පාස්කු ඉරුදින ප්‍රහාරය පිටුපස සිටි මහ මොළකරුවන් කවුද යන්න පිළිබඳ තමාට සති කිහිපයකට පෙර දැන ගන්නට ලැබුණේ යැයි හිටපු ජනාධිපති මෛත්‍රීපාල සිරිසේන මහතා කළ ප්‍රකාශය යළි එම ප්‍රහාරය පිළිබඳ සාකච්ඡාවක් ඇති කරන්නට සමත් වී තිබේ. එසේ පාස්කු ප්‍රහාරය පිළිබඳ කරුණු දැනගෙන එය හෙළිනොකර සඟවාගෙන සිටීම සම්බන්ධයෙන් ඔහු අත්අඩංගුවට ගත යුතු බවට අදහස් පළවූ අතර එසේ ඔහු අත්අඩංගුවට ගන්නා ලෙස ඉල්ලමින් අපරාධ පරීක්ෂණ දෙපාර්තමේන්තුවට පැමිණිලිද ඉදිරිපත් විය. ඊට අමතරව පොලිසිය බාර ඇමති ටිරාන් අලස් මෙන්ම පොලිස්පති දේශබන්දු තෙන්නකෝන්ද පැවසුවේ ඔහුගෙන් ප්‍රකාශයක් ලබා ගන්නා ලෙස අපරාධ පරීක්ෂණ දෙපාර්තමේන්තුවට උපදෙස් ලබාදුන් බවයි.
මේ සියලු හාහෝ මැද අමාරුවෙන් කෙකර ගාමින් හිටපු ජනාධිපති මෛත්‍රීපාල සිරිසේන අපරාධ පරීක්ෂණ දෙපාර්තමේන්තුවට ගොස් ප්‍රකාශයක් ලබාදී තිබුණි. එම ප්‍රකාශය ලබාදීමෙන් පසු ඔහු අපරාධ පරීක්ෂණ දෙපාර්තමේන්තුවෙන් පිටවී තිබුණේ එහි පිටුපස දොරටුවෙනි. ඒ මාධ්‍ය මග හැරීම සඳහාය. ඉන් දින කිහිපයකට පසු ඔහු ඔහුගේ පවුලේ සාමාජිකයන් සමග අනුරාධපුරයට ආගමික වතාවත් සඳහා ගිය ගමනේදී මාධ්‍යයට සම්මුඛ වුවද පාස්කු ඉරුදින ප්‍රහාරය සම්බන්ධයෙන් අපරාධ පරීක්ෂණ දෙපාර්තමේන්තුවට ලබාදුන් ප්‍රකාශය සම්බන්ධයෙන් යමක් කීම මග හැරියේය.
එහෙත් ඔහු අපරාධ පරීක්ෂණ දෙපාර්තමේන්තුවට ලබාදුන් ප්‍රකාශය සම්බන්ධයෙන් සන්ඩේ ටයිම්ස් පුවත්පත වාර්තා කර තිබුණේ එම ප්‍රහාරය පිටුපස ඉන්දියාව සිටි බවට ඔහු කියා ඇති බවයි. එසේම ඔහුට එම කරුණ කියා ඇත්තේ මීට සති කිහිපයකට පෙර සාදයකදී හමුවූ විදේශීය පුද්ගලයෙකු බවත් වාර්තා විය.
එම ප්‍රකාශයෙන් පසු අපරාධ පරීක්ෂණ දෙපාර්තමේන්තුව උපුටා දක්වමින් තවදුරටත් මාධ්‍ය වාර්තා කර තිබුණේ ඔහු විසින් ලබාදෙන ලද ප්‍රකාශය අධිකරණයට ඉදිරිපත් කරන බවත්, එම තොරතුරු ලබාදුන් විදේශිකයා ඔහුට හමුවූ බව කියන ස්ථානයට අදාළ සීසීටීවී දර්ශන පරීක්ෂා කරමින් සිටින බවත්ය. මෛත්‍රීපාල සිරිසේන මහතාගේ එම ආන්දෝලනාත්මක ප්‍රසිද්ධ ප්‍රකාශය අවස්ථාවේදී ඔහු කී තවත් දෙයක්ද විය. ඒ, ඒ සම්බන්ධයෙන් වන තොරතුරු ඔහු අධිකරණයක් හමුවේ රහසේ හෙළිකිරීමට කැමති බවත්, ඒ සඳහා ඔහුට හා ඔහුගේ පවුලේ සාමාජිකයන්ට ආරක්ෂාව ලබාදිය යුතු බවත්ය. එම අතිරේක දෙය ඔහු කියනු ලැබුවේ අපරාධ පරීක්ෂණ දෙපාර්තමේන්තුවට ප්‍රකාශ ලබාදීමෙන් වැළකීමට වුවත්, අවසානයේ ඔහුට ප්‍රකාශයක් ලබාදීමට සිදුවුණේ අපරාධ පරීක්ෂණ දෙපාර්තමේන්තුවටමය.
