- අධිකරණ නියෝග ඕනෑ නෑ – අපි කඩන්නේ අපිට ඕනෑ වෙලාවට
- වෙරළ සංරක්ෂණ දෙපාර්තමේන්තුව කියයි.
- ඒත් දුම්රිය දෙපාර්තමේන්තු ඉඩමේ ඉදිකිරීමත් කැඩුවේ ඇයි?
- කඩන්න ඕනෑ සෝල් බීච් විතරද?
දෙහිවල මුහුදු මාවතේ පිහිටි සෝල් බීච් හෝටලය කඩා ඉවත් කරන්නේ 2024 අලුත් අවුරුද්දේ ජනවාරි පළමුවෙනිදා රටම කතා වන ප්‍රධාන පුවත කරමිනි. උදෑසන 8.45 පමණ වන විට බැකෝ යන්ත්‍ර යොදා ගනිමින් කඩා ඉවත් කිරීමට කටයුතු කළ එම හෝටලය කුඩු බාසික් නැමැත්තෙකුගේ බවත් එය යුක්තිය මෙහෙයුමේම කොටසක් බවත් රූපවාහිනී නාලිකා සියල්ලම පාහේම වාර්තා කළේය. නමුත් ‘අනිද්දා’ කළ විමසීමක දී පොලිස් මාධ්‍ය ප්‍රකාශක නිහාල් තල්දූව පැවසුවේ එය යුක්තිය මෙහෙයුමට සම්බන්ධ නොමැති බවත් ශ්‍රී ලංකා පොලීසිය එම ස්ථානයට පැමිණියේ වෙරළ සංරක්ෂණ හා වෙරළ සම්පත් කළමනාකරණ දෙපාර්තමේන්තුවෙන් කළ ඉල්ලීමකට අනුව ආරක්ෂාව සැපයීමට බවත්ය.
සෝල් බීච් හෝටලය කඩා ඉවත් කිරීම පිළිබඳව වෙරළ සංරක්ෂණ දෙපාර්තමේන්තුව මාධ්‍ය වෙත පැවසුවේ සෝල් බීච් හෝටලය කඩා බිඳ දැමුවේ නීත්‍යනුකූලව තමන්ට පැවරී ඇති බලතල අනුව බවයි. නමුත් සෝල් බීච් ආයතනයේ කළමනාකාර අධ්‍යක්ෂවරයෙකු වන මීපේ අත්තටගේ චන්දන සම්පත් අප වෙත ප්‍රකාශ කළේ සෝල් බීච් හෝටලය නීත්‍යනුකූල ලෙස අවසර ලබා ගනිමින් පවත්වාගෙන ගිය හෝටලයක් බවයි. මේ නිසා මෙහි සත්‍ය අසත්‍ය කුමක්දැයි රටේ ජනතාව දැනගත යුතුය. අපට මින් කිසිම පාර්ශ්වයකට පහරක් ගැසීමට හෝ ආරක්ෂා කිරීමට අවශ්‍ය නොවේ. එහෙත්, සෝල් බීච් හෝටලය කඩා ඉවත් කර දැමුවේ නීතියට අනුවද නැද්ද යන්න රටේ ජනතාව දැනගත යුතුය.
සෝල් බීච් පුද්ගලික සමාගම 2022 දෙසැම්බර් 8 වන දින 2007 අංක 07 දරන සමාගම් පනත යටතේ ලියාපදිංචි කරන ලද සමාගමකි. සෝල් බීච් හෝටලය ඉදිකර තිබූ බිම් කොටස 2023 මාර්තු පළමුවන දින සිට 2028 පෙබරවාරි මස 28 දක්වා වසර පහක කාල සීමාවක් සඳහා බදු වශයෙන් ලබා ගෙන තිබේ. හෝටලයේ ඉදිකිරීම් කටයුතු සඳහා වෙරළ සංරක්ෂණ හා වෙරළ සම්පත් කළමනාකරණ දෙපාර්තමේන්තුව කොන්දේසි මත වසරක කාලයක් තුළ ඉදිකිරීම් කිරීමට අවසර පත්‍රයක් ද ලබා දී ඇත. හෝටලයේ ඉදිකිරීම් කටයුතු හා පවත්වාගෙන යාම සඳහා ශ්‍රී ලංකා දුම්රිය දෙපාර්තමේන්තුවේ රක්ෂිත ඉඩම පරිහරණය කිරීම සඳහා වසරක කාලසීමාවක් සඳහා අවසර ලබාගෙන ඇත. ශ්‍රී ලංකා සංචාරක සංවර්ධන අධිකාරියෙන් හෝටලය පවත්වාගෙන යාම සඳහා අවසර පත්‍රයක් ලබාගෙන ඇත.
