අනූපමා ඈන් පෙරේරා වෘත්තියෙන් උපදේශන සේවා ලබාදෙන්නියකි. ජිවිතයේ බොහෝ දේ නොසිතූ අවස්ථාවල වෙනස් වන්නා සේ අනුපමාගේ ජීවිතයේද බරපතළ වෙනසක් 2015 වසරේ දී සිදුවන්නේය. දෙපයින් ඇවිද ගිය ඇය නොසිතූ මොහොතක වැළඳුණු ආඝාත තත්ත්වයක් හේතුවෙන් ආබාධිත වූවාය. රැයක් එළිවෙද්දී සිදුවූ මේ අනපේක්ෂිත ඇබැද්දිය ඇගේ ජිවිතයේ පමණක් නොව ලංකාවේ ක්රිකට් ක්‍රීඩාවටද අලුත් පිටුවක් පෙරළන්නට සමත් වෙතැයි ඒ මොහොතේ අනූපමා පමණක් නොව ඇගේ පවුලේ හිතවතුන්වත් සිතුවේ නැත.
අනපේක්ෂිත අවස්ථාවක සිදුවූ මේ විපත ඒ ආකාරයෙන්ම පිළිගන්නට අනූපමා කැමති වූයේ නැත. දෙපයින් යළි ඇවිද යන්නට ඇයට ඕනෑ විය. ඉරණමට පමණක් නොව කර්මයටද අභියෝග කරන්නට තරම් මානසික හයියකින් යුතු ඈ අද නැගී සිටින්නේ තවත් තමා මෙන්ම ඔත්පලවූ පිරිසක්ද සමගය. එමතුදු නොව ලංකා ක්රිකට් වංශ කථාවට නවතම පරිච්ඡෙදයක්ද එක් කරමිනි. අනූපමා ඈන් පෙරේරා අද අප හඳුන්වාදෙන්නේ ශ්‍රී ලංකා රෝදපුටු ක්රිකට් සංගමයේ නිර්මාතෘ මෙන්ම වත්මන් සභාපතිනියද ලෙසිනි.
“නොහිතපු වෙලාවක ස්ට්රෝක් එකක් ඇවිත් මාව පැරලයිස් වෙනවා. ඒ ගැන ඊට වඩා කියන්න ඕනෑ නෑ. ඕනෑ කෙනෙක්ට ඒ තත්ත්වය හිතාගන්න පුළුවන්. ජාතික රෝහලේදී සැත්කමකට මුහුණ දීපු මාව ඊළඟ අදියරට යවන්නේ රාගම පුනරුත්ථාපන රෝහලට.” දිගු කථාවකට මුලපුරමින් ඈ පැවසුවාය.
රාගම පුනරුත්ථාපන රෝහල යනු වෙනමම කථාවකි. ජීවිතය දෙවැනි වරට පටන් ගන්නා මිනිසුන් වෙනුවෙන්ම සැකසී ඇති එහි ඖෂධ ප්‍රතිකාර ඉක්මවා ගිය රෝගී සත්කාර සේවාවන් රැසක් ක්‍රියාත්මක වෙයි. උපදේශන, භෞත චිකිත්සක ප්‍රතිකාර, ව්‍යායාම සහ ක්‍රීඩා වැනි අංග රැසක් යොදාගෙන විවිධ ආබාධ සහිතවූවන් යළි සමාජගත කිරීමට එහි බොහෝ වැඩසටහන් ක්‍රියාත්මක වෙයි.
