අභිනව ජනාධිපති අනුර කුමාර දිසානායක, ශ්‍රී ලංකාවේ නව වැනි ජනාධිපතිවරයා මෙන්ම, අවසාන විධායක ජනාධිපතිවරයා වනු ඇති බවට තොරතුරු ඉදිරිපත් වී තිබේ.
ජාතික ජන බලවේගයේ ජාතික විධායක සභික සුනිල් හඳුන්නෙත්ති පසුගියදා මාධ්‍ය හමුවකදී අදහස් දක්වමින් පැවසුවේ, දිසානායක මහතා මෙරට අවසාන විධායක ජනාධිපති වනු ඇති බවයි.
ජනාධිපතිවරයා වෙනුවෙන් ජාතික ජන බලවේගය මෙවර ජනාධිපතිවරණය සඳහා ඉදිරිපත් කළ ‘පොහොසත් රටක් – ලස්සන ජීවිතයක්’ නම් ප්‍රතිපත්ති ප්‍රකාශනයේ 194 වැනි පිටුවේ ‘විධායක ජනාධිපති ආණ්ඩුක්‍රමය අහෝසි කොට පාර්ලිමේන්තු ආණ්ඩු ක්‍රමයක් ස්ථාපිත කිරීම හා විධායක බලතල රහිත ජනාධිපතිවරයෙකු පත්කිරීම සඳහා වන නව ආණ්ඩු ක්‍රම ව්‍යවස්ථාවක් කෙටුම්පත් කරනු ලබන අතර එය මහජනතාව වෙත ඉදිරිපත් කර, සංවාදයකින් අනතුරුව අවශ්‍ය වෙනස්කම් සිදුකොට ජනමත විචාරණයක්ද සමග සම්මත කර ගනු ඇත.’ යනුවෙන් සඳහන් වෙයි.
ජනාධිපති අනුර කුමාර දිසානායකගේ පස් අවුරුදු ධුර කාලය තුළ විධායක ජනාධිපති ධුරය අහෝසි කළහොත්, 1978 සිට මේ දක්වා එම ධුර අහෝසි කරන බවට ජනාධිපතිවරණවලදී පොරොන්දු දී ජනාධිපතිධුරයට පත්වූ හය දෙනකු අතරින් එම පොරොන්දුව ඉටු කළ එකම ජනාධිපතිවරයා බවට ඔහු පත්වෙයි.
අනුර කුමාර දිසානායක මහතා මෙන්ම පසුගිය ජනපතිවරණයට තරග කළ සජිත් ප්‍රේමදාස මහතාද විධායක ජනාධිපති ක්‍රමය අහෝසි කරන බවට සිය ප්‍රතිපත්ති ප්‍රකාශනයේ සඳහන් කර තිබුණි.
කෙසේ වෙතත්, පවතින ආණ්ඩුක්‍රම ව්‍යවස්ථාව යටතේ විධායක ජනාධිපති ක්‍රමය අහෝසි කිරීම සඳහා ගෙන එනු ලබන ව්‍යවස්ථා සංශෝධනයට පළමුව පාර්ලිමේන්තුවේ තුනෙන් දෙකක අනුමැතියක්ද, දෙවනුව ජනමත විචාරණයකදී ජනතාවගේ අනුමැතියද අවශ්‍ය වෙයි.
දැනට ප්‍රකාශයට පත්කර ඇති මහ මැතිවරණයෙන් පසු ඊළඟ පාර්ලිමේන්තුවට පත්වන ප්‍රධාන පක්ෂ දෙක හැටියට සැලකිය හැකි ජාතික ජන බලවේගය හා සමගි ජන සන්ධානය යන පක්‍ෂ දෙකම විධායක ජනාධිපති ක්‍රමය අහෝසි කරන බවට පොරොන්දු වී ඇති නිසා, ඒ සඳහා ගෙන එන ආණ්ඩුක්‍රම ව්‍යවස්ථා සංශෝධන කෙටුම්පතට පාර්ලිමේන්තුවේ තුනෙන් දෙකක අනුමැතියක් ලබාගැනීම අපහසු වන්නට ඉඩක් නැත.
එමෙන්ම, එම සංශෝධන කෙටුම්පත ජනමත විචාරණයට ඉදිරිපත් කළ විට එම ප්‍රධාන පක්‍ෂ දෙක එය සම්මත කරගැනීම වෙනුවෙන් පෙනී සිටියහොත්, පහසුවෙන් එය අනුමත වීමට හොඳටම ඉඩ තිබේ.
මේ අතර, සැප්තැම්බර් 24 වැනිදා මාධ්‍ය අමතමින් ශ්‍රී ලංකා පොදුජන පෙරමුණේ ජනාධිපති අපේක්‍ෂක වූ නාමල් රාජපක්‍ෂ පවසා තිබුණේ, විධායක ජනාධිපති ක්‍රමය හා මැතිවරණ ක්‍රමය සංශෝධනය කෙරෙන නීති කෙටුම්පත්වලට තම පක්‍ෂය සහාය දෙන බවයි. එහෙත්, එම කෙටුම්පත් ඵලදායක වන්නේ ජනාධිපති ධුර කාලය ආරම්භ වූ කාලයේම ගෙන ආවොත් පමණකැයිද ඔහු පවසා තිබේ.
ඒ අනුව, ජනාධිපති අනුර කුමාර දිසානායක 1978දී ඇතිකරන ලද අහෝසි කළ යුතු බවට බලවත් සමාජ ඉල්ලීමක් ඇති විධායක ජනාධිපති ක්‍රමය අවුරුදු 46කට පසු අහෝසි කළ ජනාධිපතිවරයා බවට ඉතිහාසගත වනු ඇත.