රජයේ ප්‍රකාශන කාර්යාංශය යටතේ ඇති දිස්ත්‍රික් ප්‍රකාශන කාර්යාල සියල්ල වසා දැමීමට තීරණය කර ඇතැයි වාර්තාවේ. මේ බව රජයේ ප්‍රවෘත්ති අධ්‍යක්ෂ ජනරාල්වරයා විසින් දිස්ත්‍රික් ප්‍රකාශන කාර්යාල ස්ථාපිත කර ඇති ප්‍රදේශවල දිස්ත්‍රික් ලේකම්වරුන්ට දැනුම් දී ඇතැයිද වැඩිදුරටත් වාර්තාවේ.
මහනුවර, වවුනියාව, ගාල්ල, අනුරාධපුර හා බදුල්ල යන ප්‍රදේශවල රජයේ ප්‍රකාශන කාර්යාංශයේ ප්‍රාදේශීය කාර්යාල පිහිටා ඇත. රජයේ සාමාන්‍ය හා අති විශේෂ ගැසට් පත්‍ර, පනත් හා පනත් කෙටුම්පත් හා අනෙකුත් ප්‍රකාශන මෙම කාර්යාලවලින් මිලදී ගැනීම මෙතෙක් එම පළාත්වල ජනතාව සිදුකළ අතර ඉදිරියේදී ඒ සඳහා කොළඹ රජයේ ප්‍රවෘත්ති දෙපාර්තමේන්තු පරිශ්‍රයේ පිහිටි රජයේ ප්‍රකාශන කාර්යාංශයට පැමිණීමට සිදුවනු ඇත.
ඉඳුවර බණ්ඩාර