ඈන් පෙරේරා පුනරුත්ථාපන රෝහලේ හරියටම දෙවසරක් ප්‍රිතිකාර ලබන්නීය. ඒ දෙවසර තුළ ඈ දැන ඉගෙනගත් දේ බොහෝය. දෙපා වාරු නැති අය මෙන්ම දෙපා අහිමිවූවන්ද හරි හරියට කරනා ක්‍රියාකාරකම් දෙස උනන්දුවෙන් ඇය බලා සිටියාය. ඒ වනවිටත් පුනරුත්ථාපන රෝහලේ බාස්කට් බෝල් ක්‍රීඩාව සඳහා පහසුකම් තිබුණි. එහෙත් බහුතරයක් තරුණයන්ගේ උනන්දුව තිබුණේ ක්රිකට් ක්‍රීඩාව කෙරෙහිය. හිතන්නටත් බැරි වේගයකින් ඔවුහු රෝදපුටු මත සිට ක්රිකට් ගැසූහ. රෝද පුටුවට සීමාවූවන්ටත් බොහෝදේ කළ හැකි බව එහි නේවාසික බොහෝ දෙනෙකු මෙන්ම ඈන් පෙරේරාද පසක් කර ගත්තේ රාගම පුනරුත්ථාපන රෝහලේදීය.
“රිහැබිලිටේෂන් හොස්පිට්ල් මම අවුරුදු දෙකක් විතර හිටියා. නේවාසිකයන්ට ක්‍රීඩා පහසුකම් තිබුණා. ගොඩක් පිරිමි ළමයි ක්‍රිකට්වලට කැමතියි. ඒ අය වීල් චෙයාර්වල ඉඳගෙන පුළුවන් විදියට ක්රිකට් ගැහුවා. ඔය අතරේ දවසක් පැරා ඔලිම්පික් එකෙන් ඇත්ලටික් මීට් එකක් තිබුණා සුගතදාස එකේ. එතැනදී රිහැබිලිටේෂන් හොස්පිට්ල් එකේ ක්රිකට් ගහපු ළමයි මාත් එක්ක කථා කළා. ඒගොල්ලන්ට ක්රිකට් ක්‍රීඩාව නිසි පිළිවෙළකට කරන්න ඕන වෙලා තිබුණා. ඉතින් මට ඒ කට්ටිය ආරාධනා කළා රෝදපුටු ක්රිකට් සම්මේලනයක් පටන් ගන්න.” ඇය පවසන්නීය.
ඇරියුම ඉවතලන්නට ඇයට හැකියාවක් නොවීය. බරපතළ රෝගී තත්ත්වයකින් පසු අසීරුවෙන් නැගී සිටිමින් සිටි ඇය අභියෝගය බාර ගත්තාය. සහායට කිහිප දෙනෙක් එක් වූහ. ඉන්ටර්නෙට් ඔස්සේ ලෝකයේ ආබාධ සහිතවූවන්ගේ ක්රිකට් තරග ගැන සොයා බැලීමේදී ක්රිකට් ලෝකය ආබාධිත බවට විරාමය තබා බොහෝ කල් බව වටහාගන්නට හැකි විය. වෙනකක් තබා ඒ වනවිට රෝද පුටු ක්රිකට් වෙනුවෙන් ආසියානු ශූරතාවක් පවා සැලසුම් කර තිබුණි. එබැවින් වහා ක්‍රීඩා කණ්ඩායමක් තෝරා ගෙන ඊට සහභාගි වන්නට ඈන් පෙරේරා සහ පුනරුත්ථාපන රෝහලේ ක්රිකට් ක්‍රීඩා කළ කණ්ඩායම තීරණය කරන්නේය.
ඉන්පසු ගෙවුණ කාලය බොහෝ කාර්යබහුල විය. ශ්‍රී ලංකා ක්රිකට් ආයතනය සමග සබඳතා ගොඩනගා ගැනීම, ආසියානු රෝද පුටු ක්රිකට් ක්‍රීඩාවේ නියුතු රටවල් සමග සබඳතා ඇතිකර ගැනීම මෙන්ම ලංකාව නියෝජනය කරනට රෝදපුටු ක්රිකට් පිල තෝරා ගැනීමද වහ වහා කළ යුතු විය. ඒ අනුව පළමු පුහුණු කඳවුර 2022 වසරේ ඔක්තෝබර් පළමුවෙනිදා රාගම බෝයිස් ටවුන්හිදී පැවැත්වීමට ඔවුනට හැකි විය. ඒ අවස්ථාවට පැරා ඔලිම්පික් සම්මේලනයේ ප්‍රියාන් පීරිස් ද එක් විය. කණ්ඩායමේ පුහුණුකරු ලෙස කටයුතු කළේ නාලන්දාවේ ක්රිකට් පුහුණුකරු ජයනාත් සේරම්ය. එය සැබැවින්ම අපූරු අත්දැකීමක් විය.
