සමගි ජන බලවේගයත් සමග පුරුදු විදියටම තමා දේශපාලන කටයුතු කරමින් සිටින බවත් සමගි ජන බලවේගයෙන් එක්සත් ජාතික පක්ෂයට යාමට තමාට කිසිදු වුවමනාවක් නොමැති බවත් සමගි ජන බලවේගයේ කෑගල්ල දිස්ත්‍රික් පාර්ලිමේන්තු මන්ත්‍රී කබීර් හෂීම් පැවසීය.
ඔහු මේ බව පැවසුවේ දින කිහිපයකට පෙර එක්සත් ජාතික පක්ෂයේ මහ ලේකම් රංගේ බණ්ඩාර කබීර් හෂීම් මන්ත්‍රීවරයාට එක්සත් ජාතික පක්ෂයට පැමිණෙන ලෙස කළ ආරාධනය සම්බන්ධයෙන් අප කළ විමසීමේදීය.
වැඩිදුරටත් කබීර් හෂීම් මන්ත්‍රීවරයා පැවසුවේ පාලිත රංගේ බණ්ඩාර තමාගේ නම සඳහන් කරමින් එක්සත් ජාතික පක්ෂයට පැමිණෙන ලෙස මාධ්‍ය මඟින් ආරාධනා කළත් තමාට එවැනි ආරාධනාවක් පෞද්ගලිකව සිදුකොට නොමැති බවයි.
එක්සත් ජාතික පක්ෂයේ මහලේකම් පාලිත රංගේ බණ්ඩාර අප්‍රේල් 17 දින මාධ්‍ය සාකච්ඡාවක් පවත්වමින් පැවසුවේ හර්ෂ ද සිල්වා, ඉරාන් වික්‍රමරත්න, කබීර් හෂීම් සහ තලතා අතුකෝරාල යන මන්ත්‍රීවරුන් සමගි ජන බලවේගය තුළ සිදු වන දේශපාලන කටයුතු දන්නේ නැති බවත්, ඔවුන්ට පක්ෂය තුළ හිමි විය යුතු ස්ථානය ලබා දී ඇත්තේ ශ්‍රී ලංකා පොදු ජන පෙරමුණෙන් පැමිණි පිරිසට බවත්ය. ඔහු වැඩිදුරටත් පැවසුවේ ඔවුන්ට එක්සත් ජාතික පක්ෂයට පැමිණ රනිල් වික්‍රමසිංහ ජනාධිපති සමග එකතු වී වැඩ කිරීමට ආරාධනා කරන බවයි.
