කොළඹ කොටුව ප්‍රදේශයේ ක්‍රිෂ් සමූහයට අයත් ගොඩනැගිල්ලක් ඉදිකිරීමේ ගනුදෙනුවේදී රුපියල් මිලියන 70ක අක්‍රමිකතාවක් සිදුවී ඇති බවට නාමල් රාජපක්ෂ මන්ත්‍රීවරයාට එරෙහි නඩුවේ පරීක්ෂණ යළි ආරම්භ කරන ලෙස කොටුව මහේස්ත්‍රාත් තිළිණ ගමගේ නියෝග කර ඇත.
ඒ එම නඩුව සම්බන්ධයෙන් ජනවාරි 10 දින මෝසමක් ගොනු කරමින් පැමිණිලිකරු වන වසන්ත සමරසිංහ මහතා වෙනුවෙන් පෙනී සිටි නීතිඥ සුනිල් වටගල දැක්වූ කරුණු සැලකිල්ලට ගනිමින්ය.
එහිදී නීතිඥ සුනිල් වටගල අධිකරණය හමුවේ කරුණු දක්වමින් පෙන්වා දී තිබුණේ එම අක්‍රමිකතාව සම්බන්ධයෙන් එවක පොලිස් මූල්‍ය අපරාධ ඒකකයේ ප්‍රධානියාව සිටි රවී වෛද්‍යාලංකාර අධිකරණය නොමග යවන බී වාර්තා ඉදිරිපත් කර ඇති බවත්, ඔහු 2022 වර්ෂයේදී ක්‍රිෂ් සමූහයේ අධ්‍යක්ෂවරයෙකු ලෙස කටයුතු කර ඇති බවත්ය.
එය බරපතළ තත්වයක් බව ප්‍රකාශ කරමින් එහිදී මහේස්ත්‍රාත් තිළිණ ගමගේ අපරාධ පරීක්ෂණ දෙපාර්තමේන්තුවට නියෝග කර ඇත්තේ රවී වෛද්‍යාලංකාර සම්බන්ධයෙන් වන එම කරුණු ගැන විමර්ශනයක් සිදුකරන ලෙසයි.
