විදුලි සම්බන්ධතා ලබා ගැනීමේදී ලංකා විදුලි බල මණ්ඩලය විසින් පාරිභෝගිකයින්ගෙන් ලබා ගන්නා තැන්පත් මුදල් වෙනුවෙන් ගෙවිය යුතු පොලිය එම තැන්පතුව ලබාගත් දා සිටම ගෙවීමට නියෝගයක් ලබාදෙන ලෙස විදුලි පාරිභෝගිකයින්ගේ සංගමය ශ්‍රේෂ්ඨාධිකරණයෙන් ඉල්ලීමක් කර තිබේ.
එම සංගමය වෙනුවෙන් ඉදිරිපත් කළ මූලික අයිතිවාසිකම් පෙත්සමක් මාර්තු 21 දින කැඳ වූ අවස්ථාවේදී එම පෙත්සම වෙනුවෙන් පෙනී සිටි නීතිඥ රවීන්ද්‍රනාත් දාබරේ විසින් මෙම ඉල්ලීම කර තිබේ.
එම තැන්පතු මුදල සඳහා මෙම වසරේ සිට සියයට 11.67ක වාර්ෂික පොලියක් ගෙවන බවට විදුලි බල මණ්ඩලය විසින් අධිකරණය හමුවේ ලබාදුන් පොරොන්දුව ප්‍රමාණවත් නොවන බව කරුණු දක්වමින් එම ඉල්ලීම කර තිබේ. එම පෙත්සම යළි අප්‍රේල් 02 වැනිදා කැඳවීමට නියම කර තිබේ.