එසේ කී දැන් ඔහු අපරාධ පරීක්ෂණ දෙපාර්තමේන්තුවට ගොස් ඇත. අධිකරණය යෑම මගහැර ඇත. ඒ ඔහුට මාලිගාකන්ද මහේස්ත්‍රාත් අධිකරණයේ පෙනී සිට ඒ සම්බන්ධයෙන් ප්‍රකාශයක් ලබාදෙන ලෙසට මහේස්ත්‍රාත්වරිය ලබාදී තිබුණ දැනුම් දීම ප්‍රතික්ෂේප කරමින්ය. මාලිගාකන්ද මහේස්ත්‍රාත් අධිකරණයට අප්‍රේල් 03 වැනිදා මෝසමක් ඉදිරිපත් කරමින් ඔහු වෙනුවෙන් පෙනී සිටි ජනාධිපති නීතිඥ අනූජ ප්‍රේමරත්න කියා ඇත්තේ හිටපු ජනාධිපති මෛත්‍රීපාල සිරිසේන අප්‍රේල් 04 වැනිදා එම අධිකරණයේ පෙනී සිට පාස්කු ඉරුදින ප්‍රහාරයේ මහ මොළකරුවන් දන්නා බවට ඔහු කළ ප්‍රකාශය පිළිබඳව ප්‍රකාශයක් ලබාදෙන්නේ නැති බවයි. ඒ සම්බන්ධයෙන් ඔහු අපරාධ පරීක්ෂණ දෙපාර්තමේන්තුවට ප්‍රකාශයක් ලබාදී තිබීම ඊට හේතුව වශයෙන් ඉදිරිපත් කර ඇත.
මෛත්‍රීපාල සිරිසේන මහතාගේ මෙම ප්‍රකාශය සම්බන්ධයෙන් අදහස් දක්වමින් කොළඹ අගරදගුරු මැල්කම් කාදිනල් රංජිත් හිමිගේ මාධ්‍ය ප්‍රකාශක සිරිල් ගාමිණී ප්‍රනාන්දු පියතුමා පවසා තිබුණේ පාස්කු ඉරුදින ප්‍රහාරය පිළිබඳව මෛත්‍රීපාල සිරිසේන මහතා මුල සිටම දැන සිටි බවත්, එය ඔහු සති කිහිපයකට පෙර දැනගත් එකක් නොවන බව ඔවුන්ගේ අදහස බවත්ය. පියතුමා වැඩිදුරටත් කියා තිබුණේ හිටපු නීතිපති දප්පුල ද ලිවේරා පවා පාස්කු ඉරුදින ප්‍රහාරය පිටුපස කුමන්ත්‍රණයක් තිබෙන බව ප්‍රකාශ කර තිබූ බවය.
මැතිවරණ පිළිබඳ දේශපාලන උණුසුමක් රට තුළ ඇතිවී ඇති මෙම අවස්ථාවේ සිදුකළ මෛත්‍රීපාල සිරිසේන මහතාගේ මෙම ආන්දෝලනාත්මක ප්‍රකාශය පාස්කු ඉරුදින ප්‍රහාරය පිටුපස සිටි සැබෑ මහ මොළකරුවන් බේරා එහි සැකය වෙනත් පාර්ශ්ව වෙත යොමු කිරීම සඳහා කරන ලද එකක් බවට දසතින්ම චෝදනා එල්ල වී ඇති අතර එම චෝදනාවලට පදනමක්ද තිබේ. ඒ පාස්කු ඉරුදින ප්‍රහාරය සම්බන්ධයෙන් එම ප්‍රහාරයට පෙර අවස්ථා කිහිපයකදීම ශ්‍රී ලංකාවේ බුද්ධි අංශ දැනුවත් කරන ලද්දේ ඉන්දියාව විසින් බවට ඒ සම්බන්ධයෙන් පරීක්ෂා කරන ලද පාර්ලිමේන්තු කමිටු වාර්තාව, ජනාධිපති කොමිෂන් සභා වාර්තාව සහ අධිකරණ ක්‍රියාදාමයන්වලදී හෙළිවී ඇති නිසාය.
