රාජපක්ෂ පවුල් ගහ කාටූන් හා විරිඳු කැසට් පටය ගැන ප්‍රශ්න කරලා
හමුදා බුද්ධි අංශ සාමාජිකයන්ට උසස්වීම්
මාධ්‍යවේදී ප්‍රගීත් එක්නැලිගොඩ බලහත්කාරයෙන් පැහැරගෙන ගොස් අතුරුදහන් කිරීමේ සිදුවීමට ජනවාරි 24 වැනිදා වසර 14ක් සපිරේ. 2010 වසරේ ජනාධිපතිවරණයට දින කිහිපයක් තිබියදී ඔහු පැහැරගෙන යෑම සිදුකළ අතර ඒ සම්බන්ධයෙන් යහපාලන ආණ්ඩුව බලයට පත්වීමෙන් පසු අපරාධ පරීක්ෂණ දෙපාර්තමේන්තුවේ හිටපු අධ්‍යක්ෂක ශානි අබේසේකරගේ ප්‍රධානත්වයෙන් කළ පරීක්ෂණ සිදුකරන ලදි.
එහිදී අනාවරණය වූයේ පොළොන්නරුව ගිරිතලේ පිහිටි යුද හමුදා සන්නද්ධ බුද්ධි බලකා කඳවුරේ එවක ලුතිනන් කර්නල් ෂම්මි කුමාරරත්න ඇතුළු හමුදා බුද්ධි අංශ සාමාජිකයන් පිරිසක් විසින් ප්‍රගීත් එක්නැලිගොඩ කොළඹදී පැහැරගෙන ගිරිතලේ හමුදා කඳවුරට රැගෙන ගොස් තිබූ බවයි. පැහැර ගැනීම සඳහා ප්‍රගීත් එක්නැලිගොඩ ගෙන්වාගෙන තිබුණේ බුද්ධි අංශ බාරයේ සිටි හිටපු එල්ටීටී්ඊ සාමාජිකයෙකුගේ මාර්ගයෙන් වන අතර ගමන් බලපත්‍රයක් සාදා ගැනීමට උදව් ඉල්ලීම අනුව ප්‍රගීත් ඔහු හමුවීමට ගොස් තිබේ. එම හිටපු එල්ටීටීඊ සාමාජිකයා ප්‍රගීත්ට හමුවී තිබුණේ සාම සාකච්ඡා සඳහා ජයලත් ජයවර්ධන සමග ගිය අවස්ථාවකදීය. එම හිටපු එල්ටීටීඊ සාමාජිකයාද පසුව ඝාතනය කර තිබේ.
පැහැරගත් කණ්ඩායම විසින් දෑස් බැඳ තිබූ ප්‍රගීත් එක්නැලිගොඩ ප්‍රශ්න කිරීම සඳහා සාජන් මේජර් රණ්බණ්ඩාට බාරදී තිබූ අතර රාජපක්ෂ පවුල් ගස නැමැති කාටුන් සටහන් ගැන හා රාජපක්ෂවරුන් සම්බන්ධයෙන් නිර්මාණය කර තිබූ විරිදු කැසට් පටයට පදමාලා හා සංගීතය සැපයුවේ කවුරුන්ද යන්න සම්බන්ධයෙන් ප්‍රශ්න කරන ලෙස උපදෙස් ලබාදී තිබේ.
එම බුද්ධි අංශ කඳවුරේ ප්‍රගීත් එක්නැලිගොඩ රඳවාගෙන සිට ඇති අතර පසුව අක්කරෙයිපත්තු හමුදා කඳවුරට රැගෙන ගොස් ඇති බව තහවුරු කරගෙන තිබුණි. එම පරීක්ෂණවලදී ගිරිතලේ කඳවුරේ වාහන ඇතුල්වීමේ හා පිටවීමේ සටහන් ලබාදීම හමුදාව විසින් ප්‍රතික්ෂේප කළ අතර එම සටහන් නැතිවී ඇති බව ප්‍රකාශ කර තිබුණි.
මෙම අතුරුදහන් කිරීමේ සිදුවීම සම්බන්ධයෙන් කොළඹ ස්ථීර ත්‍රිපුද්ගල මහාධිකරණය ඉදිරියේ ෂම්මි කුමාරරත්න ඇතුළු හමුදා බුද්ධි අංශ සාමාජිකයන්ට එරෙහිව නඩුවක් පවරා ඇති අතර එය තවමත් විභාග වෙමින් පවතී. එමෙන්ම 2009 වර්ෂයේදීද ෂම්මි කුමාරරත්න ඇතුළු බුද්ධි අංශ සාමාජිකයන් ප්‍රගීත් පැහැර ගන්නා අතර එක් දිනකින්ම ඔහු මුදා හරිනු ලබයි. ඒ සම්බන්ධයෙන්ද එම බුද්ධි අංශ සාමාජිකයන්ට එරෙහිව හෝමාගම මහාධිකරණයේ නඩු පවරා ඇති අතර එම නඩුවද තවමත් විභාග වෙමින් පවතී.
මෙම සිදුවීම් සම්බන්ධයෙන් ෂම්මි කුමාරරත්න ඇතුළු හමුදා බුද්ධි අංශ සාමාජිකයන්ට නඩු පැවරුවද අනෙක් හමුදා සාමාජිකයන්ට මෙන් ඔවුන්ගේ හමුදා සේවය අත්හිටුවීමක් හෝ වැටුප් නතර වීමක් සිදුනොවූ ඔවුන් උසස් වීම්ද ලැබුණි. ෂම්මි කුමාරරත්න ලුතිනන් කර්නල් නිලයේ සිට බි්‍රගේඩියර් නිලය දක්වා උසස්වීම් ලබා ගත්තේය.