සුරාබදු දෙපාර්තමේන්තුවෙන් දේශීය හා විදේශීය මත්පැන් අලෙවි කිරීම සඳහා බලපත්‍රයක් ලබාගෙන ඇත. විදුලිබල මණ්ඩලයෙන් ත්‍රී පේස් විදුලිබලය ලබාගෙන ඇත. ශ්‍රී ලංකා මගින් ස්ථාවර දුරකථන සේවා සැපයුමක් ලබාගෙන ඇත. ජාතික ජල සැපයුම් හා ජලපවාහන මණ්ඩලයෙන් ජල සැපයුම ලබාගෙන ඇත. ව්‍යාපාර පරිශ්‍රයට අදාළ වරිපනම් බදු දෙහිවල ගල්කිස්ස මහනගර සභාව වෙත ගෙවා ඇත. සෝල් බීච් හෝටලය ආරම්භ කිරීමේ දී මුදල් ආයෝජනය කර ඇත්තේ එහි ගිවිසුමේ පරිදි මීපේ අත්තටගේ සම්පත් චන්දන රුපියල් මිලියන 90 ක්ද මොහොමඩ් අබ්දුල් කාදර් මොහොමඩ් රීෆා රුපියල් මිලියන 180ක් ද නලින් චමින්ද වික්‍රමරත්න රුපියල් මිලියන 25ක් ද මොහොමදු ෆාරීක් මොහොමදු ඉෂාක් රුපියල් මිලියන 05ක් ද වශයෙනි.
සෝල් බීච් හෝටලයේ ඉදිකිරීම් අවසන් කොට හෝටලයේ කටයුතු ආරම්භ කරන්නේ 2023 වර්ෂයේ සැප්තැම්බර් 24 වන දිනයේ ය. එදින හෝටලය විවෘත කිරීමේ උත්සවයට සරත් වීරසේකර, ඒඑච්එම් ෆවුසි, එරන්දික ප්‍රනාන්දු, මධුර විතානගේ, රේණුක පෙරේරා යන මැති ඇමතීන්ද පක්ෂ විපක්ෂ භේදයකින් තොරව සහභාගී වී ඇත. හෝටල් පාර්ශ්වය පෙන්වා දෙන ආකාරයට ආරම්භ කළ දිනයේ සිට හෝටලය පවත්වාගෙන ගිය මාස තුනක ආදායම රුපියල් අනූ තුන් ලක්ෂ අසූ පන් දහස් හත්සිය අසූ නවයකි. (රු 9385789.00). එහි ස්ථාවර සේවක මණ්ඩලය 92ක් වන අතර අර්ධකාලීන සේවකයෝ නම දෙනෙක්ද වෙති.
