ලංකා විදුලි බල මණ්ඩලය විසින් විදුලි ගාස්තු සංශෝධනය කිරීම සම්බන්ධයෙන් ශ්‍රී ලංකා මහජන උපයෝගිතා කොමිසමට ඉදිරිපත් කළ යෝජනාවේ සඳහන් කරුණු ගැන තවදුරටත් සමාලෝචනය කිරීම සඳහා වැඩිදුරටත් තොරතුරු එම කොමිසම විසින් ලංවිමෙන් ඉල්ලා ඇත.
ඊට අමතරව ලංවිම යෝජනාවේ ඇති තවදුරටත් සමාලෝචනය කළ යුතු කරුණු කිහිපයක්ද කොමිසම විසින් හඳුනාගෙන ඇත.
එම කරුණු අතරින් එකක් වන්නේ 2024 වර්ෂය සඳහා මෙගාවොට් 100ක හදිසි විදුලිය මිලදී ගැනීමකි. කොමිසම සඳහන් කරන්නේ 2023 වර්ෂයේද මෙගාවොට් 100ක හදිසි විදුලිය මිලදී ගැනීම්වලින් ජනනය කළ මාසික සාමාන්‍ය විදුලි ප්‍රමාණය ගිගා වොට් පැය 6.29ක් වූ බවත්, ඒ වෙනුවෙන් මාසිකව රුපියල් මිලියන 206ක ධාරිතා ගාස්තුවක් ගෙවා ඇති බවත්ය. එසේ හදිසි පදනම යටතේ ප්‍රසම්පාදනය කළ බලාගාරවලින් අඩු විදුලිය ප්‍රමාණයක් ජනනය කර ඇතත්, 2024 වර්ෂය සඳහාද හදිසි විදුලිය මිලදී ගැනීම් සඳහා වැයවන අමතර ධාරිතා පිරිවැය රුපියල් මිලියන 1594.84ක් බවයි.
ජනන බලපත්‍ර නොමැති විදුලි බලාගාරවලින් විදුලිය සැපයීම සඳහාද ලංවිම යෝජනා කර ඇති බවත්, එම බලාගාරවලග ධාරිතා පිරිවැය ලෙස රුපියල් මිලියන 5160.65ක් ඇස්තමේනතු කර ඇති බවයි. ලංවිම විදුලි බලාගාර සඳහාද ක්ෂයවීම් වෙනුවෙන් රුපියල් මිලියන 14,816.92ක ධාරිතා ගාස්තු ඇතුලත් කර ඇති බවත්, එහෙත් ඒවා රජයේ අරමුදල්වලින් ඉදිකර ඇති ඒවා බවත්ය.
2024 විදුලි ජනන ධාරිතා පිරිවැය අධිතක්සේරු කර ඇති බවත්, එය රුපියල් මිලියන 95,726.72ක අමර වැය බරක් බවත්ය. බෙදාහැරීම් පිරිවැය වශයෙන් යෝජනා කර ඇති රුපියල් මිලියන 133,235.20ද අධි ඇස්තමේනතුවක් බවයි. රුපියල් මිලියන 53,910.90ක් වන ලංවිම මූල්‍ය පිරිවැය පොලී අනුපාත අඩුකර ඇති තත්වය යටතේ තවදුරටත් සමාලෝචනය කළ යුතු බවද, 2023 වර්ෂයේ ඉපයූ ලාභය සැළකිල්ලට ගෙන නැති බවද වැඩිදුරටත් සඳහන් කර තිබේ.