ජාතික රෝදපුටු කණ්ඩායමේ ක්‍රීඩකයන් පහලොස් දෙනා අතරට තේරෙන්නට තිස්දෙනෙක් පමණ පුහුණු සැසියට සහභාගි වූහ. එහි වඩාත් අපූරු කාරණාව වූයේ කලකට පෙර දෙපිල බෙදී යුද වැදුණු ශ්‍රී ලංකා යුද හමුදාවේ සහ එල්ටීටීඊ සංවිධානයේ සටන්කාමීන් එකම කණ්ඩායමකට එක් වීම සඳහා ක්‍රීඩා කිරීමය. අනපේක්ෂිත ආබාධ සහිත බව විසින් ඔවුනගේ සියලු අමනාප දුරුකොට එකම පිටියක ක්‍රීඩා කරන්නට හුරුකර තිබුණි. සටන් වැදුණ කණ්ඩායම් දෙකක තරුණයන් එක කණ්ඩායමකට එක්වන්නට තරග කිරීම බෙදන්නට උත්සාහ ගත් අයටද මතු නොව අදටත් මිනිසුන් බෙදන්නට උත්සාහ ගන්න අයටද පාඩමකි.
මේ වන විට ආසියානු රෝදපුටු ක්රිකට් ශූරතාවය සඳහා සියලු කටයුතු සූදානම් වෙමින් පැවතුණි. තරගාවලිය සංවිධානය කෙරුණේ පාකිස්ථානය විසිනි. එහෙත් එරට පවතින අර්බුදකාරී තත්ත්වය නිසා තරගාවලිය පැවැත්වූයේ නේපාල භූමියේය. ඒ සඳහා ලංකාවෙන්ද රෝදපුටු ක්රිකට් පිලක් සහභාගි කරන්නට ලොකු ඕනැකමක් ඈන් පෙරේරාගේ මූලිකත්වයෙන් පිහිටවාගෙන තිබූ ශ්‍රී ලංකා රෝදපුටු ක්රිකට් සම්මේලනයට විය. ඒත් සකසා ගත යුතු මූලික වියහියදම් රැසකි. එකී වියදම් සපයා ගැනීම සැබෑම ගැටලුවක් විය. අවසානයේ මාකොල ප්‍රදේශයේ තුබූ තමාට අයත් නිවසක් විකුණා මුදල් ලබා ගෙන කණ්ඩායමේ මූලික කටයුතු කරන්නට ඈන් පෙරේරා තීරණය කරන්නීය.
කාරණා කටයුතු මේ ආකාරයෙන් සිදුවෙමින් තිබියදී රෝදපුටු ක්රිකට් පිලට නේපාලයේ පැවැත්වෙන ආසියානු කුසලාන තරගාවලියට සහභාගී වීමට ශ්‍රී ලංකා ක්රිකට් ආයතනයේ අනුග්‍රහය හිමිවිය. ඒ අනුග්‍රහය ඈන් පෙරේරා අදටද සිහිකරනුයේ කෘතවේදීවය. “අපි ටීම් එක හදාගත්තා. ඒත් නේපාල සංචාරයට ලොකු මුදලක් වැය වෙනවා. ශ්‍රී ලංකා ක්රිකට් ආයතනය අපිට ලක්ෂ 23 ක් පරිත්‍යාග කළා. ඒකෙන් කණ්ඩායම නේපාලයට යවන්න පුළුවන් වුණා.”