සෝල් බීච් හෝටලය කඩා ඉවත් කිරීමට පෙර 2023 දෙසැම්බර් මාසයේ 23 හෝ ඊට ආසන්න දිනක හෝටලයේ කළමණාකාර අධ්‍යක්ෂ සම්පත් චන්දන හෝටලයේ සිටින් අවස්ථාවක දෙහිවල සහ ගල්කිස්ස පොලිස් ස්ථානාධිපතිවරුන් එහි පැමිණ වෙරළ සංරක්ෂණ දෙපාර්තමේන්තුවෙන් හෝටලය ඉදිකිරීම සඳහා ලබා දුන් අවසර පත්‍රයේ මුල් පිටපත පරීක්ෂා කිරීමට ඉල්ලූ බවත් පසුව පොලීසිය එම අවසර පත්‍රය රැගෙන යාමට උත්සාහ කළ බවත් ඔවුගේ සහ හෝටල් සේවකයන්ගේ විරෝධය මත මුල් පිටපත භාරගත බවට පිටසනක් යොදා එහි ඡායා පිටපතක් ලබා දුන් බවත් ඔහු අප වෙත පැවසුවේය. තවද දෙසැම්බර් මාසයේ හෝටල් පරිශ්‍රයේ පවත්වන රාත්‍රී උත්සව අවස්ථාවල දී වරින් වර පොලිස් බාධා පැමිණි බව ඔහු අප සමග පැවසුවේය.
හෝටලයේ කළමනාකරණ අධ්‍යක්ෂ සම්පත් චන්දන තවදුරටත් පැවසුවේ, හෝටලය කඩා ඉවත් කිරීමට පෙර හෝ කඩා ඉවත් කිරීම සිදු වූ ජනවාරි පළමුවෙනිදා හෝ සෝල් බීච් හෝටලය නීති විරෝධී බවට කිසිදු නෛතික ලියවිල්ලක් හෝ දැනුම් දීමක් සිදු නොවූ බවයි. හෝටලය කඩා ඉවත් කිරීම සඳහා පොලීසියේ විශාල පිරිසක් පැමිණි බවත් ඒ අතර සිවිල් ඇඳුමින් සැරසුණු පිරිසක් ද පොලීසිය සමග පැමිණ හෝටලය කඩා ඉවත් කිරීම්වලට සම්බන්ධ වූ බවත් ඔහු කියයි. බැකෝ යන්ත්‍ර හතරක් යොදා ගනිමින් හෝටලය කඩා ඉවත් කිරීමට කටයුතු කළ බවද එම බැකෝ යන්ත්‍රවල අයිතිකාරත්වය පෙන්වන දුරකථන අංක සහ ලිපිනයන් නොපෙනෙන ලෙස යමක් අලවා තිබූ බවද පැවසුවේය.
මේ එදින හෝටලයේ සේවයේ නිරත වූ ආරක්ෂක නිලධාරියෙකුගේ අත්දැකීමයි.
“මගේ නම අසංක පුංචිහේවා. මම සෝල් බීච් හෝටලයේ ආරක්ෂක නිලධාරියෙක්. හෝටලය කඩන්න ආව සියලුම දෙනා ෆේස් මාස්ක් දාලා හිටියේ. ඒ ආව ජේසීබී හතරෙම එඩ්‍රස් ඔප්පු කර ගන්න බැරි වෙන්න සෙලෝටේප් ගහලා වහලයි තිබ්බේ. මුලින්ම එයාලා ඇවිල්ලා දොරට තට්ටු කරලා කියනවා දැන් කවුරුත් නැහැ කඩපල්ලා කියලා. පොලීසියේ නිලධාරීන් තමයි එහෙම කියන්නේ. ඊට පස්සේ තමයි රේල් පාරෙන් ජේසීබී හතර පන්නන්නේ. ඉස්සෙල්ලම කඩන්නේ අපේ එන්ට්‍රන්ස් එක. එතන තාප්ප ටිකත් කඩලා ඊට පස්සේ තමයි අපේ අල්මාරි ටිකයි, ලිකර් බාර් එකයි කඩන්නේ. විස්කි බෝතල් හොය හොයා ගිහිල්ලා පොළොවේ ගැහුවා. ජේසීබී එකෙන් එළියේ කඩන ගමන් ඇතුළට පැනලා සෙට් එකක් හෝටලයේ තියෙන දේවල් පොළොවෙ ගගහා කැඩුවා.”
