වැයවේද යන්නද මෙහිදී අවධානය යොමුකළ යුතු කරුණකි.

නියෝජ්‍ය ඇමතිවරුන්ගේ කාර්ය මණ්ඩලයේ රියැදුරන්ගේ හා සාමාජිකයන්ගේ අතිකාල පැය ගණන මාසයකට 150 සිට 180 දක්වා වත්මන් චක්‍රලේඛය අනුව වැඩිකර ඇති අතර සංයුක්ත දීමනා දින ගණනද 8 සිට 12 දක්වා වැඩිකර ඇත. මෙහිදී ඇමති කාර්ය මණ්ඩලයේ රියැදුරන්ගේ අතිකාල දීමනා පමණක් 200 සිට 180 දක්වා අඩුවී තිබේ.

ඒ අනුව ඇමතිවරුන්ට, නියෝජ්‍ය ඇමතිවරුන්ට හා ඔවුන්ගේ කාර්ය මණ්ඩලයට පහසුකම් ලබාදීමේ ජනාධිපති ලේකම්වරයාගේ මෙම චක්‍රලේඛය මතුපිටින් අපට හඳුනාගත හැක්කේ අඩු සහ වැඩි කිරීම්වලින් සමන්විත එකක් වශයෙනි. එහෙත් එය විශ්ලේෂණය කළ විට ජාතික ජන බලවේග ආණ්ඩුව කියන අනෙක් ආණ්ඩුවලින් ඔවුන් වෙනස්වන නාස්තියේ හා අවභාවිතයේ වෙනසක් පැහැදිලිව සටහන් කර නැති බව සඳහන් කළ යුතුමය.

එම චක්‍රලේඛයේ ඇති පෞද්ගලික කාර්ය මණ්ඩලය සඳහා පවුලේ සාමාජිකයන් සහ සමීප ඥාතීන් බඳවා නොගත යුතු බවට වන සඳහන ඒ අනුව අයිසින් තැවරීමක් පමණක් බව කිව යුතුය. මන්ද පත්කරන්නේ වෙනත් අය වුව ඔවුන්ට පෙර පරිදි පහසුකම් ලබාදී ඇති නිසාය.