ඉන්දියාව නම් මෙම ප්‍රහාරය පිටුපස සිටියේ ඔවුන් ඒ සම්බන්ධයෙන් වන ඔවුන්ට ලැබුණ බුද්ධි තොරතුරු කිසිසේත්ම ශ්‍රී ලංකාවට ලබා දෙන්නේ නැත. මෙය තේරුම් ගැනීමට අමාරු නැති සරල කාරණයකි. යම් ප්‍රහාරයක් පිටුපස සිටින මහ මොළකරුවන් එම ප්‍රහාරයට ලක්වන පාර්ශ්වයට එම ප්‍රහාරය පිළිබඳ තොරතුරු ලබාදෙනවා යැයි යමෙකු සිතන්නේ නම් ඔහු හොඳ මානසිකත්වයකින් සිටින අයෙක් නොවේ. එය ඔහුගේ මානසිකත්වය පිළිබඳ සොයා බැලිය යුතු තත්වයකි.
එමෙන්ම පාස්කු ඉරුදින ප්‍රහාරය සම්බන්ධයෙන් යහපාලන ආණ්ඩු සමයේදී අපරාධ පරීක්ෂණ දෙපාර්තමේන්තුව භාර ජ්‍යෙෂ්ඨ නියෝජ්‍ය පොලිස්පති රවී සෙනෙවිරත්නගේ හා එහි අධ්‍යක්ෂ ශානි අබේසේකරගේ ප්‍රධානත්වයෙන් කළ විමර්ශනවලදී හෙළි වූයේ මෙම ප්‍රහාරය පිටුපස විදේශීය නොව දේශීය මහ මොළකරුවන් පිරිසක් සිට ඇති බවයි. එහෙත් ගෝඨාභය රාජපක්ෂ ජනාධිපතිවරයා ලෙස පත්වීමෙන් පසු එම පරීක්ෂණ ඉදිරියට ගෙනගියේ නැතිවා පමණක් නොව, එම පරීක්ෂණ සම්බන්ධයෙන් කටයුතු කළ අපරාධ පරීක්ෂණ දෙපාර්තමේන්තුවේ සියලු නිලධාරීන් මාරු කළේය. ජනාධිපති ධුරයට පත්වී ඔහුගේ පළමු රාජකාරිය වශයෙන් ශානි අබේසේකර දකුණු පළාතේ නිfායා්ජ්‍ය පොලිස්පතිවරයාගේ පෞද්ගලික සහකාර ලෙස පත්කර පළි ගත්තේය. ඉන් පෙන්නුම් කළේ පාස්කු ඉරුදින ප්‍රහාරය සම්බන්ධයෙන් දේශීය මහ මොළකරුවන් බියට පත්වී සිටි බවයි. ඔවුන් බියට පත් නොවූයේ නම් එම පරීක්ෂණ සාර්ථක අවසානයක් කරා ඉදිරියට යා යුතුව තිබුණි. ඇත්ත වශයෙන්ම එම පරීක්ෂණ කණ්ඩායමට පාස්කු ඉරිදා ප්‍රහාරය සම්බන්ධයෙන් තවදුරටත් විසඳා ගැනීමට තිබුණේ ඉතා සුළු කරුණු කිහිපයක් පමණී.
අප මීට පෙරද වාර්තා කර ඇති පරිදි පොඩි සහරාන් සමග ගනුදෙනු කළ රාජ්‍ය බුද්ධි සේවයේ සේවය කළ සොනික් සොනික් යනුවෙන් හඳුන්වන පොලිස් පරීක්ෂක බණ්ඩාරට මහ මොළකරුවන් සමග ඇති සම්බන්ධය, දෙහිවල ට්‍රොපිකල් ඉන් හෝටලයේ බෝම්බය පුපුරුවා ගත් ජමීල්ගේ නිවසට ගිය හමුදා බුද්ධි අංශ සාමාජිකයන්ට මහ මොළකරුවන් සමග තිබූ සම්බන්ධය, එම බෝම්බකරු ටාජ් සමුද්‍රා හෝටලයේ සිටියදී ඔහුට ඇමතුමක් දුන්නේ කවුද යන්න, සහරාන් හෂීම්ට ඉහළින් සිටියේ යැයි කියන අබු හින්ද් කවුද, සහරාන් හෂීම් නිතරම කතා කළ බවට තහවුරු වූ අපරාධ පරීක්ෂණ දෙපාර්තමේන්තුවට ප්‍රශ්න කිරීමට ඉඩ ලබානොදුන් මුස්ලිම් ජාතික හමුදා බුද්ධි අංශ සාමාජිකයා කවුද, මීගමුව කටුවාපිටිය බෝම්බ ප්‍රහාරකයා වූ හස්තුන්ගේ බිරිඳ වන සාරා ජෙස්මින් හෙවත් පුලස්තිනිට සිදුවූයේ කුමක්ද යන්නය.