හෝටලය කඩා ඉවත් කරන දිනයේ ද එම හෝටලයේ විවාහ උත්සව දෙකක් පැවත්වීමට නියමිතව තිබූ බව චන්දන සම්පත් පැවසුවේය. කඩා ඉවත් කරන මොහොතේ හෝ කිසිදු අධිකරණ නියෝගයක් හෝ කිසිදු ලියවිල්ලක් ඉදිරිපත් නොකොට හිතාමතාම හෝටලයේ නාම පුවරුව සහ පිවිසුම විනාශ කළ බව තවදුරටත් අප සමග පැවසුවේය. මේ අවස්ථාවේ හෝටලය කඩා ඉවත් කිරීම සිදු කළේ වෙරළ සංරක්ෂණ අධිකාරිය නිසා හෝටල් පාර්ශ්වයෙන් පෙන්වා දෙන්නේ හෝටලයේ නාම පුවරුව, පිවිසුම හා තාප්පය ඉදිකර තිබෙන්නේ දුම්රිය දෙපාර්තමේන්තුවට අයිති කොටසක බැවින් ඒ සඳහා කිසිදු නෛතික බලයක් නොමැතිව තමන්ට අයිති නැති භූමියක පවා අනීතිකව හැසිරී ඇති බවයි.
හෝටලය කඩා ඉවත් කිරීම ආරම්භ කළ පසු එම ස්ථානයට පැමිණෙන සෝල් බීච් හෝටලයේ සම්පත් චන්දන මුහුණ දුන් අත්දැකීමයි මේ.
“හෝටලය කඩනවා කියලා දැනගත්ත ගමන්ම මම එතැනට ගිහින් ඒකට විරුද්ධ වුණා. කඩන්න තියෙන නීතිමය අවසරය මොකද්ද? කොහොමද එහෙම කඩන්නේ? කියලා මම නීතිමය පැත්ත ඇහුවා. ඒ වෙලාවේ රාජකාරියට බාධා කිරීම කියලා මාව රැගෙන ගියා. මාව පොලීසියේ තියාගෙන හිටියා එදා දවසම. මම ඉන්න තැනට ඕඅයිසීගේ කාමරය පේනවා. මම ඒ කිට්ටුව හිටගෙන හිටියේ කූඩුවට දැම්මේ නැහැ. හෝටලය කඩන්න බැකෝ යන්ත්‍ර පදවපු හතර දෙනාම ආවා. එතකොට ඕඅයිසී නෙමෙයි වෙනත් උසස් නිලධාරියෙක් වාඩිවෙලා හිටියේ. බැකෝ යන්ත්‍ර පැද්ද හතර දෙනාම විනාඩි 45ක් විතර පොලීසියේ හිටියා. ඊට පස්සේ ඕඅයිසීගේ කාමරේ හිටපු ඕඅයිසීටත් වඩා උසස් නිලධාරියා ඒ හතර දෙනාටම යමක් සල්ලි දුන්නා. ඒක මම හොඳටම දැක්කා.”