කෙසේ වෙතත් කණ්ඩායම සමග කළමනාකරුවෙකු නේපාලයට යැවීමට ඔවුන් ලද මුදල් ප්‍රමාණවත් වූයේ නැත. එහෙත් කණ්ඩායමේ පුහුණුකරු, කළමනාකරුගේ ජොබ්එකත් කරන්නට එකඟවීමෙන් ගැටලුව විසඳාගන්නට හැකි විය. අවසානයේ මුළු කණ්ඩායමටම ආබාධ රහිත කෙනෙකුට සිටියේ පුහුණුකරු පමණකි.
“මේ තරගාවලියට ඉන්දියාව, පාකිස්ථානය, නේපාලය, බංග්ලාදේශය සහ ශ්‍රී ලංකාව සහභාගි වුණා. අපේ ටීම් එක මුළු සංචාරයම හොඳින් කළා. ඒත් අවසාන මහා තරගයේදී පාකිස්ථානයට පරාජය වීම නිසා අපිට අනු ශූරතාවයෙන් සැනසෙන්න වුණා. අපේ කණ්ඩායමේ නායක තුසිත මහින්දසිරි සහ සරත් ගලහිටිය කැපී පෙනෙන දස්කම් දැක්වූවා” ඈන් පෙරේරා පවසන්නීය.
රෝදපුටු ක්රිකට් ක්‍රීඩාව සහ සාමාන්‍ය ක්රිකට් ක්‍රීඩාව අතර ඇත්තේ සුළු වෙනස්කම් කිහිපයකි. විකට් දෙක අතර දුර සහ හතරේ සීමාවෙ දුර මඳක් අඩු වීම එකී වෙනස්කමය. ඊට අමතරව ක්‍රීඩාවට යොදාගන්නේ ස්පෝර්ට් වීල් චෙයා නම් විශේෂිත රෝදපුටු වර්ගයකි. ඒවා මිලාධිකය. එහෙයින් බොහෝ ක්‍රීඩකයෝ තම සාමාන්‍ය රෝදපුටු රාගම පුනරුත්ථාපන රෝහලේ කාර්මිකයා ලවා ස්පෝර්ට් වීල් චෙයා බවට පත් කරගෙන තිබේ. ක්‍රීඩාවට යොදාගන්නා පා ආවරණ, පිති ආදි සියලු උපකරණ සාමාන්‍ය ක්‍රීඩකයන් භාවිත කරනා ඒවාය. මේ සියලු දේ මිලදී ගැනීම වියදම් අධික වැඩකි. ශ්‍රී ලංකා ක්රිකට් ආයතනය විවිධාකාරයෙන් මේ කණ්ඩායමට සහාය දෙයි. පුහුණුවීම් කරනා මැටින් එක ලබා දී ඇත්තේද ඔවුන් විසිනි.
ශ්‍රී ලංකා රෝදපුටු ක්රිකට් සම්මේලනය පිහිටුවා කෙටිකලකින් ආසියානු අනුශූරතාව දිනාගැනීම අදහා ගැනීමට තරම් අසීරු දෙයකි. එහෙත් ඒ විස්මිත දස්කම් පෑවද ලංකාවේ රෝදපුටු ක්රිකට් ක්‍රීඩාව හමුවේ බරපතළ අභියෝග රැසකි. ක්‍රීඩකයන් මුහුණදෙන ආර්ථික ගැටලු ඒ අතරින් මුල් තැනක් ගනී. “අපේ ළමයි ගොඩක් අය දුප්පත්. ගෙවල්වල දරුවන්ගේ ප්‍රශ්න තියනවා. මේ රටේ ආබාධ සහිත අය වෙනුවෙන් ප්‍රමාණවත් පහසුකම් නෑ. සමහර අය ප්‍රැක්ටිස් කරන්න එන්නේ අතට බ්‍රේක් හදාගත්ත ත්‍රීවීල්වල. ඒත් පාකිස්ථානය ඉන්දියාව වගේ රටවල ක්‍රීඩකයෝ එන්නේ ප්‍රාඩෝ ජීප්වල. ඉතින් අපේ ක්‍රීඩකයන්ටත් ජාතික කණ්ඩායමේ ක්‍රීඩකයන්ට වගේ ස්ථිර වැටුපක් දෙනවා නම් ලොකු දෙයක්” ඒ රෝදපුටු ක්රිකට් සම්මේලනයේ සභාපතිනි ඈන් පෙරේරාගේ සිත උපන් පුංචි බලාපොරොත්තුවකි.