ආණ්ඩු මාරු නොවී හා බලපෑම් එල්ල නොවී පරීක්ෂණ සඳහා තවත් සුළු කාලයක් ලැබුණේ නම් පාස්කු ප්‍රහාරයේ මහ මොළකරුවන් අද ඉන්නේ මන්දිර තුළ නොව හිර ගෙවල්වලය. අප්‍රේල් 02 වැනිදා පාස්කු ඉරුදින ප්‍රහාරය සම්බන්ධයෙන් පාර්ලිමේන්තුවේ අදහස් දක්වමින් විපක්ෂ නායක සජිත් ප්‍රේමදාස තවත් අලුත් කරුණක් කියා තිබුණි. ඒ පාස්කු ඉරුදින ප්‍රහාරකයින්ගේ නායකයා වශයෙන් කටයුතු කළ සහරාන් හෂීම්ගේ බිරිඳ වන හාදියාගෙන් විමර්ශනවලදී ප්‍රශ්න කිරීම් කළ පොලිස් නිලධාරියා අබිරහස් ලෙස මියගොස් ඇති බවයි.
එසේම ඔහු කියා අසා තිබුණේ පාස්කු ප්‍රහාරයට දින කිහිපයකට පෙර දක්ෂිණ අධිවේගී මාර්ගයේ ගැලනිගම පිවිසුමේදී අල්ලාගත් සැක කටයුතු වාහනය නිදහස් කරන ලෙස නියෝග කළ ඉහළ පොලිස් නිලධාරියා කවුද යන්නයි. ඒ පිළිබඳව එම පිවිසුමේ රාජකාරි කළ පොලිස් නිලධාරියා සටහනක් තබා ඇති බවද විපක්ෂ නායකවරයා කීවේය.
පාස්කු ප්‍රහාරය සම්බන්ධයෙන් වූ පරීක්ෂණ අවස්ථාවලදී මෛත්‍රීපාල සිරිසේන මීට පෙර පුන පුනා කීවේ එවක රාජ්‍ය බුද්ධි ප්‍රධානී වශයෙන් කටයුතු කළ ජ්‍යෙෂ්ඨ නියෝජ්‍ය පොලිස්පති නිලන්ත ජයවර්ධන ඒ සම්බන්ධයෙන් ඉන්දියාවෙන් ලැබුණා යැයි කී කිසිදු තොරතුරක් පිළිබඳ ඔහුව දැනුවත් කළේ නැති බවයි. ඒ පිළිබඳ ඇත්ත නැත්ත දන්නේ ඔහුත් නිලන්ත ජයවර්ධනත් පමණය. කෙසේ වෙතත් රට දන්නා සත්‍යය වන්නේ නිලන්ත ජයවර්ධන පාස්කු ඉරිදා ප්‍රහාරයේ පරීක්ෂණ සඳහා ඔහු රාජකාරි සඳහා භාවිත කළ ජංගම දුරකථනය හා ලැප්ටොප් පරිගණක ඉදිරිපත් කළේ ඒවායේ තිබූ දත්ත මකා දමා බවයි.
පාස්කු ප්‍රහාරයේ වගකීම සම්බන්ධයෙන් වැරදිකරු වී රුපියල් මිලියන 100ක වන්දියක්ද ගෙවීමට නියමිතව සිටින මෛත්‍රීපාල සිරිසේන මහතාට සති කිහිපයකට පෙර යම් පුද්ගලයෙකු එම ප්‍රහාරයේ මහ මොළකරුවන් ගැන කීවේ නම් ඔහු ඒ මොහොතේම කළ යුතුව තිබුණේ ඒ පිළිබඳව විමර්ශන අංශ දැනුවත් කර එම පුද්ගලයා සම්බන්ධ කර එම ප්‍රහාරයේ මහ මොළකරුවන් හෙළිදරව් කර ගැනීමට උත්සාහ කිරීමය. මන්ද මෙම ප්‍රහාරය සිදුවුණේ ඔහුගේ පාලන කාලයේ වන නිසා හා ඔහුට ඒ පිළිබඳව අධිකරණ තීන්දුවක් ඇතත් නැතත් එහි වගකීමක් ඇති නිසාය.
ඒ අනුව මෛත්‍රීපාල සිරිසේන පාස්කු ඉරිදා ප්‍රහාරයේ අලුත් මහ මොළකරුවන් සම්බන්ධයෙන් ආන්දෝලනාත්මක ප්‍රකාශයක් සිදුකළේ කාගේ හෝ කොන්ත්‍රාත්තුවකට බව පැහැදිලිය. එම කොන්ත්‍රාත්තුව මේ අවස්ථාවේ ඔහුව අමාරුවේ දමනු ඇත්ද නැද්ද යන්න පිළිබඳව කිව නොහැකි වූවත්, පෙනෙන්නට ඇත්තේ මේ අවස්ථාවේ ඔහු ඇන ඇත්තේ කෙසෙල් ගහකට බවය.