සෝල් බීච් හෝටලය කඩා ඉවත් කිරීමේ සිදුවීමේ නීතිමය තත්වය පිළිබඳව හෝටල් පාර්ශ්වය වෙනුවෙන් පෙනී සිටිනා නීතිඥ තමාරා අබේරත්නගෙන් අප කළ විමසීමේ දී ඇය දැක් වූ අදහසයි මේ. “හෝටලය කඩා ඉවත් කිරීම සඳහා කිසිදු නීතිමය තත්වයක් අනුගමනය කොට නැහැ. මේ හෝටලය වෙරළ රක්ෂිතයේ ඉදිකරන්න කලින් වෙරළ සංරක්ෂණ දෙපාර්තමේන්තුවේ නිසි අවසර අරගෙන තියෙනවා. වසරක් ඇතුළත ඉදිකිරීම් කටයුතු නිම කරන්න සහ තවත් කොන්දේසි දාලා තියෙනවා. ඒ කොන්දේසි අනුව ක්‍රියා කරලා තියෙනවා. වෙරළ සංරක්ෂණ දෙපාර්තමේන්තුවේ කොන්දේසි උල්ලංඝනය කරලා තියෙනවා නම් හෝ අවසර ගන්නේ නැතිව ඉදිකිරීම් කරලා තියෙනවා නම්, වෙරළ සංරක්ෂණ දෙපාර්තමේන්තුවේ අධ්‍යක්ෂට ඒ සම්බන්ධයෙන් සුදුසු නියෝගයක් නිකුත් කරන්න පුළුවන්. හැබැයි කඩා ඉවත් කිරීමට නියෝග දෙන්න බැහැ. ඒ සඳහා අධිකරණ නියෝගයක් ගන්න ඕනෑ. ඒ කඩා ඉවත් කිරීමේ නියෝගය ගන්න කලින් අදාළ පාර්ශ්ව වෙත එම නියෝගය ලිඛිතව භාර දෙන්න ඕනෑ. එහෙම බැරි නම් අදාළ ස්ථානයේ දොරේ අලවන්න ඕනෑ. ඒ විදියට කටයුතු කළාට පසුව දින තුනක් ඇතුළත අදාළ පාර්ශ්වයට අභියාචනාධිකරණයට යෑමේ අයිතියත් තියෙනවා. නමුත් කිසිදු ආයතනයකින් මේ පාර්ශ්වය දැනුවත් කරලා නැහැ.”
හෝටල් පාර්ශ්වයෙන් කියන විදියට ඔවුන්ගේ තක්සේරුව අනුව හෝටලයේ ගබඩා කර තිබූ කෝටි දෙකක පමණ ආහාරපාන ද සේවා සැපයීමට තිබූ උපකරණ ද කෝටි දෙකක දේශීය හා විදේශීය මත්පැන් ද විනාශ වී ඇති අතර ගොඩනැගිලි කඩා ඉවත්කිරීම නිසා සිදු වූ අලාභය රුපියල් කෝටි 20ක් පමණ වෙයි. හෝටලය කඩා ඉවත් කිරීම පිළිබඳව වෙරළ සංරක්ෂණ දෙපාර්තමේන්තුවෙන් අප කළ විමසීමක දී එහි නිලධාරියෙකු පැවසූවේ මෙවන් අදහසකි.
“අපි කටයුතු කළේ පනත අනුව. අනවසර ඉදිකිරීමක් කඩා ඉවත් කරන්න අධිකරණ නියෝග අවශ්‍ය නැහැ. අපිට ඒ සඳහා බලය තියෙනවා. අනවසරයෙන් ඉදිකරලා තියෙන ඕනෑම ගොඩනැගිල්ලක් අපිට කඩන්න පුළුවන් අපේ සීමාවට යටත්ව. අපි කඩන්නේ අපිට ඕනෑ දවසක. සෝල් බීච් හෝටලය අනවසර ඉදිකිරීමක් ඒ නිසා අපි ඒක කැඩුවා. ඒකට දැනුවත් කිරීමක් අවශ්‍ය නැහැ. සමහර ඒවා අවසර අරගෙන තියෙනවා සමහර ඒවා අවසර අරගෙන නැහැ. සමහර තැන් බලපුළුවන්කාරකමෙනුත් කරගෙන යනවා.”
ගල්කිස්ස සිට ගෝල්ෆේස් දක්වා වෙරළ රක්ෂිතයේ දේශීය සහ විදේශීය සංචාරකයන් සඳහා හෝටල් විශාල සංඛ්‍යාවක් පවත්වාගෙන යන අතර සෝල් බීච් හෝටලයේ සිට දෙපසට කිලෝ මීටර 5 බැගින් වෙරළ තීරයේ හෝටල් 15කට අධික සංඛ්‍යාවක් විහිදී ඇත. නමුත් ඉන් කිසිදු ගොඩනැගිල්ලක් තවමත් වෙරළ සංරක්ෂණ අධිකාරිය මඟින් ඉවත් කිරීමට කටයුතු කොට නැත.