ශ්‍රී ලංකා රෝදපුටු ක්රිකට් සම්මේලනය බිහිකළේ ඈන් පෙරේරා සහ ඇගේ කණ්ඩායමය. ඒ බව ආසියානු ශූරතාව දිනාගත් කණ්ඩායම සාක්ෂි දරයි. එහෙත් මේ වන විට වෙනත් කණ්ඩායමක්ද රෝදපුටු ක්රිකට් සම්මේලනය ලෙසින් ලියාපදිංචි වීමට උත්සාහ ගන්නා බවට ආරංචියක් ලැබී ඇති බව ඔවුහු පවසති. “එහෙම ආරංචියක් තියෙනවා. ඒත් අපි ඒක පස්සේ එළෙව්වේ නෑ. අපේ වැඩවලට සම්බන්ධ ඔක්කොම වගේ ආබාධ සහිත අය. ඒ නිසා ඕවා පස්සේ එළවන්න අපිට අමාරුයි. ආසියානු ශූරතාවය ගෙනාවේ අපේ කණ්ඩායම බව පැරා ඔලිම්පික් සහ ක්රිකට් ආයතන දන්නවා. ඒ හින්දා අසාධාරණයක් වෙන එකක් නෑ කියලා විශ්වාස කරනවා. ජාතික රෝදපුටු ක්රිකට් සම්මේලනය අපේ. අපියි කණ්ඩායම හදලා ආසියානු අනුශූරතාව ගෙනාවේ” ඇය පවසන්නීය.
සමුගන්නට පෙර ජාතික රෝදපුටු ක්රිකට් පිලේ වර්තමාන කටයුතු ගැන අප විමසා සිටියෙමු. “හැම මාසයකම අන්තිම සතියේ එක දිගට දවස් හතරක් අපි ප්‍රැක්ටිස් කරනවා. දෙල්ගොඩ මහජන ක්‍රීඩාංගණයේදී තමයි ප්‍රැක්ටිස් කරන්නේ. අපේ කෝච් මංජුසිරි ලොකු මහන්සියක් ගන්නවා කණ්ඩායම වෙනුවෙන්. ගොඩක් දුර පළාත්වල අයත් පුහුණුවට එනවා. ඒ හින්දා අපි ක්‍රීඩාංගණය ළඟම ගෙයක් කුලියට අරන් තියෙනවා ක්‍රීඩකයන්ට නතර වෙන්න. ක්‍රීඩකයන්ගේ කෑම බීම වියදම ඔක්කොම දරන්නේ දෙල්ගොඩ ප්‍රාදේශීය සභාවේ හිටපු සභාපති ආනන්ද ගනේපොල මහත්තයා. එයා සංචාරයට යන්න ඉස්සර වෙලාත් අපිට ඒ අනුග්‍රහය දැක්වූවා. කියන්න තියෙන අලුත්ම ආරංචිය තමයි ගිය මාසේ ඉඳලා අපි රෝදපුටු කාන්තා ක්රිකට් කණ්ඩායම් හදන්න ක්‍රීඩිකාවන්ටත් පුහුණු වීම් ආරම්භ කළා.”
